Ibuot 26

Nso Kaban̄a Edinam Idan̄ Nte Ẹmama?

“Nditọwọn̄ ẹsitọn̄ọ mbre ima ye owo ekededi oro mmọ ẹkụtde man ẹse m̀mê usụn̄ oyodu se mmọ ẹnamde idan̄ ye adan̄a ediwak owo nte ẹkekeme.”​—Penny.

“Iren isidịpke inua ke ini ẹtịn̄de n̄kpọ ẹban̄a idan̄. Mmọ ẹsinam inua ẹte ke imesikpọn̄ ufan mmimọ iban ikanam idan̄ ye ediwak nditọiban en̄wen.”​—Edward.

EDIWAK uyen mfịn ẹsinam inua ẹte ke imesinam idan̄ ye owo ekededi oro mmimọ ikụtde, ndien ke oro ebede ifre owo oro ofụri ofụri. Ndusụk mmọ ẹnyenyene mme owo emi mmọ ẹsikamade ẹnam idan̄, edi idịghe nte ẹmama mmọ.

Kûyak idem akpa fi edieke orụk n̄kpọ emi ọdọn̄de fi. (Jeremiah 17:9) Edward emi ẹsiakde ke enyọn̄ emi ọdọhọ ete: “Ediwak iban ẹsidọhọ ndinam idan̄ ye mmimọ, ndien emi esidi n̄kponn̄kan idomo oro nsobode nte Christian. Esinen̄ede ọsọn̄ ndidọhọ ke ndinamke.” Mme edumbet N̄wed  Abasi ewe ke afo ekpeti edieke owo ọdọhọde edinam idan̄ ye imọ?

Ntak Ọdiọkde Ndinam Idan̄ Nte Ẹmama

Use edi akwa idiọkn̄kpọ, ndien mbon oro ẹkade iso ẹnam use “ididaha obio ubọn̄ Abasi inyene.” (1 Corinth 6:9, 10) Emi edi akpanikọ inamke n̄kpọ m̀mê mbon oro ẹnamde use ẹdọhọ ke imama idem mmimọ m̀mê ẹnam ye owo emi mmọ mîtịmke ifiọk. Ke idaha ekededi, man ikan idomo emi, ana ise edinam emi nte Jehovah esede.

“Mmenen̄ede nnịm ke nte Jehovah ọdọhọde idu uwem ọfọn akan.”—Karen, Canada.

“Ti ete ke afo edi eyen owo, ke ediwak owo ẹma fi, ye nte ke afo esịne ke esop Abasi. Eyenen̄ede abiak kpukpru mmọ edieke ọduọde ke ini ẹdomode fi!”—Peter, Britain.

Edieke adade use nte Jehovah adade, afo eyekeme ‘ndisua se idiọkde’ idem ọkpọkọm enen̄ede ọdọn̄ fi ndinam.​—Psalm 97:10.

Itien̄wed emi okpokotde: Genesis 39:7-9. Ndi omokụt nte Joseph ọkọsọn̄ọde ada etre ndinam use ye se ikan̄wamde enye akan idomo oro?

Nen̄ede Ma Se Afo Enịmde ke Akpanikọ

Mme uyen ẹsiwak ndisọn̄ọ nda nnam se mmọ ẹnịmde ke akpanikọ. Afo emenyene san̄asan̄a ifet ndidu uwem nte Abasi etemede. Kûyak nte esede idan̄ mbemiso ndọ anam fi bụt.

“Babak nam mme owo ẹfiọk ke afo ada mme edumbet Bible odu uwem.”—Allen, Germany.

“N̄kparawa oro n̄kakade ufọkn̄wed sekọndri ntre ẹma  ẹfiọk owo emi ndide, ẹma ẹnyụn̄ ẹfiọk ke se ededi oro mimmọ idinamde editie nte ndiduọn̄ọ inụn̄ ke nsia ebiọn̄.”—Vicky, United States.

Ndisọn̄ọ nda nnam se afo enịmde ke akpanikọ owụt ke afo ke anam n̄kọri man akabade edi Christian emi ọkọride esịm ọyọhọ idaha.​—1 Corinth 14:20.

Itien̄wed emi okpokotde: Mme N̄ke 27:11. Ndi omokụt ke afo ndinam se inende ekeme ndidat Jehovah esịt?

Nyene Iwụk!

Ọfọn ndidọhọ ke imọ idinamke. Edi ndusụk owo ẹkeme ndikere ke anam asian kan̄a, edi ke eyenyịme ke akpatre.

“Kpukpru se anamde—nte esịnede n̄kpọ, nte etịn̄de ikọ, mbon oro esinemede nneme, nte esinamde n̄kpọ ye mme owo—ẹkpenyene ndiwụt ke udunamke.”—Joy, Nigeria.

“Nam mmọ ẹfiọk ke tutu amama ke imọ idinamke. Kûdedei ubọ n̄kparawa emi ẹyomde ndida fi nyụhọ udọn̄ idem mmọ enọ. Mmọ ẹkeme ndiyịre fi ke ntak oro, nte n̄kpọ eke ẹdọhọde ke akama mmọ isọn.”—Lara, Britain.

Jehovah ayan̄wam fi edieke enyenede iwụk. Se iketịbede inọ David andiwet Psalm ama anam enye ọdọhọ ete: “Afo ọyọsọn̄ọ ada ye owo emi ọsọn̄ọde ada.”​—Psalm 18:25.

Itien̄wed emi okpokotde: 2 Chronicles 16:9. Fiọk ete ke Jehovah akam oyoyom ndin̄wam mbon oro ẹyomde ndinam se inende.

 Nyene Mbufiọk

Bible ọdọhọ ete: “Owo mbufiọk ada okụt afanikọn̄ ndien edịbe.” (Mme N̄ke 22:3) Didie ke ekeme ndinam se itien̄wed oro etịn̄de? Nyene mbufiọk!

“Dian̄ade ofụri ofụri kpọn̄ mbon oro ẹsinemede utọ n̄kpọ oro.”—Naomi, Japan.

“Idịghe kpukpru owo ke ana etịn̄ n̄kpọ oro aban̄ade idemfo ọnọ, utọ nte ebiet emi odụn̄de ye nọmba telefon fo.”—Diana, Britain.

Fiak se nte esitịn̄de ikọ, nte esinamde n̄kpọ, mbon oro esidụkde ndụk, ye mme ebiet oro esikade. Ekem bụp idemfo, ‘Okûdi nte nsinamde n̄kpọ ekeme ndinam mme owo ẹyom ndinam idan̄ ye ami?’

 Itien̄wed oro okpokotde: Genesis 34:1, 2. Ndi omokụt ke Dinah ndikodu ke ebiet emi mîkpakanaha enye odu akada enye ekesịn ke fehesan̄?

Ti ete ke ndinam idan̄ nte ẹmama idịghe n̄kpọ mbubru ke enyịn Jehovah Abasi; afo n̄ko ukpadaha enye ke n̄kpọ mbubru. Edieke anamde se inende, ayaka iso enyene edisana ubieresịt ke iso Abasi onyụn̄ enyene uku. Eyenan̄wan kiet emi ekerede Carly ọdọhọ ete: “Ntak emi akpayakde owo ada fi oyụhọ udọn̄ idemesie? Kûyak n̄kpọ ndomokiet abiat ọsọn̄urua itie ebuana fo ye Jehovah.”

KE IBUOTIKỌ ORO ETIENEDE

N̄kparawa ẹdọhọ ke nso orụk iban ke mmimọ isinen̄ede ima. Se mmọ ẹtịn̄de ekeme ndikpa fi idem!

AKPAN ITIE N̄WED ABASI

“Ẹsịn ofụri ukeme man ke akpatre [Abasi] okpokụt mbufo nte ẹnanade ntọi ẹnyụn̄ ẹnanade ndo ẹnyụn̄ ẹdude ke emem.”​—2 Peter 3:14.

ITEM

Domo ndinyene nti edu. (1 Peter 3:3, 4) Edieke enyenede nti edu, mbon oro ẹnyenede nti edu n̄ko ẹyema fi.

NDI AMA ỌFIỌK . . . ?

Ke ini Jehovah okobotde owo, enye okoyom idan̄ edi n̄kpọ inemesịt ke ufọt ebe ye n̄wan. Ntre edieke ebetde tutu afo ọdọ ndọ, udutịmekede esịt ke ini anamde idan̄, udutuaha n̄kpọfiọk, udunyụn̄ unyeneke mfịna oro mbon emi ẹsinamde use ẹsinyenede.

SE NDINAMDE

Joseph ama ebiere ndika iso ndu edisana uwem, ndien mmekeme ndikpebe enye edieke ․․․․․

Ndinamke ukem ndudue oro Dinah akanamde edieke ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Okposụkedi emi unana mfọnmma ekemede ndinam owo oyom ndinam idan̄ nte amama, ntak emi edinam emi ọdiọkde?

● Nso ke afo edinam edieke owo ọdọhọde edinam idan̄ ye imọ?

[Se ẹwetde ke ikpọ abisi ke page 185]

“Nyene iwụk! Ke ini akparawa kiet ọkọtọn̄ọde ndisịme mbre ye ami, n̄kọdọhọ enye nte, ‘Dorode mi ubọk ke afara!’ nnyụn̄ nse enye ke idiọk enyịn nsan̄a okịmmọ mbe.”​—Ellen

[Ndise ke page 187]

Edieke anamde idan̄ nte amama, ọwọrọ amakabade mbaha n̄kpọurua