Panoj e̱yi to̱nal iga Jesús miktoyaʼ, wa̱n sekin siwa̱tkej yajki kitatoj pan te’xapo’ ka̱n tokto̱ya wa̱n akasikej ompa. Jehová kixitijkaya’.

Jesús moi̱xne̱xti ka̱n onoyaj iyapostolmej.

Dios akixitij ken se̱ ta̱ga’ yej kipiá inakayo wa̱n iyomiyo. Kixitij Jesús ken se̱ ta̱ga’ yej aweli moita’, ken angelmej. Idiscipulojmej kitakej ke̱man tejka ajko. A̱man yéj kipiá komati tajpal wa̱n nike̱man mikis.

Jesús mikiko’ iga makipojpowa totechko wa̱n makitami mikilis (Mateo 20:28). Wa̱n inó̱n iga, wel tikpiáj isatolis iga nochipa.

Jehová kitapejpen Jesús iga nepa ajko mamochi̱wa tekiwaj de iní̱n Ta̱jli. Wa̱n ayá̱’onoj ise̱lti ken tekiwaj. Wa̱n yej onoskej 144,000 tajta̱gamej wa̱n siwa̱tkej yej kitajto̱lkakikej Dios. Ke̱man yejeme̱n mikij, Jehová kixitiá iga mayakan ajko. Dios yawi kichi̱wati iga iní̱n tekiwajmej makichi̱wakan yej ye̱kti pan Ta̱jli (Revelación [Apocalipsis] 14:1-3).

Iní̱n tekiwajmej kichi̱waskej iga nochi Ta̱jli mamochi̱wa se̱ xo̱chita̱l. Yej onoskej ompa ayá̱’ mokuejkuesoskej, amomijmiktiskej, kipiaskej nochi tejté̱ wa̱n ayawij a̱pismikiti. Nochi yo̱lpa̱kiskej (Salmo 145:16).