Maayong Panig-ingnan—Job

Ang kalibotan ni Job nahugno. Una, nawad-an siyag panginabuhian. Ikaduha, nangamatay ang iyang mga anak. Ikatulo, siya nagsakit. Kining tanan nahitabo nga wala damha. Sa tumang kaguol, si Job miingon: “Ang akong kalag mibati gayod ug kasilag sa akong kinabuhi.” Iyang gihubit ang iyang kinabuhi nga “tugob sa kaulawan ug puno sa kasakitan.” (Job 10:1, 15) Apan bisan pa niana, siya wala gayod motalikod sa iyang Maglalalang. (Job 2:10) Bisag nausab ang kahimtang sa iyang kinabuhi, siya wala mausab. Busa si Job maoy usa ka panig-ingnan sa pagkamalahutayon.

Kon duna kay problema, tingali mobati ka usab ug ‘kasilag sa imong kinabuhi.’ Bisan pa niana, sama kang Job, ikaw makapabiling malig-on bisan pa sa kausaban, nga dili matarog sa imong determinasyon sa pag-alagad kang Jehova nga Diyos. Si Santiago misulat: “Tan-awa! Gipahayag namo nga malipayon kadtong nakaantos. Nakadungog kamo bahin sa pagkamainantoson ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug maluluy-on.” (Santiago 5:11) Siya nahingawa kang Job, ug siya may kahingawa kanimo!