Uo Wingapashanya—Ruti

Kuti wasambilila ifya kuba ne cishinka kuli Ruti uwali mukamfwilwa. Asalilepo ukushala na Naomi nafyala umukote, ukucila ukubwelela ku calo ca ku mwabo ukwali imikalile isuma. Nangu ca kutila ifi asalilepo fyali no kulenga camwafya ukusanga uwa kumuupa, Ruti taletontonkanya fye pa fingamuwamina. Ifyo atemenwe Naomi ne fyo alefwaisha ukuba na bantu ba kwa Yehova e fyo acindamike sana ukucila ukufwaya ukuupwa no kuisekesha umwine.—Ruti 1:8-17.

Bushe ulefwaya ukuupa nelyo ukuupwa? Pashanya Ruti. Wilatontonkanya fye pa fyo umutima obe ulefwaya, lelo uletontonkanya na pa fisuma wingacitila uukaba umwina mobe. Ku ca kumwenako, bushe waliba ne cishinka kabili bushe ulaitemenwa ukubombela bambi? Bushe ulakonka ifyo Lesa afwaya te mulandu no kuti tawapwililika? Ruti tabikile sana amano ku kufwaya ukuupwa. Lelo mu kuya kwa nshita, aishileupwa ku mwaume uwakosoka uwali ne mibele imo ine nga ena—kabili uwatemenwe Lesa. Ifyacitikile Ruti na iwe kuti fyakucitikila.