Ŋâla-kɔlɔi e wɔlɔ lóno é pîlan mɛni támaa ma, nyii ŋai sâa kɛi. E mo nyɛɛ; “nûa da pai kɛi a sɛŋ-kao wɛli-ɓela, ǹûai difa dikáa-ɓela woo mɛnii, ŋwana-lɔɔ-ɓela da ǹûai dinîa-kɛɛ wɛ́li káa diai.”

Ŋâla-kɔlɔi e ŋɔ́nɔ mo à gɛ́ɛ lɔii a pai kpɛ̃liŋ-nii gɛ wolo zu, da pai kɔ́ kɔi nɔii gwaa kélee, puru kpeya-kpeya a pai tooi da núu paa kɔlɔ-fela ŋa. Mɛni ŋai ŋí kélee dikáa nâa kɛi.

Yîsɛ è ŋɔ́nɔ mo à gɛ́ɛ Ŋâla-taa kâloŋ-laai maa-tuŋ lɛ́lɛɛi a pai ɓôi nɔii gwaa kélee.—Mâafiu 24:14.

Tãi kpua yée mu, Ziova a pai sɔŋyɔ̂ŋ-kɛ́-ɓela su karai.

Ziova a pai séetìŋ da ŋɔnyinaŋ nyɔ́mɔɔ-ŋai su karai.

Diai pai diwóli tɔ́ɔi Ɣâla wóo mai da pa ɓáloi, dikɛ́ dɔ̃yâ ɣeniɛ ninai su; ɓɛi yao maa fé pa kɛi naai, ɓɛi nûa da pa láai a dikie-ni, di díkie-ni wɛ́li.