Uo Wingapashanya—Yakobo

Yakobo no mukalamba wakwe Esau, balilekele ukusoshanya pa myaka iingi. Esau alipatile Yakobo. Nangu ca kutila tapali nangu cimo ico Yakobo alufyenye, e wabalilepo ukuwikishanya na munyina pa kupwisha ubwafya. Alinakileko fye. Ico alefwaya te kushinina umukalamba wakwe ukuti e walufyenye lelo alefwaisha ukuti baleumfwana nankwe. Filya Yakobo acitile te kutila ninshi alilekele ukukonka ifyo aishibe ukuti e fyalungama, kabili takoselepo fye ukuti kano umukalamba wakwe alombe ubwelelo e lyo atendeke ukumfwana nankwe.—Ukutendeka 25:27-34; 27:30-41; 32:3-22; 33:1-9.

Ucita shani nga wapusana na ba pa ng’anda? Inshita shimo kuti wayumfwa ukuti iwe taulufyenye lelo uulufyenye ni munonko nelyo abafyashi bobe. Nga caba ifyo, bushe ulalolela ukuti e bo babalilepo ukuwikishanya na iwe? Nelyo bushe kuti wacita ifyacitile Yakobo? Bushe ukaitemenwa ukukonka ifilefwaya uwalufyenye pa kutila fye mutendeke ukuumfwana cikulu fye tautobele amafunde ya mu Baibolo? (1 Petro 3:8, 9) Yakobo talekele icilumba ukupaatukanya ulupwa. Ali-icefeshe no kuwikishanya na munyina. Bushe na iwe kuti wacita cimo cine ku ba pa ng’anda?