តើខ្ញុំគួរដឹងអ្វីខ្លះអំពីការជក់បារី?
ជំពូកទី៣៣
តើខ្ញុំគួរដឹងអ្វីខ្លះអំពីការជក់បារី?
សូមមើលជម្រើសនៅក្បែរនោះ ហើយដាក់សញ្ញា ✔ នៅក្នុងប្រអប់ដែលប្អូនគិតថាត្រូវនឹងប្អូន។
□ ខ្ញុំចង់សាកមើល
□ ខ្ញុំចង់បន្ធូរអារម្មណ៍តានតឹង
□ ខ្ញុំចង់ចូលគេចុះ
□ ខ្ញុំចង់ស្រកទម្ងន់
បើប្អូនបានគូសប្រអប់ណាមួយក្នុងទំព័រ២៣៧ នោះប្អូនមានអ្វីមួយដូចគ្នានឹងមនុស្សស្រករប្អូនដែលជក់បារី ឬកំពុងគិតចង់ជក់។ a ជាឧទាហរណ៍៖
ចង់សាកមើល។ ប្អូនត្រេស៊ី និយាយថា៖ «ខ្ញុំចង់ដឹងថាការជក់បារីវាយ៉ាងម៉េច ខ្ញុំក៏យកបារីមួយដើមពីមិត្តម្នាក់នៅសាលា ហើយលួចទៅជក់នៅខាងក្រៅ»។
ចង់បន្ធូរអារម្មណ៍តានតឹងនិងចូលគេចុះ។ ប្អូននីកគី ប្រាប់ថា៖ «នៅសាលា ខ្ញុំឧស្សាហ៍ឮក្មេងៗនិយាយថា‹គ្នាចង់ជក់បារី›។ ពេលជក់រួច ពួកគេក៏ប្រាប់គ្នាថា‹ជក់ហើយធូរអារម្មណ៍ភ្លាម!›។ ពេលខ្ញុំតានតឹងចិត្ត ខ្ញុំក៏ចង់ធ្វើដូចពួកគេដែរ»។
ចង់ស្រកទម្ងន់។ ប្អូនសឺមែនថឺ ប្រាប់ថា៖ «ក្មេងស្រីខ្លះជក់បារី ដោយសារចង់រក្សារាង។ នេះស្រួលជាងតមអាហារ!»។
មុនពេលប្អូនអុជបារីជក់ សូមគិតមួយភ្លែតសិន។ ជាឧទាហរណ៍ ពេលគេស្ទូចត្រី គេដាក់នុយជាប់នឹងផ្លែសន្ទូច។ ពេលត្រីឃើញនុយ តើវានឹងធ្វើអ្វី? វានឹងហែលទៅស៊ីនុយ។ ពិតមែនថាត្រីបានត្របាក់ស៊ីនុយ តែមាត់វាក៏ត្រូវជាប់នឹងផ្លែសន្ទូចដែរ ទីបំផុតវានឹងងាប់! ដូច្នេះ ជាការប្រសើរឲ្យប្អូនធ្វើតាមឱវាទក្នុងគម្ពីរ ហើយប្រើ«សមត្ថភាពរិះគិត»ឲ្យបានច្បាស់លាស់។ (ពេត្រុសទី២ ៣:១) សូមឆ្លើយសំណួរដូចតទៅ៖
តើប្អូនដឹងច្រើនប៉ុនណាអំពីការជក់បារី?
សូមគូសលើចម្លើយ‹ត្រូវ›ឬ‹ខុស›។
ក. ការជក់បារីកាត់បន្ថយភាពតានតឹង។
□ ត្រូវ □ ខុស
ខ. ខ្ញុំអាចបង្ហុយផ្សែងបារីចេញមកវិញស្ទើរតែទាំងអស់។
□ ត្រូវ □ ខុស
គ. នៅក្មេងជក់បារី គ្មានបញ្ហាសោះ។
□ ត្រូវ □ ខុស
ឃ. ការជក់បារីធ្វើឲ្យមនុស្សភេទផ្ទុយចាប់អារម្មណ៍។
□ ត្រូវ □ ខុស
ង. ទោះជាខ្ញុំជក់បារីក៏គ្មានប៉ះពាល់អ្នកណាដែរ។
□ ត្រូវ □ ខុស
ច. ព្រះមិនខ្វល់ថាខ្ញុំជក់បារីឬមិនជក់ទេ។
□ ត្រូវ □ ខុស
ចម្លើយ
ក. ខុស។ ទោះជាការជក់បារីកាត់បន្ថយការតានតឹងចិត្តជាបណ្ដោះអាសន្នក្ដី អ្នកវិទ្យាសាស្ត្របានរកឃើញថា តាមពិតជាតិនីកូទីននាំឲ្យកម្រិតអ័រម៉ូនស្ដ្រេសកើនឡើងខ្លាំងជាង។
ខ. ខុស។ ការសិក្សាខ្លះបង្ហាញថា ជាង៨០ភាគរយនៃសារធាតុក្នុងផ្សែងបារីដែលប្អូនស្រូបចូល វានៅជាប់ក្នុងខ្លួនប្អូន។
គ. ខុស។ រាល់ដងដែលប្អូនជក់បារី ប្អូនបង្កើនហានិភ័យដល់សុខភាពខ្លួន។ ផលប៉ះពាល់ខ្លះអាចកើតឡើងភ្លាមៗ។ សូម្បីតែអ្នកខ្លះជក់តែមួយដើមសោះក៏ញៀនដែរ។ ការជក់បារីធ្វើឲ្យសួតខ្សោយ ក្អករ៉ាំរ៉ៃ និងស្បែកចាស់មុនអាយុ។ ម្យ៉ាងទៀត នេះអាចបង្ខូចសមត្ថភាពផ្លូវភេទរបស់ប្អូន ធ្វើឲ្យប្អូនឆាប់ភ័យស្លន់ស្លោ និងមានជំងឺបាក់ទឹកចិត្ត។
ឃ. ខុស។ អ្នកស្រាវជ្រាវម្នាក់ឈ្មោះឡយ ចនស្តុន បានរកឃើញថា យុវវ័យដែលជក់បារី«មិនសូវមានភាពទាក់ទាញចំពោះមនុស្សភេទផ្ទុយទេ»។
ង. ខុស។ ជារៀងរាល់ឆ្នាំ ផ្សែងបារីសម្លាប់មនុស្សរាប់ពាន់នាក់។ វាបង្កគ្រោះថ្នាក់ដល់ក្រុមគ្រួសារ មិត្តភក្ដិ និងសត្វចិញ្ចឹមរបស់ប្អូន។
ច. ខុស។ អស់អ្នកដែលចង់ធ្វើឲ្យព្រះពេញចិត្ត ត្រូវសម្អាតខ្លួន«ឲ្យស្អាតពីអ្វីៗទាំងអស់ដែលនាំឲ្យស្មោកគ្រោក»។ (កូរិនថូសទី២ ៧:១) ការជក់បារីពិតជាធ្វើឲ្យរូបកាយស្មោកគ្រោកមែន។ ប្រសិនបើប្អូនសម្រេចចិត្តជក់បារី ប្អូនមិនត្រឹមតែបង្ខូចសុខភាពខ្លួនប៉ុណ្ណោះទេ តែក៏បង្ខូចសុខភាពរបស់អ្នកឯទៀតដែរ។ ជាលទ្ធផល ប្អូនមិនអាចធ្វើជាមិត្តរបស់ព្រះបានឡើយ។—ម៉ាថាយ ២២:៣៩; កាឡាទី ៥:១៩-២១
របៀបបដិសេធ
តើប្អូននឹងធ្វើយ៉ាងណា បើអ្នកណាម្នាក់ឲ្យបារីប្អូនជក់? ប្អូនគ្រាន់តែឆ្លើយយ៉ាងខ្លី និងដោយម៉ឺងម៉ាត់ថា«អរគុណ តែខ្ញុំមិនជក់ទេ»។ ពាក្យតបឆ្លើយបែបនេះច្រើនតែមានលទ្ធផលល្អ។ ទោះជាគេបង្ខំ ឬសើចចំអកឲ្យប្អូនក្ដី សូមចាំថា ប្អូនជាអ្នកសម្រេចចិត្ត។ ប្អូនអាចនិយាយថា៖
● «ខ្ញុំដឹងថាបារីអាចបង្ខូចសុខភាពខ្ញុំ ដូច្នេះខ្ញុំមិនជក់ទេ»។
● «ខ្ញុំមានអនាគតវែងឆ្ងាយ ដូច្នេះខ្ញុំចង់រក្សាសុខភាពល្អ»។
● «ដូចអ្នកដែរ ខ្ញុំមានសិទ្ធិជ្រើសរើសនូវអ្វីដែលខ្ញុំចង់ធ្វើ»។
នេះស្រដៀងគ្នានឹងយុវវ័យដែលបានលើកឡើងនៅខាងលើ។ ប្អូនប្រហែលជាឃើញថាសម្ពាធភាគច្រើន គឺកើតចេញពីខ្លួនប្អូន។ បើដូច្នេះមែន សូមវែកញែកសំណួរដូចតទៅនេះ៖
● ‹តើការជក់បារីពិតជាល្អសម្រាប់ខ្ញុំឬទេ? ជាឧទាហរណ៍ បើខ្ញុំជក់បារីដើម្បីឲ្យចូលពួកគេចុះ តើខ្ញុំពិតជាអាចចូលពួកគេចុះមែនឬ ទាំងដែលយើងមានភាពដូចគ្នាតិចតួចណាស់? ហេតុអ្វីបានជាខ្ញុំចង់ធ្វើជាមិត្តជាមួយមនុស្សដែលមិនខ្វល់ពីសុខភាពខ្ញុំ?›
● ‹តើការជក់បារីនឹងធ្វើឲ្យខ្ញុំខាតបង់លុយកាក់ សុខភាព និងការគោរពពីអ្នកឯទៀតច្រើនប៉ុណ្ណា?›
● ‹តើខ្ញុំសុខចិត្តលះបង់ចំណងមិត្តភាពជាមួយព្រះដោយសារតែបារីឬ?›
ចុះយ៉ាងណា បើប្អូនញៀនបារី តើប្អូនអាចធ្វើអ្វីដើម្បីផ្ដាច់វាចោល?
វិធីផ្ដាច់
១. ចូរប្ដេជ្ញាចិត្ត។ សូមសរសេរមូលហេតុដែលប្អូនចង់ផ្ដាច់បារី ហើយឧស្សាហ៍មើលកំណត់នោះឲ្យបានញឹកញាប់។ ការចង់ធ្វើខ្លួនឲ្យស្អាតស្អំនៅចំពោះមុខព្រះ ក៏អាចជាការជំរុញចិត្តដ៏ខ្លាំងមួយដែរ។—រ៉ូម ១២:១; អេភេសូរ ៤:១៧-១៩
២. ចូរសុំជំនួយ។ បើប្អូនមានទម្លាប់លួចជក់បារី ឥឡូវដល់ពេលដែលប្អូនត្រូវហ៊ានប្រាប់មនុស្សពេញវ័យណាម្នាក់ ដើម្បីឲ្យគាត់ជួយប្អូនផ្ដាច់បារី។ បើប្អូនចង់បម្រើព្រះ ប្អូនគួរអធិដ្ឋានសុំជំនួយពីលោក។—យ៉ូហានទី១ ៥:១៤
៣. ចូរកំណត់ពេលផ្ដាច់បារី។ ក្នុងរយៈពេលពីរសប្ដាហ៍ សូមជ្រើសរើសថាថ្ងៃណាដែលប្អូនចង់ឈប់ជក់បារី ហើយគូសថ្ងៃនោះនៅលើប្រតិទិនរបស់ប្អូន។ សូមប្រាប់ក្រុមគ្រួសារ និងមិត្តភក្ដិរបស់ប្អូនឲ្យដឹងថា ប្អូនចង់ផ្ដាច់បារីនៅថ្ងៃនោះ។
៤. ចូរប្រមូលបោះចោល។ មុនថ្ងៃបរិច្ឆេទដែលប្អូនបានកំណត់ សូមឆែកមើលថា តើមានបារីនៅក្នុងបន្ទប់ ក្នុងឡាន ឬក្នុងខោអាវរបស់ប្អូនឬទេ? រួចប្រមូលយកមកបំផ្លាញចោល ទាំងដែកកេះ ឈើគូស និងចានគោះបារី។
៥. ដំណោះស្រាយចំពោះអាការញៀន។ ត្រូវផឹកទឹកផ្លែឈើ ឬផឹកទឹកឲ្យបានច្រើន។ គេងឲ្យបានគ្រប់គ្រាន់។ សូមចាំថា អាការញៀនគឺបណ្ដោះអាសន្នប៉ុណ្ណោះ តែអត្ថប្រយោជន៍គឺអចិន្ត្រៃយ៍!
៦. ចូរជៀសវាង។ នៅឲ្យឆ្ងាយពីស្ថានភាព ឬកន្លែងដែលទាក់ទាញប្អូនឲ្យចង់ជក់បារី។ ប្អូនក៏ប្រហែលជាត្រូវឈប់សេពគប់អ្នកដែលជក់បារីដែរ។—សុភាសិត ១៣:២០
កុំចាញ់ពាក្យបោកបញ្ឆោត
ជារៀងរាល់ឆ្នាំ ក្រុមហ៊ុនថ្នាំជក់ចំណាយលុយរាប់ពាន់លានដុល្លាលើការផ្សាយពាណិជ្ជកម្ម។ តើអ្នកណាជាអតិថិជនចម្បងរបស់ពួកគេ? ឯកសារផ្ទៃក្នុងរបស់ក្រុមហ៊ុនថ្នាំជក់មួយបញ្ជាក់ថា៖ «យុវវ័យសព្វថ្ងៃគឺជាអតិថិជនដែលមានសក្ដានុពលសម្រាប់ថ្ងៃអនាគត»។
កុំចូលអន្ទាក់របស់ក្រុមហ៊ុនថ្នាំជក់។ ប្អូនមិនចង់ដូចជាត្រីដែលជាប់ផ្លែសន្ទូចរបស់គេទេ ពីព្រោះទាំងក្រុមហ៊ុនថ្នាំជក់ ទាំងមនុស្សស្រករប្អូនដែលជក់បារី មិនខ្វល់ពីអ្វីដែលល្អសម្រាប់ប្អូនឡើយ។ ផ្ទុយទៅវិញ សូមស្ដាប់តាមដំបូន្មានពីគម្ពីរ ហើយរៀនដើម្បី«ប្រយោជន៍»របស់ប្អូន។—អេសាយ ៤៨:១៧
តើមិត្តភក្តិបង្ខំប្អូនឲ្យផឹកស្រាឬទេ? ហេតុអ្វីជាការសំខាន់ដែលប្អូនត្រូវដឹងអំពីកម្រិតរបស់ខ្លួន?
[កំណត់សម្គាល់]
a ពិតមែនថាក្នុងជំពូកនេះនិយាយអំពីអ្នកជក់បារី តែអ្នកដែលទំពាថ្នាំជក់ឬស្លាម្លូ ក៏ប្រឈមមុខបញ្ហានិងហានិភ័យដូចគ្នា។
បទគម្ពីរសំខាន់
«ចូរយើងសម្អាត . . . កាយរបស់យើងឲ្យស្អាតពីអ្វីៗទាំងអស់ដែលនាំឲ្យស្មោកគ្រោក»។—កូរិនថូសទី២ ៧:១
យោបល់
កុំបញ្ឆោតខ្លួនដោយគិតថា‹ខ្ញុំបឺតតែមួយខ្សឺតប៉ុណ្ណោះ វាមិនអីទេ›។ អ្នកដែលធ្វើបែបនេះ ច្រើនតែចាប់ផ្ដើមជក់បារីម្ដងទៀត។—យេរេមា ១៧:៩
តើប្អូនដឹងទេ . . . ?
ការចុកថ្នាំជក់ ផ្ដល់ជាតិនីកូទីនច្រើនជាងបារី និងផ្ទុកសារធាតុពុលប្រហែលជា២៥យ៉ាងដែលបង្កជាមហារីក។ នេះធ្វើឲ្យអ្នកប្រើប្រាស់ងាយកើតជំងឺមហារីកមាត់ និងមហារីកបំពង់ក។
គម្រោងអនុវត្ត!
បើសិស្សរួមថ្នាក់បង្ខំខ្ញុំឲ្យជក់បារី ខ្ញុំនឹង ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● ទោះជាដឹងថាការជក់បារីនាំឲ្យមានគ្រោះថ្នាក់ក្ដី ហេតុអ្វីមនុស្សខ្លះនៅតែចង់ជក់?
● ហេតុអ្វីប្អូនគិតថាការជក់បារីគឺជាគំនិតមិនល្អ?
[ឃ្លាអក្សរធំនៅទំព័រ២៤០]
«ប្អូនអេឡាណឺ រៀបរាប់ថា៖ ‹ពេលគេឲ្យបារីខ្ញុំជក់ ខ្ញុំគ្រាន់តែញញឹម ហើយប្រាប់ថា៖ «អរគុណ តែខ្ញុំមិនចង់កើតមហារីកទេ»›»
[ប្រអប់/រូបភាពនៅទំព័រ២៤១]
តើការប្រើកញ្ឆាមានគ្រោះថ្នាក់ទេ?
ប្អូនអិលអិន ដែលរស់នៅប្រទេសអៀរឡង់ប្រាប់ថា៖ «មនុស្សមួយចំនួននិយាយថា កញ្ឆាជួយឲ្យភ្លេចទុក្ខកង្វល់ ហើយវាគ្មានផលប៉ះពាល់អ្វីទាំងអស់»។ តើប្អូនធ្លាប់ឮគេនិយាយបែបនេះទេ? សូមប្រៀបធៀបពាក្យសម្ដីរបស់គេ ជាមួយនឹងហេតុការណ៍ពិត។
សម្ដីគេ។ កញ្ឆាមិនមានគ្រោះថ្នាក់ឡើយ។
ការពិត។ ការស្រាវជ្រាវមួយបង្ហាញថា កញ្ឆាអាចមានឥទ្ធិពលយូរអង្វែងក្នុងរាងកាយដូចជា៖ ថមថយការចងចាំ សមត្ថភាពរៀនសូត្រថយចុះ និងប្រព័ន្ធភាពស៊ាំក្នុងរូបកាយចុះខ្សោយ ព្រមទាំងបង្ខូចសមត្ថភាពផ្លូវភេទ មិនថាប្រុសឬស្រីទេ។ ណាមួយទៀត វាអាចបង្កឲ្យមានជំងឺថប់បារម្ភ វិកលចរិត និងសរសៃប្រសាទ។ កុមារដែលកើតពីស្ត្រីជក់កញ្ឆា ទំនងជាមានបញ្ហាខាងបុគ្គលិកលក្ខណៈ ពិបាកផ្ដោតអារម្មណ៍ និងពិបាកក្នុងការសម្រេចចិត្ត។
សម្ដីគេ។ ផ្សែងកញ្ឆាមានគ្រោះថ្នាក់តិចជាងផ្សែងបារី។
ការពិត។ ផ្សែងកញ្ឆាស្អិតជាប់ក្នុងប្រព័ន្ធផ្លូវដង្ហើមច្រើនជាងផ្សែងបារីដល់ទៅបួនដង ហើយផ្ទុកកាបូនម៉ូណូអុកស៊ីតច្រើនជាងប្រាំដងនៅក្នុងឈាម។ ការជក់កញ្ឆាប្រាំដើមស្មើនឹងការស្រូបយកសារធាតុពុលបង្កឲ្យកើតជំងឺមហារីកដូចគ្នានឹងការជក់បារីមួយកញ្ចប់ដែរ។
សម្ដីគេ។ កញ្ឆាមិនធ្វើឲ្យញៀនទេ។
ការពិត។ ក្មេងជំទង់ដែលមានបញ្ហាផ្លូវចិត្ត ឬផ្លូវអារម្មណ៍ងាយនឹងញៀនកញ្ឆា។ ក្មេងខ្លះទៀតទៅជាញៀនក្រោយពីប្រើប្រាស់កញ្ឆាយូរ។ ជាងនេះទៅទៀត ការស្រាវជ្រាវបង្ហាញថាយុវវ័យដែលប្រើកញ្ឆាទំនងជាប្រើប្រាស់គ្រឿងញៀនផ្សេងទៀតដូចជា កូកាអ៊ីនជាដើម។
[ប្រអប់/រូបភាពនៅទំព័រ២៤៤, ២៤៥]
តើការជក់បារីប៉ះពាល់យ៉ាងណាដល់រូបកាយ?
នៅក្នុងពាណិជ្ជកម្មបារី យើងឃើញអ្នកជក់មានសុខភាពល្អ។ ប៉ុន្តែ សូមមើលក្នុងជីវិតពិតវិញ តើបារីប៉ះពាល់ដល់សុខភាពមនុស្សខ្លាំងប៉ុណ្ណា?
មាត់និងបំពង់ក៖ អាចកើតមហារីក
[រូបភាព]
មហារីកអណ្ដាត
បេះដូង៖ ខ្វះអុកស៊ីសែន អាចមកពីសរសៃឈាមទៅជារឹងនិងរួមតូច ហើយអាចនាំឲ្យមានជំងឺបេះដូងដល់ទៅបួនដង
[រូបភាព]
ស្ទះសរសៃឈាម
សួត៖ ការជក់បារីនាំឲ្យថង់ខ្យល់ក្នុងសួតខូច រលាកផ្លូវដង្ហើម និងនាំឲ្យមានហានិភ័យខ្ពស់ក្នុងការកើតជំងឺមហារីកដល់ទៅ២៣ដង
[រូបភាព]
សួតរបស់អ្នកជក់បារី
ខួរក្បាល៖ បង្កើនលទ្ធភាពដាច់សរសៃឈាមខួរក្បាលដល់ទៅបួនដង
ស្បែក៖ ជ្រីវជ្រួញមុនអាយុ
ធ្មេញ៖ ប្រែពណ៌លែងស្អាត
ក្រពះ៖ បង្កមហារីក
លំពែង៖ បង្កមហារីក
ប្លោកនោម៖ បង្កមហារីក
តម្រងនោម៖ បង្កមហារីក
[រូបភាពនៅទំព័រ២៣៩]
ដូចត្រីជាប់ផ្លែសន្ទូច អ្នកជក់បារីត្រូវបង់អ្វីៗជាច្រើនសម្រាប់តែនុយបន្តិចបន្តួច
លោកអ្នកក៏ប្រហែលជាចូលចិត្តដែរ
ក្មេងជំទង់និងយុវវ័យ
សំណួរពីយុវវ័យ
សំណួរទូទៅពីយុវវ័យ មានដូចជារឿងខាងផ្លូវភេទ មិត្តភក្ដិ ឪពុកម្ដាយ សាលារៀន និងរឿងផ្សេងទៀត។
