Ni̱xi̱yo ku̱a̱ʼání se̱ʼe ta̱ Adán xíʼin ñá Eva ta ndu̱ku̱a̱ʼá na̱ yiví nu̱ú Ñuʼú yóʼo. Tá ni̱ya̱ʼa tíempo sava na̱ ángel nda̱kutáʼana xíʼin ta̱ Ndiva̱ʼa ña̱ ni̱ya̱ʼandosóna tu̱ʼun Ndióxi̱.

Ta saá ki̱xina nu̱ú Ñuʼú yóʼo ndu̱una na̱ yiví ña̱kán va̱ʼa ta̱nda̱ʼána xíʼin ná ñaʼá.Ná ñaʼá yóʼo ka̱ku se̱ʼená, ta se̱ʼená yóʼo ndakúní ni̱xi̱yona ta kue̱ʼe̱ní ni̱xi̱yona.

Ña̱kán nda̱kutú iníí saá nu̱ú Ñuʼú yóʼo xíʼin na̱ yiví na̱ íxaa ña̱ vǎʼá á ña̱ ni̱kuu. Tu̱ʼun Ndióxi̱ káʼa̱ña chi nina ña̱ vǎʼá á ña̱ ni̱kuu xi̱kuu ña̱ ke̱ʼé na̱ yiví nu̱ú Ñuʼú yóʼo ta nina ña̱ vǎʼá xi̱kuu ña̱ nda̱kanixinína.

Ta̱ Noé ta̱a va̱ʼa xi̱kuura. Jehová ni̱ka̱ʼa̱nra xíʼin ta̱ Noé ña̱ sakuun ndiééníra sa̱ví iníí saá nu̱ú Ñuʼú ta sandiʼira xa̱ʼá na̱ yiví vǎʼá á na̱ ni̱kuu.

Saátu ni̱ka̱ʼa̱n Ndióxi̱ xíʼin ta̱ Noé ña̱ ná keʼéra iin barco káʼnu, túyóʼo xi̱nanínú arca, ta saá ki̱ʼvi na̱ veʼera ininú xíʼin túkúndiʼi nu̱ú kití.

Ta̱ Noé ni̱xi̱kaníra nda̱tuʼúnra xíʼin na̱ yiví ña̱ kuun ndiééní sa̱ví iníí saá nu̱ú Ñuʼú, ta ndi̱a̱ ni iin na níxiniso̱ʼo. Savana ni̱xa̱ku̱ndi̱a̱na ta̱ Noé, inkatuna ni̱sâání-inina xi̱niñaʼána.

Tá ndi̱ʼi ku̱váʼa̱ tú arca, ta̱ Noé sa̱ndíʼvi̱ra túkúndiʼi kití ininú.