តើធ្វើដូចម្ដេចអាចព្យាបាលរបួសបេះដូង?
ជំពូកទី៣១
តើធ្វើដូចម្ដេចអាចព្យាបាលរបួសបេះដូង?
ប្អូនរ៉ាជែល រៀបរាប់ថា៖ «យើងបានរាប់អានគ្នាជាមិត្តភក្តិអស់ប្រាំឆ្នាំ ហើយបានទៅជាសង្សារនឹងគ្នាអស់ប្រាំមួយខែ។ នៅពេលគាត់ចង់បែកពីខ្ញុំ គាត់មិនហ៊ានប្រាប់ខ្ញុំទេ តែគាត់ឈប់និយាយជាមួយខ្ញុំតែម្ដង។ ខ្ញុំខូចចិត្តណាស់ ហើយចេះតែបន្ទោសខ្លួនថា‹តើខ្ញុំបានធ្វើអ្វីខុស?›»។
ពេលប្អូននិងសង្សារបែកគ្នា នោះធ្វើឲ្យអារម្មណ៍ដែលធ្លាប់តែសប្បាយប្រែក្លាយទៅជាអស់សង្ឃឹម។ នេះជារឿងមួយដែលបានកើតឡើងចំពោះចេហ្វនិងស៊ូសាន ដែលបានស្រឡាញ់គ្នាអស់ពីរឆ្នាំ។ ក្នុងអំឡុងពេលដែលពួកគេទាក់ទងគ្នា ស្នេហាពួកគេរឹតតែផ្អែមល្ហែម។ ជារៀងរាល់ថ្ងៃ ចេហ្វផ្ញើសារស្នេហាច្រើនដងឲ្យស៊ូសាន ព្រមទាំងទិញអំណោយជូននាង ដើម្បីបង្ហាញថាគាត់នឹកនាង ហើយស្រឡាញ់នាងខ្លាំងប៉ុនណា។ ស៊ូសានប្រាប់ថា៖ «ពេលខ្ញុំនិយាយអ្វីមួយ គាត់យកចិត្តទុកដាក់ស្ដាប់ ហើយយល់អំពីខ្ញុំ។ គាត់ធ្វើឲ្យខ្ញុំមានអារម្មណ៍ថា ខ្ញុំពិសេសសម្រាប់គាត់»។
មិនយូរក្រោយមក ចេហ្វនិងស៊ូសានបាននិយាយគ្នាអំពីរឿងរៀបការ និងកន្លែងណាដែលពួកគេចង់កសាងគ្រួសារជាមួយគ្នា។ ចេហ្វថែមទាំងសួរអំពីទំហំចិញ្ចៀនរបស់ស៊ូសានទៀតផង។ ប៉ុន្តែបន្ទាប់មក ស្រាប់តែចេហ្វសុំបែកគ្នា! ពេលនោះស៊ូសានភាំងស្មារតីនិយាយមិនចេញ បេះដូងនាងស្ពឹកអស់ហើយ។ ពីមួយថ្ងៃទៅមួយថ្ងៃ នាងត្រូវរស់នៅទាំងឈឺពើតផ្សា។ នាងនិយាយថា៖ «រាល់ថ្ងៃខ្ញុំរស់ប្រៀបដូចជាស្លាប់»។ a
ហេតុអ្វីឈឺចាប់ម្ល៉េះ?
បើប្អូនធ្លាប់ជួបស្ថានភាពដូចស៊ូសាន ប្អូនប្រហែលឆ្ងល់ថា‹តើខ្ញុំអាចក្រោកឡើង ហើយរស់នៅដូចធម្មតាវិញឬទេ?›។ ពេលរបួសបេះដូង គឺមិនប្លែកទេដែលប្អូនឈឺចាប់។ ស្ដេចសាឡូម៉ូនបានសរសេរថា៖ «សេចក្ដីស្រឡាញ់មានអំណាចខ្លាំងដូចសេចក្ដីស្លាប់»។ (បទចម្រៀងសាឡូម៉ូន ៨:៦) ដូច្នេះ ការបែកគ្នាគឺជារបួសផ្លូវចិត្តដ៏ធ្ងន់មួយ។ អ្នកខ្លះនិយាយថា ការបែកគ្នាប្រៀបដូចជាការស្លាប់មួយចំហៀងខ្លួន។ បើប្អូនកំពុងខូចចិត្ត ប្អូនប្រហែលជាមានអារម្មណ៍ដូចខាងក្រោម៖
មិនទទួលស្គាល់ការពិត។ ‹យើងមិនទាន់បែកគ្នាទេ។ ប៉ុន្មានថ្ងៃទៀតគាត់នឹងត្រឡប់មករកខ្ញុំវិញ›។
ខឹង។ ‹ម៉េចបានជាគាត់ធ្វើបែបនេះដាក់ខ្ញុំ? ខ្ញុំស្អប់គាត់!›។
បាក់ទឹកចិត្ត។ ‹ខ្ញុំមិនស្អាត។ គ្មានអ្នកណាស្រឡាញ់ខ្ញុំទេ›។
ព្រមទទួលយក។ ‹ខ្ញុំមិនអីទេ។ ដំបូងវាឈឺ តែបន្តិចទៀតលែងអីហើយ›។
ប៉ុន្តែ ទីបំផុតប្អូនអាចទទួលយកការពិតបាន គ្រាន់តែត្រូវការពេលវេលា។ តើត្រូវការពេលយូរប៉ុណ្ណា? នោះគឺអាស្រ័យទៅលើកត្តាមួយចំនួនដូចជា រយៈពេលដែលប្អូនទាក់ទងគ្នា និងទំនាក់ទំនងរវាងប្អូនទាំងពីរស៊ីជម្រៅដល់កម្រិតណា។ ប៉ុន្តែ ក្នុងអំឡុងពេលនេះ តើប្អូនគួរធ្វើយ៉ាងណាដើម្បីព្យាបាលបេះដូងប្រេះស្រាំ?
ខំព្យាយាមបោះជំហាន
ប្អូនប្រហែលជាធ្លាប់ឮពាក្យថា‹ពេលវេលានឹងព្យាបាលរបួស›។ ប៉ុន្តែ ពេលដែលប្អូនទើបនឹងខូចចិត្ត ពាក្យនោះស្ដាប់ទៅហាក់ដូចជាគ្មានប្រយោជន៍សោះ។ ហេតុផលគឺថា ពេលវេលាជួយបានតែមួយផ្នែកប៉ុណ្ណោះ។ ដូចពេលដែលប្អូនមុតកាំបិត ប្អូនដឹងថាបន្តិចម្ដងៗមុខរបួសនឹងជាសះស្បើយ តែពេលដែលមុតភ្លាមនោះ ប្អូនឈឺ។ ដូច្នេះ ប្អូនក៏រកវិធីឃាត់ឈាមនិងបន្ថយការឈឺចាប់ ថែមទាំងថែមុខរបួសកុំឲ្យឆ្លងមេរោគទៀតផង។ នេះក៏ដូចគ្នានឹងរបួសបេះដូងដែរ។ ឥឡូវប្អូនគ្រាំគ្រាចិត្ត។ ប៉ុន្តែ អ្វីដែលប្អូនអាចធ្វើបាន គឺរកវិធីបន្ថយការឈឺចាប់និងអារម្មណ៍សោកសៅ។ ពិតមែនថាពេលវេលាអាចជួយមួយផ្នែក តែប្អូនក៏ត្រូវខំប្រឹងដោយខ្លួនឯងដែរ។ សូមសាកល្បងធ្វើតាមវិធីដូចតទៅ៖
● ទម្លាយអារម្មណ៍សោកសៅ។ ការយំគឺមិនខុសទេ។ គម្ពីរចែងថា៖ «មានពេលយំ» និង«មានពេលសោយសោក»។ (អ្នកទូន្មាន ៣:១, ៤) ពេលប្អូនយំមិនមានន័យថា ប្អូនខ្សោយឡើយ។ សូម្បីតែដាវីឌជាអ្នកចម្បាំងដ៏ក្លាហាន ពេលគាត់ពិបាកចិត្តខ្លាំង គាត់និយាយចេញមកថា៖ «ពេញមួយយប់ ទឹកភ្នែកខ្ញុំហូរជោកគ្រែ។ ខ្ញុំយំឡើងលិចដំណេក»។—ចម្រៀងសរសើរព្រះ ៦:៦
● ថែសុខភាព។ ការហាត់ប្រាណ និងការបរិភោគអាហារដែលមានជីវជាតិនឹងជួយប្អូនឲ្យមានកម្លាំងឡើងវិញ។ គម្ពីរចែងថា៖ «ការហ្វឹកហាត់ខ្លួនប្រាណមានប្រយោជន៍»។—ធីម៉ូថេទី១ ៤:៨
តើប្អូនចង់ធ្វើអ្វីដើម្បីថែរក្សាសុខភាពរបស់ខ្លួន?
․․․․․
● ធ្វើខ្លួនឲ្យរវល់។ សូមបន្តធ្វើអ្វីដែលប្អូនចូលចិត្ត។ កុំផ្ដាច់ខ្លួនពីអ្នកឯទៀត។ (សុភាសិត ១៨:១) ការសេពគប់មនុស្សដែលយកចិត្តទុកដាក់ចំពោះប្អូននឹងជួយប្អូនឲ្យគិតតែអំពីអ្វីល្អៗ។
តើប្អូនចង់មានគោលដៅអ្វីខ្លះ?
․․․․․
● ជម្រាបព្រះអំពីអារម្មណ៍របស់ប្អូន។ នេះប្រហែលជាមិនស្រួលទេ។ ពីព្រោះក្រោយពេលបែកគ្នា អ្នកខ្លះរហូតដល់មានអារម្មណ៍ថាព្រះបានក្បត់ខ្លួន ដោយលើកហេតុផលថា‹ខ្ញុំបានអធិដ្ឋានម្ដងហើយម្ដងទៀត សូមឲ្យខ្ញុំរកបានមនុស្សល្អសមនឹងខ្ញុំ។ ឥឡូវមើល នេះជាអ្វីដែលបានកើតឡើង!›។ (ចម្រៀងសរសើរព្រះ ១០:១) តើជាការត្រឹមត្រូវទេ ដែលគិតថាព្រះជាអ្នកផ្គូផ្គង? ពិតជាមិនត្រឹមត្រូវទេ។ មិនមែនជាកំហុសរបស់ព្រះឡើយ កាលដែលប្អូននិងសង្សារបែកគ្នា។ ប៉ុន្តែ អ្វីដែលយើងដឹងច្បាស់ គឺព្រះយេហូវ៉ា«រមែងគិត»អំពីយើងម្នាក់ៗ។ (ពេត្រុសទី១ ៥:៧) ដូច្នេះ សូមអធិដ្ឋានជម្រាបព្រះអំពីអារម្មណ៍របស់ប្អូន។ គម្ពីរចែងថា៖ «អធិដ្ឋាន អង្វរសុំ . . . ។ យ៉ាងនេះ សេចក្ដីសុខសាន្តរបស់ព្រះដែលហួសពីការនឹកស្មាន នឹងការពារចិត្តនិងសមត្ថភាពរិះគិតរបស់អ្នករាល់គ្នា តាមរយៈគ្រិស្តយេស៊ូ»។—ភីលីព ៤:៦, ៧
បើប្អូនកំពុងតស៊ូនឹងអារម្មណ៍ឈឺចាប់ដែលមកពីការបែកគ្នា តើប្អូននឹងអធិដ្ឋានយ៉ាងចំៗអំពីរឿងអ្វីខ្លះដល់ព្រះយេហូវ៉ា?
․․․․․
មើលទៅខាងមុខ
ក្រោយពីប្អូនបានធូរស្រាលពីរបួសបេះដូង ប្អូនប្រហែលជាចង់ពិនិត្យមើលឡើងវិញនូវអ្វីដែលបានកើតឡើងចំពោះទំនាក់ទំនងស្នេហារបស់ប្អូន។ ជាការល្អ សូមប្អូនសរសេរចម្លើយចំពោះសំណួរផ្សេងៗក្នុងប្រអប់« តើខ្ញុំអាចទាញមេរៀនអ្វីពីការខូចចិត្ត?» នៅទំព័រ២២៤។
ជាការពិតណាស់ ចំណងស្នេហ៍របស់ប្អូន មិនបានរលូនដូចអ្វីដែលប្អូនសង្ឃឹមទុកទេ។ ប៉ុន្តែ សូមចាំចំណុចនេះ៖ ក្នុងពេលមានព្យុះ ធម្មតាយើងមើលឃើញតែមេឃខ្មៅងងឹត និងធ្លាក់ភ្លៀងខ្លាំង។ ប៉ុន្តែ ទីបំផុតក្រោយពីភ្លៀងហើយ មេឃក៏ស្រឡះ។ យុវវ័យដែលបានរៀបរាប់ក្នុងជំពូកនេះបានឃើញថា បន្តិចម្ដងៗពួកគេបានធូរស្រាលពីការខូចចិត្ត។ ប្អូនក៏ប្រាកដជាដូចពួកគេដែរ!
តើប្អូនអាចធ្វើអ្វីដើម្បីការពារខ្លួនពីមនុស្សដែលរំលោភបំពានផ្លូវភេទ?
[កំណត់សម្គាល់]
a ទោះជាបទពិសោធន៍ក្នុងជំពូកនេះគឺអំពីស្ត្រីក៏ដោយ គោលការណ៍ក៏បានត្រូវអនុវត្តចំពោះបុរសដែរ។
បទគម្ពីរសំខាន់
«[ព្រះយេហូវ៉ា]មើលថែអ្នកដែលមានចិត្តខ្ទេចខ្ទាំ លោករុំរបួសឲ្យពួកគេ»។—ចម្រៀងសរសើរព្រះ ១៤៧:៣
យោបល់
ប្អូនស៊ូសានដែលបានរៀបរាប់នៅដើមជំពូកនេះ បានកត់ទុកបទគម្ពីរមួយចំនួន។ នាងតែងតែដាក់បទគម្ពីរទាំងនោះជាប់ខ្លួន ដើម្បីទុកអាននៅពេលនាងពិបាកចិត្ត។ ប្អូនក៏អាចធ្វើដូចនាងដែរ ដោយជ្រើសរើសបទគម្ពីរខ្លះពីក្នុងជំពូកនេះ។
តើប្អូនដឹងទេ . . . ?
គូស្នេហ៍វ័យជំទង់ភាគច្រើនមិនបានរៀបការជាមួយគ្នាទេ ហើយបើពួកគេរៀបការ អត្រានៃការលែងលះគ្នាក៏ខ្ពស់ដែរ។
គម្រោងអនុវត្ត!
ដើម្បីព្យាបាលរបួសបេះដូង ហើយបន្តដើរទៅមុខទៀត ខ្ញុំនឹង ․․․․․
ដើម្បីឲ្យស្នេហាលើកក្រោយកាន់តែរលូន ខ្ញុំនឹងព្យាយាម ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● តាមរយៈរឿងរបស់ខ្លួន តើប្អូនបានស្គាល់អ្វីខ្លះអំពីខ្លួនឯង?
● តើប្អូនយល់អ្វីថែមទៀតអំពីមនុស្សភេទផ្ទុយ?
[ឃ្លាអក្សរធំនៅទំព័រ២២៧]
«ប្អូនខឺរីណឺ ប្រាប់ថា៖ ‹ពេលវេលាជួយអ្នកឲ្យយល់កាន់តែច្បាស់ ហើយអារម្មណ៍របស់អ្នកនឹងប្រសើរឡើង។ ដូច្នេះ អ្នកអាចគិតបានដិតដល់ជាង ហើយព្រមទទួលយកការពិត។ អ្នកក៏នឹងស្គាល់ខ្លួនឯងច្បាស់ជាងមុនដែរ ហើយដឹងថាខ្លួនចង់បានគូបែបណា ដើម្បីកុំឲ្យខូចចិត្តម្ដងទៀត›»
[ប្រអប់នៅទំព័រ២២៤]
ក្រដាសលំហាត់
តើខ្ញុំអាចទាញមេរៀនអ្វីពីការខូចចិត្ត?
តើសង្សារប្រាប់ពីមូលហេតុដែលគាត់សុំបែកទេ? បើប្រាប់ សូមសរសេរនៅខាងក្រោម មិនថានោះជាមូលហេតុល្អឬមិនល្អក្ដី។ ․․․․․
តើប្អូនគិតថាមានមូលហេតុផ្សេងទៀតទេ? ․․․․․
បើប្អូនអាចបង្វិលពេលវេលាឲ្យត្រឡប់ក្រោយ តើប្អូនគិតថាគួរធ្វើយ៉ាងណាដើម្បីកុំឲ្យមានលទ្ធផលបែបនេះ? ․․․․․
តាមរយៈអ្វីដែលប្អូនឆ្លងកាត់ តើប្អូនចង់កែលម្អខ្លួនយ៉ាងណា ដើម្បីមានភាពចាស់ទុំនិងមានគុណសម្បត្តិជាអ្នកកាន់តាមគ្រិស្ត? ․․․․․
បើប្អូនចង់មានសង្សារម្ដងទៀត តើប្អូននឹងធ្វើអ្វីដើម្បីកុំឲ្យមានប្រវត្តិច្រំដែល? ․․․․․
[រូបភាពនៅទំព័រ២២៣]
ការបែកគ្នាប្រៀបដូចជារបួសដ៏ឈឺផ្សា។ តែយូរៗទៅ វានឹងជាសះស្បើយ
លោកអ្នកក៏ប្រហែលជាចូលចិត្តដែរ
ក្មេងជំទង់និងយុវវ័យ
សំណួរពីយុវវ័យ
សំណួរទូទៅពីយុវវ័យ មានដូចជារឿងខាងផ្លូវភេទ មិត្តភក្ដិ ឪពុកម្ដាយ សាលារៀន និងរឿងផ្សេងទៀត។
