Ibuot 16

Ndi Ọdiọk Ndifụhọ Nte Mfụhọde Emi?

Okposụkedi emi ibuotikọ emi enemede aban̄a n̄kpa ete m̀mê eka, mme edumbet oro ẹnemede mi ẹkeme n̄ko ndin̄wam fi ọyọ ke ini owo en̄wen ke ubon mbufo m̀mê edima ufan fo akpade.

“Ke ini Mama akakpade, n̄kọfiọkke se n̄kpanamde; uwem ama odorode mi. Mama akanam ubon nnyịn adiana kiet.”​—Karyn.

IWAKKE n̄kpọ oro ekemede ndibiak fi nte ete m̀mê eka fo ndikpa. Ke ini oro etịbede, idem ekeme nditịmede fi ke usụn̄ oro akanam mîtịmekede. Brian emi ekedide isua 13 ke ini ifehesịt okowotde ete esie ọdọhọ ete: “N̄kukụre n̄kpọ oro ikanamde ke okoneyo oro ẹkesiande nnyịn ke Papa akpa ekedi nditua eyet nnyụn̄ n̄n̄wan̄a kiet eken ke idem.” Natalie ekedi isua duop ke  ini kansa okowotde eka esie. Enye ọdọhọ ete: “N̄kọfiọkke m̀mê n̄kpatatua m̀mê n̄kpọfọfụhọ. N̄kọfiọkke se n̄kpanamde.”

Mme owo esifụhọ n̄kpa ke nsio nsio usụn̄. Ke nditịm ntịn̄, Bible ọdọhọ ke ‘owo kiet kiet ọdiọn̄ọ ufen ye ubiak esie.’ (2 Chronicle 6:29) Sia edide ntre, da esisịt ini kere ban̄a nte eketiede fi ke idem ke ini ete m̀mê eka fo akakpade. Ke idak emi, wet (1) nte eketiede fi ke idem ke ndondo oro ọkọfiọkde ke ete m̀mê eka fo akpa ye (2) nte etiede fi ke idem idahaemi. a

1 ․․․․․

2 ․․․․․

Ibọrọ fo ekeme ndiwụt ke ufụhọke aba nte ekesifụhọde. Inyeneke se idiọkde do. Edi oro iwọrọke ke emefre ete m̀mê eka fo. Ke n̄kan̄ eken, ekeme ndidi osụk ofofụhọ, mîdịghe ekeme ndidi emenen̄ede ofụhọ idahaemi akan nte ekesifụhọde. Ekeme ndidi mfụhọ fo etie nte  mbufụt inyan̄ emi edide ọtọtọ, ekekebe—ke ini mûdorike enyịn. Emi idiọkke n̄ko—idem ekpededi etie ntre ediwak isua ke ete m̀mê eka fo ama akakpa. Mbụme oro ekpekerede aban̄a edi, Didie ke ekeme ndiyọ mfụhọ, inamke n̄kpọ m̀mê okwo etie didie?

Emekeme nditua. Nditua eyet ekeme ndinam mfụhọ fo osụhọde ubọk. Nte ededi, ekeme nditie fi ke idem nte eketiede Alicia. Enye ekedi isua 19 ke ini eka esie akakpade. Alicia ọdọhọ ete: “N̄kekere ke edieke nnen̄erede ntua eyet, ke mbon en̄wen edikere ke nnyeneke mbuọtidem.” Edi kere ise: Jesus Christ ekedi mfọnmma owo emi ekenyenede ọkpọsọn̄ mbuọtidem ke Abasi. Kpa ye oro, enye ‘ama atua eyet’ ke ini Lazarus edima ufan esie akakpade. (John 11:35) Ntre, kûyak ndịk anam fi etre nditua eyet. Nditua eyet iwọrọke ke unyeneke mbuọtidem! Alicia ọdọhọ ete: “Ke akpatre, mma ntua. Mma ntua eyet etieti. N̄kesitua kpukpru usen.” b

Kûyak esịt obiom fi. Karyn emi ekedide isua 13 ke ini eka esie akakpade ọdọhọ ete: “Mma  nsidọk n̄ketịm Mama inua mbemiso ndụkde idap. Edi odu okoneyo kiet oro mmen̄kanamke oro. Ke ndan̄nsiere, Mama ama akpa. Okposụkedi emi etiede nte se nyomde nditịn̄ emi isịneke ifiọk, esịt esifịna mi sia mmen̄kọdọkke n̄kese enye okoneyo oro, esịt esinyụn̄ obiom mi aban̄a mme n̄kpọ eken oro ẹketịbede edem usen oro. Papa ama aka isan̄ mbubehe onyụn̄ ọdọhọ mi ye adiahaeka mi ete ise Mama enyịn. Edi nnyịn ikabakke idụk idap. Etisịm ini emi n̄kodụkde ubet Mama, enye ama akpa. Idem ama enyek mi sia n̄kpọ ndomokiet ikanamke enye ke ini Papa akadahade!”

Eyedi esịt esibiom fi aban̄a mme n̄kpọ oro ekerede ke akpakana anam ukem nte okobiomde Karyn. Afo emekeme ndikam mmia idemfo ufen ke ndisitie n̄kere kpukpru ini ete, “ekpedide mma nnam emi m̀mê oko.” ‘Ekpedide mma n̄kpak Papa nte okokụt abiausọbọ.’ ‘Ekpedide mma mbak n̄ka n̄kese Mama.’ Edieke esịt obiomde fi ntem, ti ke idiọkke ndiseme mban̄a mme n̄kpọ oro ekerede ke akpakana anam ọfọn akan nte akanamde. Se idude edi ke akpakanam mme n̄kpọ oro ọfọn ke ekpedide ama ọfiọk se iditịbede. Edi ukọfiọkke. Ke ntre, ifọnke obiom idem ikpe. Idịghe afo edi ntak n̄kpa ete m̀mê eka fo! c

Tịn̄ nte etiede fi ke idem nọ mbon en̄wen. Mme N̄ke  12:25 ọdọhọ ete: “Eti ikọ anam esịt adara.” Edieke mûmaha nditịn̄ nte etiede fi ke idem, emi ekeme ndinam ọsọn̄ fi ndiyọ mfụhọ. Ke n̄kan̄ eken, nditịn̄ nte etiede fi ke idem nnọ owo emi afo ekemede ndiberi edem ayanam okop “nti ikọ” ndọn̄esịt ke ini enen̄erede oyom.

Bọn̄ akam nọ Abasi. Etie nte udunen̄ekede ufụhọ aba ke ama ‘akan̄wan̄a esịt fo ọnọ’ Jehovah Abasi ke akam. (Psalm 62:8) Fiọk ete ke akam idịghe ibọk usụhọde ubiak. Ke ini ọbọn̄de akam, afo eseme ọnọ “Abasi kpukpru ndọn̄esịt, emi ọdọn̄de nnyịn esịt ke kpukpru ukụt nnyịn.” (2 Corinth 1:3, 4) Usụn̄ kiet oro Abasi esidọn̄de owo esịt esidi ke Ikọ esie, kpa Bible. (Rome 15:4) Ntak mûwetke mme itie N̄wed Abasi oro ẹkemede ndidọn̄ fi esịt ukama? d

Ndifụhọ n̄kpa owo isidịghe n̄kpọ usen kiet. Edi Bible ekeme ndidọn̄ owo esịt, koro enye ọsọn̄ọ ọnọ nnyịn ete ke obufa ererimbot oro Abasi ọn̄wọn̄ọde, ke ‘n̄kpa ididụhe aba, mfụhọ m̀mê ntuan̄a m̀mê ubiak idinyụn̄ idụhe aba.’ (Ediyarade 21:3, 4) Afo n̄ko emekeme ndikụt ke nditie n̄kere mme utọ un̄wọn̄ọ oro ayanam ọyọ n̄kpa ete m̀mê eka fo.

[Mme Ikọ Idakisọn̄]

AKPAN ITIE N̄WED ABASI

“[Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:4.

ITEM

Wet n̄kpọ nịm. Ndiwet n̄kpọ mban̄a ete m̀mê eka fo oro akakpade ekeme ndinen̄ede n̄n̄wam fi ọyọ mfụhọ.

NDI AMA ỌFIỌK . . . ?

Nditua eyet iwọrọke ke edi mbe. Idem n̄kpọsọn̄ owo nte Abraham, Joseph, David, ye Jesus ẹma ẹtua eyet ke ini mmọ ẹkefụhọde.—Genesis 23:2; 50:1; 2 Samuel 1:11, 12; 18:33; John 11:35.

SE NDINAMDE

Ke ini mfụhọ oyomde ndikan mi ubọk, se ndinamde edi

Se ndibụpde ete m̀mê eka mi oro osụhọde mban̄a n̄kpọ emi edi

AFO EKERE DIDIE?

● Ntak emi ọfọnde esitie ekere aban̄a nti n̄kpọ emi ekesinamde ye ete m̀mê eka fo ke ini enye okodude uwem?

● Ntak emi ndiwewet mme n̄kpọ emi ekemede ndin̄wam fi ọyọ mfụhọ?

[Se ẹwetde ke ikpọ abisi ke page 112]

“N̄kesitịn̄ke nte etiede mi ke idem nnọ owo. Ọkpọkọfọn nsitịn̄ nte etiede mi ke idem nnọ mbon en̄wen. Emi ekpekenen̄ede an̄wam mi nyọ mfụhọ.”​—David

 [Ekebe/​Ndise ke page 113]

CHANTELLE

“Ete mi ama ọdọn̄ọ ke n̄kpọ nte isua ition, ndien idem ama ọdọdiọn̄ ọdiọk enye. N̄kedi isua 16 ke ini enye okowotde idem. Ke oro ebede, eka mi ama esitịn̄ kpukpru se ikakade iso ọnọ mi ye akamba eyeneka mi eren. Enye ama akam ayak itiene isịn uyo ke ubiere oro ẹkenamde ẹban̄a nte ẹdibụkde Papa. Emi ama anam afiak emem utom ọnọ nnyịn ndiyọ mfụhọ oro. N̄kere ke nditọwọn̄ isimaha ẹdedịp mmimọ n̄kpọ—akpan akpan utọ n̄kpọ ntem. Nte ini akade, mma nsitịn̄ mban̄a n̄kpa ete mi ke eferife. Ini ekededi oro eyet ọdọn̄de mi, mma nsika n̄koyom itie ntua, mîdịghe n̄ka mbịne ufan mi n̄katua eyet. Se n̄kpọdọhọde mme owo edi: Edieke oyomde ndineme n̄kpọ emi, ka bịne mbonubon mbufo ye mme ufan fo.”

[Ekebe/​Ndise ke page 113, 114]

LEAH

“Mama ama ọduọ akpauben̄ ke ini n̄kedide isua 19 onyụn̄ akpa ke isua ita ẹbede. Ke enye ama akakpa, mma n̄kụt ke ana nsọn̄ idem. Ekpekenen̄ede afịna Papa edieke mmen̄kpọkọsọn̄ke idem. Ke ini n̄kedide eyenọwọn̄, Mama ama esise aban̄a mi kpukpru ini oro n̄kọdọn̄ọde m̀mê oro idem mîkenemke  mi. Ke nteti nte enye ekesitụkde mi ini ekededi oro n̄kopde ufiopidem. Esibiak mi ini ekededi oro ntide ke enye idụhe aba. Nsiyomke mme owo ẹfiọk nte etiede mi ke idem, edi oro ifọnke. Ntre mmesise ndise Mama ndusụk ini man ntua. Nditịn̄ ikọ ye mme ufan mi esin̄wam mi n̄ko. Bible ọn̄wọn̄ọ ke mbon oro ẹkpade ẹyeset ẹdidu ke paradise isọn̄. (John 5:28, 29) Mma nti ke nyafiak n̄kụt Mama, mma nnyụn̄ n̄kere mban̄a se nnyenede ndinam man ndu ke paradise oro, ubiak emi esisụhọde.”

[Ekebe/​Ndise ke page 114]

BETHANY

“Ubaha-e nte ekpedide mma nti ndọhọ ete mi ‘Papa, mmama fi.’ Mmọdiọn̄ọ ke mma mma Papa, edi ntịghi nte n̄kọdọhọde enye ‘mmama fi.’ N̄kpama ndisiti n̄kpọ ntre. N̄kedi isua ition kpọt ini enye akakpade. Papa ọkọduọ akpauben̄ ke adan̄aemi okosụk edede idap, ndien ẹma ẹsọsọp ẹmen enye ẹka ufọkibọk. Ntidemede idap ndan̄nsiere, enye ama akpa. Ke oro ebede, ama esisọn̄ mi nditịn̄ mban̄a Papa. Edi nte ini akakade, mma nsima ndikop mbon en̄wen ẹtịn̄de ẹban̄a enye sia oro ama anam mfiọk orụk owo emi enye ekedide. Se n̄kpọdọhọde owo ekededi oro ete m̀mê eka esie akpade edi: Domo ndisiti ini oro ekesidude ye ete m̀mê ye eka fo nyụn̄ wet mme n̄kpọ nịm mbak udufre. Ekem nam ofụri se ekekeme ndibuọt idem ye Abasi man okpodu uwem ke obufa ererimbot Abasi ke ini ẹdinamde ete m̀mê eka fo eset.”

 [Ekebe ke page 116]

Utomufọk

Wewet Mme Ekikere Fo

Wet ndusụk nti n̄kpọ oro etide aban̄a ete m̀mê eka fo oro akakpade.

Wet se akpakamade nditịn̄ ye ete m̀mê eka fo ke adan̄aemi enye okosụk odude uwem.

Da nte ke emenyene ekpri eyeneka oro esịt osụk obiomde aban̄a n̄kpa ete m̀mê eka fo. Wet se ekpetịn̄de man ọdọn̄ enye esịt. (Emi ekeme ndinam esịt okûbiom fi n̄ko.)

Wet n̄kpọ iba m̀mê ita oro akpakamade ndifiọk mban̄a ete m̀mê eka fo oro akakpade, ekem bụp ete m̀mê eka fo oro osụhọde kiet ke otu mme n̄kpọ emi.

Kot Utom 24:15. Didie ke idotenyịn oro ẹtịn̄de ẹban̄a ke ufan̄ikọ oro an̄wam fi ọyọ n̄kpa ete m̀mê eka fo?

[Ndise ke page 115]

Mfụhọ ekeme nditie nte mbufụt inyan̄ emi ọtọde ke ini owo mîdorike enyịn