Kapitulo 27

Nganong Dili Ganahan Nako ang mga Lalaki?

Nahibalo siya nga popular ko kay ako siyang giingnan nga daghag naibog nako. Mikatawa siya dihang miingon ko nga dili brayt ang uban nakong mga higala. Ug nahibalo siya nga brayt ko kay gikoreksiyonan nako siya sa uban niyang gipanulti. Kanus-a kaha ko niya hagaron nga magdeyt?

Gwapa unta siya, wala lang ko kaangay sa iyang kinaiya! Iya lang ang tanang estorya. Ug kon ako na gani ang mosulti, iya kong barahon! Unsaon kaha nako pag-ikyas ini ha?

 NABALAKA ka ba nga walay lalaking naibog nimo? Mao kanay pagtuo sa daghang babaye, bisan gani kadtong sa imong tan-aw daghag nakagusto. Tagda pananglitan si Joanne. Siya gwapa, brayt, ug maayong manulti. Apan siya miingon: “Ang mga lalaki morag dili ganahan nako. Ang pipila nga akong naibgan nakagusto pod nako pero sa ulahi ila na kong gilikay-likayan!”

Unsay magustohan sa mga lalaki sa usa ka babaye? Unsay dili nila magustohan? Unsay imong himoon aron makagusto nimo ang usa ka buotang lalaki?

Kon Unsay Himoon

● Ilha ang imong kaugalingon. Kon motin-edyer ka na, mokusog ang imong pagkaibog sa mga lalaki. Lagmit daghan kag nagustohan. Normal kana. Apan kon imo dayong sugton ang unang lalaki nga nagpapitik sa imong kasingkasing, maapektohan ang imong emosyonal ug espirituwal nga pag-uswag. Nagkinahanglag panahon sa pag-ugmad sa maayong mga kinaiya, sa ‘pagbag-o sa imong hunahuna’ bahin sa hinungdanong mga butang, ug sa pagkab-ot sa pipila nimo ka tumong.—Roma 12:2; 1 Corinto 7:36; Colosas 3:9, 10.

Tinuod, daghang lalaki maibog sa mga babaye nga wala pay lig-ong baroganan o inosentehon pa. Apan kining matanga sa mga lalaki interesado lang sa lawas sa babaye, dili sa iyang pagkatawo. Sa pagkatinuod, ang hamtong nga batan-ong lalaki mangitag babaye kansang kinaiya mobagay sa iyang kinaiya.—Mateo 19:6.

Ang giingon sa mga lalaki: “Ganahan kog babaye nga may kaugalingong opinyon ug baroganan.”—James.

“Ganahan kog babaye nga prangka pero matinahoron ug dili mag-uyon-uyon lang sa tanan nakong isulti. Bisan pag gwapa siya, lainan ko kon moestorya  lang siyag mga butang nga gusto nakong madunggan.”—Darren.

Unsay imong ikaingon sa komento sa maong mga lalaki?

․․․․․

● Tahora ang uban. Kon ang babaye gustong higugmaon, ang lalaki gustong tahoron. Dili ikahibulong nga ang Bibliya nag-ingon nga kinahanglang higugmaon sa bana ang iyang asawa ug nga ang asawa kinahanglang magpakitag “halawom nga pagtahod” sa iyang bana. (Efeso 5:33) Bahin niini, nakita diha sa usa ka surbi sa gatosan ka batan-ong lalaki nga kapig 60 porsiyento miingon nga mas importante kanila ang pagtahod kay sa gugma. Mao sab kanay giingon sa kapin sa 70 porsiyento sa edad-edarang mga lalaki.

Ang pagtahod wala magpasabot nga maghilom-hilom ka na lang ug dili mopahayag sa imong opinyon. (Genesis 21:10-12) Apan importante sa mga lalaki ang imong paagi sa pagpahayag sa imong opinyon. Kon pirme nimong kontrahon o koreksiyonan ang iyang isulti, magtuo siya nga wala kay tahod niya. Apan kon imong tahoron ug dayegon ang iyang maayong mga opinyon, lagmit pabilhan usab niya ang imong opinyon. Siyempre, mamatikdan usab sa usa ka maalamong lalaki kon matinahoron ka sa imong pamilya ug sa uban.

 Ang giingon sa mga lalaki: “Para nako importante ang pagtahod sa pagsugod pa lang sa usa ka relasyon. Ang gugma ma-develop ra sa ulahi.”—Adrian.

“Kon ang babaye may pagtahod nako, higugmaon pod ko niya.”—Mark.

Unsay imong ikaingon sa komento sa maong mga lalaki?

․․․․․

● Magmaugdang sa pagpamesti ug magmahinlo. Mailhan ang imong pagkababaye pinaagi sa imong pamesti ug pamostura. Bisag dili pa gani nimo maestorya ang lalaki, makita niya kon kinsa ka tungod sa imong sininaan. Kon ang imong sinina hinlo ug desente, kini makahatag ug maayong impresyon. (1 Timoteo 2:9) Apan kon kini seksi o sobra ka kaswal, kini makadaot sa impresyon sa mga lalaki kanimo!

Ang giingon sa mga lalaki: “Ang sininaan sa babaye magpadayag sa iyang tinamdan. Kon seksi o sobra ka  kaswal ang iyang sinina, para nako siya kulag atensiyon.”—Adrian.

“Gusto kog babaye nga kanunayng hapsay ang buhok, humot, ug lumo manulti. Naa koy nagustohan nga gwapa, galing lang nawad-an kog gana niya kay damak siya.”—Ryan.

“Siyempre, daghan gyod ang makalingi sa babayeng seksi ug sinina. Pero dili ko gustong mangulitawo ug babaye nga ingon niana.”—Nicholas.

Unsay imong ikaingon sa komento sa maong mga lalaki?

․․․․․

Kon Unsay Dili Himoon

● Ayaw pagbirigbirig. Dako kaayog impluwensiya ang babaye sa lalaki. Kini magamit sa maayo o sa dili maayong paagi. (Genesis 29:17, 18; Proverbio 7:6-23) Kon imong gamiton kana nga impluwensiya sa tanang lalaki nga imong makaila, magtuo sila nga kiat ka.

Ang giingon sa mga lalaki: “Lalim na kaayo ang imong bation kon makatapad kag gwapa ug magsaghiray pa gyod ang inyong bukton, busa para nako kiat ang babaye kon maghapak-hapak sa lalaki dihang makig-estorya.”—Nicholas.

“Kon ang babaye maghapak-hapak sa braso sa matag lalaki nga iyang ikaestorya o maibogong motan-aw sa matag lalaking moagi, nan para nako kiat siya, ug lainan ko ana.”—José.

● Ayawg sunod-sunod sa lalaki. Ang Bibliya nag-ingon nga kon magminyo ang managtrato, sila mahimong “usa  ka unod.” (Genesis 2:24) Dili na nila mahimo ang tanan nilang gusto sama niadtong ulitawo ug dalaga pa sila; sila duna nay bug-os nga tulubagon sa usag usa. (1 Corinto 7:32-34) Apan kon managtrato pa lang mo, ayaw pagdahom nga duna moy bug-os nga tulubagon sa usag usa. * Ang tinuod, kon imo siyang hatagag kagawasan sa iyang pagpakig-uban sa iyang mga higala, basin mas maapresyar ka niya. Ug mas mailhan nimo siya sa iyang paagi sa paggamit niana nga kagawasan.—Proverbio 20:11.

Ang giingon sa mga lalaki: “Lainan kog babaye nga magpunay lag bantay sa akong lihok, nga morag dili mabuhi kon wala ko.”—Darren.

“Dili ko ganahag babaye nga bag-o pa lang gani nakong makaila magsige nag text nako ug mangutana ilabina kon duna ba koy kaubang mga dalaga.”—Ryan.

“Dili ko gustog babaye nga dili mosugot nga maglingaw-lingaw ka uban sa imong mga amigo ug masuko kon siya dili paubanon usahay.”—Adrian.

Unsay imong ikaingon sa komento sa maong mga lalaki?

․․․․․

 Pabilhi ang Imong Pagkababaye

Tingali may kaila kang mga babaye nga mohimog bisan unsa aron lang makuha ang atensiyon sa lalaki. Ang uban mosugot na lang bisan kinsa nga lalaki basta lang makatrato—o makabana. Apan hinumdomi nga imong ‘anihon kon unsay imong gipugas.’ (Galacia 6:7-9) Kon dili nimo pabilhan ang imong pagkababaye ug ang mga prinsipyo nga imong gisunod, basin ang lalaki nga maibog nimo ingon usab niini.

Ang tinuod, dili tanang lalaki makagusto nimo—ug bentaha kana! Apan kon hatagan nimog pagtagad ang imong panagway ug ang imong pagkatawo, ikaw mahimong ‘bililhon kaayo sa mga mata sa Diyos’—ug magustohan kag lalaki nga mobagay gyod nimo.—1 Pedro 3:4.

SA SUNOD NGA KAPITULO

Komosta kon ikaw lalaki ug nakapangutana ka, ‘Nganong dili man ganahan nako ang mga babaye?’

[Footnote]

TEKSTO

“Ang pagkamadanihon mahimong malimbongon, ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.”—Proverbio 31:30.

SUGYOT

Ayaw pagpalabig mek-ap! Ang baga nga mek-ap makahatag ug dili maayong impresyon—nga garbosa ka o kulag atensiyon.

NAHIBALO KA BA . . . ?

Kon magpatagad ka kanunay sa imong trato, posibleng madaot nimo ang inyong relasyon.

ANG AKONG PLANONG HIMOON!

Kini ang kinaiya nga kinahanglan nakong bag-ohon: ․․․․․

Kon unsay akong gustong ipangutana sa akong ginikanan bahin niini: ․․․․․

UNSAY IMONG HUNAHUNA?

● Unsaon nimo pagpakita nga gitahod nimo ang opinyon ug pagbati sa usa ka batan-ong lalaki?

● Unsaon nimo pagpakita nga gipabilhan nimo ang imong kaugalingon?

[Blurb sa panid 190]

“Tinuod maibog kog gwapa. Pero mawad-an kog gana sa usa ka babaye nga walay klarong tumong sa kinabuhi. Sa laing bahin, ganahan kog babaye nga nahibalo kon unsay buot niyang buhaton sa iyang kinabuhi—ilabina kon nakab-ot na niya ang pipila niya ka tumong.”—Damien

[Hulagway sa panid 191]

Ang gugma ug pagtahod samag duha ka ligid sa bisikleta—ang duha pulos hinungdanon