KAPITLU 5

Kif Nistaʼ Nkampa Meta Ġenitur Jerġaʼ Jiżżewweġ?

JISTAʼ jkun li l-​ġenitur tiegħek ikun ferħan se jtir dakinhar li jerġaʼ jiżżewweġ. Iżda int forsi ma tħoss l-​ebda ferħ! Għala? Iż-​żwieġ mill-​ġdid taʼ ġenitur ikisser it-​tama li l-​ġenituri bijoloġiċi tiegħek għad xi darba jerġgħu lura flimkien. Ukoll, iż-​żwieġ mill-​ġdid jistaʼ jkun taʼ wġigħ b’mod partikulari meta jseħħ eżatt wara l-​mewt taʼ ġenitur għażiż.

Kif ħassejtek meta xi ħadd mill-​ġenituri tiegħek reġaʼ żżewweġ? Agħmel ✔ maġenb id-​deskrizzjonijiet li japplikaw għalik.

Ħassejt . . .

□ Ferħ

□ Nuqqas taʼ sigurtà

□ Tradiment

□ Għira għall-​ġenitur tar-​rispett

□ Ħtija taʼ tradiment għax bdejt inħobb lill-​ġenitur tar-​rispett

Din l-​aħħar reazzjoni tistaʼ tkun kaġunata minn sens taʼ lealtà lejn il-​ġenitur tiegħek li jkun ġie nieqes. Tkun xi tkun ir-​raġuni, is-​sentimenti li ssemmew hawn fuq jistgħu jġegħluk tisfoga l-​uġigħ emozzjonali tiegħek b’modi li jkunu taʼ ħsara.

 Pereżempju, għandek mnejn li l-​ħin kollu tagħmel il-​ħajja diffiċli għall-​ġenitur tar-​rispett. Forsi saħansitra tipprova taqlaʼ l-​inkwiet bejn il-​ġenitur tiegħek u l-​ġenitur tar-​rispett, bit-​tama li tifridhom. Madankollu, proverbju għaqli jwissi: “Min iħarbat daru jiret ir-​riħ”—jiġifieri jispiċċa b’xejn. (Proverbji 11:29, Għaqda Biblika Maltija) M’għandekx għalfejn taqaʼ f’din in-​nassa. Int tistaʼ tkampa mat-​taqlib emozzjonali tiegħek b’modi iktar pożittivi. Ikkunsidra xi ftit eżempji.

L-​1 Sfida: Tkampa mal-​Awtorità li Jkollu Ġenitur tar-​Rispett

Mhuwiex faċli li tissottometti ruħek għall-​awtorità taʼ ġenitur ġdid. Meta tiġi mitlub tagħmel xi ħaġa, għandu mnejn tiġik it-​tentazzjoni li tkun pront u tgħid, ‘Int mhux ommi/missieri!’ Tweġiba bħal din forsi tagħtik sens taʼ sodisfazzjon temporanju, iżda tkun qed turi immaturità min-​naħa tiegħek.

Mill-​banda l-​oħra, mod wieħed kif turi li int obdejt il-​parir tal-​Bibbja biex ‘tikber għalkollox fil-​mentalità tiegħek,’ hu billi tissottometti ruħek għall-​awtorità tal-​ġenitur tar-​rispett. (1 Korintin 14:20) Tabilħaqq, il-​ġenitur tar-​rispett iwettaq id-​dmirijiet li għandu ġenitur naturali u jistħoqqlu r-​rispett tiegħek.​—Proverbji 1:8; Efesin 6:1-​4.

Id-​dixxiplina taʼ ġenitur tar-​rispett normalment tkun espressjoni taʼ mħabbtu għalik. (Proverbji 13:24) “Missieri tar-​rispett jiddixxiplinana,” tgħid Yvonne, “iżda hekk suppost jagħmlu l-​missirijiet naturali. Inħoss li jekk ma nismax mill-​pariri tiegħu, inkun bħallikieku qed ngħid li ma jimpurtanix li matul is-​snin hu pprovdielna materjalment u spiritwalment—inkun qed nuri nuqqas taʼ gratitudni.”

Xorta waħda, jistaʼ jkun li jkollok raġunijiet validi biex tilmenta. Jekk inhu hekk, agħti prova li int ‘kbirt’ billi tagħmel bħalma jħeġġeġ Kolossin 3:13: “Komplu ssaportu lil xulxin u aħfru lil xulxin mill-​qalb jekk xi ħadd għandu għalxiex jilmenta kontra ħaddieħor.”

 Hawn taħt, ikteb żewġ kwalitajiet tajbin jew iktar li għandu l-​ġenitur tar-​rispett.

․․․․․

Jekk iżżomm f’moħħok il-​kwalitajiet tajbin tal-​ġenitur tar-​rispett, kif tistaʼ tiġi megħjun tirrispettah iktar?

․․․․․

It-​2 Sfida: Titgħallem Taqsam maʼ Ħaddieħor u Ċċedi

“Missieri żżewweġ darbtejn,” jiftakar Aaron, li għandu 24 sena. “Sibtha diffiċli nuri affezzjoni lejn kull familja ġdida. Għall-​ewwel kienu biss stranġieri għalija, iżda ntqalli li kelli l-​obbligu li nurihom imħabba. Din is-​sitwazzjoni ħawditni.”

Anki int forsi tiffaċċja sfidi diffiċli. Pereżempju, għandek mnejn ikollok iċċedi l-​pożizzjoni tiegħek bħala l-​akbar jew l-​uniku wild. Jekk int ġuvni, għandek mnejn li għal żmien twil ħassejt li int kont il-​wieħed responsabbli biex tieħu ħsieb il-​familja—responsabbiltà li issa waqgħet f’idejn missierek tar-​rispett. Jew forsi tħossok bħal Yvonne. Hi tgħid: “Missieri qatt ma kien jagħti kas ommi, u għalhekk kont drajtha tagħti l-​attenzjoni lili biss. Iżda meta ommi reġgħet iżżewġet, missieri tar-​rispett kien juriha ħafna attenzjoni. Kienu jqattgħu ħafna ħin fil-​kumpanija taʼ xulxin u kienu jitkellmu flimkien, u kont inħoss li kien qed jisraqhieli. Iżda, fl-​aħħar irnexxieli nidra.”

Bħal Yvonne, int kif tistaʼ tidra? Il-​Bibbja tagħti l-​parir: “Ħa jkun jaf kulħadd kemm intom raġunevoli.” (Filippin 4:5) Il-​kelma oriġinali tradotta “raġunevoli” kienet tfisser “li ċċedi” u kienet tagħti sens taʼ li wieħed ikollu attitudni li ma jinsistix fuq id-​drittijiet kollha tiegħu. Kif tistaʼ tapplika dan il-​parir? (1) Evita li toqgħod thewden fuq il-​passat.  (Ekkleżjasti 7:10) (2) Kun lest li taqsam mal-​ġenitur u ħutek tar-​rispett. (1 Timotju 6:18) (3) Tittrattahomx bħala stranġieri.

Fuq liema minn dawn il-​punti li ssemmew hawn fuq għandek bżonn taħdem l-​iktar? ․․․․․

It-​3 Sfida: Tkampa maʼ Trattament Differenti

“Missieri tar-​rispett kien iħobb lil uliedu ħafna iktar milli kien iħobb lili u lil oħti,” tgħid Tara. “Hu kien jixtrilhom l-​ikel li kienu jħobbu jieklu u jikrilhom il-​films li riedu jaraw. Kien jagħmel minn kollox biex jikkuntentahom.” Trattament bħal dan hu diffiċli biex tkampa miegħu. X’jistaʼ jkun t’għajnuna? Ipprova ifhem għala ġenitur tar-​rispett forsi ma jħossux bl-​istess mod lejn wild tar-​rispett bħalma jħossu lejn il-​wild naturali tiegħu. Forsi dan ma jkunx minħabba r-​rabta tad-​demm mal-​wild naturali tiegħu, iżda minħabba li jkunu għexu u esperjenzaw affarijiet flimkien għal iktar żmien. Wara kollox, anki int għandek mnejn tħossok iktar qrib tal-​ġenitur naturali tiegħek milli tal-​ġenitur tar-​rispett.

Iżda hemm distinzjoni importanti bejn li tiġi trattat b’mod ugwali u li tiġi trattat b’mod ġust. In-​nies għandhom personalitajiet uniċi u bżonnijiet differenti. Mela minflok ma tkun  konċernat iżżejjed dwar jekk il-​ġenitur tar-​rispett huwiex jittrattak b’mod ugwali, ipprova ara jekk huwiex jistinka biex jissodisfa l-​bżonnijiet tiegħek.

Liema bżonnijiet għandek int li jissodisfalek il-​ġenitur tar-​rispett?

․․․․․

Liema bżonnijiet tħoss li mhumiex qed jiġu sodisfati?

․․․․․

 Jekk tħoss li xi wħud mill-​bżonnijiet tiegħek mhumiex qed jiġu sodisfati, għala ma tiddiskutix il-​kwistjoni b’mod xieraq mal-​ġenitur tar-​rispett?

Il-​Paċenzja Tagħti Riżultati Tajbin!

Normalment, iridu jgħaddu diversi snin qabel ma l-​fiduċja tiżviluppa sal-​punt li l-​membri taʼ familja li fiha jkun hemm xi ġenitur tar-​rispett iħossuhom komdi maʼ xulxin. Imbagħad, id-​drawwiet u l-​valuri differenti jkunu jistgħu jiġu amalgamati flimkien biex joħolqu rutina effiċjenti. Għalhekk, kun paċenzjuż! Tistenniex li mill-​ewwel se jkun hemm l-​imħabba u l-​atmosfera taʼ familja.

Meta ommu reġgħet iżżewġet, Thomas ħassu skomdu ferm. Ommu kellha erbat itfal, u r-​raġel li żżewġet kellu tlieta. “Kien ikollna ġlied, argumenti, nuqqas taʼ paċi, u tensjonijiet emozzjonali xejn sbieħ,” kiteb Thomas. X’kienet is-​soluzzjoni li fl-​aħħar irnexxiet? “Meta bdejna napplikaw il-​prinċipji tal-​Bibbja, il-​problemi ġew solvuti.”

FIL-​KAPITLU LI JMISS

Xi ngħidu jekk ħutek kollha huma ħutek naturali iżda jirritawk?

SKRITTURA PRINĊIPALI

“Aħjar it-​tmiem taʼ xi ħaġa milli l-​bidu tagħha. Aħjar min hu paċenzjuż milli min għandu spirtu supperv.”​—Ekkleżjasti 7:8.

SUĠĠERIMENT

Meta tgħix taħt l-​istess saqaf m’aħwa ġodda tas-​sess oppost jistgħu jinbtu xi ġibdiet sesswali. Għalhekk, ipprova waqqaf lilek innifsek milli tberren ħsibijiet li jqanqluk sesswalment, u kun ċert li la bl-​ilbies u lanqas bil-​kondotta tiegħek ma tkun provokattiv/a sesswalment.

KONT TAF . . . ?

Anki ħutek tar-​rispett jistgħu jsibuha diffiċli biex jidraw l-​atmosfera tal-​familja l-​ġdida.

L-​AZZJONI LI SE NIEĦU

Se nipprova nirrispetta iktar lill-​ġenitur tar-​rispett billi niftakar dawn l-​affarijiet tajbin li għamel għall-​familja (ikteb żewġ affarijiet pożittivi): ․․․․․

Jekk ħuti tar-​rispett ma jittrattawnix sew, nistaʼ napplika l-​prinċipju f’​Rumani 12:21 billi nagħmel dan li ġej: ․․․․․

Dak li nixtieq nistaqsi lill-​ġenitur tiegħi jew lill-​ġenitur tar-​rispett dwar dan is-​suġġett hu ․․․․․

INT X’TAĦSEB?

● Liema beżgħat għandu mnejn ikollu l-​ġenitur jew ħutek tar-​rispett dwar li jingħaqdu mal-​familja tiegħek?

● Għala hu importanti li tħares lil hinn mis-​sitwazzjoni preżenti tar-​relazzjonijiet fil-​familja l-​ġdida tiegħek?

[Kumment f’paġna 38]

“It-​tieni żwieġ t’ommi spiċċa f’divorzju. Iżda, għadni qrib ħafna taʼ ħuti tar-​rispett sal-​ġurnata tal-​lum. Il-​fatt li saru parti minn ħajti kien wieħed mill-​aqwa affarijiet li qatt ġrawli.”​—Tara

[Stampa f’paġna 39]

It-​taħlit taʼ żewġ familji flimkien hu bħat-​taħlit tal-​ilma mas-​siment—jinvolvi ħin u sforz, iżda r-​riżultat aħħari jistaʼ jkun wieħed b’saħħtu u dejjiemi