Nasayaat nga Ulidan​—Ni Timoteo

Mabiiten a pumanaw ni Timoteo iti pagtaenganda​—saan a tapno maitarayanna ti pamiliana no di ket tapno agbalin a misionero a kadua ni apostol Pablo! Mabalin nga agtutubo pay laeng idi ni Timoteo ngem responsablen ken “naimbag ti damagna kadagiti kakabsat idiay Listra ken Iconio.” (Aramid 16:2) Patien ni Pablo a dakkel ti maaramidan ni Timoteo nga agserbi iti Dios. Ket talaga a kasta ti napasamak! Kadagiti simmaganad a tawen, nagdaliasat ni Timoteo kadagiti adu a lugar, a nangbuangay kadagiti kongregasion ken nangpabileg kadagiti kakabsat. Gapu kadagiti nagsasayaat a kualidad ni Timoteo, isu ket impatpateg ni Pablo. Agarup 11 a tawen kalpasanna, kinuna ni Pablo kadagiti taga Filipos: “Awanen kaniak ti sabali pay nga addaan kababalin a kas kenkuana a sipupudno a mangisakitto iti bambanag maipapan kadakayo.”​—Filipos 2:20.

Sisasaganaka kadi nga agpausar para iti panagserbi iti Dios? No wen, adu a bendision ti agur-uray kenka! Talaga nga ipatpateg ni Jehova dagiti agtutubo a ‘situtulok a mangidaton iti bagbagida.’ (Salmo 110:3) Malaksid iti dayta, masiguradom a ni Jehova a Dios ket ‘saan a nakillo tapno lipatenna ti aramidmo.’​—Hebreo 6:10.