KAPITULO 23

Kasanok a Mailawlawag ti Kuna ti Biblia Maipapan iti Homoseksualidad?

Nagriaw dagiti agbuybuya iti awards ceremony idi nagbinnisong ti dua a nalatak nga aktres kas panagkinnablaawda! Naklaat dagiti nakabuya sada nagiikkis ken nagpapalakpak. Maysa a balligi dayta para kadagiti homoseksual. Kuna met dagiti dadduma nga inaramidda laeng dayta tapno agbalinda a nalatak. Aniaman ti rason, maulit-ulitto a maipadamag dayta iti TV ken minilion ti mangbuyanto iti Internet kadagiti sumaganad nga aldaw.

KAS nadakamat iti ngato, no ipadlaw wenno aminen ti nalatak a tao nga isu ket bakla, tomboy, wenno bisexual (agpada nga agkursonada iti lalaki ken babai), pagbalinen dayta ti media nga ad-adda a kontrobersial ngem iti dadduma pay a damag.  Dayawen ti dadduma ti kasta a kinatured ngem adda met dagidiay mangkondenar iti kasta a kinarugit iti moral. Malaksid kadagita a dua nga agsupadi a panangmatmat, adu ti mangibilang iti homoseksualidad kas sabali laeng nga estilo ti panagbiag. “Idi ages-eskuelaak,” kuna ni Daniel nga agtawen iti 21, “uray dagiti agtutubo a pudpudno a lallaki ken babbai ibilangdaka a manangidumduma ken manangukom no kaguram ti homoseksualidad.”

Mabalin nga agduduma ti panangmatmat iti homoseksualidad depende iti henerasion ken lugar. Ngem dagiti Kristiano ket saan nga “iyallaalla ditoy ken idiay ti tunggal angin ti sursuro.” (Efeso 4:14) Iyap-aplikarda ti kuna ti Biblia.

Ania ti kuna ti Biblia maipapan iti homoseksualidad? No an-annurotem ti moral a pagalagadan ti Biblia, ania ti isungbatmo kadagidiay mangibagbaga a manangidumduma, manangukom, wenno kagurguram dagiti homoseksual? Usigem dagiti sumaganad a saludsod wenno sasao ken dagiti posible nga isungbatmo.

“Ania ti kuna ti Biblia maipapan iti homoseksualidad?”

“Nalawag a kuna ti Biblia a ti Dios inyurnosna a ti sekso ket tagiragsaken laeng ti lalaki ken babai nga agassawa. (Genesis 1:27, 28; Levitico 18:22; Proverbio 5:18, 19) Ti pannakiabig a konkondenaren ti Biblia tukoyenna dagiti seksual nga aramid agpadpada dagiti agkasekso ken ti dakes nga aramid dagiti di agkasekso.” *​—Galacia 5:19-21.

“Ania ti panangmatmatmo iti homoseksualidad?”

“Diak kagura dagiti homoseksual, ngem kagurak dagiti aramidda.”

 Laglagipem: No agpapaiwanwanka iti moral a pagalagadan ti Biblia, dayta ti pinilim a wagas ti panagbiag, ken kalintegam dayta. (Josue 24:15) Dimo ibain dayta a takdermo.​—Salmo 119:46.

“Saan kadi a masapul a raemen dagiti Kristiano ti amin a tattao, agraman dagiti homoseksual?”

“Wen. Kuna ti Biblia: ‘Padayawanyo dagiti amin a kita ti tattao’ wenno, kas kuna Ti Baro a Naimbag a Damag Biblia, ‘Raemem ti amin a tattao.’ (1 Pedro 2:17) No kasta, saan a kagura dagiti Kristiano dagiti homoseksual. Pakpakitaanda iti kinaimbag dagiti amin a tattao, a pakairamanan dagiti homoseksual.”​—Mateo 7:12.

“Saan ngata a ti panangmatmatmo iti homoseksualidad itantandudona ti panangidumduma kadagiti homoseksual?”

“Saan met a kasta. Ti kagurak ket ti aramid dagiti homoseksual, saan a ti homoseksual a mismo.”

Mabalinmo pay nga ibaga: “Kas pagarigan, diak agsigsigarilio. Kinapudnona, diak mairusok dayta. Ngem ipapantan nga agsigsigarilioka, isu nga agduma ti panangmatmatta. Saanka a kagura gapu iti panangmatmatmo, ken sigurado a dinak met kagura gapu iti panangmatmatko​—di ngamin? Kasta met laeng no iti agduma a panangmatmatta iti homoseksualidad.”

 “Saan kadi nga insuro ni Jesus nga akseptarentayo dagiti sabsabali? No kasta, saan kadi a nasayaat no saan unay a nainget dagiti Kristiano no maipapan iti homoseksualidad?”

“Saan nga imparegta ni Jesus kadagiti adalanna nga akseptarenda ti uray ania lattan a wagas ti panagbiag. Imbes ketdi, insurona a ti pannakaisalakan ket magun-odan ti ‘tunggal maysa a mangwatwat iti pammati kenkuana.’ (Juan 3:16) Ti panangwatwat iti pammati ken Jesus ramanenna ti panangsurot iti moral a pagalagadan ti Dios, a mangiparit iti dadduma a kita ti aramid​—agraman ti homoseksualidad.”​—Roma 1:26, 27.

“Saanen a makapagbalbaliw dagiti homoseksual ta nayanakdan a kasta.”

“Saan a dinakamat ti Biblia no dagiti homoseksual ket sigudda a kasta wenno saan, ngem bigbigenna nga adda dagiti kababalin a nauneg ti pannakairamutna. (2 Corinto 10:4, 5) Uray no agkursonada ti maysa iti padana a lalaki wenno babai, ibaga ti Biblia a liklikan dagiti Kristiano ti homoseksual nga ar-aramid.”

Singasing: Imbes a makipinnapilitka maipapan iti nagtaudan dagiti homoseksual a tarigagay, ipaganetgetmo nga iparit ti Biblia ti homoseksual nga aramid. Kas panangyilustrar, mabalinmo nga ibaga: “Ammom, adu ti agkuna a matawid ti naranggas a kababalin isu nga adda tendensia dagiti dadduma nga agbalin a naranggas. (Proverbio 29:22) Kasanon no agpayso dayta? Kas pagaammom, kondenaren ti Biblia ti kinamanagpungpungtot. (Salmo 37:8; Efeso 4:31) Ibagam kadi a saan  a nainkalintegan dayta a pagalagadan gapu laeng ta kayat ti dadduma ti agbalin a naranggas?”

“Kasano koma nga ibaga ti Dios iti maysa nga agkursonada iti kaseksona a liklikanna ti homoseksualidad? Kasla saan a nainkalintegan dayta.”

“Ti kasta a panagrasrason ket naibatay iti di umiso a kapanunotan a masapul a suroten dagiti tattao ti seksual a tarigagayda. Ti Biblia ipapaayanna dagiti tattao iti dignidad babaen ti panangipanamnamana kadakuada a kabaelanda nga iwaksi dagiti di umiso a seksual a tarigagayda no talaga a kayatda.”​—Colosas 3:5.

 “Uray no saanka a homoseksual, masapul a baliwam ti panangmatmatmo iti homoseksualidad.”

“Kas pagarigan, diak kayat ti agsugal ngem sika ket kayatmo. Nainkalintegan kadi a pilitennak a baliwak ti panangmatmatko gapu laeng ta minilion ti agsugsugal?”

Laglagipem: Dagiti homoseksual, ken ti kaaduan a tattao, ket addaan kadagiti prinsipio mainaig iti naimbag ken dakes isu nga adda dagiti banag a kagurada​—kas iti panagkusit, kinaawan hustisia, wenno gubat. Iparit ti Biblia dagita; iparitna pay ti dadduma a kita ti seksual nga aramid, agraman ti homoseksualidad.​—1 Corinto 6:9, 10.

Nainkalintegan ti Biblia ken saanna nga itantandudo ti panangidumduma. Agpada ti pagalagadan nga ipapaannurotna kadagiti agduyos iti kapadada iti sekso ken dagidiay agduyos iti saanda a kasekso​—“adaywanyo ti pannakiabig.”​—1 Corinto 6:18.

Kinapudnona, ti minilion a heterosexual (dagidiay agduyos iti saanda a kasekso) a mayat a mangyaplikar iti pagalagadan ti Biblia ket agtepteppel iti laksid ti aniaman a sulisog a mabalin a pakaipasanguanda. Adu kadakuada ti babbaro ken babbalasang a bassit ti tsansana a makaasawa. Adu met ti addaan iti baldado nga asawa a din makabael a makidenna. Ngem naragsakda latta uray no saan a mapempennek ti seksual a tarigagayda. Kabaelan met nga aramiden dayta dagidiay agduyos iti kapadada iti sekso no talaga a kayatda a paragsaken ti Dios.​—Deuteronomio 30:19.

ADU PAY TI MABASAM MAIPAPAN ITI DAYTOY A TOPIKO ITI TOMO 2, KAPITULO 28

ITI SUMAGANAD A KAPITULO

Patien ti dadduma a babbai a nasingsingedda iti nobioda no agseksda. Ngem saan a kasta! Ammuem no apay.

[Footnote]

NAPAPATEG A TEKSTO

“Papatayenyo, ngarud, dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso, makapasakit a tarigagay, ken kinaagum, a dayta ket idolatria.”​—Colosas 3:5.

BALAKAD

Nupay nalabit masnaayanka iti aramid dagiti sabsabali, saanmo koma nga iparikna a sika laeng ti husto. Kas kenka, adda met kalinteganda a mangpili no ania ti patienda.

AMMOM KADI . . . ?

Ti dadduma a Kristiano idi umuna a siglo a makiramraman idi kadagiti homoseksual nga aramid nabalbaliwanda ti narugit a kabibiagda ket ‘naugasanda’ iti imatang ti Dios. ​—1 Corinto 6:9-11.

DAGITI ARAMIDEK!

No adda mangibaga a kadaanan ti ibagbaga ti Biblia maipapan iti homoseksualidad, ti isungbatko ket ․․․․․

Tapno mailawlawagko a ti kagurak ket ti aramid dagiti homoseksual, saan a ti homoseksual a mismo, ibagak nga ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Apay nga adda kalintegan ti Dios a mangipasdek kadagiti paglintegan iti moral a suroten dagiti tattao?

● Kasanoka a mabenepisiaran no surotem dagiti paglintegan iti moral a nailanad iti Biblia?

[Blurb iti panid 170]

Impagarup ti maysa a lalaki idiay eskuelaanmi nga isu ket kagurgurak gapu ta diak kayat ti wagas ti panagbiagna. Ngem idi inlawlawagko a saan nga isuna ti kagurak​—ken idi naamirisna a saan laeng a ti homoseksualidad ti kagurak no di ket ti amin a kita ti imoralidad​—rinaemnak ken idepdepensanak payen no adda mangkontra kaniak.’’​—Aubrey

 [Kahon iti panid 168]

Dagiti Ngay “Bisexual”?

Nupay agpada nga adda babbai ken lallaki a bisexual, agparang a naparpartak nga umadu dagiti babbai a bisexual. Para kadagiti dadduma, kayatda laeng a padasen dayta. Kuna ni Lisa nga agtawen iti 26: “No ti panagbinnisong ti dua a babbai ket maitampok kadagiti pelikula, TV, ken musika, masulisog dagiti agtutubo a mangpadas iti dayta​—nangruna no saanda nga ibilang a dakes dayta.”

Adda met dagidiay pudpudno a naatrakar. Kuna ni Vicky nga agtawen iti 13: “Adda naam-ammok a dua a bisexual a babbai iti maysa a party. Idi kuan, adda gayyemko a nangibaga kaniak a kursonadadak dagiti dua. Nagbalin a textmate-ko ti maysa kadakuada ket natnag metten ti riknak kenkuana.”

Nariknam met kadin ti kas iti narikna ni Vicky? Adu ti mangdurog kenka nga akseptarem lattan ti kasasaadmo ken saanmo nga ibain dayta. Ngem laglagipem a ti panagkursonada iti kapadam iti sekso ket masansan nga aglabasto met laeng. Kasta ti napadasan ni Vicky ken uray ni Lisette, nga agtawen iti 16. Kinuna ni Lisette: “Nakatulong ti pannakisaritak kadagiti dadakkelko maipapan iti marikriknak. Naammuak met iti klasemi iti biology a bayat ti kinaagtutubo, agbaliwbaliw ti kaadu ti hormone iti bagi ti maysa a tao. Panagkunak, no ad-adu ti ammo dagiti agtutubo maipapan iti bagida, maawatanda a ti panagkursonada iti kapadada iti sekso ket temporario laeng ken saanda a tumulok nga agbalin a homoseksual.”

Uray no ti marikriknam ket nakarkaro ngem iti kadawyan a marikna dagiti agtutubo, laglagipem a ti Biblia ipaayannaka iti kalat a kabaelam a ragpaten: Kabaelam a labanan ti aniaman a di umiso a tarigagay.

[Ladawan iti panid 169]

Natured dagiti Kristiano a saan a sumurot lattan iti kapanunotan ti kaaduan