PARTE 5
Atun Para Nóep punchausninmanta, ¿picuna Tata Yayát uyarerancu?
Nóep punchausninpi, persunas ancha sajra imastista ʼrúaj carancu (Génesis 6:5).
Adán y Eva huaasta aperancu, y Ashpa tacacora ancha ashca persunasmanta. Chaypachá, sujcuna ángeles Súpay ina ʼruarancu y Tata Yáyap contranpi churacorancu.
Paycuna ánaj pachamanta uraycorancu Ashpaman ucun humanu ina y huarmisuan casaracunaarancu. Paycuna huaas ancha mana allista aperancu y astaan sinchis sujcuna persunasmanta.
Ashpa mana alli persunasmanta tacacora. Biblia nin «maldar ckarimanta Ashpapi huiñara» y persunas túcuy tiempu pensas tiarancu mana alli casckanta ʼruayta.
Noé Tata Yayát casucora y atun huasít ʼruara (Génesis 6:13, 14, 18, 19, 22).
Noé suj alli ckari cara. Jehová nipora mana alli persunasta suj atun paraan túcuy Ashpapi urmanman eckechícoj ʼrera.
Nipora ʼruanánpaj suj atun huasi caspimanta, yacu saanpi ʼrinánpaj: Nóep arcan. Chaypi túcuy laya uyuasta y familianta yaycuchinan tiara.
Noé sujcunas persunasta huillara, ima suj atun para amunman, pero mana uyariporancu. Huaquin asicorancu y sujcunas ancha piñacorancu.
Noé atun huasít puchucaptin, uyuasta ucupi yaycuchicora.
