KAPITULO 27

Apay a Saandak a Kayat Dagiti Lallaki?

Ammona nga adu ti mangayat kaniak ta iyes-estoriak a kursonadadak dagiti dadduma a lallaki. Makakatawa met no estoriaek ti kalokuan ti dadduma a gagayyemko. Ken ammona a nalaingak ta kinorehirko ti dadduma nga imbagana. Kaanonto ngata nga armennak?

Napintas ngem nagrabaw met ti panagpampanunotna! Bukbukodanna pay ti agsasao. Ket no agsaoak, kanayon a korehirennak! Isu a kaykayatkon ti lumiklik.

 MADANAGANKA kadi a saandaka a kayat dagiti lallaki? Adu a babbai ti makarikrikna iti kasta, uray dagidiay ipagarupmo nga adu ti mangayat kadakuada! Alaentay a pagarigan ni Joanne. Napintas, nasirib, ken nalaing a makisarita. Ngem kaskasdi a kunana: “Masansan a mariknak a saandak a kayat dagiti lallaki. Adda met dagiti nagkursonada kaniak a kayatko met ngem pagammuan ta saandakon a kasarsarita!”

Ania ti magustuan dagiti lallaki iti maysa a babai? Ania dagiti saanda a magustuan? Ania ti mabalinmo nga aramiden tapno magustuannaka ti maysa a disente a lalaki?

Ti Aramidem

● Am-ammuem ti bagim. Bayat a bumalbalasangka, mabalin nga adda metten ti crush-mo ken nalabit saan laeng a maymaysa. Normal laeng dayta. Ngem no sungbatam a dagus ti lalaki a damo a namagpitik iti pusom, mabalin a maapektaran ti panagmataengam iti emosion ken iti naespirituan. Kasapulan ti panawen tapno mapatanormo dagiti nasayaat a kababalin, tapno ‘mapabarom ti panunotmo’ mainaig kadagiti napapateg a banag, ken tapno maragpatmo ti dadduma a kalatmo.​—Roma 12:2; 1 Corinto 7:36; Colosas 3:9, 10.

Pudno nga adu a lallaki ti agkursonada kadagiti babbai nga inosente wenno saan pay a makapangngeddeng. Ngem ti laeng kayat dagiti kasta a lallaki ket ti bagi ti babai, saan a ti kinataona. Iti kinapudnona, ti birbiroken ti natakneng a baro iti maysa a babai ket daydiay addaan iti nasayaat a kualidad a mangpabileg iti relasionda.​—Mateo 19:6.

Ti kuna dagiti lallaki: “Magustuak ti babai nga addaan iti bukod a disposision, ken saan a nalaka a mayal-alis ti alipusposna.”​—James.

“Kaykayatko ti babai a napudno, nadayaw ken saan a basta umanamong lattan iti amin nga ibagak. Uray no  napintas, diak magustuan ti babai a ti laeng ibagbagana ket dagiti kayatko a mangngeg.”​—Darren.

Ania ti makunam kadagitoy a komento dagiti lallaki?

․․․․․

● Sursuruem a raemen dagiti sabsabali. No kasano a kasapulam ti ayat, tarigagayan met unay dagiti lallaki a mapakitaanda iti respeto. Isu a saan a nakaskasdaaw ti kuna ti Biblia a ti asawa a lalaki masapul nga ayatenna ti asawana ngem ti asawa a babai ket rumbeng a maaddaan iti “nauneg a panagraem” iti asawana. (Efeso 5:33) Maitunos iti dayta, sigun iti maysa a surbey kadagiti ginasut nga agtutubo a lallaki, nasurok nga 60 porsiento ti nagkuna a napatpateg kadakuada ti respeto ngem ti ayat. Kasta met laeng ti kuna ti nasurok a 70 porsiento kadagiti napagsaludsodan a lallakay.

Ti panangipakita iti panagraem dina kayat a sawen a basta tumulokka lattan, nga awanen ti kalintegam a mangyebkas iti bukodmo a kapanunotan. (Genesis 21:10-12) Ngem agdepende iti pamay-an a panangibagam iti opinionmo no magustuan wenno liklikannaka ti maysa a lalaki. No kanayonmo a kontraen wenno korehiren ti ibagbagana, mabalin a panunotenna a saanmo a raraemen. Ngem no ikabilangam ti kapanunotanna ken apresiarem dagiti nagsayaat nga imbagana,  nalabit anamonganna met ken tagipatgenna ti kapanunotam. Siempre, madlaw met ti nasayaat a baro no raraemem dagiti kapamiliam ken dagiti sabsabali.

Ti kuna dagiti lallaki: “Para kaniak, ti panagraem ti kapatgan iti rugrugi ti maysa a relasion. Ti ayat ket mabalin a sursuruen.”​—Adrian.

“No kabaelannak a respetuen ti maysa a babai, ammok a kabaelannak met nga ayaten.”​—Mark.

Ania ti makunam kadagitoy a komento dagiti lallaki?

․․․․․

● Agkaweska a sieemma, ken taginayonem a nadalus ti bagim. Sakbay pay a makisaoka iti maysa a lalaki, ti panagkawkawes ken panaglanglangam ket adun ti naibagana maipapan iti kapanunotam ken kababalinmo. No naurnos ken naemma ti panagkawkawesmo, nagsayaatto ti impresion kenka dagiti sabsabali. (1 Timoteo 2:9) Ngem no makagargari wenno naalas ti panagkawkawesmo, saanto a nasayaat ti panagkitkitada kenka!

 Ti kuna dagiti lallaki: “Makitam no ania a klase ti maysa a babai babaen ti panagkawkawesna. No makagargari ken naalas ti panagkawkawesna, ipakita dayta a kayatna nga alaen ti atension dagiti lallaki.”​—Adrian.

“Kursonadak dagiti babbai a naurnos ti panagbubuokna, nabanglo, ken natanang nga agsasao. Adda nagustuak idi a napintas a balasang, ngem nadismayaak ta nadugyot.”​—Ryan.

“No na-sexy ti panagkawkawes ti maysa a babai, sigurado a mapataliawka. Ngem saan a kasta ti klase ti babai a kayatko nga armen.”​—Nicholas.

Ania ti makunam kadagitoy a komento dagiti lallaki?

․․․․․

Ti Saanmo nga Ar-aramiden

● Saanka nga agalembong. Napigsa ti impluensia dagiti babbai kadagiti lallaki​—mabalin a pagsayaatan wenno pagdaksan. (Genesis 29:17, 18; Proverbio 7:6-23) No ipakatmo dayta kadagiti amin a lallaki a maam-ammom, amangan no agdinamagto a naalembongka.

Ti kuna dagiti lallaki: “Nagmayat man ti riknam no makatugawmo laeng ti napintas a balasang sa agdekket ti abagayo, isu a panagkunak ket agal-alembong ti babai a kanayon a mangsagid kenka no agsarsaritakayo.”​—Nicholas.

“Iti panagkunak, alembong ti maysa a babai no masansan a sagidenna ti takkiag wenno paludipanna ti tunggal lalaki a maam-ammona. Awan la ti sumgar a dutdotko iti kasta a babai.”​—José.

● Saanmo a kedngan ti wayawayana. No agassawan ti  lalaki ken babai, kuna ti Biblia nga agbalindan a “maymaysa a lasag.” (Genesis 2:24) Saandan a nawaya a mangaramid kadagiti adu a banag nga ar-aramidenda idi awan pay ti asawada; naikumitdan iti maysa ken maysa. (1 Corinto 7:32-34) Ngem no agnobiokayo pay laeng, agpada nga awan ti kalinteganyo a mangnamnama iti kasta a pannakaikumit. * Kinapudnona, no bigbigem ti kalinteganna a makigayyem kadagiti sabsabali, mabalin nga ad-addanto a maay-ayo kenka. Ken ad-adu ti maammuam maipapan kenkuana iti wagas a panangusarna iti dayta a wayawayana.​—Proverbio 20:11.

Ti kuna dagiti lallaki: “Kasla mabekkelak iti maysa a babai no sangkasaludsodna ti amin nga ar-aramidek ken awanen ti kayatna nga aramiden no di ti makikadua kaniak.”​—Darren.

“No kanayon nga agteks ti babai a nabiit pay a naam-ammok ken kayatna a maammuan no siasino ti kakaduak, nangruna ti nagan dagiti kaduami a babbai, pakakitaan daytan nga isu ket saan a nasayaat a para kaniak.”​—Ryan.

“Makaparurod ti babai a mangiparit kenka a makikadua kadagiti lallaki a gagayyemmo ken masuron no saanmo a kanayon nga ikuyog.”​—Adrian.

 Ania ti makunam kadagiti komento dagiti lallaki iti daytoy a subtitulo?

․․․․․

Tagipatgem ti Bagim

Mabalin nga adda dagiti am-ammom a babbai nga aramidenda ti amin tapno laeng magustuan ken maalada ti atension ti lallaki. Adda pay dagidiay mangipababa iti pagalagadanda tapno maaddaanda iti nobio​—wenno makaasawada pay ketdi. Ngem agaplikar iti daytoy ti prinsipio nga ‘apitem no ania ti immulam.’ (Galacia 6:7-9) No saanmo a tagipatgen ti bagim ken dagiti pagalagadam, mabalin a dagiti lallaki nga agkursonadanto kenka ket saandakanto met nga ipateg ken saandanto a raemen dagiti pagalagadan a sursurotem.

Kinapudnona, saan nga amin a lallaki ket agrayo kenka​—ngem awan dakesna dayta! No la ket ta napintas ti makinruar ken makin-uneg a kinataom, ‘dakkel ti pategmo iti imatang ti Dios’​—ken agrayonto kenka ti lalaki a maikari kenka.​—1 Pedro 3:4.

ITI SUMAGANAD A KAPITULO

No ngay maysaka a lalaki ket pampanunotem, ‘Apay a saandak a kayat dagiti babbai?’

[Footnote]

NAPAPATEG A TEKSTO

“Ti kayaw mabalin nga ulbod, ken ti kinalibnos mabalin nga ubbaw; ngem ti babai nga agbuteng ken Jehova isu ti makagun-od iti dayaw maipaay iti bagina.”​—Proverbio 31:30.

BALAKAD

Saanmo a kapuskolen ti ag-makeup tapno saanda a panunoten nga agpaspasindayag wenno agsapsapulka iti atension.

AMMOM KADI . . . ?

No kanayon a kayatmo a sika laeng ti pangipaayan ti lalaki iti atensionna, mabalin a madadael ti relasionmo kenkuana.

DAGITI ARAMIDEK!

Ti kababalin a kayatko a pasayaaten ket ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Kasanom a maipakita a raraemem ti kapanunotan ken karirikna ti maysa a lalaki?

● Kasanom a maipakita a tagtagipatgem ti bagim?

[Blurb iti panid 190]

Aminek a masansan a maatrakarak a dagus iti napintas a balasang. Ngem saankonto met laengen a kayat no madlawko nga awan ti masinunuo ken nasayaat a planona iti biag. Iti sabali a bangir, magustuak unay ti babai nga ammona ti ar-aramidenna iti biag​—nangruna no naragpatnan dagiti dadduma a kalatna.’’​—Damien

[Ladawan iti panid 191]

Ti ayat ken panagraem ket mayarig iti dua a pilid ti bisikleta​—agpadada a napateg