KAPÍTULO 5

Mbaʼépa ikatu ajapo omenda jeýramo?

NANDEGUSTAIETE la rehecháva! Nde sy omenda jey. Rerrenegaiterei voi, reikuaa porã rupi hasymaha nde tuvakuéra oiko jey hag̃ua oñondive. Ha oiméramo ndaʼareiete nde ru omano hague, koʼýte ijetuʼuvéntema ndéve.

Mbaʼéichapa reñeñandu upérõ? Emarka (✔) koʼápe:

□ Revyʼa

□ Ndeselóso

□ Repensa reñetraisionaha

□ Ndepyʼapy oikótava upe rire

□ Reñeñandu vai reñepyrũgui rehayhu ne tuvangápe a

Heta mbaʼére ikatu reñeñandu péicha. Ikatu reimoʼã rejogueraha porãrõ ne tuvanga ndive refallataha nde túva teépe. Péro reñatendevaʼerã umi mbaʼe reñandu ha rejapóvare, ikatúgui ojapo vai nderehe térã katu repyta vai nde rapichándi.

 Pór ehémplo ikatu reñepyrũ remoprovléma ne tuvangápe térã rejapo oimeraẽ mbaʼe remoingovai hag̃ua chupekuéra reipotágui ojopoi jey. Péro iporãta nemanduʼárõ Proverbios 11:29 heʼívare: ‘Hogapy ombyaíva opyta mbaʼeveʼỹre’. Aníkena reheja umi mbaʼe reñandúva ojapouka ndéve ivaíva. Mbaʼe mbaʼépa rejapovaʼerã rembohovái porã hag̃ua umi mbaʼe ijetuʼúva? Jahechamína mbohapy mbaʼe.

Peteĩha: Neñeʼẽrenduvaʼerã ne tuvangápe

Katuete ijetuʼúta neñeʼẽrendu ne tuvangápe. Omandáramo ndéve peteĩ mbaʼe oiméne resapukaise jepi chupe: “Nde pio mbaʼe eréta chéve, ndéngo ndahaʼéi che túva!”. Ikatu reñeñandu porã eréramo péicha, péro ojekuaáta nderehe nemitãrekoitiha.

Neñeʼẽrendúramo katu rejapóta heʼiháicha ko konsého oĩva la Bíbliape: ‘Peikókena okakuaapavaʼekuéicha’ (1 Corintios 14:20, BNP). Nemanduʼavaʼerã ne tuvanga nepytyvõsenteha nde túva teéicha, ha upévare rerrespetavaʼerã chupe (Proverbios 1:8; Efesios 6:1-4).

Ha ndekorrehi jave repensavaʼerã ojapoha upéva nderayhu ha ojepyʼapýgui nderehe (Proverbios 13:24). Pór ehémplo Eva orekóva 18 áño omombeʼu: “Añetehápe che tuvanga orejaʼo jepi, péro tuvakuéra ningo okorrehintevaʼerã voi ifamíliape. Haʼéngo heta áñorema omoĩ oréve ore remikotevẽ ha orepytyvõ roñemoag̃uive hag̃ua Jehováre, ha chemalagradesidaitereíta ningo la chepochýrõ mbaʼe oñemoñeʼẽ haguére oréve”.

Upéicharamo jepe sapyʼánte ne tuvanga ikatu ojapo peteĩ mbaʼe noĩporãmbáiva ha ndepochy. Mbaʼéichapa upéicha jave rehechaukáta rejapoha opa mbaʼe ‘kakuaáicha’? Colosenses 3:13 (BNP) heʼíva ikatu nepytyvõ: ‘Penepasiénsiakena ojuehe ha peñoperdona oĩramo ipochýva ambue ndive’.

 Ehai umi mbaʼe porã ojapóva ne tuvanga.

․․․․․

Mbaʼéichapa nepytyvõta rerrespetave hag̃ua chupe rejesarekóramo koʼã mbaʼére?

․․․․․

Mokõiha: Ani reñemohatã nde erévapente ha eikokuaa ótrondi

Epensamína Aarón orekóva 24 áño ohasavaʼekuére, haʼe heʼi: “Papa dos vése voi omenda jey. Ijetuʼuetereivaʼekue chéve ajepokuaa hembireko pyahu ha ifamíliare. Ni che képe ndahecháiva chupekuéra ha koʼág̃a katu ahayhuvaʼerã chupekuéra. Ni che nantendevéima la oikóva”.

Nde ikatu rembohovaihína ótro provléma. Oiméne neañónte vaʼekue nde rógape térã heta tiémpore remoakã nde rogapy ha koʼág̃a ne tuvanga ojapo upéva. Eva omombeʼu avei ótro provléma: “Papa nopenaguasuivaʼekue mamáre, upévare ahasámi vaʼerã heta tiémpo che sýndi. Péro che tuvanga ombojeroviaiterei chupe. Órare oñemongeta hikuái ha oñondivémante ojapo opa mbaʼe. Che katu añandu ajekyraʼo ha apytamaha tapykuépe. Péro koʼág̃a ajepokuaamiéma ahávo”.

Oimérõ rehasa ko situasión, mbaʼépa ikatu rejapo rejepokuaa hag̃ua avei Eva ojapo haguéicha? La Biblia heʼi: ‘Opavave toikuaa peneakãguapyha’ (Filipenses 4:5). Griégo ñeʼẽme “akãguapy” heʼise “nañañemohatãiha ñande jaʼévapente”.  Upearã, 1) Ndereikoivaʼerã repensa ymave reiko porãve hague (Eclesiastés 7:10). 2) Eñehaʼã eikuaave ne família pyahúpe ha ehasa tiémpo hendivekuéra (1 Timoteo 6:18). 3) Iñimportantevéva katu ani retrata ne enemígoramo térã ndereikuaairõguáicha chupekuéra.

Koʼã mbohapy mbaʼégui, mbaʼépepa rembaʼapovevaʼerã? ․․․․․

Mbohapyha: Ani rehaʼarõ pendetrata peteĩchapa

Peteĩ mitãkuña hérava Laura omombeʼu: “Che tuvanga ningo ombojeroviaiterei vaʼekue ifamíliape. Haʼekuéra hoʼusévante ojejogua, ojehecha umi pelíkula haʼekuéra ohechasévante... nambre, haʼekuéra oipotávante voi ojejapo!”. Añetehápe ndaigustomoʼãi voi rehecháramo ótropente oñembojerovia. Mbaʼépa ikatu rejapo péicha jave? Reñehaʼãvaʼerã repensa mbaʼérepa oiméne otrata chupekuéra upéicha. Haʼekuéra ningo ifamília ha umi mbaʼe ohasámava oñondive omoag̃uive chupekuéra ojuehe. Katuete nde avei rehayhuve nde sýpe, péro nderejepokuaaguasúi ne tuvangáre, ajépa?

Ne tuvanga ombojeroviavéramo jepe ifamíliape ndeʼiséi ndetrata vaiha. Opavave  ñanediferénte ojuehegui ha upévare nerehaʼarõivaʼerã voi pendetrata peteĩchapa. Upéicharõ, reiko rangue rejeplagea ombojerovia haguére ifamíliape, mbaʼére piko nderehechái umi mbaʼe ojapovahína nderehehápe?

Mbaʼe mbaʼe reikotevẽvapa omoĩ ndéve ne tuvanga?

․․․․․

Oĩvépa peteĩ mbaʼe reikotevẽva? Mbaʼépa upéva?

․․․․․

 Oiméramo upéicha, reñemongeta porãnte vaʼerã ne tuvanga ndive.

Tuicha nepytyvõta nepasiénsiaramo

Saʼi saʼípente voi enterovéva peñeñandu porãta ha pejepokuaavéta pehóvo. Upe rire pejoayhuvétama ha pejeroviavéta ojuehe. Upe aja nepasiensiavaʼerã, ani reimoʼã peteĩ tesapirĩme peikotamaha oñofamília teéicha.

Tomás sy omenda jeýrõ guare ijetuʼuvaʼekue chupe ojepokuaa hag̃ua ifamília pyahúre. “Mama ningo cuatro voi imemby ha iména katu mbohapy ifamília. Ára ha pyhare roiko vai ha rojodiskuti, ndaigústoi mbaʼeve.” Mbaʼépa oipytyvõ chupekuéra ogueropuʼaka hag̃ua ko situasión? Tomás heʼi: “Rojapo la Biblia heʼíva ha upéicha rosolusiona ore provlemakuéra”.

PE KAPÍTULO OÚVAPE

Mbaʼéichapa rejogueraha ne ermanokuérandi? Reiko vaípa manterei hendivekuéra?

[Nóta]

TÉYSTO OĨVA LA BÍBLIAPE

‘Iporãve remohuʼã peteĩ tembiapo remoñepyrũ rangue. Ha rehaʼarõkuaa reñembotuicha rangue.’ (Eclesiastés 7:8)

PETEĨ KONSÉHO

Reñatende porã vaʼerã ndejehe, ani ág̃a neakãraku ne ermána térã ne ermanoangáre. Upévare koʼág̃ama voi reñehaʼãvaʼerã rehechauka nderekopotĩ ha neakãguapytaha reiko ha reñemonde lájare.

REIKUAÁPARAʼE?

Ne ermáno térã ne ermanangápe katuete oiméne ijetuʼu avei ojepokuaa hag̃ua ifamília pyahúre.

UMI MBAʼE AJAPÓTAVA!

Arrespetavéta che tuvangápe chemanduʼáramo koʼã mbaʼe porã ojapóvare orerehehápe (ehai mokõi mbaʼe): ․․․․․

Che ermanoanga chetratáramo ku ndachekuaairõguáicha chemanduʼáta Romanos 12:21 heʼívare ha ajapóta péicha: ․․․․․

Mbaʼépa aporanduse che ru (sýpe) térã che tuvangápe (syangápe) ko témare? ․․․․․

NDÉPA MBAʼE ERE?

● Mbaʼépa oiméne oipyʼapy ne tuvanga ha ifamíliape oúmarõ koʼág̃a oiko penendive?

● Mbaʼérepa iñimportánte repensa amo gotyove ikatutaha pejogueraha porã ne família pyahúndi?

[Komentário oĩva páhina 38-pe]

“Mama omendavaʼekue dos vése ha ojedivorsia jey, péro koʼag̃aite peve ajegueraha porã umi che tuvanga raʼykuérandi. Ndaikatuichéne ambojoja mbaʼevére umi mbaʼe porã ahasavaʼekue hendivekuéra”. (Laura)

[Taʼanga oĩva páhina 39-pe]

Ojogueraha porã hag̃ua mokõi família, oñekotevẽ tiémpo ha entéro oñehaʼãvaʼerã. Haʼete ku rejapóva méskla: remoĩ y ha seménto ha heta reiko hese ojeheʼa porã hag̃ua