KAPITLU 19

Għandi Nitlaq mill-Iskola?

Sa fejn taħseb li għandek tasal fl-​edukazzjoni tiegħek? ․․․․․

Ommok u missierek sa fejn iriduk tasal fl-​edukazzjoni tiegħek? ․․․․․

IŻ-​ŻEWĠ tweġibiet li ktibt hawn fuq jaqblu? Anki jekk jaqblu u għadek tmur l-​iskola, għandu mnejn jiġuk ġranet meta tkun tixtieq li tistaʼ titlaq mill-​iskola. Agħti daqqa t’għajn lejn il-​kummenti li ġejjin u ara jekk qattx ħassejtek bħal dawn iż-​żgħażagħ.

“Xi drabi tant kont inħossni stressata li ma kienx ikolli aptit inqum mis-​sodda. Kont ngħid bejni u bejn ruħi: ‘Għala għandi mmur l-​iskola u nitgħallem affarijiet li qatt ma se nuża?’”—Rachel.

 “Kemm-​il darba kont inħoss li xbajt mill-​iskola u kulma ridt hu li nitlaq u nsib xogħol. Kont inħoss li ma kienet qed tagħmilli l-​ebda ġid u kont nippreferi jkolli xogħol bil-​paga dieħla.”—John.

“Kont immur skola sekondarja fiċ-​ċentru tal-​belt u kien diffiċli għalija biex nagħmel ħbieb. Ma kellix problemi bix-​xogħol tal-​iskola, imma qatt ma ħassejtni aċċettat u kont inqattaʼ ħafna ħin waħdi. Lanqas iż-​żgħażagħ l-​oħrajn li ma kinux jiġu aċċettati ma riedu jkellmuni! Kont inkun mejjet biex naqbad u nitlaq mill-​iskola.”—Ryan.

“Kien ikolli saħansitra sa erbaʼ sigħat ħowmwerk kuljum! Tant spiċċajt mgħobbija b’assignments, projects, u testijiet—kollha wieħed f’wieħed—li kont inħossni li ma stajtx inkampa iktar u ridt nitlaq mill-​iskola.”—Cindy.

“Kellna theddida taʼ bomba, suwiċidju, tliet attentati taʼ suwiċidju, u klikek vjolenti. Kultant kont inħoss li ż-​żejjed kien kollu żejjed, u ridt nitlaq mill-​iskola!”—Rose.

Qatt iffaċċjajt sfidi bħal dawn? Jekk iva, liema sitwazzjoni ġegħlitek tħossok li trid titlaq mill-​iskola?

․․․․․

Forsi bħalissa qed taħseb bis-​serjetà biex titlaq mill-​iskola. Trid titlaq mill-​iskola għax tassew wasal il-​waqt? Jew għax xbajt mill-​iskola? Kif tistaʼ tkun taf għal liema raġuni trid titlaq mill-​iskola? Sabiex twieġeb din il-​mistoqsija, l-​ewwel trid tara x’jiġifieri li titlaq mill-​iskola.

Nispiċċa l-​Iskola jew Nitlaq mill-​Iskola?

Int kif tiddeskrivi d-​differenza li hemm bejn li tispiċċa l-​iskola u li titlaq mill-​iskola?

․․․․․

Kont taf li f’xi pajjiżi hu meħtieġ li ż-​żgħażagħ idumu bejn ħames u tmien snin biss jattendu l-​iskola? F’pajjiżi oħrajn, hu mistenni li l-​istudenti jibqgħu jmorru l-​iskola għal minn tal-​inqas  għaxar snin. Għalhekk, m’hemmx xi età jew livell speċifiku li japplika għal kulħadd b’mod ugwali madwar id-​dinja.

Barra minn hekk, xi pajjiżi għandhom mnejn jippermettu li student jitgħallem xi suġġett jew is-​suġġetti kollha mid-​dar stess, mingħajr ma jmur l-​iskola. L-​istudenti li jiġu mgħallmin mid-​dar tagħhom stess—ovvjament bil-​permess u bil-​kooperazzjoni tal-​ġenituri tagħhom—ma jkunux qed jitilqu, biex ngħidu hekk, mill-​iskola.

Madankollu, jekk għandek il-​ħsieb li titlaq mill-​iskola qabel ma jkun il-​waqt li suppost ittemm l-​edukazzjoni tiegħek—sew jekk fl-​iskola u sew jekk mid-​dar—jeħtieġ li tikkunsidra l-​mistoqsijiet li ġejjin:

X’titlob il-​liġi? Bħalma diġà ssemma, il-​liġijiet dwar l-​ammont taʼ snin li student għandu jattendi l-​iskola jvarja minn pajjiż għal ieħor. X’inhu l-​ammont minimu taʼ snin li titlob il-​liġi taʼ fejn toqgħod int? Wasalt int sa dan il-​livell? Jekk tinjora l-​parir tal-​Bibbja biex tkun ‘sottomess lejn l-​awtoritajiet superjuri’ u twaqqaf l-​edukazzjoni tiegħek qabel ma tkun ilħaqt dan il-​livell, tkun qed titlaq mill-​iskola.​—Rumani 13:1.

Ilħaqthom il-​miri tiegħi fl-​edukazzjoni? Liema miri trid li l-​edukazzjoni tiegħek tgħinek tilħaq? M’intix ċert? Jeħtieġ tkun taf! Inkella tkun bħal passiġġier fuq ferrovija li m’għandux l-​iċken ħjiel taʼ fejn irid imur. Mela poġġi bilqiegħda mal-​ġenituri tiegħek u wieġeb is-​sett taʼ mistoqsijiet taħt it-​titlu  “Il-​Miri Tiegħi fl-​Edukazzjoni,” li jinsabu f’paġna 139. Meta tagħmel dan, se tiġi megħjun tibqaʼ ffokat u se jkun t’għajnuna għalik u għall-​ġenituri tiegħek biex tippjanaw kemm għandek iddum tattendi l-​iskola.​—Proverbji 21:5.

M’hemmx dubju li l-​għalliema tiegħek u wħud oħrajn se jagħtuk xi pariri dwar sa fejn għandek tasal fl-​edukazzjoni tiegħek. Iżda, fl-​aħħar mill-​aħħar il-​ġenituri għandhom l-​awtorità li jieħdu d-​deċiżjoni finali. (Proverbji 1:8;  Kolossin 3:20) Jekk twaqqaf l-​edukazzjoni tiegħek qabel ma tkun ilħaqt il-​miri fl-​edukazzjoni li int u l-​ġenituri tiegħek tkunu qbiltu fuqhom, int tkun qed titlaq mill-​iskola.

X’raġunijiet għandi biex nitlaq mill-​iskola? Oqgħod attent li ma tkunx qed tidħaq bik innifsek. (Ġeremija 17:9) Hija tendenza umana li wieħed jaħseb li għandu raġunijiet validi biex jaġixxi b’mod egoistiku.​—Ġakbu 1:22.

Hawn taħt ikteb ir-​raġunijiet validi li jistaʼ jkollok biex twaqqaf l-​edukazzjoni tiegħek qabel ma jkun il-​waqt.

․․․․․

Hawn taħt ikteb liema raġunijiet egoistiċi għandek biex titlaq mill-​iskola.

․․․․․

Liema raġunijiet validi ktibt? Ftit mill-​possibbiltajiet jistgħu jkunu biex tgħin lill-​familja tiegħek finanzjarjament jew biex tieħu sehem f’xogħol volontarju. Xi raġunijiet egoistiċi jistgħu jkunu biex tevita t-​testijiet jew biex tevita l-​ħowmwerk. L-​isfida hi li tagħraf liema hi r-​raġuni primarja tiegħek—u jekk hijiex valida jew egoistika.

Erġaʼ ħares lejn il-​lista li ktibt hawn fuq u bl-​onestà kollha nnumera minn 1 sa 5 r-​raġunijiet għala tixtieq titlaq mill-​iskola (in-​numru 1 jindika l-​inqas importanti, u n-​numru 5 jindika l-​iktar importanti). Jekk titlaq mill-​iskola sempliċement biex tevita l-​problemi, hemm realtà ħarxa tistenniek!

X’Fiha Ħażin Billi Nitlaq mill-​Iskola?

Meta titlaq mill-​iskola jkun bħallikieku qed taqbeż minn ferrovija qabel ma tkun wasalt fid-​destinazzjoni tiegħek. Jistaʼ  jkun li l-​ferrovija tkun skomda, u l-​passiġġieri forsi ma jkunux dħulin. Iżda jekk taqbeż mill-​ferrovija, ovvjament ma tasalx fid-​destinazzjoni tiegħek u x’aktarx li tweġġaʼ serjament. Bl-​istess mod, jekk titlaq mill-​iskola għandek mnejn ma tilħaqx il-​miri tiegħek fl-​edukazzjoni, u b’hekk iġġib fuqek innifsek kemm problemi immedjati u kemm problemi li jitfaċċaw maż-​żmien, bħalma huma dawn li ġejjin:

Problemi immedjati: X’aktarx li se tkun iktar diffiċli biex issib xogħol. U jekk issib xogħol, x’aktarx li jkun b’inqas paga minn xogħol li ssib kieku tkun komplejt l-​iskola. Sabiex ikollok livell bażiku t’għajxien, għandu mnejn ikollok taħdem sigħat itwal f’ambjent li x’aktarx ikun saħansitra inqas pjaċevoli mill-​ambjent tal-​iskola bħalissa.

Sfidi li jitfaċċaw maż-​żmien: Ir-​riċerka turi li hemm probabbiltà ikbar li dawk li jitilqu mill-​iskola jkollhom saħħa iktar batuta, jispiċċaw il-​ħabs, u jkollhom jiddependu minn benefiċċji soċjali.

M’għandniex xi ngħidu, m’għandek l-​ebda garanzija li jekk tkompli l-​iskola se tevita dawn il-​problemi. Iżda għala għandek titfaʼ l-​ġebla fuq saqajk billi titlaq mill-​iskola?

Kif Nibbenefika Jekk Ma Nitlaqx mill-​Iskola

Jekk m’għaddejtx minn xi test jew jekk kellek xi ġurnata diffiċli  fl-​iskola, għandek mnejn tkun trid taqbad u tirrassennja ruħek. Kwalunkwe problema li tistaʼ tinqalaʼ fil-​futur forsi tidher li mhi xejn meta mqabbla mas-​sitwazzjoni kerha tal-​preżent. Imma qabel ma tagħmel l-​iktar għażla “faċli” kkunsidra x’jgħidu l-​istudenti li ġew kwotati fil-​bidu taʼ dan il-​kapitlu dwar kif ibbenefikaw għax komplew l-​iskola.

“Tgħallimt nuri s-​sabar u nkun iktar determinata. Tgħallimt ukoll li jekk trid tieħu pjaċir tagħmel xi ħaġa, trid tbiddel l-​attitudni tiegħek stess. Minħabba li komplejt l-​iskola tejjibt is-​sengħa tiegħi tal-​arti u se nużaha meta nispiċċa l-​iskola.”—Rachel.

“Issa naf li jekk naħdem iebes nistaʼ nilħaq il-​miri tiegħi. Fl-​iskola qed nieħu kors prattiku ferm fuq taħriġ tekniku. Dan se  jgħinni biex ikolli l-​kwalifiki għax-​xogħol li nixtieq bħala mekkanik fuq magni tal-​istampar.”—John.

“Minħabba li ppersistejt, ksibt l-​abbiltà bażika li nikteb u naqra sew. L-​iskola għallmitni kif nibbenefika mill-​kritika u kif nesprimi ruħi b’mod ċar u bil-​loġika—abbiltajiet li huma taʼ siwi fil-​ministeru Kristjan tiegħi.”—Ryan.

“L-​iskola għenitni ntejjeb l-​abbiltà li nsolvi l-​problemi, sew fil-​klassi u sew xi mkien ieħor. Tgħallimt xi rrid nagħmel meta niffaċċja sfidi akkademiċi, soċjali, u fiżiċi. Dan tassew għenni nimmatura.”—Cindy.

“L-​iskola għenitni nħejji ruħi għall-​isfidi li jinqalgħu fuq il-​post tax-​xogħol. Ukoll, iffaċċjajt ħafna sitwazzjonijiet li ġegħluni neżamina r-​raġunijiet għall-​fidi tiegħi. Għalhekk, l-​iskola saħħitli l-​konvinzjonijiet reliġjużi tiegħi.”—Rose.

Is-​sultan għaref Salamun kiteb: “Aħjar it-​tmiem taʼ xi ħaġa milli l-​bidu tagħha. Aħjar min hu paċenzjuż milli min għandu spirtu supperv.” (Ekkleżjasti 7:8) Mela minflok ma titlaq mill-​iskola, ipprova solvi l-​problemi li tiffaċċja fl-​iskola bil-​paċenzja kollha. Jekk tagħmel dan, se ssib li fl-​aħħar mill-​aħħar ir-​riżultat se jiswielek ħafna iktar taʼ ġid.

FIL-​KAPITLU LI JMISS

Xi ngħidu jekk raġuni waħda għala tobgħod l-​iskola tkun għax ma tistax tingwalaha maʼ xi ħadd mill-​għalliema tiegħek?

SKRITTURA PRINĊIPALI

“Kulmin jgħaġġel żgur li jiġi fil-​bżonn.”​—Proverbji 21:5.

SUĠĠERIMENT

Jekk qed tissielet biex tkampa mal-​ambjent tal-​iskola, ara jekk tistax tinkiteb f’xi kors taʼ taħriġ li jippermettilek tikseb il-​kwalifiki meħtiġin f’inqas żmien milli kieku tagħmlu l-​iskola.

KONT TAF . . . ?

Żgħażagħ li jiskartaw il-​lezzjonijiet iktar għandhom tendenza li jitilqu mill-​iskola qabel il-​waqt.

L-​AZZJONI LI SE NIEĦU

Jekk qed insib diffikultà f’xi suġġett, minflok ma nitlaq mill-​iskola, jien se ․․․․․

Jekk l-​għeja qed iġġegħelni nħoss li rrid nitlaq mill-​iskola, se nkun nistaʼ nkampa jekk jien ․․․․․

Dak li nixtieq nistaqsi lill-​ġenitur(i) tiegħi dwar dan is-​suġġett hu ․․․․․

INT X’TAĦSEB?

● Għala hu vitali li titgħallem il-​matematika u li titgħallem taqra u tikteb b’mod tajjeb?

● Ara liema miri akkademiċi tistaʼ tilħaq fi ftit żmien. Dawn il-​miri kif jistgħu jgħinuk toqgħod attent(a) u tieħu vantaġġ mill-​edukazzjoni provduta mill-​iskola?

● Għala hu importanti għalik li jkollok ħjiel taʼ liema tip taʼ impjieg tixtieq issib wara li tkun spiċċajt l-​iskola?

[Kumment f’paġna 140]

Ma tistax taħrab mill-​problemi tiegħek. L-​iskola tgħinek tiddefendi d-​drittijiet tiegħek—abbiltà li se tiswielek taʼ ġid fuq il-​post tax-​xogħol u f’postijiet oħrajn.’’ —Ramona

 [Kaxxa f’paġna  139]

 Eżerċizzju

Il-​Miri Tiegħi fl-​Edukazzjoni

Wieħed mill-​iktar għanijiet importanti li għandha l-​edukazzjoni hu li tħejjik biex issib xogħol li se jgħinek tmantni lilek innifsek u lill-​familja li forsi tibni fil-​futur. (2 Tessalonikin 3:10, 12) Iddeċidejt x’tip taʼ xogħol trid? U ż-​żmien tal-​iskola, kif jistaʼ jgħinek tħejji ruħek għal dan ix-​xogħol? Sabiex tiġi megħjun tara jekk l-​edukazzjoni li qed tieħu hijiex qed tmexxik fid-​direzzjoni t-​tajba, wieġeb dawn il-​mistoqsijiet:

X’abbiltajiet għandi? (Pereżempju, taf tingwalaha man-​nies? Tieħu pjaċir tagħmel xogħol manwali, toħloq affarijiet ġodda, jew issewwi l-​affarijiet? Tinqalaʼ int biex tanalizza u ssolvi l-​problemi?) ․․․․․

Liema impjiegi se jippermettuli nuża l-​abbiltajiet li għandi? ․․․․․

Liema opportunitajiet taʼ impjieg huma disponibbli fejn ngħix jien? ․․․․․

Liema suġġetti li għandi bħalissa se jħejjuni għad-​dinja tax-​xogħol? ․․․․․

Liema għażliet li għandi bħalissa fl-​edukazzjoni se jgħinuni nilħaq il-​miri tiegħi b’iktar effiċjenza? ․․․․․

Ftakar li l-​mira tiegħek hi li tispiċċa l-​iskola b’edukazzjoni li tistaʼ tpoġġiha fil-​prattika. Mela tmurx fl-​estrem l-​ieħor u tibqaʼ tistudja bla waqfien, u b’hekk tibqaʼ “fuq il-​ferrovija” b’mod indefinit sempliċement biex taħrab mir-​responsabbiltajiet li jkollok bħala adult. *

[Nota ta’ taħt]

[Stampa f’paġni 138, 139]

Meta titlaq mill-​iskola jkun bħallikieku qed taqbeż minn ferrovija qabel ma tkun wasalt fid-​destinazzjoni tiegħek