ចុះការរួមភេទឲ្យតែបានសប្បាយ?
ជំពូកទី២៦
ចុះការរួមភេទឲ្យតែបានសប្បាយ?
ប្អូនផេននី ប្រាប់ថា៖ «ក្មេងៗជាច្រើនទាក់ទងគ្នា គ្រាន់តែចង់មើលថាតើទំនាក់ទំនងពួកគេអាចឈានដល់កម្រិតណា? ឬចង់ដឹងថា តើអ្នកណាខ្លះដែលខ្លួនអាចរួមភេទបាន?»។
ប្អូនអេឌវ៉ាដ ប្រាប់ថា៖ «យុវជនជាច្រើននិយាយអំពីរឿងរួមភេទដោយគ្មានក្រែងរអែងចិត្ត។ ពួកគេអួតគ្នាថា ទោះជាមានសង្សារហើយ ក៏ពួកគេនៅតែដេកជាមួយស្រីៗផ្សេងទៀតដែរ»។
យុវវ័យសម័យនេះច្រើនតែអួតគ្នាថា ពួកគេបានរួមភេទជាមួយអ្នកនេះ ឬជាមួយអ្នកនោះដើម្បីតែការសប្បាយ ដោយគ្មានអារម្មណ៍ស្នេហាឡើយ។ យុវវ័យមួយចំនួនថែមទាំងត្រៀមខ្លួនក្នុងការរួមភេទជាមួយអ្នកស្គាល់គ្នា ដោយមិនចង់មានស្នេហាទេ។
បើប្អូនចង់ធ្វើបែបនោះ គឺមិនមែនជារឿងប្លែកឡើយ! (យេរេមា ១៧:៩) ប្អូនប្រុសអេឌវ៉ាដដែលរៀបរាប់ខាងលើ បានពោលទៀតថា៖ «ស្រីៗជាច្រើនសុំរួមភេទជាមួយខ្ញុំ។ នេះជារឿងពិបាកបំផុតដែលខ្ញុំបានជួបតាំងពីក្លាយជាគ្រិស្តសាសនិក។ និយាយត្រង់ទៅ គឺមិនស្រួលឡើយឲ្យខ្ញុំបដិសេធ!»។ បើមានគេបបួលប្អូនឲ្យរួមភេទ តើគម្ពីរមានគោលការណ៍អ្វីខ្លះដែលប្អូនគួរចងចាំ?
ចូរដឹងពីមូលហេតុដែលការរួមភេទឲ្យតែបានសប្បាយគឺជាការខុស
អំពើប្រាសចាកសីលធម៌ខាងផ្លូវភេទគឺជាអំពើខុសឆ្គងធ្ងន់ធ្ងរមួយ។ មិនថាការរួមភេទកើតឡើងដោយសារ«ស្នេហា» ឬកើតឡើងដោយសារការសប្បាយទេ អ្នកដែលធ្វើទង្វើបែបនោះ«នឹងមិនទទួលរាជាណាចក្ររបស់ព្រះជាមត៌កឡើយ»។ (កូរិនថូសទី១ ៦:៩, ១០) បើប្អូនមានទស្សនៈដូចព្រះយេហូវ៉ាចំពោះការប្រព្រឹត្តអំពើប្រាសចាកសីលធម៌ខាងផ្លូវភេទ ប្អូនអាចយកឈ្នះការល្បងលនោះបាន។
ប្អូនខារិននៅកាណាដា និយាយថា៖ «ខ្ញុំជឿជាក់យ៉ាងខ្លាំងថា ការរស់នៅតាមផ្លូវរបស់ព្រះយេហូវ៉ាគឺជារបៀបរស់នៅល្អបំផុត»។
ប្អូនភីធើនៅអង់គ្លេស និយាយថា៖ «សូមចាំថា អ្នកមានឪពុកម្ដាយ មិត្តភក្តិ និងបងប្អូនជាច្រើនក្នុងក្រុមជំនុំ ហើយបើអ្នកចុះចាញ់ការល្បងល អ្នកនឹងធ្វើឲ្យពួកគេខកចិត្ត»។
ពេលប្អូនមានទស្សនៈដូចព្រះយេហូវ៉ាចំពោះការប្រព្រឹត្តអំពើប្រាសចាកសីលធម៌ខាងផ្លូវភេទ នោះប្អូននឹង«ស្អប់អ្វីដែលអាក្រក់» មិនថារឿងនោះទាក់ទាញចិត្តប្អូនខ្លាំងយ៉ាងណាទេ។—ចម្រៀងសរសើរព្រះ ៩៧:១០
សូមអានបទគម្ពីរ ដើមកំណើត ៣៩:៧-៩ ហើយកត់សម្គាល់អំពីរបៀបដែលយ៉ូសែបបង្ហាញចិត្តក្លាហានក្នុងការបដិសេធការរួមភេទ និងអ្វីដែលបានជួយគាត់ឲ្យធ្វើដូច្នេះ។
ចូរមានមោទនភាពចំពោះជំនឿរបស់ខ្លួន
ជាញឹកញយ យុវវ័យតែងតែមានមោទនភាពចំពោះឧត្តមគតិឬជំនឿរបស់ខ្លួន។ ប្អូនមានកិត្តិយសគាំទ្រខ្នាតតម្រាសីលធម៌របស់ព្រះតាមរយៈការប្រព្រឹត្តរបស់ប្អូន។ ដូច្នេះ ប្អូនមិនចាំបាច់ខ្មាសអៀនក្នុងការប្រាប់អ្នកឯទៀតអំពីទស្សនៈរបស់ប្អូនចំពោះការរួមភេទមុនរៀបការឡើយ។
ប្អូនអាឡិននៅអាល្លឺម៉ង់ ប្រាប់ថា៖ «តាំងពីដំបូងអ្នកត្រូវបញ្ជាក់ឲ្យគេដឹងច្បាស់ថា អ្នកមានគោលការណ៍សីលធម៌ផ្ទាល់ខ្លួន»។
ប្អូនវីកគីនៅសហរដ្ឋអាម៉េរិក ប្រាប់ថា៖ «ពេលរៀននៅវិទ្យាល័យ ប្រុសៗដឹងថាខ្ញុំមានគោលជំហរបែបណា ហើយពួកគេក៏ដឹងដែរថា ទោះជាពួកគេខំចែចង់ខ្ញុំយ៉ាងណា ក៏គ្មានប្រយោជន៍ដែរ»។
ការប្រកាន់ខ្ជាប់តាមជំនឿរបស់ខ្លួនជាសញ្ញាបង្ហាញថា ប្អូនជាគ្រិស្តសាសនិកដែលមានភាពចាស់ទុំ។—កូរិនថូសទី១ ១៤:២០
សូមអានបទគម្ពីរ សុភាសិត ២៧:១១ ហើយមើលអំពីរបៀបដែលការប្រព្រឹត្តល្អរបស់ប្អូនធ្វើឲ្យព្រះយេហូវ៉ាសប្បាយចិត្ត!
ចូរតាំងចិត្តរឹងមាំ!
ការចេះបដិសេធគឺសំខាន់។ ប៉ុន្តែ មនុស្សមួយចំនួនប្រហែលជាយល់ខុសថា ការបដិសេធរបស់ប្អូន គ្រាន់តែជាការ«លេងខ្លួនប៉ុណ្ណោះ»។
ប្អូនជយនៅនីហ្សេរីយ៉ា ប្រាប់ថា៖ «ក្រោយពីអ្នកបដិសេធ អ្នកត្រូវបង្ហាញថាអ្នកតាំងចិត្តធ្វើតាមពាក្យរបស់ខ្លួន រួមទាំងការស្លៀកពាក់ ការនិយាយស្ដី និងការប្រព្រឹត្តរបស់អ្នក។ អ្នកក៏ត្រូវគិតដែរអំពីមនុស្សបែបណាដែលអ្នកចង់និយាយជាមួយ»។
ប្អូនឡារ៉ានៅអង់គ្លេស ប្រាប់ថា៖ «អ្នកត្រូវបញ្ជាក់យ៉ាងច្បាស់ទៅបុគ្គលនោះថា អ្នកគ្មានថ្ងៃរួមភេទជាមួយគាត់ឡើយ។ កុំទទួលយកអំណោយពីមនុស្សប្រុសដែលចង់គេងជាមួយអ្នក ព្រោះបើអ្នកទទួល នោះគាត់ចាត់ទុកថាអ្នកត្រូវសងគាត់វិញដោយការគេងជាមួយគ្នា»។
បើប្អូនតាំងជំហរមាំមួន នោះព្រះយេហូវ៉ានឹងជួយប្អូន។ តាមរយៈបទពិសោធន៍ផ្ទាល់ខ្លួន ដាវីឌបានច្រៀងសរសើរព្រះយេហូវ៉ាថា៖ «លោកស្មោះត្រង់ចំពោះអ្នកដែលស្មោះត្រង់»។—ចម្រៀងសរសើរព្រះ ១៨:២៥
សូមអានបទគម្ពីរ ប្រវត្តិហេតុទី២ ១៦:៩ ហើយកត់សម្គាល់ថា ព្រះយេហូវ៉ាពិតជាចង់ជួយអស់អ្នកដែលខំធ្វើអ្វីដែលត្រឹមត្រូវ។
ចូរគិតទុកជាមុន
គម្ពីរចែងថា៖ «មនុស្សឈ្លាសវៃឃើញអន្តរាយមកក៏ពួនខ្លួន»។ (សុភាសិត ២២:៣) តើប្អូនអាចធ្វើតាមគោលការណ៍នេះដោយរបៀបណា? គឺដោយគិតទុកជាមុន!
ប្អូនណាអូមីនៅជប៉ុន រៀបរាប់ថា៖ «ព្យាយាមនៅឲ្យឆ្ងាយពីមនុស្សដែលចូលចិត្តនិយាយរឿងបែបនោះ»។
ប្អូនដាយអាណានៅអង់គ្លេស រៀបរាប់ថា៖ «កុំប្រាប់ព័ត៌មានផ្ទាល់ខ្លួន រួមទាំងអាសយដ្ឋាន និងលេខទូរស័ព្ទរបស់អ្នក»។
សូមគិតពីពាក្យសម្ដីដែលប្អូននិយាយ អាកប្បកិរិយាដែលប្អូនបង្ហាញ និងមនុស្សដែលប្អូនសេពគប់ រួមទាំងកន្លែងដែលប្អូនចូលចិត្តទៅ។ បន្ទាប់មក សូមសួរខ្លួនថា‹តើខ្ញុំកំពុងនិយាយឬធ្វើអ្វីមួយដែលនាំឲ្យគេគិតថាខ្ញុំចង់រួមភេទជាមួយឬទេ?›។
សូមអានបទគម្ពីរ ដើមកំណើត ៣៤:១, ២ ហើយពិចារណាអំពីលទ្ធផលដ៏ខ្លោចផ្សាដែលនារីម្នាក់ឈ្មោះឌីណាបានបង្កឡើង ដោយសារនាងបានទៅកន្លែងដែលនាងមិនគួរទៅ។
សូមចាំថា ការរួមភេទឲ្យតែបានសប្បាយគឺជារឿងធ្ងន់ធ្ងរសម្រាប់ព្រះយេហូវ៉ា។ ដូច្នេះ ប្អូនក៏ត្រូវមានទស្សនៈដូចលោកដែរ។ បើប្អូនប្រកាន់ខ្ជាប់នូវអ្វីដែលត្រឹមត្រូវ នោះប្អូនអាចរក្សាតម្លៃខ្លួន និងបន្តមានសមត្ថភាពវិនិច្ឆ័យស្អាតស្អំនៅចំពោះព្រះ។ យុវតីម្នាក់ឈ្មោះខាលី និយាយថា៖ «ហេតុអ្វីអ្នកត្រូវធ្វើជាឧបករណ៍ដើម្បីបំពេញការសប្បាយរបស់មនុស្សឯទៀត? ពីមុនអ្នកបានខំអស់ពីសមត្ថភាពដើម្បីរក្សាភាពស្អាតស្អំ ដូច្នេះសូមបន្តធ្វើបែបនេះទៀត!»។
តើមនុស្សស្រីបែបណាដែលមនុស្សប្រុសចូលចិត្ត? ប្អូនប្រហែលជាភ្ញាក់ផ្អើលពេលដឹងចម្លើយនោះ!
បទគម្ពីរសំខាន់
«ចូរខំអស់ពីសមត្ថភាព ដើម្បីនៅទីបំផុត[ព្រះ]នឹងឃើញថា អ្នករាល់គ្នាគឺឥតស្នាមប្រឡាក់ ស្អាតស្អំ និងមានសន្តិភាព»។—ពេត្រុសទី២ ៣:១៤
យោបល់
សូមបណ្ដុះគុណសម្បត្តិដ៏មានតម្លៃ។ (ពេត្រុសទី១ ៣:៣, ៤) បើប្អូនមានចរិតល្អមារយាទបាន នោះមនុស្សល្អនឹងចាប់អារម្មណ៍ប្អូន។
តើប្អូនដឹងទេ . . . ?
សុភមង្គលនៃការួមភេទក្នុងចំណងអាពាហ៍ពិពាហ៍ គឺជាអំណោយពីព្រះយេហូវ៉ា។ ដូច្នេះ ដល់ពេលរៀបការ ប្អូនអាចសប្បាយរីករាយនឹងអំណោយនោះ ដោយគ្មានការបារម្ភ ការភ័យខ្លាច និងការសោកស្ដាយទៅថ្ងៃក្រោយ ព្រោះតែការប្រព្រឹត្តអំពើប្រាសចាកសីលធម៌ខាងផ្លូវភេទឡើយ។
គម្រោងអនុវត្ត!
ខ្ញុំព្យាយាមធ្វើតាមគំរូយ៉ូសែបដើម្បីរក្សាភាពស្អាតស្អំខាងសីលធម៌ ដោយ ․․․․․
ខ្ញុំនឹងមិនធ្វើខុសដូចឌីណាទេ បើខ្ញុំ ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● ទោះជាប្អូនប្រហែលចង់រួមភេទមុនរៀបការឬរួមភេទឲ្យតែបានសប្បាយក្ដី ហេតុអ្វីនោះជាការខុស?
● បើនរណាម្នាក់សុំរួមភេទជាមួយប្អូន តើប្អូននឹងធ្វើអ្វី?
[ឃ្លាអក្សរធំនៅទំព័រ១៨៥]
«ប្អូនអិលអិន ប្រាប់ថា៖ ‹យើងត្រូវរឹងមាំ កុំទន់ជ្រាយឲ្យសោះ។ មានពេលមួយ ប្រុសម្នាក់បានដាក់ដៃលើស្មាខ្ញុំដូចជាចង់គេងជាមួយខ្ញុំ ភ្លាមនោះខ្ញុំនិយាយថា«ដកដៃចេញពីស្មាខ្ញុំឲ្យលឿន!» រួចខ្ញុំក៏ដើរចេញទាំងមុខមាំ›»
[រូបភាពនៅទំព័រ១៨៧]
បើប្អូនរួមភេទដើម្បីឲ្យតែបានសប្បាយ នោះប្អូនកំពុងបន្ថោកតម្លៃខ្លួនហើយ
លោកអ្នកក៏ប្រហែលជាចូលចិត្តដែរ
ក្មេងជំទង់និងយុវវ័យ
សំណួរពីយុវវ័យ
សំណួរទូទៅពីយុវវ័យ មានដូចជារឿងខាងផ្លូវភេទ មិត្តភក្ដិ ឪពុកម្ដាយ សាលារៀន និងរឿងផ្សេងទៀត។
