Tá ni̱ya̱ʼa u̱ni̱ ki̱ví ña̱ ni̱xi̱ʼi̱ Jesús, sava ná ñaʼá ni̱xa̱ʼa̱ná xi̱toʼniná ya̱vi̱ nu̱ú sa̱ndúxi̱na ra, ta kǒókara ndíka̱a̱ ikán. Jehová sa̱ndátiakuñaʼá.

Tá ni̱ya̱ʼa ki̱ví, Jesús ni̱na̱ʼa̱ra miíra nu̱ú na̱ apóstolra, na̱ xi̱táʼan xíʼin ra.

Saá íyoña, Jehová sa̱ndátiakura Jesús ta ndu̱ura iin ángel ra̱ íyoní ndieé ndaʼá, ta va̱ása xa̱a̱ iin ki̱ví kuvira. Na̱ xi̱táʼan xíʼin Jesús xi̱nina tá kua̱ʼa̱nra nu̱ú ndiví.

Jesús ta̱xira miíra ña̱ cha̱ʼvíra xa̱ʼáyó (Mateo 20:28). Ndióxi̱ xíniñúʼura Jesús ña̱ cha̱ʼvíra xa̱ʼáyó, ta saá va̱ʼa kutiakuyó ndisaá tíempo.

Jehová nda̱kaxinra Jesús ña̱ kuura Rey ta kaʼndiachíñura nu̱ú Ñuʼú yóʼo. Xíʼin Jesús koo 144.000 na̱ yiví na̱ xíka nda̱kú xíʼin Ndióxi̱, ki̱ví xíʼi̱na, Ndióxi̱ sándátiakura na ña̱ kua̱ʼa̱na nu̱ú ndiví. Jesús xíʼin na̱ 144.000 kúú na̱ kaʼndiachíñu nu̱ú Ñuʼú yóʼo (Revelación [Apocalipsis] 14:1-3).

Ta̱ Rey nda̱kaxin Ndióxi̱ kúú ra̱ ndasaluvi iníí saá nu̱ú Ñuʼú yóʼo. Ki̱ví saá, ndiʼi xa̱ʼá ku̱a̱chi nu̱ú xáʼní-táʼana, va̱ása kooka na̱ xáʼní, ni na̱ ndáʼvi ndóʼo, ni so̱ko. Ña̱ nda̱a̱ kúú ña̱ si̱íní koo ini na̱ yiví (Salmo 145:16).