Amashiwi ya Kutampilapo

Ifyasuko Ifingabafwa!

‘Kuti nacita shani pa kuti ndelanshanya bwino na bafyashi bandi?’ ‘Kuti napanga shani ifibusa?’ ‘Bushe bucilalelale bubi?’ ‘Cinshi cilenga ndeba sana no bulanda?’

Nga walipushapo aya mepusho, ninshi tawaba weka. Amasuko yafwile yalapusanapusana ukulingana na bantu waipusha. Pa kuti abacaice basange ukupanda amano ukusuma, bafwile ukubelenga ifipande fya muli magazini iitwa ukuti Loleni! ifyaba no mutwe wa kuti “Abacaice Bepusha Ukuti . . . “ ifyatendeke ukulembwa muli Loleni! ya ciNgeleshi mu January 1982. Nangu ca kuti napapita sana imyaka, ifi ifipande ficili fyalitemwikwa. Pa kulemba icipande cimo na cimo kulaba ukufwailisha bwino ifyebo. Na kuba, pa kwishiba ifyo abaice batontonkanya, abalemba magazini ya Loleni! balilanda ku baice abengi nga nshi ukushinguluka icalo! Lelo icacindama ca kuti ifiba mu fipande fya kuti “Abacaice Bepusha ukuti” fifuma muli Baibolo.

Icitabo mulebelenga pali ino nshita cabalilepo ukulembwa mu 1989. Lelo, ifipande nafilembululwa pa kuti fyumfwane ne filecitika pali ino nshita. Muli cino citabo muli ifipande fya kuti “Abacaice Bepusha Ukuti” ukucila pali 30 ifyalembelwe pa kati ka 2004 na 2011.

Icitabo ca kuti Ifipusho Abacaice Bepusha—Ifyasuko Ifingabafwa, Ibuuku 1, nacikwatamo ifyebo ifyo ulekabila pa kuti ukakule bwino. Ico tulefwaisha ca kuti ilyo ulekonka ifili mu citabo, ukabe pa bantu abengi nga nshi, abanono na bakalamba, abo “ukupitila mu kubelesha balikwata amano aya kulekanya icalungama ne calubana.”—AbaHebere 5:14.

Ni fwe Bakalemba