KAPÍTULO 23

Mbaʼéichapa amombeʼúta la Biblia heʼíva homosexualidad rehe?

Peteĩ jey oñentrega jave prémio, mokõi kuña ojapóva pelíkula oñohetũ ikuénta hag̃uáicha. Ñepyrũrã umi hénte opyta hovayva, péro upéi oñepyrũ osapukái ha ojepopetejoa. Oĩ heʼíva haʼekuéra ojapo hague upéva ifamosave hag̃uánte. Umi homosexual ha lesbiana katu omombaʼeterei upe oikovaʼekue. Télepe ojagarrapaite upéva ha hetaiterei oĩ ohekáva Internétpe ohecha hag̃ua.

UPE oikovaʼekue ohechauka mbaʼeichaitépa ojehecharamo peteĩ famóso heʼíramo haʼeha homosexual, térã katu ogustaha chupe kuña ha kuimbaʼe. Oĩ oguerohorýva  koʼãichaguápe ndokyhyjéigui oiko hag̃ua chupe ogustaháicha. Ambue katu ndaijaʼeiete voi hesekuéra. Ha oĩ heʼíva káda uno odesidivaʼerãha koʼã mbaʼe. Daniel, orekóva 21 áño omombeʼu: “Koléhiope ndaikatuivaʼekue ni ere nandegustaiha peteĩ kuimbaʼe oiko hapicha kuimbaʼéndi térã kuña kuñándi. Umi ndahaʼéiva jepe umichagua pyaʼéma voi nemarka ha heʼi nderechaʼeiha umi homosexual rehe”.

Heta mbaʼe ningo ojeʼe ko témare. Pór ehémplo, umi imitãva nopensái jepi umi kakuaa opensaháicha, ha peteĩ tetãme ikatu ojehecha mbaʼeveʼỹrõguáicha pe homosexualidad ha ambuépe katu ndaupéichai. Péro jaipotáramo Ñandejára ñandeguerohory ndajahejaivaʼerã avave ‘ñandeguerotyryry ágotyo ha pégotyo’ ha jaroviánte opa mbaʼe rei ojeʼéva (Efesios 4:14, ÑÑB). Ñande ñamombaʼevaʼerã la Biblia heʼíva.

Ha mbaʼépa heʼi la Biblia pe homosexualidad rehe? Oimérõ nde reikose Ñandejára Ñeʼẽme heʼiháicha, mbaʼéichapa rembohováita ojeʼéramo nderehe nderechaʼeiha umi homosexual rehe? Jahechamína ocho mbaʼe ikatúva ojeʼe térã oñeporandu ndéve, ha ejesareko mbaʼéichapa ikatu rembohovái.

1. “Mbaʼépa heʼi la Biblia homosexualidad rehe?”

“Ohechauka Ñandejára heʼi hague kuña ha kuimbaʼe añónte ikatuha oiko oñondive, ha upearã omendavaʼerã (Génesis 1:27, 28; Levítico 18:22; Proverbios 5:18, 19). Ñandejára Ñeʼẽ heʼi porã ivaietereiha pe tekokyʼa, ha upévape oike umi oikóva oñondive omendaʼỹre, umi kuimbaʼe oikóva  kuimbaʼéndi ha umi kuña oikóva kuñándi (Gálatas 5:19-21).” a

2. “Mbaʼépa nde repensa umi homosexual rehe?”

“Che arrespeta chupekuéra, péro chéve noĩporãi pe ojapóva hikuái.”

Ani nderesarái: Nde redesidíma reikotaha Ñandejára Ñeʼẽ heʼiháicha ha avave ndaikatúi ndejopy rekambia hag̃ua (Josué 24:15). Upévare, ani retĩ nerepensái haguére haʼekuéra opensaháicha (Salmo 119:46).

3. “Péro umi heʼíva ijehe kristianoha omombaʼevaʼerã opavavépe.”

“Ha upéicha ningo, la Biblia heʼi voi ñamombaʼevaʼerãha opavavépe (1 Pedro 2:17). Upévare, ore roservíva Ñandejárape rorrespeta ha rotrata porã umi homosexuálpe, rojapoháicha avei opavavéndi (Mateo 7:12).”

4. “Péro eréramo oĩ vaiha pe homosexualidad piko neremomyihína ótrope ndaijaʼéi hag̃ua avei hesekuéra?”

“Nahániri. Che ndaguerohorýi pe ojapóva, péro upéva ndeʼiséi ndachaʼeiha hesekuéra.”

 Ikatu avei ere: “Chéve ndachegustái pe sigarríllo, chembojeguaru voi. Péro nde repitáramo ndahaʼéi upe haguére ndachaʼemoʼãvéimava nderehe. Ha ajerovia nde nderejapomoʼãiha avei upéva che ndapitái haguére. Ha upéichante avei jajoavy pe ñapensáva homosexualidad rehe”.

5. “Ndeʼíri piko rakaʼe Jesús nañamboykeivaʼerãha avavépe? Hiʼãche peẽ pekambiamieve vaʼerã pepensa lája.”

“Péro Jesús nomboʼéi jaguerohoryvaʼerãha enterove oiko lája. Haʼe heʼivaʼekue ikatuha ojesalva ‘opaite umi hese ojeroviáva’ (Juan 3:16, NM). Ha jahechaukáta jajeroviaha hese ndajajapóiramo umi mbaʼe Ñandejárape g̃uarã oĩ vaíva, ha umíva apytépe oĩ pe homosexualidad (Romanos 1:26, 27).”

6. “Umi homosexual ningo ndaikatúi okambia, péichama voi onase.”

“La Biblia noñeʼẽi upévare, péro heʼi oĩha heta mbaʼe ikatúva ijetuʼu ñandéve ñakambia hag̃ua (2 Corintios 10:4, 5; Efesios 2:3). Jepe hetápe oitira ko mbaʼe, ndahaʼéi upe haguére la Biblia heʼíva oĩ porãha.”

Konsého: Ani rembopukurei oĩramo odiskutiséva mbaʼéicha rupípa umi homosexual oiko péicha. La Biblia heʼi oĩ vaiha umi mbaʼe ojapóva, ha upéva la remyesakãvaʼerã. Ikatu voi ere: “Oĩ heʼíva umi oporotrata vaíva ha oñorairõsénteva upéicha voi onaseha. Upéicharamo jepe la Biblia omboʼe oĩ vaiha upe ojapóva, ha eréta piko la Biblia ojavyha oĩguinte  heʼíva upéicha voi onaseha? (Proverbios 29:22; Salmo 37:8; Efesios 4:31)”.

7. “Mbaʼéicha piko Ñandejára nontendemoʼãi umi homosexuálpe ha ojeruréta chupekuéra okambia hag̃ua?”

“Umi heʼíva upéicha opensa ñande yvypóra ndaikatuiha jajejoko ha jajapovaʼerãha katuete ñande rete ojaposéva. Péro ndaupéichai ningo. La Biblia heʼi ikatuha ñandepuʼaka umi mbaʼe ñañandúva ha jajaposévare, ha Ñandejára ojerovia jajapotaha upéva (Colosenses 3:5).”

 8. “Rekambiavaʼerã repensa lája, nandegustáiramo jepe upe ojapóva hikuái.”

“Ñamoĩ chupe ndéve ndegusta rehuga plátare, péro chéve nahániri ha upévare ndahugái. Akambiavaʼerã piko upéicharõ heta hénte ohuga rupínte?”

Ani nderesarái: Umi homosexuálpe ndogustái avei umi mbaʼe vai ojejapóva koʼág̃a rupi. Pór ehémplo gérra, japu, ñemonda, ha ndoguerohorýi avei oĩramo ombohasa asýva hapichápe. Ha la Biblia heʼi noĩporãiha koʼã mbaʼe, péro upeichaite avei heʼi pe homosexualidad rehe (1 Corintios 6:9, 10).

La Biblia ndeʼíri ñandepyʼahatã térã ñamboykevaʼerãha ñande rapichápe. Omeʼẽ guei peteĩ konsého opavavépe: tahaʼe homosexual, lesbiana térã umi ndahaʼéivape g̃uarã: ‘Peñemomombyrýke tekovaígui’ (1 Corintios 6:18).

Oĩ heta tapicha ojejokopaitéva oiko hag̃ua la Biblia heʼiháicha, ijetuʼúramo jepe chupekuéra. Pór ehémplo oĩ kuña ha kuimbaʼe ndahaʼéiva homosexual ha nomendáiva ndojuhúigui iñirũrã. Ha oĩnte avei omendáva péro ndaikatúiva oreko rrelasión sexual iména térã hembireko orekógui peteĩ mbaʼasy térã ambue mbaʼére. Péro ndahaʼéi upe haguére ndovyʼáiva hikuái. Umi homosexual avei ikatu ojejoko ha ovyʼa iñeʼẽrendúvo Jehovápe (Deuteronomio 30:19).

RETOPAVÉTA INFORMASIÓN VOLÚMEN 2, KAPÍTULO 28-PE

PE KAPÍTULO OÚVAPE

Heta mitãkuña oimoʼã ichíko ohayhuvetaha chupe oñenóramo hendive. Péro tuicha ojavy hikuái! Mbaʼérepa?

[Nóta]

TÉYSTO OĨVA LA BÍBLIAPE

‘Peñehaʼã pejejokokuaa; aníke avave oiko oñondive omendaʼỹre, ni ojapo mbaʼe kyʼa, térã oiko hembipota vai rapykuéri, ỹrõ heko taryrýi, haʼete jeýnteva taʼanga ñemombaʼeguasu.’ (Colosenses 3:5, BNP)

PETEĨ KONSÉHO

Sapyʼánte ningo nandegustamoʼãi voi heta hénte ojapóva, péro ani upe haguére remboyke ni reiko reñemoñeʼẽse chupekuéra. Haʼekuéra ikatu avei odesidi mbaʼépa opensáta ha mbaʼéichapa oikóta.

REIKUAÁPARAʼE?

Síglo primérope oĩvaʼekue kuimbaʼe oikóva hapicha kuimbaʼéndi ha kuña kuñándi, péro upéi ohejapaite hikuái koʼã mbaʼe ipotĩ hag̃ua Ñandejára renondépe (1 Corintios 6:9-11).

UMI MBAʼE AJAPÓTAVA!

Mbaʼépa haʼéta ojeʼéramo chéve la Biblia omboʼéva ndahaʼeveimaha ñane tiémpope g̃uarã? ․․․․․

Mbaʼépa ikatu haʼe antendeuka hag̃ua che rapichakuérape ndachaʼeiha pe homosexualidad rehe, péro ndahaʼéi umi homosexual rehe? ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼérepa Ñandejára ikatu heʼi yvypórape mbaʼéichapa oikovaʼerã?

● Mbaʼéichapa ideprovéchota ndéve rejapóramo Haʼe heʼíva?

[Komentário oĩva páhina 170-pe]

“Koléhiope peteĩ che kompañéro ipochými vaʼerã ndaguerohorýigui haʼe oiko lája. Che haʼe porã chupe ndahaʼeiha hese la ndachaʼéiva, síno pe homosexualidad rehe ha opa mbaʼe Ñandejára heʼívare oĩ vaiha. Upe rire haʼe ohechakuaa upéva ha cherrespetave, ha chedefende avei oĩramo oñeʼẽ vaíva cherehe”. (Adriana)

 [Rrekuádro oĩva páhina 168-pe]

Ha umi ogustáva chupe kuña ha kuimbaʼe?

Koʼág̃a rupi hetaiterei oĩ koʼãichagua, péro ojehechave jepi umi mitãkuña apytépe. Heta vése haʼekuéra oikuaasénte mbaʼépa oñeñandu. Lisa, orekóva 26 áño heʼi voi: “Músika ha télepe oñeñeʼẽ térã ojehechaukáramo mokõi kuña oñohetũha mbaʼeveʼỹrõguáicha, upe rire umi mitãkuña otanteasétama avei, koʼýte opensáramo ndaivairiha upéva”.

Sapyʼánte katu ojegusta voi hikuái. Vicky, orekóva 13 áño heʼi: “Peteĩ fiéstape aikuaa mokõi mitãkuña ojegustáva kuña ha kuimbaʼére. Upéi che amíga heʼi haʼekuéra imanduʼa porã hague cherehe. Upe rire añepyrũ amensahea peteĩva ndive ha saʼi saʼípe ajegusta hese”.

Heta mitãrusu oñandu ogustaha chupe kuña ha kuimbaʼe. Ha oimérõ nde avei reñandu upéva, katuete oĩta heʼíva ndéve ere porãntema hag̃ua ndegustaha mokõivéva. Péro koʼã mbaʼe oñandúva jepi mitãrusukuéra upéi ojehasa jey chuguikuéra. Vicky ohechakuaavaʼekue upéva, ha Lisette, orekóva 16 áño avei. Haʼe heʼi: “Amombeʼu rire che tuvakuérape mbaʼéichapa añeñandu tuicha chepyʼaguapyve. Koléhiope avei aaprende oĩha heta mbaʼe okambiáva ñande retépe jakakuaa aja, upévare ñañandu jepi heta mbaʼe ipyahúva ha ñanemondýiva voi, péro upéi ojehasapa jey ñandehegui. Mitãrusukuéra ontende porãrire koʼã mbaʼe ndoikoivaʼerãmoʼã ojapura heʼi hag̃ua haʼeha homosexual”.

Repensáramo jepe ndojehasamoʼãiha ndehegui upe reñandúva, ani reimoʼã nanepohãveimaha. La Biblia heʼi ndete ikatuha redesidi ko mbaʼe: rehejátapa umi mbaʼe reñandúva ipuʼaka nderehe, térãpa reñehaʼãta rejejoko pono rejapo peteĩ mbaʼe hekopeʼỹ.

[Taʼanga oĩva páhina 169-pe]

Jaservíramo Ñandejárape ndajaikói umi hénte oiko lája, ha ndajahái haʼekuéra ohoha gotyo