CIIYO 5
Ino Mbaani Bakamumvwida Leza Lyazambangulwe? Ino Mbaani Batakamumvwida?
Mumazuba aa Nowa, bantu banji bakali kucita zintu zibi. Matalikilo 6:5
Ba Adamu a Eva bakazyala bana, aboobo bantu bakavwula munyika. Mukuya kwaciindi, bamwi bangelo bakatobela Saatani mukuzanga.
Bakaboola anyika akusama mibili yabuntu kutegwa bakwate bamakaintu. Bamakaintu aaba bakazyala bana mabbabbani, basinguzu alimwi ibakali.
Inyika yakazula bantu bacita zintu zibi. Ibbaibbele lyaamba kuti: ‘Bubi bwabantu bwakavwulisya anyika, akuti makanze aabo amizeezo njibakali kuyeeya mumyoyo yabo yakali mibi ciindi coonse.’
Nowa wakamumvwida Leza akupanga bwato. Matalikilo 6:13, 14, 18, 19, 22
Nowa wakali kucita zintu zibotu. Jehova wakaambila Nowa kuti wakali kuyooleta zambangulwe kutegwa anyonyoone bantu bacita zintu zibi.
Alimwi Leza wakaambila Nowa kuti apange bwato bupati akunjizya bamukwasyi wakwe abanyama bamisyobo yoonse.
Nowa wakabacenjezya bantu kujatikizya Zambangulwe, pele tiibakamumvwida pe. Bamwi bakamuseka Nowa, alimwi bamwi tiibakali kumuyanda.
Naakamana kupanga bwato, wakabanjizya banyama.
