Nso ke N̄kpesịne?
Ibuot 11
Nso ke N̄kpesịne?
Heather eben̄e idem ndiwọrọ, edi idem akpa ete ye eka esie ndikụt se enye esịnede.
Ete esie ofiori ete: “Nso ke esịne emi?”
Heather ọbọrọ ke n̄kpaidem ete: “Anam didie? N̄kọ nyom ndisan̄a ye mme ufan mi n̄kedep n̄kpọ.”
Eka esie ọdọhọ ete: “Udusịneke n̄kpọ oro uwọrọ ke ufọk emi!”
Heather okụni uyo ọwọrọ ete: “Mama, se kpukpru nditọwọn̄ ẹsịnede edi emi. Kamse, ọfọn̄ emi owụt se ndide!”
Ete esie ọbọrọ ke iyatesịt ete: “Imokop, edi nnyịn imaha se enye owụtde! Semi, dọk kokpụhọ ọfọn̄ oro idahaemi, mîdịghe ntre udukaha ebiet!”
NDITỌHỌ mban̄a ọfọn̄ idịghe obufa n̄kpọ. Ekeme ndidi nte ete ye eka fo ẹkesisịnede ọfọn̄ ke ini mmọ ẹkedade nte afo ama esinam ete ye eka mmọ ẹtọhọ ye mmọ. Ndien ini oro, okonyụn̄ etie mmọ ke idem nte etiede fi mfịn. Edi idahaemi mmọ ẹdidi ete ye eka, ndien mmọ n̄ko imaha nte afo esisịnede ọfọn̄ ndusụk ini.
Afo ete: Ọfọn̄ emi odot mi.
Mmọ ẹte: Etie nsuahade nsuahade.
Afo ete: Ọfọn̄ emi eye ọsọn̄!
Mmọ ẹte: Ososion̄o fi ndido idem.
Afo ete: Ọfọn̄ emi emem urua etieti.
Mmọ ẹte: Edi se ememde urua. . . . Ebiet ọfọn̄ nsekeyen!
Ndi enyene se ẹkpenamde mbak mbufo ẹditọhọ ke ntak ọfọn̄? Ih! Megan emi edide isua 23 ọfiọk se ẹkpenamde. Enye ọdọhọ ete: “Ufọn idụhe ndisitọhọ mban̄a ọfọn̄. Ẹmekeme ndineme n̄kpọ emi nsịm ubiere.” Ndi ẹkeme ndisịm utọ ubiere emi? Ndi oro ọwọrọ ke ana esịne n̄kpọ nte owo isua 40? Baba-o! Man esịm ubiere, ana afo ye ete ye eka fo ẹneme se mbufo kiet kiet ẹmade, ẹnyụn̄ ẹkọk ibuot ọtọkiet man ẹmek ọfọn̄ oro mmọ—ye afo nde—ẹdimade. Nso ididi ufọn nneme emi?
1. Eyesisịne ndiye ọfọn̄ emi idem mme ufan fo ẹdimade.
2. Ete ye eka fo idiwakke ndikụt ndudue nnọ fi ke ntak ọfọn̄ fo.
3. Ete ye eka fo ẹkeme ndinọ fi ifụre efen efen ke ini mmọ ẹkụtde ke afo emesisịne ọfọn̄ ọfọn.
Yak ineme se akpanamde man ọfiọk orụk ọfọn̄ emi ekpesịnede. Kere ban̄a ọfọn̄ kiet oro afo okokụtde ke Intanet m̀mê ke ufọkurua, oro ekerede ke ana imọ inyene. Akpa n̄kpọ emi akpanamde ekpedi . . .
Kere Ban̄a Mme Edumbet Bible
Bible inen̄ekede itịn̄ n̄kpọ iban̄a ọfọn̄. Ke nditịm ntịn̄, edida fi minit ifan̄ kpọt ndikot kpukpru item oro ẹnọde ke N̄wed Abasi ẹban̄a usịnen̄kpọ! Edi ke ekpri ini oro, oyokụt nti ndausụn̄ oro ẹnyenede ufọn. Ke uwụtn̄kpọ:
● Bible eteme iban ete ẹsịne ọfọn̄ oro “owụtde iso o-bụt ye eti ibuot.” a—1 Timothy 2:9, 10.
Ikọ oro “iso o-bụt” ekeme ndinam esịt etịmede fi. Afo emekeme ndikere ete, ‘Ndi ana nsisịne ntaha ọfọn̄?’ N̄wan̄ansa-o! Afo ndisịne ọfọn̄ oro owụtde iso o-bụt ọwọrọ ndisịne ọfọn̄ emi owụtde ke omokpono idemfo onyụn̄ ekere aban̄a ubieresịt mbon en̄wen. (2 Corinth 6:3) Ediwak ọfọn̄ ẹdu oro ẹwụtde iso o-bụt. Danielle emi edide isua 23 ọdọhọ ete: “Okposụkedi mîsimemke utom, emekeme ndisịne n̄kpọ ediye ediye edi unamke ube ubọk.”
● Bible etịn̄ nte akpakamade idem. Enye ọdọhọ ke akpana owụk ntịn̄enyịn ke “ndedịbe owo eke esịt”—mîdịghe, ke “ata owo emi afo edide ke esịtidem,” nte Today’s English Version ọdọhọde.—1 Peter 3:4.
Ọfọn̄ oro mînyeneke iso o-bụt ekeme ndinam odụk ndusụk owo enyịn, edi nti edu uwem fo ẹdinam ikpọ owo ye mme uke fo ẹka iso ẹkpono fi. Emekeme ndikere ke mme uke fo isidọn̄ke enyịn ke se esịnede. Edi se idude edi ke ndusụk mmọ isimaha ebeubọk usịnen̄kpọ. Brittany emi edide isua 16 ọdọhọ ete: “Esịt esitek mi ndikụt iban ẹsiode idem ẹnyan ẹnọ irenowo ke se mmọ ẹsịnede!” Kay enyịme ye se enye etịn̄de oro. Enye etịn̄ nte kiet ke otu n̄kani ufan esie ekesisịnede n̄kpọ ete: “Kpukpru ọfọn̄ esie ekesitie nte n̄kpọ eke enye ọdọhọde iren ete: ‘Ẹse mi mi-o.’ Enye ekesiyom irenowo ẹse imọ, oro akanam enye esisịne se ededi oro enye ọfiọkde ke eyenen̄ede odụk mmọ enyịn.”
Kop Uyo Ete ye Eka Fo
Ifọnke ndimen idiọk ọfọn̄ nsịn ke ekpat ufọkn̄wed man okokpụhọ ke ini esịmde ufọkn̄wed. Ete ye eka fo ẹyenen̄ede ẹnyene mbuọtidem ke idemfo edieke afo esitịn̄de akpanikọ ọnọ mmọ mûsunyụn̄ udịpke mmọ n̄kpọ—idem ọkpọkọm afo ekere ke mmọ idifiọkke. Ke nditịm ntịn̄, ọkpọfọn okop se ete ye eka fo ẹtịn̄de ẹban̄a ọfọn̄ oro oyomde ndisịne m̀mê oyomde ndidep. (Mme N̄ke 15:22)—Bọrọ mme mbụme oro ẹbụpde ke ekebe oro, “Nte Ẹkemede Ndisịm Ubiere Mban̄a Ọfọn̄” ke page 82 ye 83.
Edi ntak emi oyomde okop uyo mmọ? Emekeme ndikere ke ete ye eka fo iyomke etiene esịne n̄kpọ nte mme uke fo; edi ekikere oro inenke. Edi akpanikọ ke usụn̄ oro ete ye eka fo ẹsede n̄kpọ ekeme ndikpụhọde ye okwo, edi oro akam edi ke ufọn fo. Nataleine, n̄kaiferi emi edide isua 17, ọdọhọ ete: “Mmama nte ete ye eka mi ẹsinọde mi item sia nyomke ndiwọrọ ke ufọk n̄kesuene idem nnyụn̄ nyomke usịnen̄kpọ mi anam mme owo ẹtịn̄ idiọk ẹban̄a mi.”
Se idude edi nte ke adan̄aemi osụk odụn̄de ye ete ye eka fo, afo odu ke idak mmọ. (Colossae 3:20) Nte ededi, edieke nte mmọ ẹsede n̄kpọ an̄wan̄ade fi—nte afo esede n̄kpọ onyụn̄ an̄wan̄ade mmọ—oyokụt ke ẹyesọsọp ẹsịm ubiere. Ndien emi ekeme ndinam ẹtre nditọhọ ke ntak ọfọn̄.
Item: Enyene n̄kpọ emi anade ọfiọk ke ini esede idem ke ukụtiso man okụt nte ọfọn̄ oro esịnede etiede fi ke idem. Ọfọn̄ oro etiede nte owụt iso o-bụt ekeme ndikabade n̄kpọ en̄wen ke ini etiede-tie m̀mê ke ini onụhọde ete imen n̄kpọ. Edieke ekemede, dọhọ ete m̀mê eka fo, mîdịghe ufan fo oro ọkọride esịm ọyọhọ idaha etiene fi ese nte ọfọn̄ fo etiede.
Ndi umaha nte etiede? Nso ke akpanam aban̄a oro?
[Ikọ Idakisọn̄]
a Okposụkedi Bible ọnọde iban item emi, edumbet oro ebehe irenowo n̄ko.
AKPAN ITIE N̄WED ABASI
“Ẹkûyak mbanaidem mbufo edi . . . edisịne ndiye ọfọn̄, edi ẹyak edi ndedịbe owo eke esịt.”—1 Peter 3:3, 4.
ITEM
Kûsịne ọfọn̄ emi osion̄ode owo ndido idem. Ndisịne utọ ọfọn̄ emi edinam etie nte ke oyom ufan-ima ke mbrenyịn ye nte ke ekere aban̄a idemfo kpọt.
NDI AMA ỌFIỌK . . . ?
Se afo esịnede ke ẹsiwak ndida mbiere orụk owo emi afo edide.
SE NDINAMDE
Owo ke ubon mi m̀mê ufan mi oro ọkọride esịm ọyọhọ idaha oro n̄kemede ndibụp n̄kpọ mban̄a ọfọn̄ oro n̄kpedepde edi ․․․․․
Ini en̄wen oro ndifiakde ndep se ndisịnede, mme n̄kpọ oro ndikerede mban̄a ẹdi: ․․․․․
Se ndibụpde ete ye eka mi mban̄a n̄kpọ emi edi ․․․․․
AFO EKERE DIDIE?
● Nso isinam mme ete ye eka ẹtọhọ ye nditọ mmọ ke ntak usịnen̄kpọ?
● Nso ke ekeme ndikpep nto ete ye eka fo ke ini enyenede nneme ye mmọ aban̄a usịnen̄kpọ?
[Se ẹwetde ke ikpọ abisi ke page 81]
“Mma n̄kụt nte nditọiban ẹsịnede ọfọn̄ oro osion̄ode owo ndido idem, nsikponoke mmọ aba nte n̄kesikponode. Edi mma n̄kụt nte mme owo ẹsịnede ọfọn̄ oro enyenede iso o-bụt onyụn̄ eyede, mmesidọhọ ke esịt mi nte, ‘Nte nyomde mme owo ẹse mi edi oro.’”—Nataleine
[Ekebe/Ndise ke page 82, 83]
Utomufọk
Nte Ẹkemede Ndisịm Ubiere Mban̄a Ọfọn̄
Item: Da n̄wed en̄wen wet se idude ke page mbiba emi. Dọhọ ete ye eka fo ẹwet n̄kpọ ẹyọhọ enye oro odude ke ubọk nnasia ke adan̄aemi afo ewetde n̄kpọ ọyọhọ eke ubọk ufien. Ẹma ẹkụre, bọ eke mmọ nyụn̄ yak okwo nọ mmọ; ekem ẹneme se ẹkewetde. Ndi ẹmekụt mme n̄kpọ oro akpade mbufo idem? Nso ke ẹkedifiọk ẹban̄a utọ ọfọn̄ oro owo mbufo kiet kiet akpamade, emi mbufo mîkọfiọkke ke akpa?
Okwommọ Kere ban̄a akpan ọfọn̄ kiet emi oyomde ndisịne m̀mê oyomde ndidep.
Ntak emi enen̄erede ama ọfọn̄ emi? Wet 1 esịm 6 kpere mme ntak oro ẹdude ke idak emi. Tọn̄ọ ke enye oro adade nte ata akpan ntak.
․․․․․ Enyịn̄ mme andinam ọfọn̄ emi
․․․․․ Nte owo isio uduot edimade ọfọn̄ emi
․․․․․ Nte mme ufan mi ẹmade ọfọn̄ emi
․․․․․ Nte ọfọn̄ emi odotde mi
․․․․․ Ekọmurua
․․․․․ Ntak en̄wen ․․․․․
Ekeme ndidi akpa ikọ emi ediwọrọde ete ye eka mi ke inua ke ini mmọ ẹkụtde ọfọn̄ emi edidi
□ “Tutu amama udusịneke utọ n̄kpọ oro!”
□ “Idiọkke ikaha.”
□ “Idiọkke.”
Edieke mmọ mîmaha ọfọn̄ emi, ekeme ndidi sia
□ “Ososion̄o owo ndido idem.”
□ “Etie nsuahade nsuahade.”
□ “Ẹsịne enye ẹkaha idahaemi.”
□ “Owụt ke nnyịn inọhọ fi eti ukpep.”
□ “Ọsọn̄ urua akaha.”
□ Ntak en̄wen ․․․․․
Ndi Imekeme Nditie Ọtọkiet Nneme N̄kpọ Emi?
Nso ke n̄keme ndisio nda ke se ete ye eka mi ẹtịn̄de?
․․․․․
Ndi enyene se ẹkemede ndinam ke ọfọn̄ emi man mmọ ẹnyịme mi nsịne?
․․․․․
Eke Ete ye Eka Fo Kere ban̄a akpan ọfọn̄ kiet oro eyen mbufo oyomde ndisịne m̀mê oyomde ndidep.
Ẹkere ke nso inam eyen mbufo ama ọfọn̄ emi? Ẹwet 1 esịm 6 ẹkpere mme ntak oro ẹdude ke idak emi. Ẹtọn̄ọ ke enye oro ẹdade nte ata akpan ntak.
․․․․․ Enyịn̄ mme andinam ọfọn̄ emi
․․․․․ Nte owo isio uduot edimade ọfọn̄ emi
․․․․․ Nte mme ufan esie ẹmade ọfọn̄ emi
․․․․․ Nte ọfọn̄ emi odotde enye
․․․․․ Ekọmurua
․․․․․ Ntak en̄wen ․․․․․
Akpa ikọ emi ediwọrọde nnyịn ke inua edidi
□ “Tutu amama udusịneke utọ n̄kpọ oro!”
□ “Idiọkke ikaha.”
□ “Idiọkke.”
Se ikemede ndinam nnyịn ikûma ọfọn̄ emi edi
□ “Ososion̄o owo ndido idem.”
□ “Etie nsuahade nsuahade.”
□ “Ẹsịne enye ẹkaha idahaemi.”
□ “Owụt ke nnyịn inọhọ enye eti ukpep.”
□ “Ọsọn̄ urua akaha.”
□ Ntak en̄wen ․․․․․
Ndi Imekeme Nditie Ọtọkiet Nneme N̄kpọ Emi?
Ndi idọhọ enye ọkpọn̄ ọfọn̄ oro n̄kukụre sia nnyịn mîkpamaha ndisịne utọ ọfọn̄ oro?
□ Ih □ Etie ntre □ Ihih
Ndi enyene se ẹkemede ndinam ke ọfọn̄ oro man edi se enye esịnede?
․․․․․
Se Ibierede
[Box on page 84]
Nso Kaban̄a Irenowo?
Mme edumbet Bible oro ẹnemede ke ibuotikọ emi ẹbehe irenowo n̄ko. Sịne n̄kpọ ke usụn̄ oro owụtde iso o-bụt. Yak mme owo ẹkụt ndedịbe owo esịt fo—kpa ata owo emi afo edide ke esịtidem. Ke ini oyomde ndidep n̄kpọ oro edisịnede, bụp idemfo ete: ‘N̄kpọ emi edinam mme owo ẹtịn̄ nso ẹban̄a mi? Ndi se mmọ ẹtịn̄de enen̄ede edi se ami ndide?’ Ti ke se afo esịnede edi usụn̄ kiet ndiwụt orụk owo emi afo edide. Kụt ete ke se esịnede ekem ye se enịmde ke akpanikọ.
[Ndise ke page 80]
Ọfọn̄ fo etie nte idiọn̄ọ oro owụtde mme owo se afo edide. “Idiọn̄ọ” fo owụt ke afo edi nso?
Ekeme Ndidi Ayama Mmọ Emi N̄ko
MME UYEN YE N̄KPARAWA
N̄kparawa Owo Ẹbụp
Mme mbụme emi n̄kparawa owo ẹsiwakde ndibụp mban̄a idan̄, mme ufan, mme ete ye eka, ufọkn̄wed, ye mme n̄kpọ en̄wen.
