Owo Emi Ekpekpebede​—Ruth

Ruth emi ekedide ebeakpa ama ọfiọk se nsọn̄ọnda edide. Enye ama ebiere ndika iso ndu ye Naomi, kpa akanian̄wan eka ebe esie, utu ke ndinyọn̄ n̄kodu inem uwem ke obio mmọ. Okposụkedi ubiere emi mîdiyakke enye ọsọp okụt ebe, Ruth okowụk ntịn̄enyịn ke se ikedide akpan n̄kpọ ikan. Ima emi enye akamade Naomi ye udọn̄ oro enye ekenyenede ndidu ye ikọt Jehovah ke enye akabat ke akpan n̄kpọ akan ndisọsọp nnyene ebe.​—Ruth 1:8-17.

Ndi ke aduak ndidọ ndọ? Do kpebe Ruth. Kûkere uban̄a nte etiede fi ke idem kpọt, edi domo ndinyene nti edu emi edifọnde ye owo emi edidọde. Ke uwụtn̄kpọ, ndi emenyene nsọn̄ọnda ye edu n̄waidem? Ndi emesitiene mme edumbet Bible, idem ke ini unana mfọnmma anamde ọdọn̄ fi ndinam idiọk? Ruth ikoyomke ebe ke mbrenyịn. Edi nte ini akade, enye ama okụt ebe emi ama ọkọkọri esịm ọyọhọ idaha, kpa eren emi ekenen̄erede ama Abasi onyụn̄ enyenede nti edu ukem nte enye. Emi ekeme n̄ko nditịbe nnọ fi.