Na‘e ma‘u fānau ‘a ‘Ātama mo ‘Ivi, pea na‘e hoko ‘o tokolahi ‘a e kakaí ‘i he māmaní. ‘I he faai mai ‘a e taimí, na‘e kau ha kau ‘āngelo ‘i he angatu‘u ‘a Sētané.

Na‘a nau ha‘u ki he māmaní pea nau ‘ai ‘a e ngaahi sino fakaetangata koe‘uhi ke nau malava ‘o mali mo ha kakai fefine. Na‘e fā‘ele‘i ‘e he kakai fefiné ha ngaahi foha na‘e mahulu hake ia he tangatá, ‘a ia na‘a nau anga-kakaha mo mālohi.

Na‘e hoko ‘o fonu ‘a e māmaní ‘i he kakai na‘a nau fai ‘a e ngaahi me‘a na‘e kovi. ‘Oku lave ‘a e Tohi Tapú “ki he lahi fau ‘a e fulikivanu ‘a e tangatá ‘i he māmaní pea ko e hehema kotoa ‘o e ngaahi fakakaukau ‘o hono lotó na‘e kovi pē ‘i he taimi kotoa pē.”

Ko Noá ko ha tangata lelei. Na‘e folofola ‘a Sihova kia Noa te Ne faka‘auha ‘a e kakai fulikivanú ‘aki ha fu‘u lōmaki.

Na‘e toe folofola ‘a e ‘Otuá kia Noa ke ne langa ha fu‘u vaka lahi, na‘e ui ko ha ‘a‘ake, pea ke ne fakahū ki ai hono fāmilí pea mo e fa‘ahinga kotoa pē ‘o e fanga manú.

Na‘e fakatokanga ‘a Noa ki he kakaí ‘o fekau‘aki mo e Lōmaki na‘e teu ke hoko maí, ka na‘e ‘ikai te nau fanongo. Na‘e kata‘i ‘e he ni‘ihi ‘a Noa; ko e ni‘ihi na‘a nau fehi‘a ‘iate ia.

‘I he ‘osi ‘a e ‘a‘aké, na‘e fakahū ‘e Noa ‘a e fanga manú ki loto.