‘I he hili ‘a e ‘aho ‘e tolu mei he pekia ‘a Sīsuú, na‘e ‘a‘ahi ha kau fefine ki hono fonualotó ‘o nau ‘ilo‘i ‘oku ‘ikai ‘i ai ha taha. Na‘e ‘osi fokotu‘u ‘e Sihova ia ‘a Sīsū mei he maté.

Na‘e hā ‘a Sīsū ki mui ai ki he‘ene kau ‘apositoló.

‘Io, na‘e fokotu‘u mai ‘e Sihova ‘a Sīsū ki he mo‘uí ‘i he tu‘unga ko ha me‘amo‘ui laumālie mālohi ta‘efa‘amate. Ko e kau ākonga ‘a Sīsuú na‘a nau mamata kiate ia he‘ene ‘alu hake ki hēvaní.

Na‘e foaki ‘e Sīsū ‘a ‘ene mo‘uí ke totongi ai ha huhu‘i ma‘á e fa‘ahinga ‘o e tangatá. (Mātiu 20:28) Fakafou ‘i he huhu‘i ko iá, ‘oku ‘ai ai ‘e he ‘Otuá ‘o malava kiate kitautolu ke tau mo‘ui ta‘engata.

Na‘e fakanofo ‘e Sihova ‘a Sīsū ko ha Tu‘i ke pule mai ki he māmaní. ‘E kau fakataha mo ia ha kakai faitōnunga ‘e toko 144,000 ‘a ia kuo fokotu‘u hake mei he māmaní ki he mo‘ui ‘i hēvaní. Ko Sīsū mo e toko 144,000 ‘oku fa‘u‘aki kinautolu ha founga-pule fakahēvani mā‘oni‘oni​—ko e Pule‘anga ‘o e ‘Otuá.​—Fakahā 14:1-3.

Ko e Pule‘anga ‘o e ‘Otuá te ne ‘ai ‘a e fo‘i māmaní ko ha palataisi. ‘E ‘ikai ke toe ‘i ai ha tau, faihia, masiva, mo e fiekaia. ‘E fiefia mo‘oni ‘a e kakaí.​—Saame 145:16.