Owo Emi Ekpekpebede​—Jacob

Esau ikosioroke Jacob eyeneka esie uyo ke ediwak isua. Ke nditịm ntịn̄, Esau akasasua Jacob. Okposụkedi emi Jacob mîkanamke Esau idiọk, enye akakam anam n̄kpọ man ẹbiere mfịna oro mmọ ẹkenyenede. Enye ikọsọn̄ọke iyịre ke unen esie. Enye ikanamke emi man owụt ke imenen, edi akanam man mmọ ẹdu ke emem. Jacob ikabiatke edumbet emi enye akadade odu uwem, ikonyụn̄ idọhọke Esau ekpe imọ ubọk mbemiso mmimọ inamde emem.​—Genesis 25:27-34; 27:30-41; 32:3-22; 33:1-9.

Afo esinam n̄kpọ didie ke ini enyenede mfịna ye owo ke ubon mbufo? Ndusụk ini, emekeme ndikere ke imọ iduehe ke baba usụn̄ kiet, ke eyeneka imọ mîdịghe ete m̀mê eka imọ akam edue. Ke mme utọ idaha ntre, ndi emesibet owo enye eken ebem iso ekpe fi ubọk? Mîdịghe, ndi emekeme ndikpebe Jacob? Edieke owo mîbiatke edumbet Bible, ndi eyetre ndisọn̄ọ nyịre ke unen fo man emem odu? (1 Peter 3:8, 9) Jacob ikokohokede idem iyak utọk abahade ufọk mmọ. Enye ama osụhọde idem anam emem ye eyeneka esie. Ndi eyekpebe Jacob ke ini enyenede mfịna ye owo ke ubon mbufo?