PAKAUNA

Dagiti Sungbat nga Epektibo!

‘Kasanoak a makisarita kadagiti dadakkelko?’ ‘Kasanoak a maaddaan kadagiti gagayyem?’ ‘Ania ti pagdaksan ti casual sex?’ ‘Apay a nakalidlidayak?’

No naisalsaludsodmo metten dagita, saanka nga agmaymaysa. Mabalin nga adda dagiti nagpabalakadam, ngem nagduduma ti imbalakadda. Tapno maikkan dagiti agtutubo iti nasayaat a balakad, ti serye a naibatay iti Biblia a napauluan iti “Agimtuod Dagiti Agtutubo . . . ” ket naipablaak iti magasin nga Agriingkayo! manipud pay idi Enero 1982. Agingga ita, adu pay laeng ti mabembenepisiaran kadagitoy nga artikulo. Nasukimat a naimbag ti tunggal artikulo. Kinapudnona, tapno maammuan dagiti mannurat iti Agriingkayo! ti kapanunotan ken karirikna dagiti agtutubo, nanginterbiuda iti ginasut nga agtutubo iti intero a lubong! Ngem napatpateg pay, ti balakad iti “Agimtuod Dagiti Agtutubo” ket naibatay iti Sao ti Dios, ti Biblia.

Ti libro nga ig-iggamam ita ket immuna a naipablaak idi 1989. Nupay kasta, interamente a napabaro dagiti linaonna, a tumulong kadagiti agtutubo a mangsaranget kadagiti karit a pakaipaspasanguanda ita. Nasurok a 30 a kapitulo ti naadaw kadagiti artikulo nga “Agimtuod Dagiti Agtutubo” a naipablaak manipud 2004 agingga iti 2011.

Ti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo, Tomo 1, tulongannaka nga agbalin a responsable nga adulto. Mangnamnamakami a bayat nga iyap-aplikarmo dagiti balakadna, maysakanto kadagiti minilion a tattao, agtutubo man wenno adulto, a “babaen iti panangusar nasanay dagiti pannakabalin ti pannakaawatda a mangilasin agpadpada iti umiso ken di umiso.”​—Hebreo 5:14.

Dagiti Nangipablaak