KAPÍTULO 31

Mbaʼépa ikatu ajapo cherejárõ?

“Ore ningo cinco áñore oñoamigoite ha ojapómakuri seis mése roñemoĩ hague de nóvio. Péro upeichahágui haʼe noñeʼẽvéintema chéve. Ha mbaʼe piko ajapovéta! Ni ndoúi ningo heʼi hag̃ua chéve mbaʼérepa chereja. Apyta vaietereíngo upe rire. Tódo el día añeporandu: ‘Mbaʼépe piko la afalláraʼe?’.” (Raquel)

 NDE rehayhuetereíkuri nde chíkope ha oiméne pehasa oñondive heta mbaʼe porã, péro nderejárõ guare, yvýre repyta. Péicha oikovaʼekue Susánare. Haʼe ha Gerardo dos áñore osẽ oñondive. Gerardo káda día omensaheámi Susánape heʼi hag̃ua ohayhuha chupe. Ha pyʼỹinte ogueraha chupe peteĩ rregalitoʼi ohechauka hag̃ua imanduʼaha hese. Susana heʼi voi: “Gerardo ningo chembojeroviaitereivaʼekue. Haʼéngo cherendukuaa ha chentende porãiterei”.

Upe rire oñepyrũma oñeʼẽ kasamiéntore ha moõpa oikóta hikuái omenda rire. Gerardo katu kuãirũre entéroma voi oiko oporandu. Péro oĩ porãháguinte hikuái, Gerardo ojedeha Susánagui. Mbaʼéichapa opytáraʼe Susana? Haʼe oñehaʼãmbaite ogueropuʼaka ko situasión, péro avei heʼi: “Apyta vaieterei kuri upe rire, koʼág̃a peve nañeñandúiva gueteri péicha. Cherasẽháre aiko, ndacheretiaʼevéi ha chekaneʼõmbarei”. a

Mbaʼérepa rembyasyeterei

Rehasáramo ko situasiónre, ikatu repensa: “Ndaikatumoʼãi ningo agueropuʼaka”. Ha reñeñandútante voi upéicha, ko rehayhu jepémava chupe, ha upéva ndojehasamoʼãi ndehegui péicha péichante. Rréi Salomón heʼivaʼekue pe mborayhu “ñemanóicha” imbareteha. Upéicha rupi ijetuʼúta ndéve regueropuʼaka hag̃ua pejuejáramo (El Cantar de los Cantares 8:6, ÑÑB). Ikatu reñeñandu oñeñanduháicha umi ihentemanóva, ha rehasa koʼã mbaʼére:

Nderegueroviaséi: “No, haʼe ndacherejamoʼãi. Haʼéngo  ohónte opensaʼimi, ha dos térã tres día haguépe ou jeýta katuete”.

Ndepochyeterei hendive: “Ndaikuaaseveietéma chugui mbaʼeve. Mbaʼéicha piko péicha ojapóta cherehe!”.

Reñedeprimi: “Chévengo avave voínte ndacherayhumoʼãi”.

Neremboguapyguasuvéima ndejehe: “Legalméntengo ijetuʼúkuri, péro ojehasamiéma ohóvo chehegui”.

Añetehápe ijetuʼúta ndéve regueropuʼaka, koʼýte oimérõ pendeʼarémaraʼe oñondive ha peñeʼẽ jepéma ñemendáre. Péro mbeguekatúpe ningo ojehasáta ohóvo ndehegui. Mbaʼépa rejapokuaa upe aja?

Ikatúva rejapo

Koʼag̃aite oiméne ni nerehenduséi ojeʼérõ ndéve: “Ohasávo pe tiémpo reĩ porãvétama”. Ha añetehápe upévante nosolusionamoʼãi opa mbaʼe. Pór ehémplo, reñekytĩramo katuete hasýta ndéve, reikuaáramo jepe okuera jeytaha. Ha upéicha avei umi mbaʼe rembohováiva koʼág̃a, oiméne hasy ndéve, ha tiémpo rirémante rekueráta. Péro reñekytĩ jave ndahaʼéi péichante rehejáva,  síno reipohãno ha reñatende hese pono oñembyai. Ha nde, oĩ piko ikatúva rejapo? Jahechamína mbaʼépa nepytyvõkuaa ponove remboguapyeterei ndejehe upe oikovaʼekue, ha ani hag̃ua repyta reñamarga.

● Ani rejejoko nerasẽ hag̃ua. Upéva ikatu nepytyvõ pono reñeñandu vaieterei. La Biblia heʼi voi ‘oĩha ára ñanerasẽ hag̃ua, ha ára ñañembyasy hag̃ua’ (Eclesiastés 3:1, 4). Nerasẽ hague ndeʼiséi nandepuʼakaiha ko situasiónre. Rréi David ipyʼaguasu ha imbaretevaʼekue, upéicharõ jepe ohasa asyetérõ guare heʼi: ‘Pyharekue heta ajaheʼo, che resaýpe amoheʼõmba che aramboha’ (Salmo 6:6, ÑÑB).

● Eñangareko ndejehe. Rehasa rire ko mbaʼe ikatu repyta ndepilaʼi térã nekangyeterei. Péro rekaru porã ha rejapórõ ehersísio, katuete nembaretemiéta. La Biblia heʼi: ‘Umi ehersísio ojapo porã ñanderehe’ (1 Timoteo 4:8, NM).

Oimérõ ndepilaʼi reikóvo, mbaʼépa iporã vaʼerã rejapo?

․․․․․

● Eñehaʼã eñemohembiapo. Nanderetiaʼéiramo jepe, reñehaʼãvaʼerã rejapo umi mbaʼe ndegustáva ha rejepokuaavaʼekue rejapo. Ha iñimportanteveha katu, aníkena reñemohaʼeño. Rejeheʼa memérõ nde rapicha ojepyʼapývare nderehe, nekyreʼỹvéta ha rejesarekovéta umi mbaʼe porãre (Proverbios 18:1).

Ehai mbaʼépa reñehaʼãta rejapove koʼág̃a guive.

․․․․․

 ● Emombeʼu Ñandejárape ne remiandu. Oĩ heta ndojaposéiva upéva oimoʼãgui Ñandejára ofalla hague hendive. Heʼi voi hikuái: “Hetaite ningo añemboʼékuri ajuhu hag̃ua che irũrã ha ipahápe, emañamína la oikóva!” (Salmo 10:1). Ha ndépa mbaʼe ere? Oĩ porã piko repensa Ñandejára káusare nosẽporãi hague térã katu haʼe oikoha ñanemomenda? Nahániri. Upéva rangue nemanduʼavaʼerã Jehová nderayhu ha ojepyʼapyha nderehe (1 Pedro 5:7). La Biblia nemokyreʼỹ ‘remoĩ hag̃ua opa mbaʼe Ñandejára pópe. Ha haʼe omeʼẽne ndéve ipyʼaguapy, oñangarekótava nde pyʼapy ha ne remiandúre’. Upéicharõ, ani rekyhyje remombeʼu hag̃ua Jehovápe nembaʼembyasy (Filipenses 4:6, 7).

Mbaʼe mbaʼépa rejerurekuaa Ñandejárape rembohovái porã hag̃ua ko situasión?

․․․․․

 Ohasáta katuete

Reñeñandu porãmieve vove ikatu rejepyʼamongeta upe rehasavaʼekuére, ikatuhag̃uáicha rehecha mbaʼépa oikóraʼe ajeve pejueja. Upearã ikatu nepytyvõ pe rrekuádro heʼíva “ Mbaʼépa reaprende upe rehasavaʼekuégui?”, oĩva páhina 224-pe.

Añetehápe ningo opavave ñambyasy ndoikói jave peteĩ mbaʼe ñahaʼarõ haguéicha. Upéicharamo jepe epensamína ko mbaʼére: ou jave peteĩ torménta vai ijaraipa ha iñypytũmbaite, péro ohasa rire ojavripaite jey ha hesakãmba. Upéicharõ, ikatu koʼág̃a reñeñandu vaieterei, péro upéva ojehasáta ohóvo ndehegui. Pór ehémplo Raquel ha Susana ogueropuʼaka upe ohasavaʼekue, ijetuʼúramo jepe chupekuéra. Mbaʼére piko upéicharõ nde ndaikatumoʼãi avei?

PE KAPÍTULO OÚVAPE

Mbaʼépa rejapovaʼerã reñeñangareko hag̃ua umi ojaposévagui nderehe mbaʼe vai?

[Nóta]

TÉYSTO OĨVA LA BÍBLIAPE

‘Jehová omombarete umi oñembyasývape ha omonguera chupekuéra ijerída.’ (Salmo 147:3, NM)

PETEĨ KONSÉHO

Susana ohaivaʼekue peteĩ kuatiápe umi téysto oĩva la Bíbliape ikatúva omokyreʼỹ chupe oñeñandu vai jave. Nde avei rejapokuaa upéva ha reiporu umi téysto oĩva ko kapítulope.

REIKUAÁPARAʼE?

Umi oñemoĩva de nóvio imitãiterei rehe, heta vése nomendái ojuehe. Ha umi omendávagui, hetaiterei ojedivorsia jey.

UMI MBAʼE AJAPÓTAVA!

Agueropuʼaka hag̃ua upe oikovaʼekue, ajapóta koʼã mbaʼe: ․․․․․

Ág̃a ótrope oho porãve hag̃ua chéve, tekotevẽ koʼág̃ama voi akambia koʼã mbaʼépe: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Pejueja rire, rehechakuaápa tekotevẽha rekambia peteĩ mbaʼépe?

● Ha mbaʼépa reaprende kuña térã kuimbaʼekuéra opensa lájagui?

[Komentário oĩva páhina 227-pe]

“Ohasávo pe tiémpo reñeñandu porãvéma ha rehechakuaáma heta mbaʼe ymave nderehechaivaʼekue. Avei rejekuaavéma ndejupe ha upéva nepytyvõ reñatendeve hag̃ua rehekáta jave ne irũrã”. (Camila)

 [Rrekuádro oĩva páhina 224-pe]

 Rekompleta hag̃ua

Mbaʼépa reaprende upe rehasavaʼekuégui?

Heʼíparaʼe ndéve mbaʼérepa pejuejavaʼerã? Ehai upéva, jepe vyrorei kuri ndéve g̃uarã. ․․․․․

Ndéverõ g̃uarã, mbaʼérepa avei odesidi ojapo upéva? ․․․․․

Rejepyʼamongeta rire upe oikovaʼekuére, oĩpa peteĩ mbaʼe ikatuvaʼerã kuri rejapo ani hag̃ua pejueja? Ehai koʼápe. ․․․․․

Rehasa rire koʼã mbaʼe, rehechakuaápa tekotevẽha neakãguapyve térã remombaʼeve Ñandejára heʼíva koʼã mbaʼére? Mbaʼépepa rekambiavaʼerã? ․․․․․

Reñemoĩ jeýrõ de nóvio amo gotyove, mbaʼépa reñehaʼãta rejapo térã mbaʼépa nderejapomoʼãvéima? ․․․․․

[Taʼanga oĩva páhina 223-pe]

Nderejáramo haʼete ku reñekytĩva: hasy ndéve péro tiémpo rire katuete okueráta