តើធ្វើដូចម្ដេចអាចមានសេរីភាពច្រើនជាង?
ជំពូកទី៣
តើធ្វើដូចម្ដេចអាចមានសេរីភាពច្រើនជាង?
សារ៉ា អាយុ១៨ឆ្នាំ ប្រាប់ថា៖ «ខ្ញុំចង់ឲ្យប៉ាម៉ាក់អនុញ្ញាតឲ្យខ្ញុំទៅខាងក្រៅច្រើនជាងនេះ»។
គ្រីស្ទីន អាយុ១៨ឆ្នាំ ប្រាប់ថា៖ «ខ្ញុំតែងតែសួរប៉ាម៉ាក់ថា ហេតុអ្វីមិនទុកចិត្តឲ្យខ្ញុំទៅដើរលេងជាមួយមិត្តភក្តិ? ពួកគាត់ឆ្លើយថា៖ ‹ប៉ាម៉ាក់ទុកចិត្តកូន តែប៉ាម៉ាក់មិនទុកចិត្តមិត្តភក្តិរបស់កូនទេ›»។
ដូចសារ៉ានិងគ្រីស្ទីនដែរ តើប្អូនចង់បានសេរីភាពច្រើនជាងទេ? បើមែន ប្អូនត្រូវធ្វើឲ្យឪពុកម្ដាយទុកចិត្តប្អូន។ ប៉ុន្តែ ទំនុកចិត្តប្រៀបដូចជាលុយ គឺពិបាករក តែងាយបាត់។ មិនថាទទួលបានលុយច្រើនប៉ុណ្ណាទេ នៅតែមានអារម្មណ៍ថាមិនចេះគ្រប់។ អ៊ីលយ៉ាណា អាយុ១៦ឆ្នាំ ប្រាប់ថា៖ «ឲ្យតែខ្ញុំចង់ចេញទៅក្រៅម្ដងៗ ប៉ាម៉ាក់សួរនោះសួរ ដូចខ្ញុំជាជនល្មើស។ គាត់សួរថា ទៅណា? ជាមួយអ្នកណា? ទៅធ្វើអ្វី? ហើយមកវិញពេលណា? ខ្ញុំដឹងថាពួកគាត់ជាប៉ាម៉ាក់ខ្ញុំ តែពេលពួកគាត់សួរបែបនោះ ធ្វើឲ្យខ្ញុំមិនស្រួលចិត្តសោះ!»។
តើប្អូនអាចធ្វើអ្វីដើម្បីឲ្យឪពុកម្ដាយទុកចិត្តប្អូន និងឲ្យសេរីភាពប្អូនច្រើនជាង? មុននឹងឆ្លើយសំណួរនេះ សូមមើលថា ហេតុអ្វីបានជាការជឿទុកចិត្តគឺជាប្រធានបទដ៏រសើបមួយរវាងឪពុកម្ដាយនិងកូនជំទង់?
បញ្ហានៃការផ្លាស់ប្ដូរវ័យ
គម្ពីរចែងថា៖ «បុរសនឹងចាកចេញពីឪពុកម្ដាយខ្លួន»។ (ដើមកំណើត ២:២៤) ប្រាកដណាស់ នេះក៏សំដៅលើស្ត្រីដែរ។ មិនថាប្អូនជាប្រុសឬជាស្រីទេ វ័យជំទង់ជារយៈពេលដ៏សំខាន់មួយដើម្បីឈានទៅដល់ភាពពេញវ័យ ពោលគឺជាពេលដែលប្អូនត្រៀមខ្លួនរើចេញពីឪពុកម្ដាយ ហើយកសាងគ្រួសារដោយខ្លួនឯង។ a
ទោះជាយ៉ាងណាក្ដី ការឈានទៅរកភាពពេញវ័យ មិនដូចជាការដើរឆ្លងទ្វារទេ តែប្រៀបដូចជាការឡើងជណ្ដើរម្ដងមួយកាំៗ។ ប្អូននិងឪពុកម្ដាយអាចនឹងមានការខ្វែងគំនិតគ្នាអំពីចម្ងាយដែលប្អូនបានឡើង។ ប្អូនស្រីម៉ារៀមានអារម្មណ៍ថា ឪពុកម្ដាយមិនទុកចិត្តនាងក្នុងការសេពគប់មិត្តភក្ដិឡើយ។ នាងប្រាប់ថា៖ «ខ្ញុំអាយុ២០ឆ្នាំហើយ ប៉ុន្តែប៉ាម៉ាក់នៅតែមិនទុកចិត្តខ្ញុំ! ពួកគាត់គិតថាខ្ញុំមិនហ៊ានបដិសេធ ពេលមិត្តភក្តិបបួលឲ្យធ្វើរឿងមិនល្អ។ ខ្ញុំខំពន្យល់ពួកគាត់ថាខ្ញុំអាចធ្វើបាន ហើយខ្ញុំក៏បានធ្វើរួចដែរ តែពួកគាត់នៅតែមិនជឿ!»។
ដូចប្អូនស្រីម៉ារៀបាននិយាយ បញ្ហាទំនុកចិត្តអាចបង្កឲ្យមានភាពតានតឹងយ៉ាងខ្លាំងរវាងក្មេងជំទង់និងឪពុកម្ដាយ។ តើនេះបានកើតឡើងក្នុងគ្រួសាររបស់ប្អូនឬទេ? បើមែន តើប្អូនអាចធ្វើអ្វីដើម្បីឲ្យឪពុកម្ដាយទុកចិត្តប្អូនថែមទៀត? ហើយបើប្អូនបានធ្វើឲ្យឪពុកម្ដាយលែងទុកចិត្តព្រោះទង្វើមិនល្អរបស់ប្អូន តើប្អូនអាចធ្វើយ៉ាងណាដើម្បីដោះស្រាយបញ្ហានោះ?
ចូរបង្ហាញថាប្អូនជាមនុស្សគួរឲ្យទុកចិត្ត
សាវ័កប៉ូលបានសរសេរទៅគ្រិស្តសាសនិកនៅសតវត្សរ៍ទី១ថា៖ «ចូរពិនិត្យពិចារណាអំពីខ្លួនឥតឈប់»។ (កូរិនថូសទី២ ១៣:៥) ពិតមែនថាប៉ូលមិនបានសរសេរពាក្យទាំងនេះសម្រាប់ប្អូនៗវ័យក្មេង តែគោលការណ៍នេះក៏អនុវត្តចំពោះពួកគេដែរ។ ប្អូនអាចទទួលបានសេរីភាពតិចឬច្រើន អាស្រ័យទៅលើប្អូនជាមនុស្សគួរឲ្យ ទុកចិត្តដល់កម្រិតណា។ នេះមិនមានន័យថាប្អូនត្រូវតែល្អឥតខ្ចោះឡើយ ពីព្រោះម្ដងម្កាលយើងទាំងអស់គ្នាតែងធ្វើខុស។ (អ្នកទូន្មាន ៧:២០) សរុបមក តើការប្រព្រឹត្តរបស់ប្អូនគឺជាមូលហេតុដែលធ្វើឲ្យឪពុកម្ដាយមិនទុកចិត្តប្អូនឬទេ?
ជាឧទាហរណ៍ ប៉ូលបានសរសេរថា៖ «យើងចង់ធ្វើការទាំងអស់ដោយទៀងត្រង់»។ (ហេប្រឺ ១៣:១៨) សូមសួរខ្លួនប្អូនថា‹តើខ្ញុំបានប្រាប់ឪពុកម្ដាយយ៉ាងស្មោះអំពីកន្លែងដែលខ្ញុំទៅ និងអ្វីដែលខ្ញុំធ្វើឬទេ?›។ យុវវ័យមួយចំនួនបានទទួលស្គាល់ថា ពួកគេត្រូវកែលម្អខ្លួនក្នុងរឿងនោះ។ សូមអានយោបល់របស់ពួកគេ ហើយឆ្លើយសំណួរនៅខាងក្រោម។
ឡូរី និយាយថា៖ «ខ្ញុំបានលួចផ្ញើសារទៅប្រុសម្នាក់ដែលខ្ញុំចូលចិត្ត។ ពេលឪពុកម្ដាយខ្ញុំដឹង ពួកគាត់ប្រាប់ខ្ញុំឲ្យឈប់។ ខ្ញុំបានសន្យាថាខ្ញុំនឹងឈប់ តែខ្ញុំមិនបានឈប់ទេ។ ខ្ញុំបន្តផ្ញើសារទៅប្រុសនោះអស់មួយឆ្នាំ។ ក្រោយមកឪពុកម្ដាយខ្ញុំដឹង ខ្ញុំបានសុំទោសពួកគាត់ ហើយសន្យាថាឈប់ធ្វើទៀត ប៉ុន្តែខ្ញុំនៅតែធ្វើ។ ទីបំផុត ឪពុកម្ដាយក៏លែងទុកចិត្តខ្ញុំ!»។
តាមគំនិតប្អូន ហេតុអ្វីឪពុកម្ដាយលែងទុកចិត្តឡូរី? ․․․․․
បើប្អូនជាឪពុកម្ដាយរបស់ឡូរី តើប្អូននឹងធ្វើយ៉ាងណា? ហើយហេតុអ្វី? ․․․․․
នៅលើកដំបូងដែលឪពុកម្ដាយនិយាយដាស់តឿនឡូរីអំពីបញ្ហានោះ តើឡូរីគួរធ្វើយ៉ាងណាដើម្បីឲ្យឪពុកម្ដាយទុកចិត្តនាង? ․․․․․
ប៊ីវើលី ប្រាប់ថា៖ «ពេលខ្ញុំនៅជិតមនុស្សប្រុស ឪពុកម្ដាយមិនទុកចិត្តខ្ញុំទេ។ ឥឡូវទើបខ្ញុំយល់ពីមូលហេតុ ពីព្រោះខ្ញុំធ្លាប់ចែចង់ប្រុសពីរនាក់ដែលមានអាយុបងខ្ញុំពីរឆ្នាំ។ ខ្ញុំនិយាយទូរស័ព្ទរាប់ម៉ោងជាមួយពួកគេម្នាក់ៗ ហើយពេលជួបពួកគេនៅពិធីជប់លៀង ខ្ញុំនិយាយតែជាមួយពួកគេប៉ុណ្ណោះ មិនសូវនិយាយជាមួយអ្នកឯទៀតទេ។ ដូច្នេះ ឪពុកម្ដាយបានដកទូរស័ព្ទខ្ញុំអស់មួយខែ ហើយពួកគាត់ហាមខ្ញុំមិនឲ្យទៅកន្លែងដែលមានប្រុសពីរនាក់នោះឡើយ»។
បើប្អូនជាឪពុកម្ដាយរបស់ប៊ីវើលី តើប្អូននឹងធ្វើយ៉ាងណា? ហើយហេតុអ្វី? ․․․․․
តើប្អូនគិតថាឪពុកម្ដាយរបស់ប៊ីវើលីតឹងរ៉ឹងពេកទេ? បើមែន ហេតុអ្វី? ․․․․․
តើប៊ីវើលីអាចធ្វើអ្វីដើម្បីឲ្យឪពុកម្ដាយទុកចិត្តនាងម្ដងទៀត? ․․․․․
ទទួលបានទំនុកចិត្តឡើងវិញ
ដូចយុវវ័យទាំងនោះ ចុះបើការប្រព្រឹត្តរបស់ប្អូនធ្វើឲ្យឪពុកម្ដាយលែងទុកចិត្ត? សូម្បីតែដូច្នោះ ប្អូននៅតែអាចស្ដារទំនុកចិត្តពីឪពុកម្ដាយបាន។ តើតាមរបៀបណា?
បើការប្រព្រឹត្តរបស់ប្អូនប្រកបដោយភាពទទួលខុសត្រូវ នោះឪពុកម្ដាយនឹងកាន់តែជឿជាក់ ហើយផ្ដល់សេរីភាពឲ្យប្អូនកាន់តែច្រើន។ អាណេតបានយល់ច្បាស់អំពីចំណុចនេះ នាងប្រាប់ថា៖ «ពេលនៅក្មេង ខ្ញុំមិនដឹងសោះថាការធ្វើឲ្យអ្នកឯទៀតទុកចិត្តខ្លួនគឺសំខាន់ប៉ុណ្ណា។ ឥឡូវខ្ញុំដឹង ហើយចេះទទួលខុសត្រូវច្រើន
ជាងមុន។ ខ្ញុំចង់ឲ្យឪពុកម្ដាយទុកចិត្តខ្ញុំតទៅទៀត»។ តើប្អូនរៀនអ្វីពីអាណេត? ជាជាងត្អូញត្អែរថាឪពុកម្ដាយមិនទុកចិត្តប្អូន សូមព្យាយាមធ្វើជាមនុស្សដែលគួរឲ្យទុកចិត្ត។ នេះទំនងជានឹងជួយប្អូនឲ្យទទួលបានសេរីភាពច្រើនជាង។ជាឧទាហរណ៍ តើប្អូនជាមនុស្សដែលគួរឲ្យទុកចិត្តក្នុងចំណុចខាងក្រោមនេះឬទេ? សូមដាក់សញ្ញា ✔ ក្នុងប្រអប់ដែលប្អូនគិតថា ប្អូនត្រូវកែលម្អខ្លួន។
□ មកផ្ទះវិញទាន់ពេល
□ ធ្វើតាមពាក្យសន្យា
□ គោរពពេលវេលា
□ ដឹងពីរបៀបចាយវាយ
□ ជួយធ្វើកិច្ចការផ្ទះ
□ មិនដេកទ្រមក់
□ រក្សាបន្ទប់ឲ្យនៅស្អាត
□ និយាយការពិត
□ ចេះសន្សំសំចៃក្នុងការប្រើទូរស័ព្ទឬកុំព្យូទ័រ
□ ទទួលស្គាល់កំហុស ហើយចេះសុំទោស
□ ផ្សេងទៀត ․․․․․
សូមតាំងចិត្តធ្វើតាមចំណុចដែលប្អូនបានគូស ដើម្បីបង្ហាញថាខ្លួនគួរឲ្យទុកចិត្ត។ ម្យ៉ាងទៀត សូមធ្វើតាមពាក្យដាស់តឿនក្នុងគម្ពីរដែលចែងថា៖ «ត្រូវដោះចេញនូវបុគ្គលិកលក្ខណៈចាស់ដែលស្របតាមអំពើដែលអ្នកធ្វើពីមុន»។ (អេភេសូរ ៤:២២) «ចូររក្សាសម្ដី បើថា‹មែន› គឺមែន»។ (យ៉ាកុប ៥:១២) «ចូរអ្នករាល់ គ្នាម្នាក់ៗនិយាយសេចក្ដីពិតទៅអ្នកជិតខាងខ្លួន»។ (អេភេសូរ ៤:២៥) «ចូរស្ដាប់បង្គាប់ឪពុកម្ដាយក្នុងគ្រប់ការទាំងអស់»។ (កូឡុស ៣:២០) បន្តិចម្ដងៗ គ្រប់គ្នា រួមទាំងឪពុកម្ដាយរបស់ប្អូននឹងឃើញអ្វីដែលប្អូនកំពុងព្យាយាមធ្វើ។—ធីម៉ូថេទី១ ៤:១៥
ចុះបើប្អូនប្រឹងអស់ពីសមត្ថភាពហើយ ប៉ុន្តែឪពុកម្ដាយនៅតែមិនផ្ដល់សេរីភាពឲ្យសមនឹងការខំប្រឹងរបស់ប្អូន? សូមពិភាក្សារឿងនេះជាមួយពួកគាត់។ ជាជាងត្អូញត្អែរថាពួកគាត់ត្រូវទុកចិត្តប្អូនថែមទៀត សូមសួរពួកគាត់ដោយការគោរពអំពីអ្វីដែលពួកគាត់គិតថាប្អូនត្រូវធ្វើ ដើម្បីទទួលបានទំនុកចិត្តពីពួកគាត់។ បន្ទាប់មក សូមពន្យល់យ៉ាងច្បាស់អំពីមូលហេតុដែលប្អូនសួរពួកគាត់អំពីរឿងនោះ។
កុំរំពឹងថាឪពុកម្ដាយនឹងធ្វើតាមការខំប្រឹងរបស់ប្អូនភ្លាមៗ។ ពួកគាត់ចង់ធ្វើឲ្យប្រាកដថាប្អូននឹងរក្សាពាក្យសន្យារបស់ប្អូន។ សូមប្រើឱកាសនេះដើម្បីបញ្ជាក់ថា ប្អូនគួរឲ្យទុកចិត្ត។ បន្តិចម្ដងៗ ឪពុកម្ដាយនឹងជឿជាក់ប្អូនកាន់តែខ្លាំង ហើយផ្ដល់សេរីភាពឲ្យប្អូនកាន់តែច្រើន។ ប៊ីវើលីដែលបានរៀបរាប់ខាងលើ និយាយបន្ថែមថា៖ «ការធ្វើឲ្យគេទុកចិត្តគឺជារឿងពិបាក តែការធ្វើឲ្យគេមិនទុកចិត្តគឺជារឿងស្រួល។ ឥឡូវខ្ញុំសប្បាយចិត្តណាស់ដែលឪពុកម្ដាយទុកចិត្តខ្ញុំម្ដងទៀត!»។
សូមអានថែមទៀតអំពីប្រធានបទនេះ ក្នុងជំពូកទី២២ ក្បាលទី២
ពេលឪពុកម្ដាយលែងលះគ្នា នោះហាក់ដូចជាមេឃរលំភ្នំរលាយ។ បើប្អូនមានស្ថានភាពដូចនោះ តើប្អូននឹងធ្វើយ៉ាងណា?
[កំណត់សម្គាល់]
a ដើម្បីបានព័ត៌មានថែមទៀត សូមមើលជំពូកទី៧ក្នុងសៀវភៅនេះ។
បទគម្ពីរសំខាន់
«កុំប្រើសេរីភាពរបស់អ្នករាល់គ្នាជាវិធីបិទបាំងអំពើអាក្រក់ឡើយ»។—ពេត្រុសទី១ ២:១៦
យោបល់
ជាជាងប្រៀបធៀបកម្រិតសេរីភាពរបស់ប្អូនជាមួយនឹងបងៗរបស់ប្អូន សូមប្រៀបធៀបកម្រិតសេរីភាពដែលប្អូនមានពេលនៅក្មេង ជាមួយនឹងសេរីភាពដែលប្អូនមាននៅពេលនេះ។
តើប្អូនដឹងទេ . . . ?
ឪពុកម្ដាយដែលស្រឡាញ់និងយកចិត្តទុកដាក់ចំពោះកូន នឹងមិនបណ្ដោយកូនឲ្យមានសេរីភាពធ្វើតាមចិត្តទេ។
គម្រោងអនុវត្ត!
ខ្ញុំចង់ឲ្យឪពុកម្ដាយជឿទុកចិត្តខ្ញុំថែមទៀត ក្នុងរឿង ․․․․․
បើឪពុកម្ដាយលែងទុកចិត្តខ្ញុំ ខ្ញុំនឹង ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● ទោះជាប្អូនខំព្យាយាមបង្ហាញថាប្អូនគួរឲ្យទុកចិត្តក៏ដោយ ហេតុអ្វីឪពុកម្ដាយនៅតែមិនផ្ដល់សេរីភាពឲ្យប្អូនច្រើនជាង?
● តើការចេះប្រាស្រ័យទាក់ទងល្អជាមួយឪពុកម្ដាយនឹងជួយប្អូនឲ្យទទួលបានសេរីភាពច្រើនជាងយ៉ាងដូចម្ដេច?
[ឃ្លាអក្សរធំនៅទំព័រ២៤]
«ដាយអានណា ប្រាប់ថា៖ ‹ពេលនិយាយជាមួយឪពុកម្ដាយ ខ្ញុំប្រាប់ពួកគាត់ទាំងអស់អំពីបញ្ហានិងកង្វល់របស់ខ្ញុំ។ ខ្ញុំគិតថានេះធ្វើឲ្យពួកគាត់ស្រួលទុកចិត្តខ្ញុំជាង›»
[រូប/រូបភាពនៅទំព័រ២៣]
ការផ្លាស់ប្ដូរទៅជាមនុស្សពេញវ័យដែលគួរឲ្យទុកចិត្ត គឺប្រៀបដូចជាការឡើងជណ្ដើរម្ដងមួយកាំៗក្នុងគ្រាវ័យជំទង់
[រូប]
(ដើម្បីមើលឃើញទាំងអស់ សូមមើលសៀវភៅ)
ពេញវ័យ
វ័យជំទង់
កុមារភាព