Kapitulo 28

Nganong Dili Ganahan Nako ang mga Babaye?

Siyarog di siya mobilib nako! Ako na gong gisulti niya ang tanan—ang akong mga nabatonan, naadtoan, ug mga kaila. Seguradong gusto na gyod siyang makigdeyt nako!

Unsa man ni siya oy! Di ba siya makasabot nga di ko ganahan niya? Unsaon kaha nako pagputol sa among estorya nga dili pod siya malain?

 SAKTO na ang imong edad nga makigtrato. Nangita kag gwapa nga parehas sab nimog tinuohan. (1 Corinto 7:39) Apan sa una, matag pangulitawo nimo, dili ka sugton. Unsa may problema? Ang mga babaye ba nangita lag gwapo? Si Lisa miingon, “Gusto kog lalaki nga medyo maskulado.” Apan labaw pa niana ang gipangita sa kadaghanang babaye. “Usahay, ang mga gwapo kulag maayong pamatasan,” miingon ang 18-anyos nga si Carrie.

Unsa kini nga pamatasan? Kon gusto nimong mailhan pa gyod ang babaye, unsay angay nimong timbang-timbangon? Ug unsang mga prinsipyo sa Bibliya ang angay nimong hinumdoman?

Ang Unang Himoon

Sa dili ka pa mangulitawo, dunay pipila ka importanteng butang nga kinahanglan nimong makat-onan aron mahimo kang higala sa tanan. Tagda kini:

● Ugmara ang maayong pamatasan. Ang Bibliya nag-ingon nga ‘ang gugma dili bastos.’ (1 Corinto 13:5) Kon maayo kag pamatasan, may pagtahod ka sa uban ug imong ginaugmad ang hamtong, samag-Kristo nga personalidad. Apan ang maayong pamatasan dili samag sinina nga imong isul-ob sa pagpabilib sa uban apan hukason inig-abot sa balay. Pangutan-a ang imong kaugalingon, ‘Maayo ba kog batasan ngadto sa akong pamilya?’ Kon dili, maglisod ka sa pagpakitag maayong pamatasan sa uban. Hinumdomi, aron mahibaloan ang imong tinuod nga pagkatawo, ang maalamong babaye maniid sa imong paagi sa pagtratar sa imong pamilya.—Efeso 6:1, 2.

Ang giingon sa mga babaye: “Ganahan kog lalaki nga magpakitag maayong pamatasan  sa gagmayng mga butang, sama sa pagbukas sa pultahan para nako, ug sa dagkong mga butang sama sa pagpakitag kaayo ug konsiderasyon dili lang nako kondili sa akong pamilya sab.”—Tina.

“Dili ko gustog lalaki nga bag-o pa lang gani mo nagkaila mangutana dayon ug personal nga mga butang, sama sa ‘Duna ka na bay trato?’ ug ‘Unsa may imong plano sa kinabuhi?’ Lainan gyod ko ana!”—Kathy.

“Para nako way batasan ang mga lalaki kon ila lang dula-dulaan ang among emosyon, nga morag dili mi masakitan ug nga kaming tanan kaminyoon na kaayo ug gusto namo nga ila ming kaluy-an.”—Alexis.

● Magmahinlo. Kon hinlo ka, may pagtahod ka sa uban ug sa imong kaugalingon. (Mateo 7:12) Kon may  pagtahod ka sa imong kaugalingon, lagmit tahoron sab ka sa uban. Sa laing bahin, kon maglago ka, anugon lang ang imong pagpabilib sa babaye.

Ang giingon sa mga babaye: “Ang lalaking nangulitawo nako bahog baba. Di gyod na pwede nako!”—Kelly.

● Pagtuon kon unsaon pagpakig-estorya. Ang relasyon lig-on kon maayo ang komunikasyon. Busa hisgoti dili lang ang mga butang nga imong ganahan kondili ang mga butang usab nga iyang ganahan. (Filipos 2:3, 4) Paminaw sa iyang isulti ug pabilhi ang iyang opinyon.

Ang giingon sa mga babaye: “Ganahan kog lalaki nga maayong ikaestorya, mahinumdom sa akong gisulti niya, ug mahibalo kon unsay ipangutana aron mapadayon ang among panag-estorya.”—Christine.

“Sa akong tan-aw ang mga lalaki madani sa ilang makita, pero ang mga babaye madani sa ilang madungog.”—Laura.

“Nindot man ang mga regalo. Pero mas nindot kon ang lalaki maayong ikaestorya ug ang iyang isulti makapalipay ug makapadasig nimo.—Amy.

“May kaila kong lalaki nga matinahoron ug ligdong. Maayo siyang ikaestorya ug dili siya moingon, ‘Humot lagi ka’ o ‘Gwapa lagi ka ron.’ Siya mamati gyod sa akong isulti, ug mao nay gusto sa babaye.”—Beth.

 “Gusto kog lalaki nga mahibalong mangomedya pero pormal kon maghisgot nag seryosong mga butang.”—Kelly.

● Magmaresponsable. Ang Bibliya nag-ingon: “Ang matag usa magpas-an sa iyang kaugalingong luwan.” (Galacia 6:5) Ang mga babaye dili gustog lalaki nga dili makapondo sa usa ka trabaho kay tapolan o kaha mas gustog lingaw-lingaw.

Ang giingon sa mga babaye: “Ganahan kog lalaking responsable. Way nada nang lalaking iresponsable. Wa gyoy babaye nga ganahan ana.”—Carrie.

“Ang ubang lalaki walay klarong plano sa kinabuhi. Kon may maibgan silang babaye, mangutana sila sa iyang plano sa kinabuhi ug dayon moingon, ‘Mao pod nay akong gusto!’ Apan wala silay gihimo sa pagkab-ot niana.”—Beth.

Sama sa nahisgotan na, kon responsable ka, makadani kag maayong mga higala. Apan kon sa imong tan-aw andam ka nang mangulitawo, unsay angay nimong himoon?

Ang Sunod nga Himoon

● Isulti ang imong gibati. Kon sa imong hunahuna mahimong maayong asawa ang higala nga imong naibgan, pangulitawhi siya. Iklaro ug isulti ang imong gibati kaniya. Tinuod, dili kini sayon kay mahadlok ka nga basig dili ka sugton. Apan ang pagsulti sa imong gibati nagpakita nga hamtong ka. Pero hinumdomi kini: Wala ka pa manghagad nga makigminyo. Busa magmaalamon. Ayaw sobra  ka seryoso sa imong paagi sa pagduol kay basig mahadlok na hinuon ang babaye.

Ang giingon sa mga babaye: “Dili ko makabasag hunahuna. Busa kon dunay gustong mangulitawo nako, kinahanglang moprangka siya ug isulti niya nako ang iyang gibati.”—Nina.

“Bakikaw kaayo kon dugay na mong managhigala unya mangulitawo siya nimo. Pero wala poy problema kon moingon siya nga gusto siyang makaila nako nga labaw pa kay sa usa ka higala.”—Helen.

● Tahora ang desisyon sa babaye. Komosta kon dili ka sugton? Tahora siya pinaagi sa pagpakita nga mituo ka nga tininuod ang iyang pagbalibad kanimo. Kon mamugos ka, nagpakita kana nga dili ka hamtong. Kon magsige gihapon kag pangulitawo bisag gibalibaran na—ug masuko pa gyod kay wala sugta—ang iya bang kaayohan ang imong gihunahuna o ang imo lang kaayohan?—1 Corinto 13:11.

Ang giingon sa mga babaye: “Maglagot ko kon mamugos gihapon ang lalaki bisag gibalibaran na.”—Colleen.

“Gisultihan nako ang usa ka lalaki nga wala koy interes niya, apan namugos gihapon siya sa pagpangayo sa numero sa akong telepono. Dili ko gustong maulawan siya. Dili baya pod intawon lalim nang mangulitawo. Apan nakita nako nga kinahanglang prangkahan nako siya.”—Sarah.

Kon Unsay Dili Angayng Himoon

Ang ubang tin-edyer nga lalaki nagtuo nga sayon ra nilang paibogon ang mga babaye. Magkompetensiyahay pa gani sila kon kinsay dugokonon ug babaye. Apan kini makapasakit sa pagbati sa babaye ug makadaot sa imong reputasyon. (Proverbio 20:11) Malikayan nimo kana kon imong sundon kini:

 ● Ayaw pag-ibid-ibid. Ang tawong tig-ibid-ibid maayong mobulada. Wala siyay tuyo nga mangulitawo. Kini nga tinamdan supak sa tambag sa Bibliya sa pagtratar sa “batan-ong mga babaye ingong igsoong mga babaye uban sa bug-os nga kaputli.” (1 Timoteo 5:2) Ang mga tig-ibid-ibid dili mahimong maayong higala ug dili maayong pamanhon. Ang maalamong babaye nahibalo niana.

Ang giingon sa mga babaye: “Di gyod ko ganahag lalaki nga mobulada nimo unya nahibalo ka nga iya pong gibuladahan ang imong amiga sa miaging bulan.”—Helen.

“Dihay gwapo nga nag-ibid-ibid nako niadto, ug wala siyay laing gihisgotan kondili ang iyang kaugalingon. Sa dihang miduol namo ang usa ka babaye, mao sab kanay iyang gihimo. Dayon diha na poy lain nga miduol, ug mao gihapoy iyang gihimo. Gilainan gyod ko niya!”—Tina.

● Ayawg dula-dulai ang pagbati sa babaye. Ayawg hunahunaa nga ang panaghigalaay sa lalaki parehas lang sa panaghigalaay sa babaye. Ngano? Tagda kini: Kon  imong dayegon ang imong amigo nga angayan siya sa iyang bag-ong sinina o kanunay kang makig-estorya niya ug mosulti sa imong sekreto, dili siya maghunahuna nga naibog ka niya. Apan kon imong sultihan ang babaye nga gwapa siya o kon pirme kang makig-estorya niya ug mosulti sa imong sekreto, posibleng maghunahuna siya nga nakagusto ka niya.

Ang giingon sa mga babaye: “Wala tingali makahibalo ang mga lalaki nga dili nila angayng tratahon ang mga babaye sama sa ilang pagtratar sa ilang mga amigo.”—Sheryl.

“Mangayog cellphone number nako ang usa ka lalaki, ug dayon mag-text siya nako. Unsa may iyang tuyo? Usahay ra ba magkasuod mo sa pagsigeg text ug mahulog ang imong pagbati, pero mailhan ba gyod nimo siya pinaagi rag text?”—Mallory.

“Sa akong hunahuna, ang mga lalaki wala mahibalo nga daling mahulog ang pagbati sa mga babaye, labi na gyod kon mahunahunaon kaayo ang lalaki ug maayong ikaestorya. Dili sab buot ingnon nga desperada ang babaye. Sa tan-aw nako, gusto lang ang mga babaye nga mahigugma ug makakitag lalaki nga para gyod nila.”—Alison.

BASAHA ANG DUGANG PA BAHIN NIINI NGA ULOHAN DIHA SA TOMO 2, KAPITULO 3

SA SUNOD NGA KAPITULO

Unsaon nimo pagkahibalo sa kalainan sa gugma ug “infatuation”?

TEKSTO

‘Isul-ob ang bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.’—Efeso 4:24.

SUGYOT

Pangutan-a ang ubang hamtong kon unsa ang labing maayong ugmaron sa usa ka batan-ong lalaki, ug susiha kon kini ba ang kinahanglan nimong hatagag pagtagad.

NAHIBALO KA BA . . . ?

Ang imong pagkatawo mas importante kay sa imong panagway.

ANG AKONG PLANONG HIMOON!

Kini nga pamatasan ang akong pauswagon: ․․․․․

Kini ang akong himoon sa pagpauswag sa akong paagi sa pagpakig-estorya: ․․․․․

Kon unsay akong gustong ipangutana sa akong ginikanan bahin niini: ․․․․․

UNSAY IMONG HUNAHUNA?

● Unsaon nimo pagpakita nga may pagtahod ka sa imong kaugalingon?

● Unsaon nimo pagpakita nga may pagtahod ka sa hunahuna ug pagbati sa babaye?

[Blurb sa panid 198]

“Nagtuo ang mga lalaki nga maibog nila ang mga babaye kon maayo silang mamesti ug kon gwapo sila. Hinuon, tinuod usahay ni, pero sa tan-aw nako mas gusto sa mga babaye ang lalaki nga maayog kinaiya.” —Kate

[Hulagway sa panid 197]

Ang maayong pamatasan dili samag sinina nga imong isul-ob aron magpabilib sa uban apan hukason inig-abot sa balay