Aatamu ni Haava yaakhalano anamwane, nave achu yaasareya veelaponi yavathi. Moovira wa elukuluku, ankeelo akina yaahiphitaanyerya mu omwaryeya wa Satana.

Awo yaarwa veelaponi yavathi nave yaakuxa mwiili woomuchu. Mwawihiihaa, awo yaahaathela athiyana. Athiyana yaahaayara anakuru yaawo yaari oonanara murima nave ni akuruxa.

Elapo yavathi yaasareya achu yaawo yeera ichu soonanara. Piipiliya onnaloca: “Mwelaponi atxhu yànvira ekhalaka ònanara murima. Mupuwelo aya ni otxhuna waya wàri opaka sonanara mahiku othene.”

Noowa aari muchu a phaama. Yehova aamuleela Noowa wi Owo onahaala waatoloxa achu onanara ni maahi mancipale.

Muluku aamuleela tho Noowa wi ampake mwaaceya, nave wi avoleihemo echoko awe ni miloko yoothene ya axinama.

Noowa aahaaleela achu vooloca sa orwa wa Maahi Mancipale, nyenya awo hiyawiriyanne. Achu akina yanamutheya Noowa; nave akina yaanamunyemula owo.

Vaava mwaaceya owo aamanleiye opakiwa, Noowa ahaavoleiha axinama mmwaaceyanimmo.