Kapitulo 31

Unsay Akong Himoon Aron Mahupayan Ko sa Among Panagbulag?

“Unom ka bulan na ming trato ug lima ka tuig nga managhigala. Dihang gusto na siyang makigbulag, wala ko niya prangkahi. Basta wala na lang ko niya tinggi. Wala koy mahimo. Nasakitan kaayo ko. Mangutana ko pirme sa akong kaugalingon, ‘Unsa may akong sayop?’”—Rachel.

 ANG panagbulag makapusgay sa imong kalipay. Tagda pananglitan si Jeff ug Susan, nga managtrato sa duha ka tuig. Suod kaayo sila. Daghang beses sa tibuok adlaw nga mag-text si Jeff kang Susan ug tam-is nga mga pulong sa gugma. Mohatag usahay siyag regalo sa pagpakita nga naghunahuna siya kang Susan. “Maminaw ug mosabot gyod si Jeff nako,” miingon si Susan. “Pinangga kaayo ko niya.”

Wala magdugay, si Jeff ug Susan naghisgot nga magpakasal ug kon asa sila mopuyo. Nagplano na gani si Jeff sa pagpalit ug singsing para kang Susan. Dayon, kalit lang nakigbulag si Jeff! Nahugno gyod si Susan. Siya nagpadayon sa iyang adlaw-adlawng buluhaton, pero morag wala siya sa iyang kaugalingon. “Naapektohan kaayo ko,” siya miingon. *

Kon Nganong Sakit Kaayo

Kon sama kag kaagi ni Susan, tingali nakapangutana ka, ‘Maulian pa kaha ko?’ Normal lang nga maguol ka. Si Haring Solomon misulat: “Ang gugma sama ka gamhanan sa kamatayon.” (Awit ni Solomon 8:6, Maayong Balita Biblia) Busa ang panagbulag tingali maoy usa sa kinasakitan nga imong naagian. Gani, ang uban miingon nga mora silag mamatay. Tingali kini ang sunod-sunod nimo nga bation:

Dili makadawat. ‘Dili ko motuo nga nagbulag mi. Mausab ra unya ang iyang hunahuna.’

Kasuko. ‘Wa siyay puangod! Dili na ko gustong makakita niya!’

Kaguol. ‘Wala gayoy mahigugma nako.’

Pagdawat. ‘Mahupayan ra ko. Nasakitan ko, pero nauli-ulian na ko.’

 Ang nakaayo kay madawat ra nimo kini sa ngadto-ngadto. Pero kon unsa ka dugay ka maulian nagdepende sa pipila ka butang, sama sa gidugayon sa inyong relasyon ug kon unsa na kamo ka suod. Sa pagkakaron, unsay imong himoon aron mahupayan ka?

Padayon Lang

Ang uban moingon nga maulian ra ka paglabay sa panahon. Apan kon bag-o pa lang mong nagbulag, tingali dili ka motuo niini. Ngano? Kay ang panahon bahin lang sa solusyon. Sa pag-ilustrar: Kon masamad ka, kini maalim ra paglabay sa panahon, apan sakit kini sa pagkakaron. Kinahanglang patang-onon una nimo ang pagdugo ug pahumpayon ang sakit. Kinahanglan sab nga imo kining bantayan nga dili maimpeksiyon. Ingon usab niana ang samdang pagbati. Sakit kana sa pagkakaron. Pero may mahimo ka aron mahupay-hupayan ang sakit ug dili kini mahulog sa pagdumot. Ang panahon makatabang sa pag-alim sa kaguol, apan unsa poy angay nimong himoon? Sulayi kining mosunod:

 ● Ihilak ang imong kaguol. Dili daotan ang paghilak. Gani ang Bibliya nag-ingon nga may “panahon sa paghilak” ug bisan “panahon sa pagminatay.” (Ecclesiastes 3:1, 4) Ang paghilak dili timaan nga huyang ka. Tungod sa tumang kaguol, ang banggiitang manggugubat nga si David miadmitir: “Matag gabii ang akong higdaanan ug ang akong unlan maumog sa mga luha.”—Salmo 6:6, Today’s English Version.

● Atimana ang imong panglawas. Ang ehersisyo ug hustong pagkaon makatabang sa pagpasig-uli sa kusog nga nawala tungod sa kaguol. ‘Ang lawasnong pagbansay mapuslanon,’ nag-ingon ang Bibliya.—1 Timoteo 4:8.

Unsay hatagan nimog pagtagad bahin sa imong panglawas?

․․․․․

● Magmapuliki. Padayona ang pagbuhat sa mga butang nga makapalipay nimo. Ug ayaw gayod ipalain ang imong kaugalingon. (Proverbio 18:1) Kon makig-uban ka sa mga tawong nagmahal nimo, matabangan ka nga magmapositibo.

Unsang mga tumong ang imong kab-oton?

․․․․․

● Iampo sa Diyos ang imong gibati. Tingali lisod kini para nimo. Human magkabulag, ang uban mibati nga gitalikdan sila sa Diyos. Sila mangatarongan, ‘Nag-ampo gyod ko  nga makatrato ko, pero unsa na may nahitabo ron!’ (Salmo 10:1) Apan angay bang isipon ang Diyos ingong tigpangita lag kapikas sa kinabuhi? Siyempre dili; ug dili sab siya ang mabasol kon gusto na sa lalaki o babaye nga makigbulag. Kini ang atong nahibaloan bahin kang Jehova: ‘Siya may kahingawa kanimo.’ (1 Pedro 5:7) Busa iampo kaniya ang imong gibati. Ang Bibliya nag-ingon: “Ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.

Unsang espesipikong mga butang ang mahimo nimong iampo kang Jehova samtang nagpaalim ka sa imong kaguol tungod sa inyong panagbulag?

․․․․․

 Hunahunaa ang Umaabot

Dihang mahupayan ka na, makatabang tingali ang pagpamalandong sa imong miaging relasyon. Kon andam ka na sa pagbuhat niana, isulat ang imong tubag sa mga pangutana sa kahon nga “Unsay Akong Makat-onan sa Among Panagbulag?” sa panid 224.

Tinuod, wala mahitabo ang imong gidahom nga maoy dangatan sa inyong relasyon. Apan hinumdomi kini: Dihang magbagyo, ang nag-itom nga kalangitan ug ang kusog nga ulan mao lang ang imong makita. Pero sa dili madugay motuang ra ang ulan ug mohayag ang kalangitan. Ang mga batan-on nga gihisgotan sa sinugdanan niining kapituloha nahupayan ra paglabay sa panahon. Makasalig ka nga mahupayan ka usab!

SA SUNOD NGA KAPITULO

Unsay imong himoon aron dili ka mabiktima sa mga tigmolestiya?

[Footnote]

TEKSTO

“[Si Jehova] nagaayo sa mga may gun-ob nga kasingkasing, ug nagabugkos sa ilang masakit nga mga bahin.”—Salmo 147:3.

SUGYOT

Si Susan, nga gihisgotan sa sinugdanan niini nga kapitulo, naghimog listahan sa mga teksto nga mabasa niya kon maguol siya. Mahimong ilista sab nimo ang mga teksto niini nga kapitulo.

NAHIBALO KA BA . . . ?

Ang kadaghanan sa mga tin-edyer nga nagkatrato wala magkadayon, ug kadaghanan usab niadtong nagkadayon nagdiborsiyo ra sa ulahi.

ANG AKONG PLANONG HIMOON!

Kini ang akong himoon aron mahupayan ko sa among panagbulag: ․․․․․

Kini ang akong pauswagon kon makatrato ko pag-usab: ․․․․․

Kon unsay akong gustong ipangutana sa akong ginikanan bahin niini: ․․․․․

UNSAY IMONG HUNAHUNA?

● Unsay imong nakat-onan sa imong kaugalingon gikan sa imong miaging relasyon?

● Unsay imong nakat-onan bahin sa kaatbang nga sekso?

[Blurb sa panid 227]

“Palabya una ang panahon. Kon dili na kaayo ka emosyonal, makahunahuna kag tarong ug makadawat sa nahitabo. Gawas pa, mas mailhan nimo ang imong kaugalingon ug kon unsay imong gipangita sa usa ka kapikas. Mahibaloan sab nimo kon unsay angayng himoon aron dili na kadto mahitabo pag-usab.”—Corrina

 [Kahon sa panid 224]

Worksheet

Unsay Akong Makat-onan sa Among Panagbulag?

Unsay iyang rason sa pagpakigbulag nimo? Isulat kana sa ubos, bisan pag para nimo dili kana makataronganon. ․․․․․

Sa imong tan-aw, unsa pay laing rason? ․․․․․

Kon imong balikan ang nahitabo, unsa untay pwede nimong himoon aron dili mo magbulag? ․․․․․

Sa imong nasinatian, may nakita ka bang angay nimong pauswagon aron mas mohamtong ka ug mouswag sa espirituwal? ․․․․․

Unsay imong himoon o dili himoon kon makatrato ka pag-usab? ․․․․․

[Hulagway sa panid 223]

Ang panagbulag samag samad—sakit kini pero maalim ra paglabay sa panahon