Kapitulo 12

Unsaon Nako Pagbaton ug Dugang Kompiyansa sa Kaugalingon?

Oo Dili/Wala

Kon manamin ka, ganahan □ □

ka ba sa imong hitsura?

Para nimo, duna ka bay □ □

dalayegong mga abilidad?

Makabarog ka ba sa pagpit-os □ □

sa ubang batan-on?

Modawat ka bag tambag? □ □

Makapalabay ka ba sa □ □

negatibong komento sa uban?

Mibati ka ba nga gimahal ka? □ □

Giatiman mo ba ang imong panglawas? □ □

Malipay ka ba dihang molampos ang uban? □ □

Para nimo, malamposon ka ba? □ □

Kon daghan kag tubag nga “dili/wala,” tingali wala lang ka makakita sa imong maayong mga kinaiya kay kulang kag kompiyansa sa kaugalingon. Kining kapituloha gituyog sulat sa pagtabang nimo sa pagkakita niana!

 KADAGHANANG batan-on dili ganahan sa ilang hitsura ug walay salig sa ilang kaugalingon. Para nila, ang uban mas maayo kay kanila. Ingon ka ba usab niana? Kon mao, wala ka mag-inusara!

“Maguol ko sa akong mga kapakyasan. Grabe ra kong makasaway sa akong kaugalingon.”—Leticia.

“Bisag unsa ka pa ka gwapo o ka gwapa, duna gyoy molabaw nimo.”—Haley.

“Dili ko mahimutang atubangan sa daghang tawo. Mahadlok kong maghunahuna sila nga wala koy ayo.”—Rachel.

Kon ingon ka niana, ayawg kaluya. Dunay solusyon niana. Tagda kining tulo ka paagi nga makadugang sa imong kompiyansa.

Pagtabang sa Uban

Tekstong makatabang. “Adunay labaw nga kalipay sa paghatag kay sa pagdawat.”—Buhat 20:35.

Kahulogan niini. Kon motabang ka sa uban, gitabangan mo ang imong kaugalingon. Sa unsang paagi? “Ang pagkamahinatagon pagagantihan,” nag-ingon ang panultihon sa Bibliya. “Paghatag ug usa ka basong tubig, ug ikaw makadawat ug usa ka basong tubig.” (Proverbio 11:25, Contemporary English Version) Sa pagkatinuod, mogaan ang imong pamati kon motabang ka sa uban! *

“Maghunahuna ko kon unsay akong ikatabang sa uban diha sa kongregasyon. Ang pagpakitag gugma ug pagtagad sa uban makapagaan sa akong pamati.”—Breanna.

“Ang Kristohanong ministeryo mapuslanon kay makatabang kini nimo sa paghunahuna sa  uban imbes sa paghunahuna lang sa imong kaugalingon.”—Javon.

Timan-i: Ayaw pagpaabot ug balos kon motabang ka. (Mateo 6:2-4) Ang dili maayong motibo dili makaayo nimo ug mamatikdan kini sa uban!—1 Tesalonica 2:5, 6.

Sulayi kini. May natabangan ka ba kaniadto? Kinsa siya, ug unsay imong natabang niya?

․․․․․

Unsay imong gibati human niana?

․․․․․

Kinsa pa ang mahimo nimong tabangan? Isulat kon unsay imong ikatabang.

․․․․․

Pagpangitag Higala

Tekstong makatabang. ‘Ang tinuod nga higala mahigugmaon sa tanang panahon, ug maoy usa ka igsoon nga natawo alang sa panahon sa kasakit.’—Proverbio 17:17.

Kahulogan niini. Dako kaayog tabang ang maayong higala panahon sa kalisdanan.  (1 Samuel 18:1; 19:2) Bisan ang paghunahuna lang nga dunay nabalaka nimo makapalipay na. (1 Corinto 16:17, 18) Busa pakigsuod niadtong maayog impluwensiya nimo.

“Ang tinuod nga higala dili mopasakit nimo.”—Donnell.

“Usahay igo nang mahibalo ka nga dunay nahingawa nimo. Mopabati kini nimo nga gipabilhan ka.”—Heather.

Timan-i: Paneguroa nga dili ka magpakaaron-ingnon aron lang moangay nimo ang imong mga higala. (Proverbio 13:20; 18:24; 1 Corinto 15:33) Ang pag-apil-apil ug mga binuang aron lang dawaton sa uban makapaubos sa imong pagkatawo ug mopabati nimo nga gipahimuslan.—Roma 6:21.

Sulayi kini. Isulat sa ubos ang ngalan sa imong higala nga makatabang nimo aron makabaton kag dugang kompiyansa sa kaugalingon.

․․․․․

Paggahin ug panahon sa pagpakig-uban sa higala nga imong gisulat.—Matikdi: Dili kinahanglang kaedad nimo siya.

Ayawg Kaluya Kon Masayop Ka

Tekstong makatabang. “Ang tanan nakasala ug wala makaabot sa himaya sa Diyos.”—Roma 3:23.

Kahulogan niini. Dili ka hingpit. Nagpasabot kana nga may panahong masayop ka sa pulong o sa buhat. (Roma 7:21-23; Santiago 3:2) Bisag dili kalikayan nga masayop ka, makahimo ka sa pagkontrolar sa imong reaksiyon. Ang Bibliya nag-ingon: “Ang tawong matarong mahimong matumba sa makapito, ug siya mobangon gayod.”—Proverbio 24:16.

 “Usahay mawad-an kitag kompiyansa kon atong itandi ang atong kahuyangan sa maayong hiyas sa uban.”—Kevin.

“Kitang tanan dunay maayo ug dili maayong kinaiya. Angay natong ipasigarbo ang atong maayong kinaiya ug atong paningkamotang mausab ang dili maayong kinaiya.”—Lauren.

Timan-i: Ayaw himoang rason ang pagkadili-hingpit aron sa paghimog sala. (Galacia 5:13) Kon motuyo ka sa paghimog daotan, madaot ang imong relasyon kang Jehova nga Diyos, nga maoy labing importante sa tanan!—Hebreohanon 10:26, 27.

Sulayi kini. Isulat sa ubos ang kinaiya nga gusto nimong pauswagon.

․․․․․

Isulat ang petsa karon tapad sa kinaiya nga imong gisulat. Pangitag reperensiya nga makatabang nimo, ug obserbahi ang imong pag-uswag sulod sa usa ka bulan.

Ang Imong Tinuod nga Bili

Ang Bibliya nag-ingon nga “ang Diyos mas labaw kay sa atong mga kasingkasing.” (1 Juan 3:20) Kana nagpasabot  nga makakita siya sa imong tinuod nga bili nga dili nimo makita diha nimo. Apan mausab ba ang imong bili kay dili ka hingpit? Ibutang ta nga ang imong ₱1,000 dunay gamayng gisi. Imo ba kanang ilabay o isipong walay bili kay may gisi kana? Dili gyod! May gisi man o wala, ₱1,000 gihapon ang bili niana.

Ingon niana ang paglantaw sa Diyos kanimo. Siya makakita sa imong bili bisan pa sa imong kasaypanan. Siya makakita ug nagpabili sa imong mga paningkamot sa pagpahimuot kaniya bisag gamay kaayo kini para nimo! Sa pagkatinuod, ang Bibliya nagpasalig kanimo nga ‘ang Diyos dili kay dili-matarong nga kalimtan ang imong buhat ug ang gugma nga imong gipakita alang sa iyang ngalan.’—Hebreohanon 6:10.

SA SUNOD NGA KAPITULO

May panahon bang daw malumsan ka sa tumang kaguol? Kon mao, unsay imong mahimo bahin niana?

[Footnote]

TEKSTO

“Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.”—Galacia 6:4.

SUGYOT

Ayaw pag-ingon nga ‘wala koy ayo’ ug ‘pirme lang kong masayop.’ Kining mga pulonga makapaluya lang nimo. Hinunoa, dawata dili lang ang imong mga sayop kondili ang nahimo usab nimong maayo.

NAHIBALO KA BA . . . ?

Ang imong paglantaw sa imong kaugalingon makaapektar sa paglantaw ug tinagdan sa uban kanimo.

ANG AKONG PLANONG HIMOON!

Kini ang akong himoon kon sawayon ko sa ubang batan-on: ․․․․․

Kini ang akong himoon kon mga sayop lang nako ang akong makita: ․․․․․

Kon unsay akong gustong ipangutana sa akong ginikanan bahin niini: ․․․․․

UNSAY IMONG HUNAHUNA?

● Nganong ang mga batan-on sagad kulang ug kompiyansa sa kaugalingon?

● Nganong importante nga duna kay pagtahod sa imong kaugalingon?

[Blurb sa panid 88]

“Ang tawong hitsuraan mahimong mobati nga siya maot. O ang tawong dili kaayo hitsuraan mahimong mobati nga siya puwerteng gwapaha o gwapoha. Depende kana sa tinamdan.”—Alyssa

[Hulagway sa panid 90]

Ang bili sa kuwarta dili moubos tungod lang sa gisi—sa susama, ang imong bili sa panan-aw sa Diyos dili moubos tungod lang sa mga dili kahingpitan