Pasiuna

Mga Tubag nga Mosaler!

‘Unsaon nako pag-estoryag maayo ang akong ginikanan?’ ‘Unsay akong himoon aron makakita kog mga higala?’ ‘Unsa may daotan sa lingaw-lingaw nga pagpakigsekso?’ ‘Nganong maguol man ko?’

Kon nakapangutana ka niana sa imong kaugalingon, mao man usab ang ubang batan-on. Tingali nangayo kag tambag sa uban pero lain-lain ang ilang tubag. Busa aron mahatagag kasaligang tambag ang mga batan-on, usa ka binase-sa-Bibliya nga mga serye sa Pagmata! nga nag-ulohang “Mga Batan-on Nangutana . . . ” ang gisugdan pagpatik niadtong Enero 1982. Hangtod karon daghan ang natabangan niini. Ang matag artikulo gipanukiduki pag-ayo. Gani, aron masayran kon unsa gyoy hunahuna ug pagbati sa mga batan-on, ang mga magsusulat sa Pagmata! nag-interbiyo ug daghang batan-on sa tibuok kalibotan! Apan labaw sa tanan, ang mga tambag diha sa “Mga Batan-on Nangutana” gipasukad sa Pulong sa Diyos, ang Bibliya.

Kining libroha unang gipatik sa 1989. Apan gibag-o ang mga kapitulo niini aron ang impormasyon mohaom sa mga problema sa mga batan-on karon. Kapin sa 30 ka kapitulo ang gibase sa mga artikulo gikan sa “Mga Batan-on Nangutana” nga gipatik sa 2004 hangtod sa 2011.

Ang Mga Pangutanang Gisukna sa mga Batan-on—Mga Tubag nga Mosaler, Tomo 1, makatabang sa paghimo kanimong responsableng batan-on. Hinaot nga imong ipadapat ang mga tambag niini aron usa ka sa milyon-milyong batan-on ug hamtong kansang katakos sa pagsabot nabansay sa pag-ila sa maayo ug sa daotan.—Hebreohanon 5:14.

Ang mga Magpapatik