KAPÍTULO 16

Mbaʼépa ikatu ajapo agueropuʼaka hag̃ua?

Umi konsého oĩva ko kapítulope nepytyvõta omanóramo ndehegui nde sy, nde ru, ambue ne hénte térã peteĩ ne amigoite.

“Mama omanóvo apyta vaieterei ha ndaikuaái mbaʼépa ajapóta. Haʼéngo akóinte orepytyvõmi rojogueraha porã hag̃ua ógape.” (Karina)

OMANÓRAMO ñande sy térã ñande ru japyta vaieterei, ndaipóri mbaʼeve ijetuʼuvéva upévagui. Bernardo orekórõ guare 13 áño itúva ijatáke ha omano. Mbaʼéichapa oñeñandúraʼe? Haʼe omombeʼu: “Pe pyhare roikuaárõ guare che túva omanoha roñoañuamba ha hetaiterei orerasẽ”. Natalia oñanduvaʼekue katu idiferénte. Orekórõ guare 10 áño  itúva omano kánsergui, haʼe heʼi: “Papa omanórõ guare ni che nantendéi la ojehúva chéve. Ndaikatúi cherasẽ ha ndaikuaái mbaʼépa ajapóta”.

Omano jave ñane hénte térã peteĩ ñane amígo naentéroi ñañeñandu peteĩchapa. La Biblia heʼi voi káda uno jaikuaaha ñane mbaʼembyasy (2 Crónicas 6:29). Oimérõ rehasáraʼe ko mbaʼére, ejepyʼamongetamína ha ehai 1) mbaʼéichapa reñeñandu upérõ, ha 2) mbaʼéichapa reime koʼág̃a. a

1 ․․․․․

2 ․․․․․

Oimérõ ndereikovéima reñembyasyháre, ani rejepyʼapy upe haguére. Upéva ndaivaíri ha ndeʼiséi nderesaraimaha nde sy térã nde ru omanovaʼekuégui. Péro ikatu rembyasyeterei gueteri ha haʼete voi ku omano ramoitéva ndehegui.  Umi mbaʼe reñandúva ñambojojakuaa oládare, ou ha ohóva y rembeʼýpe, sapyʼánte reĩ porãitehágui reñeñandu vai ha nderevyʼavéi. Ha upéichatante voi, ohasáramo jepe heta áño. Tahaʼe haʼéva upe reñanduvahína, umi konsého oĩva ko kapítulope tuicha nepytyvõta regueropuʼaka hag̃ua upe rehasáva.

Ani rejejoko nerasẽ hag̃ua. Heta vése, ñanerasẽ rirémante ñandepyʼaguapyve. Péro heta mitãrusu ha mitãkuña ojejokopaite ani hag̃ua hasẽ. Alíciare oikovaʼekue upéicha, orekópe 19 áño omano chugui isy. Haʼe omombeʼu: “Che ndaipotaivaʼekue avave heʼi cherehe ndajeroviaiha Ñandejárare ha upévare ajejokopaite pono cherasẽ”. Oimérõ nde avei repensa upéicha, nemanduʼavaʼerã la oikovaʼekue Jesús amigoite omanórõ guare. Jesús ‘hasẽvaʼekue’ ohechárõ guare umi hénte oñelamentaha Lázaro omano haguére. Hiʼarive haʼe perfékto ha ijerovia mbarete vaʼekue (Juan 11:35). Upévare, ani retĩ nerasẽ hag̃ua, péva ndeʼiséi nderejeroviaiha  Ñandejárare. Alicia ohechakuaavaʼekue upéva: “Ohasa rire tiémpo che sy omano hague añepyrũ cherasẽ káda día”. b

Ani repensa nde káusare oiko hague. Karina orekórõ guare 13 áño isy omano, haʼe heʼi: “Chéngo ake mboyve katuetei ahámi mama rendápe ikotýpe. Péro peteĩ pyharépe ndahái ha upéi ikoʼẽ omano. Hiʼarive upe díape papa oviaha ha heʼi porã chéve ha che ermánape roñatende hag̃ua hese. Péro tárdema ropuʼã ha ahárõ guare ahecha chupe haʼe ndorrespiravéima. Ikatúngo vyrorei ótrope g̃uarã, péro koʼag̃aite peve ambyasy ndahái haguére upe pyharépe ahetũʼimi jepe chupe”.

Heta oĩ ombyasýva avei ndojapói haguére ambue mbaʼe isy térã itúva rehehápe, ikatu voi opensa: “Voive ahárire mama rendápe...” térã “Mbaʼére piko ndaʼéiraʼe papápe roho hag̃ua doktórpe...”. Añetehápe, reikuaárire mbaʼépa oikóta, katuete rejapovaʼerãmoʼã ikatúva guive reipytyvõ hag̃ua chupe. Péro upéva noĩri nde pópe, ha upévare ndovaléi repensa omano hague nde káusare. c

Emombeʼu mbaʼéichapa reñeñandu. Ijetuʼuvéta ndéve regueropuʼaka koʼã mbaʼe rehasáva neremombeʼúiramo  upe reñandúva. Péro reñemongetárõ peteĩ rejeroviávandi rehendúta umi ‘ñeʼẽ porã nemokyreʼỹtava’ reikotevẽve jave’ (Proverbios 12:25).

Eñemboʼe Ñandejárape. Remombeʼupaitéramo Jehovápe umi mbaʼe ndepyʼapýva katuete reñeñandu porãvéta (Salmo 62:8). Ha ndahaʼéi upévante. Reñemboʼe jave rejerurekuaa Ñandejárape tanepytyvõ, haʼehína pe ‘ñanembopyʼapytuʼúva, ha ñanemombaretéva opa ñande jehasa asýpe’ (2 Corintios 1:3, 4, JMP). Mbaʼéichapa Ñandejára ikatu ojapo upéva? La Biblia rupive (Romanos 15:4). Upévare iporãta rehaíramo peteĩ kuatiáre umi téysto nemokyreʼỹvéva ha ereko voi nendive relee meme hag̃ua. d

Omanóramo ndehegui ne hénte ndaikatúi voi ere sapyʼaitépe ojehasataha ndehegui pe vyʼaʼỹ. Péro la Biblia ikatu nembopyʼaguapy, Ñandejára opromete omoĩtaha peteĩ múndo pyahu ha upépe “ndaiporimoʼãvéima ñemano, tasẽ, jaheʼo ha temimbyasy” (Revelación [Apocalipsis] 21:3, 4). Rejepyʼamongetáramo koʼã promésare katuete reñeñandu porãvéta ha regueropuʼakáta ne mbaʼembyasy.

[Nóta]

TÉYSTO OĨVA LA BÍBLIAPE

“[Ñandejára] omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy; opa oĩvaʼekue yma niko ndaiporimoʼãvéima.” (Revelación 21:4)

PETEĨ KONSÉHO

Ehaikuaa peteĩ kuadérnope mbaʼéichapa reñeñandu. Upéva nepytyvõta ndepyʼaguapy ha regueropuʼaka hag̃ua upe rehasáva.

REIKUAÁPARAʼE?

Ani retĩ nerasẽ hag̃ua. Heta kuimbaʼe ipyʼaguasúva hasẽvaʼekue avei omanórõ guare peteĩ ohayhúva: Abrahán, José ha David (Génesis 23:2; 50:1; 2 Samuel 1:11, 12; 18:33).

UMI MBAʼE AJAPÓTAVA!

Añandu jave nameʼẽveimaha ajapóta koʼã mbaʼe: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼéichapa nepytyvõkuaa nemanduʼa mimíramo umi mbaʼe porã rehasavaʼekuére nde ru térã nde sy omanovaʼekuéndi?

● Mbaʼérepa iporãta rehaíramo umi mbaʼe reñandúva?

[Komentário oĩva páhina 112-pe]

“Ñepyrũrã añehaʼã pono ojekuaa cherehe mbaʼéichapa añeñandu. Koʼág̃a ambyasy upéva. Amombeʼúrire ojehúva chéve, ndahasyivevaʼerãmoʼã agueropuʼaka hag̃ua”. (David)

 [Taʼanga ha rrekuádro oĩva páhina 113-pe]

CELESTE

“Che túva ou hasyete ha cinco áño pukukue oiko péicha. Isituasión ivaive ohóvo ha arekópe 16 áño ojesuisida. Ñanemitã aja ndajaipotái oñemokañy ñandehegui koʼã mbaʼe. Ha mama omombeʼuvaʼekue chéve ha che ermánope opa mbaʼe oikóva ha upéva tuicha orepytyvõ. Avei oheja rodesidi hendive mbaʼéichapa ojejapóta heta mbaʼe papa omanórõ guare. Ñepyrũrã ijetuʼu kuri chéve añeʼẽ koʼã mbaʼére, péro saʼi saʼípe ndahasyvéima chéve. Péro sapyʼánte añeñandu vai jey ha cherasẽse, péicha jave aheka peteĩ che amíga chepytyvõvaʼerã, térã peteĩ lugár aĩmi hag̃ua cheaño. Upévare, reikotevẽrõhína, eheka peteĩ ne amígo térã nde rogaygua ha emombeʼu chupe ne remiandu”.

[Taʼanga ha rrekuádro oĩva páhina 113 ha 114-pe]

LEA

“Arekópe 19 áño mama iderráme, opyta vaieterei ha 3 áño rire omano. Upérõ aimoʼã chembaretevaʼerãha aipytyvõ hag̃ua papápe. Chéngo ndaipotaiete haʼe oñeñandu vai. Chemichĩvérõ guare mama katuete oĩvaʼerã chendive añeñandu vai térã cherasy jave. Haʼete ku ahechapáva gueteri opoko pokóramo  che syváre ohecha hag̃ua nacheakãnundúipa. Ahechagaʼueterei ningo chupe. Sapyʼánte ndahechaukaséi pe añandúva ha cheañónte aĩse, péro aikuaa upéva ndojapoporãiha cherehe. Upévare amaña jepi ifotokuérare cherasẽ hag̃ua, térã amombeʼu che amígokuérape upe añandúva. La Biblia heʼi umi omanóva oñemoingove jeytaha peteĩ hardín iporãitereívape ko yvy ári (Juan 5:28, 29). Apensa meme rupi ko promésare ha mbaʼépa tekotevẽ ajapo aĩ hag̃ua upépe che sýndi, chepytyvõ pono ahechagaʼueterei chupe”.

[Taʼanga ha rrekuádro oĩva páhina 114-pe]

BETTY

“Cinco áñonte arekovaʼekue papa omanórõ guare. Ha añeporandu jepi: ‘Haʼépa rakaʼe papápe ahayhuha chupe?’. Oiménengo haʼéraʼe, péro nachemanduʼaiete ha ambyasyeterei upéva. Papa iderráme ikéra, ojegueraha ospitálpe ha upéi, koʼẽmentema aikuaa omano hague. Ñepyrũrã ndaikatuivaʼekue ahendu oñeñeʼẽrõ hese, péro upéi ajepokuaave ha ahenduséma oñemombeʼúva chugui, péicha aikuaa porãvégui chupe. Omanóramo avei pende sy térã pende ru, penemanduʼavaʼerã umi mbaʼe pehasavaʼekuére oñondive, ha pehai umíva pono penderesarái. Ha katuete peĩse jeýta hendive pe múndo pyahúpe, upévare peñehaʼãkena peñemoag̃uive Ñandejárare”.

 [Rrekuádro oĩva páhina 116-pe]

Rekompleta hag̃ua

Rehai hag̃ua

Umi mbaʼe porã rehasavaʼekue nde ru térã nde sýndi. ․․․․․

Ehai mbaʼépa erevaʼerãmoʼã chupe oikovérire. ․․․․․

Ñamoĩ chupe ne ermáno michĩvéva heʼiha ikáusare omano hague nde ru térã nde sy. Eanota mbaʼépa eréta chupe ponove oñeñandu péicha. (Ha oimérõ nde voi repensa upéicha, ko rehaíva nepytyvõta reñeñandu porãve hag̃ua.) ․․․․․

Ehai mokõi térã mbohapy mbaʼe reikuaaséva nde ru térã nde sy omanovaʼekuégui, ha eporandu upe oikovévape. ․․․․․

Elee Hechos 24:15. Mbaʼéichapa nepytyvõta ko téysto regueropuʼaka hag̃ua omanóramo ndehegui nde ru térã nde sy? ․․․․․

[Taʼanga oĩva páhina 115-pe]

Umi mbaʼe reñandúva ñambojojakuaa umi oláda ou ha ohóvare, sapyʼánte reĩ porãitehágui ikatu reñeñandu vai ha nderevyʼavéi