HAP 5
Bikpela Tait Wara—Husat i Harim Tok? Husat i No Harim Tok?
Long taim bilong Noa, klostu olgeta manmeri i mekim pasin nogut. Stat 6:5
Adam tupela Iv i kamapim ol pikinini, na ol manmeri i kamap planti long graun. Bihain, sampela ensel i go long sait bilong Satan na bikhet long God.
Ol i kam daun long graun, kisim bodi bilong man na bai ol i ken maritim ol meri. Ol meri i karim ol pikinini man i narapela kain, ol i gat bikpela strong na pasin bilong pait.
Bihain, graun i pulap long ol manmeri i mekim pasin nogut. Baibel i tok: “Pasin bilong ol manmeri long olgeta hap i nogut tru. Ol manmeri i tingting tasol long ol samting nogut.”
Noa i harim tok bilong God na i wokim sip. Stat 6:13, 14, 18, 19, 22
Noa em i gutpela man. Jehova i tokim Noa olsem Em bai bagarapim ol man nogut long rot bilong bikpela tait.
Na tu, God i tokim Noa long wokim wanpela traipela sip, na long kisim famili bilong em na olkain animal i go insait long en.
Noa i givim tok lukaut long ol man olsem Bikpela Tait bai kam, tasol ol i no harim. Sampela i lap long Noa; sampela i heitim em.
Taim ol i wokim sip pinis, Noa i kisim ol animal i go insait.
