KAPITULO 35

Kasano a Maisardengko ti Agdroga?

ADIKTOKA kadi iti droga? Mabalin nga ammon a ti droga ket makadadael iti isip ken bagim. Nalabit inkagumaam pay ketdi nga isardengen ngem naulitmo latta met. No kasta, saanka a maupay. Adda dagiti nakaisardeng nga agdroga isu a kabaelam met! Kas pagarigan, usigem ti kinuna ti tallo a tattao a nagduduma ti kasasaadna no kasanoda a naisardeng ti agdroga.

NAGAN Marta

TI DATI A KABIBIAGKO Maysaak nga anak iti kinabalasang. Dimmakkelkami nga agkabsat nga awanan iti ama. Idi agarup 12 ti tawenko, inrugik ti mapan kadagiti disco, a kaduak ti ikitko a pagaayatna ti agsala. Masansan nga awanak iti balay ket di nagbayag, nakigayyemak kadagiti tattao a naalas ti aramidda. Pinadasko ti nagdroga idi agtawenak iti 13. Nagusarak pay iti cocaine. Kaay-ayok ti agdroga idi damo. Ngem di nagbayag, nangrugiakon a maaddaan iti halusinasion ken managbutbutengakon. No nagmawmawen ti epekto ti droga, kayatkon ti agpakamatay. Kayatko nga isardeng ti agdroga ngem marigatanak.

NO KASANO A NAISARDENGKO Rinugiak a pinampanunot ti maipapan iti Dios ken sagpaminsan a nakimismisaak. Ngem ad-adda laeng a naldaanganak. Idi agtawenak iti 18, nakikabbalayak iti nobiok ket naaddaankami iti anak a lalaki. Pimmigsa ti tarigagayko a mangbalbaliw iti kabibiagko idi adda anakkon. Adda dati a gayyemko a nagnaed iti asideg ti balay a pagnanaedak. Sinarungkaran ken kinomustanak. Impeksak  kenkuana ti kaririknak. Imbagana nga isu ket maysan a Saksi ni Jehova ken intukonna kaniak ti panagadal iti Biblia. Immanamongak iti dayta.

Naammuak a saan a makaay-ayo iti Dios ti wagas ti panagbiagko isu a masapul nga isardengko ti agdroga ken agsigarilio. Ngem marigatanak nga agsardeng nga agdroga. Sumagmamano a daras iti kada aldaw nga agpakpakaasiak ken Jehova a Dios a tulongannak a mangisardeng iti dakes nga aramidko. Kayatko nga ay-aywen ti Dios. (Proverbio 27:11) Kalpasan ti innem a bulan a panagadalko iti Biblia ken pannakitimpuyogko kadagiti Saksi ni Jehova, naisardengko met laeng ti agdroga. Ita, addan ti direksion ti biagko. Saanak unayen a malmaldaangan. Adda naam-ammok a nagsayaat a Kristiano a lalaki ket isu ti nagbalin nga asawak. Pinadakkelko ti anakko maitunos kadagiti prinsipio iti Biblia. Kasta unay ti yamanko ta impangag ni Jehova dagiti kararagko ken tinulongannak!

NAGAN Marcio

TI DATI A KABIBIAGKO Dimmakkelak iti nasulinek a lugar ti Santo André, maysa a siudad a dakkel ti populasionna iti estado ti São Paulo, Brazil. Ubingak pay idi nangrugiak nga agsigarilio, agdroga, ken agtakaw. Ti sumagmamano kadagiti gagayyemko ket aglaklako iti droga ken agkarkarnap. Maysa kadakuada ti agipadpadawat iti droga kadagiti agtutubo iti lugarmi tapno inton maadiktodan, gumatangda kenkuanan iti droga.

Kanayon nga agronronda dagiti polis iti lugarmi, ken namin-adu a naarestoak gapu kadagiti babassit laeng a banag ken naminsan a pinagsuspetsaandak nga aglaklako iti droga.  Namin-adu a nagilemmengak iti balayko kadagiti produkto ken paltog a tinakaw ti gang-mi.

Kabutengdak dagiti tattao. Nakalablabbasit dagiti matak. Diak ammo ti umisem. Kinapudnona, agruprupaak a kriminal. Binirngasandak iti “Tufão” (Bagyo) gapu ta dayta la mangrirriribuk ti ar-aramidek iti sadinoman a papanak. Mammartekak pay ken imoral ti kabibiagko. Adu kadagiti gagayyemko ti napapatay wenno naipisok iti pagbaludan. Gapu iti nakaro a leddaangko, nangigalutak iti tali iti sanga ti maysa a kayo ket ginandatko ti agbekkel.

NO KASANO A NAISARDENGKO Kiniddawko iti Dios a tulongannak. Di nagbayag, naam-ammok dagiti Saksi ni Jehova ket inrugik ti nagadal iti Biblia. Naammuak a Jehova ti personal a nagan ti Dios, ken isu ket maseknan ken sidadaan a tumulong kadagidiay mangikagkagumaan a mangannurot kadagiti pagalagadanna. (Salmo 83:18; 1 Pedro 5:6, 7) Nakaad-adu ti nasken a balbaliwak. Ti maysa kadagiti karirigatan ket ti umisem.

Kanayon a kidkiddawek ti tulong ni Jehova, ken inyaplikarko ti balakad ti Biblia. Kas pagarigan, insardengko ti makikadua kadagiti dati a “gagayyemko” ken saanakon a napnapan kadagiti bar. Imbes ketdi, nakitimpuyogak kadagiti tattao a mangan-annurot kadagiti pagalagadan iti Biblia. Narigatanak a nangaramid iti dayta, ngem saanak itan nga agtatakaw ken manangriribuk. Nasuroken a sangapulo a tawen a saanak nga agdrogdroga.

NAGAN Craig

TI DATI A KABIBIAGKO Dimmakkelak iti maysa a talon iti South Australia. Mammartek ti tatangko, ken nagsinada ken nanang idi agtawenak iti walo. Nakiasawa iti sabali ni nanangko ket nakipagnaedak  kenkuana agingga idi agtawenak iti 17. Iti dayta a tawen, nasursurok ti agpukis iti karnero. Nakipagnaedak kadagiti grupo dagiti mammukis iti karnero nga agbibiahe iti sadinoman nga ayan ti trabaho. Inrugik ti aginum iti nalabes ken agusar iti nagduduma a droga. Pinaatiddogko ti buokko. Inikkak dayta iti wax sa sinallapid ken kinargaak iti beads. Nagbalinak a naimon, naranggas, ken nalaka a pumudpudot ti ulok. Namin-adu a naibaludak.

Immakarak iti bassit nga ili iti Western Australia ket nagkabbalaykami iti nobiak, a serbidora iti arak iti maysa a hotel. Agpadpadakami a mannigarilio ken mangnginum, ken nagmulakami iti bukodmi a marihuana.

NO KASANO A NAISARDENGKO Kaap-apitmi laeng iti marihuana idi adda simmarungkar a Saksi ni Jehova iti daanen a balaymi. Saanko a basta pinati dagiti imbagada. Imbes ketdi, bayat ti panaglabas ti tiempo, pinaneknekak no umiso ti ibagbaga ti  Biblia. Kalpasanna, in-inut nga inlintegko ti dakes a kabibiagko.

Di nagbayag, ammok a masapul nga isardengkon ti agmarihuana. Ania ti ramanen dayta? Adu ti rigatko a nagmula iti marihuana isu a ti immuna a napanunotko ket ipadawatko dayta. Ngem inkeddengko a dadaelek laengen ta saan a nasayaat no ipadawatko. Dakkel ti naitulong ti panagkararag tapno maisardengko ti panagdroga ken nalabes a panaginum. Kiniddawko ti tulong ti espiritu ti Dios tapno agballigiak. Insardengko met ti makikadua kadagiti tattao a mangisungsong kaniak kadagiti dakes nga aramid. Idi inyaplikarko dagiti maad-adalko iti Biblia, timmalged ti riknak ket nakatulong dayta tapno mabalbaliwak dagiti naalas a kababalinko. Ti nobiak ket nagadal met iti Biblia ken binalbaliwanna ti kababalin ken kabibiagna. Nagkasarkami ket 21 a tawenen a tagtagiragsakenmi ti nasaysayaat a salun-at. Naragsakkami pay ita a mangpadpadakkel iti dua nga annakmi. Diak la ketdi ammo no ania ti nagbanagak no saannak a tinulongan ni Jehova a mangbalbaliw iti kabibiagko.

NAPAPATEG A TEKSTO

“Ni . . . Jehova isu ti pigsak ken bilegko.”​—Isaias 12:2.

BALAKAD

No posible, liklikam dagiti tattao, lugar, ken bambanag a mangipalagip iti panagusarmo idi iti droga. Ipakita ti panagsukimat a matukay ti tarigagaymo nga agdroga no makitam ti aniaman kadagita.

AMMOM KADI . . . ?

Ti pannakaadikto iti droga kabaelanna a dadaelen ti utek.

DAGITI ARAMIDEK!

No nailaw-anko manen ti agdroga, ti aramidek ket

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Apay a nasken a mangaramid iti dakkel a panagbalbaliw ti maysa a tao no kayatna a maisardeng ti agdroga?

● Kasano a makatulong ti pannakaammom iti kinapudno maipapan iti Dios?

[Blurb iti panid 253]

Naragsak ken addan ti direksion ti biagko gapu ta agbibiagak maitunos kadagiti nangato a pagalagadan ti Biblia.’’​—Marta

[Ladawan iti panid 256]

Ti panangisardeng iti pannakaadikto ket mayarig iti iruruar iti maur-uram a balay​—mabatim dagiti sanikuam, ngem maispalmo ti biagmo