Nasayaat nga Ulidan​—Ni Job

Kasla nagbaliktad ti lubong ni Job. Umuna, napukaw ti sanikuana. Maikadua, natay dagiti annakna. Maikatlo, naaddaan iti nakaro a sakit. Nagpartak ti pannakapasamak dagitoy ken saanna man la a ninamnama. Gapu iti nakaro a leddaangna, kinuna ni Job: “Ti kararuak pudno unay a marumen iti biagko.” Dineskribirna ti bagina kas “simemelmel iti pannakaibabain ken napaagsepan iti pannakaparigat.” (Job 10:1, 15) Ngem iti laksid ti rigat, saan a tinallikudan ni Job ti Namarsua kenkuana. (Job 2:10) Uray no nagbalbaliw ti kasasaad ti biagna, saanna nga impalubos a dayta ti mangbalbaliw iti kinataona. Gapuna, ni Job ket maysa nga ulidan iti panagibtur.

No adda problemam, mabalin a ‘karumenmo ti biagmo.’ Kaskasdi, kas ken Job, kabaelam met a pagtalinaeden ti determinasionmo nga agserbi ken Jehova a Dios ken saanmo a balbaliwan ti kinataom iti laksid ti panagbalbaliw ti kasasaadmo. Insurat ni Santiago: “Adtoy! Kunaentayo a naragsak dagidiay nakapagibtur. Nangngegyo ti panagibtur ni Job ket nakitayo ti nagbanagan nga impaay ni Jehova, a ni Jehova nadungngo unay iti panagayat ken naasi.” (Santiago 5:11) Patpatgennaka ni Jehova no kasano nga impatpategna ni Job!