KAPITULO 12

Kasano a Maaddaanak iti Kompiansa iti Bagik?

Wen Saan

No agsarmingka, magustuam kadi ti langam? □ □

Panagkunam, adda kadi maipagpannakkelmo a paglaingam? □ □

Kabaelam kadi a sarangten ti impluensia dagiti kapatadam? □ □

Maakseptarmo kadi dagiti nainkalintegan a pammabalaw? □ □

Kabaelam kadi a palabsen dagiti negatibo a komento dagiti sabsabali maipapan kenka? □ □

Mariknam kadi a maipatpategka? □ □

As-asikasuem kadi ti salun-atmo? □ □

Makipagragragsakka kadi kadagiti sabsabali no agballigida? □ □

Iti panagkunam, naballigika kadi iti biag? □ □

No saan ti sungbatmo iti sumagmamano kadagita a saludsod, nalabit saanmo laeng a makitkita dagiti paglaingam gapu ta kurang ti kompiansam iti bagim. Tulongannaka daytoy a kapitulo a mangtakuat kadagiti paglaingam!

 AWAN ti kompiansa ti adu nga agtutubo iti langada, kadagiti abilidadda, ken iti bagida no idilig kadagiti dadduma. Kastaka met kadi? No wen, saan la a sika ti kasta!

“Malidlidayak no mapanunotko dagiti pagkurkurangak. Masansan a siak met laeng ti kangrunaan a mangdildillaw iti bagik.”​—Leticia.

“Uray kasano ti kapintas wenno kaguapom, addanto latta makitam a napimpintas wenno naguguapo ngem sika.”​—Haley.

“Kaslaak la kandela a marunrunaw iti bain no makipulpulapolak kadagiti tattao. Ngamin, iti panagriknak ket awan serserbik iti imatangda.”​—Rachel.

Saanka a maupay no kasta met ti marikriknam. Adda makatulong kenka. Usigem ti tallo a banag a makatulong kenka tapno maaddaanka iti kompiansa ken makitam dagiti paglaingam.

Tumulongka

Kuna ti Biblia. “Ad-adu ti kinaragsak iti panangted ngem iti panangawat.”​—Aramid 20:35.

Kaipapananna. No tulongam dagiti sabsabali, tultulongam met ti bagim. Kasano? Kuna ti maysa a proverbio iti Biblia a “no managparaburka, rumang-ayka. Tulongam ti padam a tao ket tulongannaka met.” (Proverbio 11:25, Ti Baro a Naimbag a Damag Biblia) Wen, sigurado a dumakkel ti panagtalekmo iti bagim no tulongam dagiti sabsabali! *

“Pampanunotek no kasanok a matulongan dagiti sabsabali ken dagiti kakongregasionko nga agkasapulan. Naragragsakak no mangipakitaak iti ayat ken pannakaseknan kadagiti sabsabali.”​—Breanna.

 “Dakkel a tulong ti Nakristianuan a ministerio ta tignayennaka a mangpanunot nga ad-adda kadagiti sabsabali imbes a ti bagim.”​—Javon.

Palagip: Ti motibom a tumulong ket saan koma a gapu ta adda maalam a kasukatna. (Mateo 6:2-4) Saan a nasayaat dayta. Masansan a madlaw no saan nga umiso ti motibom!​—1 Tesalonica 2:5, 6.

Ti aramidem. Adda kadin natulongam? Siasino ken ania ti naitulongmo kenkuana?

․․․․․

Ania ti nariknam kalpasanna?

․․․․․

Siasino pay ti mabalinmo a tulongan? Isuratmo no kasanom a matulongan.

․․․․․

Makigayyemka

Kuna ti Biblia. “Ti pudno a kadua agayat iti isuamin a tiempo, ken ti kabsat a mayanak no adda rigat.”​—Proverbio 17:17.

Kaipapananna. No adda problemam, dakkel ti maitulong ti pudno a gayyem. (1 Samuel 18:1; 19:2)  Pumigsa ti pakinakemmo no ammom nga adda maseknan kenka. (1 Corinto 16:17, 18) Isu a makisinningedka kadagidiay nasayaat ti impluensiana.

“Dagiti pudno a gagayyem pabilgendaka.”​—Donnell.

“No dadduma, nagsayaat no ammon nga adda mangisakit kenka. Ngamin, mariknam a napategka.”​—Heather.

Palagip: Piliem a pakigayyeman dagidiay mangakseptar iti pudno a kinataom, a saan a kasapulan nga agpammarangka tapno laeng gayyemendaka. (Proverbio 13:20; 18:24; 1 Corinto 15:33) No agaramidka iti di umiso tapno laeng magustuandaka, bumaba ti panangmatmatmo iti bagim ken mariknam a gunggundawayandaka.​—Roma 6:21.

Ti aramidem. Isuratmo iti baba ti nagan ti gayyem a makatulong kenka a maaddaan iti kompiansa.

․․․․․

Apay a dimo iwayaan ti makikadua kenkuana?​—Laglagipem: Saan a kasapulan nga agkasadarankayo.

Dika Maupay no Nagkamalika

Kuna ti Biblia. “Amin nagbasol ken agkurang iti dayag ti Dios.”​—Roma 3:23.

Kaipapananna. Imperpektoka. Kayatna a sawen nga adda maibaga wenno maaramidmo a di umiso no dadduma. (Roma 7:21-23; Santiago 3:2) Saanmo a maliklikan ti agkamali ngem kabaelam a kontrolen ti reaksionmo. Kuna ti Biblia: “Ti nalinteg a tao uray matuang a maminpito, ket bumangon manen.”​—Proverbio 24:16, Ti Biblia.

 “No dadduma, bumassit ti panagtalektayo iti bagitayo no idiligtayo ti pagkapuyantayo iti paglaingan ti sabali a tao.”​—Kevin.

“Amintayo ket addaan iti nasayaat ken saan a nasayaat a galad. Rumbeng nga ipannakkeltayo dagiti nasayaat ken ilintegtayo dagiti saan a nasayaat.”​—Lauren.

Palagip: Dimo pagrason ti kinaimperpektom tapno iyugalim ti agbasol. (Galacia 5:13) No igagaram ti agaramid iti di umiso, mapukawmo ti kapatgan iti amin​—ti anamong ni Jehova a Dios!​—Hebreo 10:26, 27.

Ti aramidem. Isuratmo iti baba ti maysa a galad a kayatmo a pasayaaten.

․․․․․

Ikabilmo ti petsa ita nga aldaw iti abay ti galad nga insuratmo. Agsukimatka no kasanom a mapasayaat dayta, ken paliiwem ti pagrang-ayam iti makabulan.

Ti Pudno a Pategmo

Kuna ti Biblia a ti “Dios dakdakkel ngem kadagiti pusotayo.” (1 Juan 3:20) Kaipapananna a makitkitana  dagiti naimbag a galadmo a nalabit saanmo a makitkita. Ngem bumassit kadi ti pateg dayta gapu kadagiti pagkurangam? Ipapantayon nga adda kuartam a 1,000 pisos ngem adda bassit pigisna. Ibellengmo kadin wenno ibilangmon nga awan balorna gapu ta adda pigisna? Siempre saan! Adda man pigisna wenno awan, 1,000 latta ti balorna.

Kasta met laeng ti panangmatmat ti Dios kenka. Makitkitana ti pategmo uray no adda dagiti pagkurangam. Ap-apresiarenna dagiti panagreggetmo a mangparagsak kenkuana uray no iti panagriknam ket kasla awan unay ti kaes-eskan dagita! Wen, ipatalged kadatayo ti Biblia a ‘saan a nakillo ti Dios tapno lipatenna ti aramidmo ken ti ayat nga impakitam maipaay iti naganna.’​—Hebreo 6:10.

ITI SUMAGANAD A KAPITULO

Malaplapunoska iti nakaro a liday no dadduma? No kasta, ania ti mabalinmo nga aramiden?

[Footnote]

NAPAPATEG A TEKSTO

“Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o maipapan iti bagina met laeng, ket saan nga iti panangipadis iti sabali a tao.”​—Galacia 6:4.

BALAKAD

Saanmo nga ibagbaga iti bagim a, ‘kanayon la a palpak ti ar-aramidek’ ken ‘awan a pulos ti maar-aramidko a nasayaat.’ Ad-adda laeng a maawan ti kompiansam no kasta. Imbes ketdi, aklonem dagiti pagkurkurangam ken bigbigem met dagiti nasayaat a galadmo.

AMMOM KADI . . . ?

Ti panangmatmatmo iti bagim apektaranna ti panangmatmat ken ti panangtrato pay ketdi kenka dagiti dadduma.

DAGITI ARAMIDEK!

No uyawendak dagiti gagayyemko, masapul nga ․․․․․

No dagiti laeng pagkapuyak ti makitkitak, masapul nga ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Ania ti mabalin a makagapu nga agkurang ti kompiansa dagiti agtutubo?

● Apay a napateg a raemem ti bagim?

[Blurb iti panid 88]

Adda tao a nakapimpintas ngem kaskasdi a nalaad ti panagriknana iti bagina. Adda met tao a saan unay a napintas ngem ti panagriknana, isu ti kapintasan. Depende dayta iti panangmatmat ti maysa.’’​—Alyssa

[Ladawan iti panid 90]

Saan a bumaba ti balor ti kuarta gapu laeng ta adda pigisna. Umasping iti dayta, napategka latta iti Dios uray no adda dagiti pagkapuyam