KAPÍTULO 14

Mbaʼére piko namanói mbaʼe apytuʼu hag̃ua?

 “IPORÃVE amano mbaʼe kóicha aikove rangue”. Mávapa heʼivaʼekue ko mbaʼe? Ndojeroviái mbaʼe piko Ñandejárare ajeve heʼi upéicha? Ikatúpa jaʼe Ñandejára omboyke hague chupe? Nahániri. Ko mbaʼe heʼivaʼekue pe proféta Jonás. Haʼe ijerovia mbarete vaʼekue, péro upe jave oñeñandu yvýre (Jonás 4:3).

La Biblia ndeʼíri Jonás ojesuisidase hague. Péro upe heʼivaʼekuére jahechakuaa peteĩ mbaʼe iñimportánteva: Ñandejára siervokuéra ohasa asy avei, ha ndovyʼavéi rupi sapyʼánte oñandu nomeʼẽveietemaha (Salmo 34:19).

Mitãrusukuérape ojahoʼi jepi vyʼaʼỹ ha mbaʼembyasy, ha omanoséntema voi oikove rangue upéicha. Laura orekóva 16 áño omombeʼu: “Chéngo sapyʼaiténte aĩ porã ha upéi katu añedeprimi jeýma. Aréma aiko hague péicha. Sapyʼánte haʼéma voi ikuentaveha amano mbaʼe”. Rehendúmapa peteĩ ne amígo heʼíramo avei upéicha? Ha nde voi reñeñandúrõ ko mitãkuñáicha, mbaʼépa ikatu rejapo? Tenonderã jahechami mbaʼérepa oĩ opensáva péicha.

Mbaʼérepa oĩ opensáva péicha

Ñanemanduʼavaʼerã koʼág̃a rupi ‘ipohyiveha’ ohóvo ñande rekove oiko rupi heta mbaʼe vai ha umi imitãvape ijetuʼu jepi ogueropuʼaka hag̃ua umíva (2 Timoteo 3:1, ÑÑB). Avei oĩ oñeñandu vaíva ojavy haguére térã oimoʼã mbaʼevéma voi naisentidoiha chupekuéra g̃uarã (Romanos 7:22-24). Ikatu ojejapóraʼe hese peteĩ mbaʼe vai térã ojehugapa hese. Oĩ katu opensáva ojesuisida oiko haguére hasyháre heta tiémporema. Ha peteĩ tetãme ojejapórõ guare peteĩ estúdio ojetopa 100 mitãrusu ojesuisidavaʼekuégui, 90 oreko hague depresión. a

Enterove ñambohovái jepi heta mbaʼe vai. La Biblia  heʼi voi ‘opaite Ñandejára rembiapokue ipyahẽ ha ohasa asyha’ (Romanos 8:22, ÑÑB). Ha mitãrusukuéra oĩ avei umíva apytépe. Upévare oĩ oñeñandu vaíva ohasa jave koʼã mbaʼére:

● Omano chugui ihénte térã iñamígo

● Oĩ rupi provléma hogapýpe

● Inóta vai térã ojeaplasapa rupi koléhiope

● Oheja haguére chupe ichíko térã ichíka

● Ojeavusa térã ojehugapa rupi hese

Haimete enterove mitãrusu ombohovái koʼã mbaʼe. Mbaʼérepa upéicharõ oĩ ogueropuʼakáva ha umi nahanirietéva  voi? Doktorkuéra heʼi umi mitãrusu ojesuisida jepi oñemeʼẽtereígui iprovlémape, ha oimoʼã ndaikatumoʼãiha osolusiona oñehaʼãramo jepe. Añetehápe ningo nomanoséi hikuái, síno oipotánte opa iprovlemakuéra.

Ndaiporivéima piko mbaʼeve ikatuvaʼerã ojejapo?

Ikatu peteĩ ne amígo hetáma ohasa asy ha heʼi voi omanoseha opytuʼu hag̃ua. Oimérõ upéicha, mbaʼépa ikatu rejapo?

Ere ne amígope toheka peteĩ oipytyvõvaʼerã chupe ani hag̃ua ojapo upéva. Ikatu nde voi remombeʼu peteĩ kakuaápe oipytyvõtava chupe. Ani rehaʼarõ rejapo hag̃ua upéva, heʼíramo jepe ndéve ne amígo ipochytaha nendive. Nemanduʼákena upéicha ikatuha resalva chupe.

Ha oimérõ nde hína upe rejesuisidaséva? Ndovaléi ningo reguerokirirĩ upe rehasáva. Upéva rangue, emombeʼu nde tuvakuérape térã ne amígope. Eheka peteĩ ojepyʼapy añetéva nderehe, ikatúva nerendu ha nepytyvõ. Reñeʼẽramo ne provlémare, tuicha ndepyʼaguapýta upéi. b

Remombeʼu hague ne provléma ndeʼiséi opatamaha. Péro upe nerendúva ikatu nepytyvõ rentende hag̃ua mbaʼérepa reñeñandu péicha. Avei heʼikuaa ndéve mbaʼéichapa ikatu rembohovái porãve umi mbaʼe rehasáva.

Nderehasaʼasymoʼãi opa árare

Aníkena nderesarái: Umi provléma ningo ndahaʼéi opa ára g̃uarã, ivaivéramo jepe ne  situasión katuete okambiavaʼerã. Pe rréi David heta ohasa asy vaʼekue, upéicharamo jepe peteĩ jey oñemboʼe Ñandejárape péicha: ‘Ajaheʼo rangue, koʼág̃a vyʼapópe ajeroky’ (Salmo 30:11, ÑÑB).

Añetehápe David nopensái oikotaha provlemaʼỹre, péro oikuaa avei ndohasaʼasymoʼãiha opa árare. Nde avei rehechakuaámaneraʼe upéva, oiméne reñandu jepi neremeʼẽveimaha. Péro rehaʼarõkuaáramo, mbeguekatúpe ne provlemakuéra oñesolusionáta ha sapyʼánte reimoʼãʼỹveháicha voi. Ha oñepresenta jey vove ndéve, reikuaátama mbaʼépa rejapovaʼerã. Tahaʼe haʼeháicha, nemanduʼákena nderehasaʼasymoʼãiha opa árare (2 Corintios 4:17).

Mbaʼéichapa nepytyvõta reñemboʼéramo

Tuicha nembopyʼaguapýta remombeʼúramo Ñandejárape mbaʼéichapa reñeñandu. Ikatu reñemboʼe rréi David ojapo haguéicha: “[Ñandejára], eipyguara che pyʼapy, eikuaa  mbaʼépa oĩ che apytuʼũnguápe, ehecha ahápa hína tape vai rehe, ha chemboguata [guei] nde rape opaʼỹva rupi” (Salmo 139:23, 24, ÑÑB).

Reñemboʼérõ reñeñandu porãvéta, péro ndahaʼéi upévarente reñemboʼevaʼerã. Ñandejára voi oipota reñemoag̃ui hese ha remombeʼu chupe opa mbaʼe oĩva nde pyʼapýpe (Salmo 62:8). Rejapo meme hag̃ua upéva, nemanduʼavaʼerã koʼã mbaʼére:

● Jehová oikuaa mbaʼépa nembohasa asy (Salmo 103:14).

● Haʼe ningo ndekuaa porãiterei (1 Juan 3:20).

● Ojepyʼapy añete nderehe (1 Pedro 5:7).

● Koʼẽrõitéma oipeʼáta opa mbaʼe ndejopy ha nembohasa asýva (Revelación [Apocalipsis] 21:4).

 Ha oiméramo nderasy?

Oĩ heta mitãrusu oñedeprimíva ha ojesuisidase oimoʼãgui upéicha opytuʼutaha. Oimérõ nde rehasa ko mbaʼére ani retĩ remombeʼu hag̃ua. Jesús ningo heʼivaʼekue umi hasýva ohovaʼerãha doktórpe. Oĩ heta tratamiento koʼãichagua mbaʼasýpe g̃uarã ha resegíramo hekoitépe, ikatu reñeñandu porãve (Mateo 9:12). c

La Biblia heʼíva ikatu nemokyreʼỹeterei. Ñandejára opromete imúndo pyahúpe ‘avave ndeʼimoʼãvéimaha: “Che rasyʼaína”’ (Isaías 33:24). Jehová avei heʼi ‘umi mbaʼe yma guare opytataha tesaráipe, ha nañandejopymoʼãveimaha’ (Isaías 65:17). Rehaʼarõ aja upéva eñehaʼãmbaite egueropuʼaka umi mbaʼe nembohasa asýva, ha ejeroviákena koʼẽrõitéma pe depresión opytataha tesaráipe (Revelación 21:1-4).

RETOPAVÉTA INFORMASIÓN VOLÚMEN 2, KAPÍTULO 9-PE

PE KAPÍTULO OÚVAPE

Oikuaavaʼerã piko nde tuvakuéra opa mbaʼe rejapóva? Mbaʼépa pejapokuaa ponove peiko vai?

[Nóta]

TÉYSTO OĨVA LA BÍBLIAPE

‘Pemoĩ opa mbaʼe Ñandejára pópe. Ha Ñandejára omeʼẽne peẽme ipyʼaguapy, oñangarekótava pende pyʼapy ha pene remiandúre.’ (Filipenses 4:6,7)

PETEĨ KONSÉHO

Reñandu jave neremeʼẽveimaha, esẽ eguataʼimi chupe. Rejapóramo ehersísio nderetiaʼe ha ndepyʼaguapyvéta upéi.

REIKUAÁPARAʼE?

Umi ojesuisidáva ndahaʼéi ijehénte ojapóva ivaíva. Ihénte ha iñamigokuéra katuete opyta vaieterei avei upe rire.

UMI MBAʼE AJAPÓTAVA!

Añandu jave ndavaleiha mbaʼeverã ha avave ndacherayhuiha, añemongetáta (ehai mávapa ikatu nerendu ha nepytyvõ): ․․․․․

Oĩ heta mbaʼe porã chembovyʼáva. Pór ehémplo: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Provlemakuéra ningo ikatu oñesolusiona. Peteĩ ojesuisidávare katu ndaikatuvéima ojejapo mbaʼeve. Mbaʼérepa rejepyʼamongetavaʼerã ko mbaʼére?

● Mbaʼérepa jaʼekuaa umi ojesuisidáva ombohosaha iprovléma ótro akã ári?

[Komentário oĩva páhina 104-pe]

“Heta vése añedeprimi vaietérõ guare amanoséntema voi. Péro agueropuʼaka jey upéva añemboʼe meme ha asegi rupi peteĩ tratamiénto”. (Heidi)

[Rrekuádro oĩva páhina 100-pe]

Reñandu jave neremeʼẽveietemaha

Heta oservíva Ñandejárape oñeñanduvaʼekue avei nde reñeñanduháicha. Epensamíntena koʼã ehémplore:

Rebeca: ‘Upéichataramo, mbaupe piko che aikovéta?’ (Génesis 25:22, ÑÑB).

Moisés: “Ajerure ndéve chejuka hag̃ua, [...] ani hag̃ua ahecha mbaʼe vai ojehúva chéve” (Números 11:15, ÑÑB).

Elías: ‘Che Jára, ehekýina chehegui che rekove, chéngo ndacherekoporãvéi che ypykuéragui’ (1 Reyes 19:4, ÑÑB).

Job: ‘Chemokañýna umi omanóva oĩháme, ha emoĩ peteĩ ára nemanduʼa hag̃ua cherehe ha chemopuʼã jey hag̃ua’ (Job 14:13, ÑÑB).

Haʼekuéra heta ohasa asy vaʼekue, péro upéi osẽ iprovlémagui ha ni noimoʼãi oñeñandu porã jeytaha. Nderehe ikatu avei oiko upéicha.

[Taʼanga oĩva páhina 102-pe]

Pe vyʼaʼỹ ha umi mbaʼe ndejopýva, ára vaícha ohasavaʼerã katuete