KAPÍTULO 18

Mbaʼépa ajapovaʼerã ani hag̃ua añekevrantaiterei?

“Koléhiope ahasa heta mbaʼe ijetuʼúva ha sapyʼánte ndaikuaavéima mbaʼépa ajapóta, ekapáde voi chéve asẽ adipara mbaʼe.” (Sharon)

“Ikatu remohuʼã nde koléhio, péro upéva ndeʼiséi nderejepyʼapyvéimava mbaʼevére, resegínte avei rejepyʼapy péro ambue mbaʼérema.” (James)

 OĨPA heta mbaʼe ndepyʼapýva koléhiope? Haʼetépa ndéve nandepuʼakavéimava umívare? Oiméne repensa nde tuvakuéra jepe nontendeiha mbaʼeichaitépa reñekevranta koléhiope. Añetehápe nde neremantenéi ne famíliape, nderepagái umi kuénta, ni natekotevẽi rekumpli peteĩ patróndi. Upéicharamo jepe reiko rejepyʼapyháre nde tuvakuéraicha. Ha haʼete reñekevrantavéva mbaʼe voi chuguikuéra.

Rehokuévo koléhiope térã rejukuévo ikatúma rembohovái heta mbaʼe ndepyʼapýva. Pór ehémplo Tamara, peteĩ mitãkuña oikóva Estados Unídospe ohómi vaʼerã ikoléhiope peteĩ kolektívope. Haʼe omombeʼu umi mitãrusu pyʼỹinte oñombyepotiha tapére. Péicha jave pe chofér opyta ha omboguejypaite chupekuéra ha tárde jeýma og̃uahẽ hikuái.

Ha ndahaʼéi ku koléhiope opámava la provléma. Oñepyrũtaramo katu. Oiméne ijetuʼu jepi rembohovái koʼã mbaʼe:

● Ne mboʼeharakuéra.

“Che profesorkuéra ojopyeterei chendive chenóta porã hag̃ua. Ha che ajepyʼapyeterei ndapytavaiséigui hendivekuéra.” (Sandra.)

“Umi profesorkuéra ohecháramo neakãporãha, oñepyrũma ojopy nendive remeʼẽve hag̃ua.” (Ana.)

“Nde ikatu rehupytyse heta mbaʼe porã péro ndahaʼéirõ umi mbaʼe haʼekuéra oipotáva ndéve g̃uarã, nomombaʼeiete voi hikuái ha ndeapoʼíma.” (Noemi.) a

Mbaʼéichapa reñeñandu ne mboʼeharakuéra ojopyetereíramo nendive?

․․․․․

● Ne kompañerokuéra.

“Sekundáriape umi mitãrusu iñakãrentema oiko, ha ndereikóiramo haʼekuéraicha, nemboykéma hikuái.” (Kevin.)

 “Koʼẽ koʼẽre oĩ chemboligáva amokõ térã aĩ hag̃ua kuñándi. Ha legálmente sapyʼánte ijetuʼuetereíma chéve aaguanta hag̃ua.” (Aaron.)

“Chéngo 12 áñonte areko péro koléhiope opavavénte oiko oporandu chéve: ‘Ha nde pio arakaʼe ndechíkota?’. Chekuerairóma chuguikuéra.” (Alexandra.)

“Enterovénte oikovaʼekue chemboliga ajegusta hag̃ua peteĩ mitãrusúre. Napenáimaramo hesekuéra oñepyrũ heʼi chegustaha kuña. Hiʼarive 10 áñonte areko upérõ!” (Clara.)

Mbaʼéichapa reñeñandu ne kompañerokuéra ndejopyetereíramo?

․․․․․

● Ambue mbaʼe ikatúva ndepyʼapy. Emarka (✔) pe ijetuʼuvéva ndéve rembohovái:

□ Umi examen

□ Umi taréa oñemeʼẽva ndéve koléhiope

□ Nde tuvakuéra ohaʼãrõitereíramo ndehegui

□ Umi mbaʼe rehupytyséva

□ Umi itieʼỹva ha ndejopýva nderekokyʼa hag̃ua térã oñembohorýva nderehe

□ Ambue mbaʼe ․․․․․

Mbaʼépa rejapovaʼerã ani hag̃ua reñekevrantaiterei

Jaʼe porãsérõ g̃uarã, koléhiope rembohováitante voi heta mbaʼe ijetuʼúva ha sapyʼánte reñandúta neremeʼẽveimaha. Ikatu rejepyʼapyeterei ha ndereikuaavéima mbaʼépa rejapóta ni moõ gotyopa rejapíta. Rréi Salomón ohaivaʼekue: ‘Jejopyeterei ombotavyrai iñarandúvape jepe’ (Eclesiastés 7:7).  Mbaʼépa ikatu rejapo ani hag̃ua oiko nderehe upéva? Reñehaʼãvaʼerã rejejokokuaa.

Ikatu ñambojoja peteĩ ohupívare pésa. Haʼe ojeprepara raẽ ha ñepyrurã ndohupíri umi ipohyietereíva, oikuaágui ikatuha ojedesgarra térã opẽ. Upéva rangue ohupi umi ivevyivéva ha péicha oho hese ipuʼaka peve umi ipohyivévare.

Nde avei ikatu ndepuʼaka umi mbaʼe ijetuʼuvévare, reikoʼỹre reñekevrantaiterei hese. Koʼã konsého ikatu nepytyvõ:

1. Rehechavaʼerã mbaʼépa ndepyʼapy. Proverbios 22:3 heʼi: “Oikokuaáva ohecha yvykua ha ojere chugui, [iñaranduʼỹva] katu ohónte ha hoʼa pype”. Ani hag̃ua reiko reñekevrantaiterei rehecha raẽ vaʼerã mbaʼépa pe ijetuʼuvéva ndéve rembohovái. Mbaʼépa pe ndepyʼapyvéva hína koʼág̃a? Ehechami upe remarkavaʼekue ajeʼi.

2. Eheka informasión nepytyvõtava. Ñamoĩ chupe koléhiope oñemeʼẽha ndéve atyraite taréa ha upéva ndepyʼapyeterei, upéicharõ ikatu rehecha umi konsého oĩva lívro Los jóvenes preguntan, Volumen 2 Kapítulo 13-pe. Ha oiméramo ne kompañerokuéra manterei nemboliga nderekokyʼa hag̃ua, rehechakuaa avei Kapítulo 2, 5 ha 15.

3. Ani rehaʼarõiterei. Mbaʼeve nereganamoʼãi reñembotavýnterõ ne provlémagui, tuichavereíta katu ohóvo ha ijetuʼuvéta ndéve regueropuʼaka. Upéicharõ, rekalkulavaʼerã  mbaʼépa ikatu rejapo resolusiona hag̃ua upéva, ha ani rehaʼarõiterei. Pór ehémplo, oimérõ nde testígo de Jehová, voi porã reikuaaukavaʼerã upéva ne kompañerokuérape. Péicha rehecháta ndahasyiveha ndéve nderekopotĩ hag̃ua. Margaret orekóva 20 áño ojapo péicha, haʼe omombeʼu: “Oñepyrũre voi pe kláse aheka ládo añeʼẽ hag̃ua la Biblia omboʼévare. Ahaʼãrõitereíramo haʼe hag̃ua che testigoha, upéi ijetuʼuvéma chéve. Péro enterove oikuaárõ mbaʼépa aguerovia, ndahasýivema chéve añeʼẽ hag̃ua umívare”.

4. Eheka peteĩ ikatúva nepytyvõ. Ñanemanduʼami jey pe ohupívare pésa. Imbaretevéramo jepe haʼe oikuaa porã mboy kílo pevépa ikatu ogueropuʼaka. Ha nde ningo nandepuʼakamoʼãi avei péicha péichante umi mbaʼe ijetuʼuetévare. Péro nereĩméi neaño, rejerurekuaa nde tuvakuérape térã peteĩ oservíva Ñandejárape tanepytyvõ. Ehechauka chupekuéra  umi mbaʼe ijetuʼúva ndéve reanotavaʼekue oñepyrũnguévo ko kapítulo, ha eporandu mbaʼépa ikatu rejapo (Gálatas 6:2).

Oĩ vai piko rejepyʼapy?

Añetehápe ndaivaíri rejepyʼapy mimi, upéva ohechauka rejapo porãseha ne rembiapo ha naneateʼỹiha. Ehechamína mbaʼépa heʼi la Biblia umi ndojepyʼapýivare mbaʼevére: ‘Nde neateʼỹva, arakaʼe piko repáyta? Arakaʼe piko repuʼãta? Eikónterõ erambiʼimi ha upéi eke, embojoʼa nde po ne akã guýpe ha epytuʼu, mondaháicha mboriahu ha tekotevẽ hoʼáne nde ári ha nemoperõta’ (Proverbios 6:9-11).

Peteĩ mitãkuña orekóva 16 áño hérava Heidi heʼi: “Koléhiope ñambohovái heta mbaʼe ijetuʼúva ha sapyʼánte ñanemokaneʼõma. Péro koʼã mbaʼe oñepresentátante voi ñambaʼapo vove”. Añetehápe hasy jepi regueropuʼaka hag̃ua umi mbaʼe ndepyʼapýva, péro upéicha nembaretevéta ha amo gotyove rehecháta ikatumaha rembohovái porã hetave mbaʼe.

PE KAPÍTULO OÚVAPE

Ikuentavépa rehejánte nde koléhio rejei hag̃ua heta akãrasýgui?

[Nóta]

TÉYSTO OĨVA LA BÍBLIAPE

‘Pemoĩmba Ñandejára pópe umi mbaʼe pendepyʼapýva, haʼe oñangarekógui penderehe.’ (1 Pedro 5:7, JMP)

PETEĨ KONSÉHO

Umi mbaʼe ndepyʼapýva remohendakuaa mokõi grúpope: oĩ umi ikatúva resolusiona ha oĩ umi koʼag̃aite ndaikatumoʼãiva. Reiko rangue reñemonervióso rei umi ndaikatúivare resolusiona, ikuentave rejesareko umi ikatúvare.

REIKUAÁPARAʼE?

Ocho óra jepe rekéramo káda pyhare, tuicha reñetrankilisavéta ha opyta porãvéta ne akãme umi mbaʼe reaprendéva.

UMI MBAʼE AJAPÓTAVA!

Ponove aiko chekaneʼõháre ha chepyʼaguapyve hag̃ua añehaʼãta ake la ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼérepa ojapo vaivétantema nderehe rejaposéramo opa mbaʼe rejavyʼỹre?

● Mávandipa ikatu reñemongeta reñekevrantaiterei ha reñandu jave neremeʼẽveimaha?

[Komentário oĩva páhina 132-pe]

“Papa katuete oñemboʼémi vaʼerã chendive aha mboyve koléhiope. Ha upéva tuichámi chembopyʼaguapy”. (Liz)

[Taʼanga oĩva páhina 131-pe]

Rehupírõ pésa, saʼi saʼípe ndepuʼakátama umi ipohyivévare. Koʼág̃a rembohováirõ umi mbaʼe ijetuʼúva, amo gotyove ndepuʼakátama hetave mbaʼére