Ibuot 38

Nso ke N̄kpanam Man Esinem Mi Ndinam N̄kpọ Abasi?

Josh emi edide isua 16 osụk anana ke bed esie. Eka esie edida ke enyịnusụn̄ ofiori ete: “Joshua, daha da ndien! N̄kọ ọmọfiọk ke imenyene mbono esop mfịn!” Josh akamamana edidụk ubon Mme Ntiense Jehovah, ndien mmọ ẹsidụk mbono esop Christian kpukpru ini. Edi idọn̄ke Josh ndidụk mbono esop aba.

Enye okụni ete, “Oh, Mama, idọn̄ke mi ndika!”

Eka esie ọbọrọ ete, “Kụbi inua fo ka kesịne ọfọn̄. Nyomke ndifiak n̄ka ke idiọk ini mfịn!” Mma mbon ọwọn̄ọde iso asan̄a adaha.

Eka esie ikam itoho mi isịm ko ke ini Josh ọdọhọde ete, “Mama, se ido ukpono fo edi emi idịghe okịm.” Enye ọfiọk ke eka imọ okop se imọ itịn̄de, sia enye okop eka esie atuakde ada. Mma mbon asan̄a adaha, ibọrọke enye ikọ.

Esịt ọtọn̄ọ ndibiom Josh ke se enye etịn̄de oro. Idịghe nte ke enye oyom ndiyat eka esie esịt. Edi enye inyụn̄ iyomke ndikpe ubọk. N̄kukụre se enye ekemede ndinam edi . . .

Josh asiama onyụn̄ ọtọn̄ọ ndisịne ọfọn̄. Ekem enye ọtọn̄ọ ndikụni ete: “Ebebịghi awawara, nyanam ubiere idemmi. Ami ntiehe nte mbon eken ke Ufọkmbono Obio Ubọn̄. Etie nte ndikemeke ndidi Christian!”

 NDI akanam etie fi ke idem nte etiede Josh emi ẹtịn̄de ẹban̄a mi? Ke adan̄aemi mbon eken ẹkopde inem ndinam n̄kpọ Abasi, ndi esitie fi ke idem ndusụk ini nte ke onyụn̄ etetiene anam? Ke uwụtn̄kpọ:

● Ndi ndikpep Bible etie fi ukem ukem nte ndinam utomufọk oro ẹkenọde fi ke ufọkn̄wed?

● Ndi usumaha nditiene n̄kwọrọ ikọ ke ufọk ke ufọk?

● Ndi mbono esop Christian ẹsiwak ndifek fi?

Edieke ọbọrọde ih, kûyak idem emem fi. Emekeme ndikpep ndikop inem ndinam n̄kpọ Abasi. Yak ise nte ekemede ndinam emi.

AKPA MFỊNA Ndikpep Bible

Ntak emi mîdịghe mmemmem n̄kpọ. Ekeme ndidi afo ekere ke imọ idịghe owo emi ekemede ndikpep n̄kpọ. Etie fi nte ukemeke ndisikpan̄ utọn̄ mbịghi​—ọsọsọn̄ fi nditie itie kiet n̄kpep n̄kpọ. Kamse, emenyenyene ediwak n̄kpọ ufọkn̄wed ndikpep.

Ntak akpanamde emi. Abasi ọkọnọ odudu spirit esie ẹda ẹwet Bible, ndien Bible “ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido.” (2 Timothy 3:16) Ndikpep Bible nnyụn̄ ntie n̄kere se afo okotde ayanam ọfiọk mme n̄kpọ oro mûkọfiọkke. Ke nditịm ntịn̄, udunyeneke eti n̄kpọ ekededi edieke mûsịnke idem uyom n̄kpọ oro. Edieke oyomde ndibre mbre ọfọn, ana ọfiọk mme ibet mbre oro esinyụn̄ ebre enye kpukpru ini. Edieke oyomde ndika iso n̄kop nsọn̄idem, ana esisịn̄ede idem. Kpasụk ntre, edieke oyomde ndikpep n̄kpọ mban̄a Andibot fi, ana esikpep Ikọ Abasi.

Se mme uke fo ẹtịn̄de. “Ke ini n̄kodude ke ufọkn̄wed sekọndri, ama oyom nnam ata akpan ubiere ke uwem mi. Mme uke mi ẹma ẹsinam kpukpru orụk idiọkn̄kpọ, ndien akana  nnam ubiere idemmi: ‘Ndi akpana ntiene mmọ nnam se mmọ ẹnamde? Ndi se ete ye eka mi ẹkpepde mi enen̄ede edi akpanikọ?’ Akana ndụn̄ọde mfiọk ke idemmi.”​—Tshedza.

“Mma nnịm ke se n̄kpepde edi akpanikọ, edi akana nnam ndụn̄ọde man n̄kụt ke edi ntre. Akana nda enye nte ido ukpono mi​—idịghe ndida nte ido ukpono ete ye eka mi.”​—Nelisa.

Se akpanamde. Nam ndutịm ukpepn̄kpọ oro edifọnde ye afo. Mek mme ibuotikọ emi afo oyomde ndikpep. Ọkpọtọn̄ọ ye nso? Emekeme ndida Bible fo ndụn̄ọde se afo enịmde ke akpanikọ; emekeme ndikama utọ n̄wed nte Nso ke Bible Enen̄ede Ekpep? a

Tọn̄ọ idahaemi! Sịn idiọn̄ọ emi ✔ kpere ibuotikọ Bible iba m̀mê ita ke page oro etienede, emi akpamade ndinen̄ede mfiọk n̄kpọ mban̄a​—mîdịghe, edieke amade, wet ndusụk ibuotikọ oro afo amade sịn do.

□ Ndi Abasi odu?

□ Didie ke n̄keme nditịm mfiọk ke ẹkeda odudu spirit Abasi ẹwet Bible?

□ Ntak emi n̄kpenịmde ke ẹkebobot n̄kpọ utu ke ndinịm ke mme n̄kpọ ẹkefoforo?

□ Nso idi Obio Ubọn̄ Abasi, ndien didie ke n̄keme ndiwụt ke Obio Ubọn̄ Abasi odu?

□ Didie ke n̄keme ndida se nnịmde ke akpanikọ nnam an̄wan̄a owo se isitịbede ke ini owo akpade?

□ Ntak emi n̄kpenịmde ke mme akpan̄kpa ẹyeset?

□ N̄kpanam didie mfiọk m̀mê ewe ido ukpono edi ido ukpono akpanikọ?

․․․․․

ỌYỌHỌ MFỊNA IBA Ndiwọrọ An̄wautom

Ntak emi mîdịghe mmemmem n̄kpọ. Idem ekeme ndinyek fi ke ini enemede Bible ye mbon en̄wen m̀mê ke ini osobode eyen ufọkn̄wed mbufo ke an̄wautom.

Ntak akpanamde emi. Jesus eketeme mbet esie ete: ‘Ẹkenam mme owo ẹdi mbet mi, ẹkpep mmọ ẹnam kpukpru n̄kpọ eke n̄ketemede mbufo.’ (Matthew 28:​19, 20) Edi mme ntak en̄wen ẹdu oro afo akpanamde emi. Ndụn̄ọde owụt ke ndusụk itie, ata ediwak uyen ẹnịm Abasi ye Bible ke akpanikọ. Edi, mme uyen emi inyeneke ata idotenyịn iban̄a ini iso. Ndikpep Bible anam ọfiọk mme n̄kpọ emi mme uke fo ẹkpemade ndifiọk. Ke ini etịn̄de se afo enịmde ke akpanikọ ọnọ mbon en̄wen, esịt eyenem fi, ndien ke akande oro, ayanam esịt adat Jehovah.​—Mme N̄ke 27:11.

 Se mme uke fo ẹtịn̄de. “Ami ye ufan mi ima itịm nti usụn̄ oro ẹkemede nditọn̄ọ nneme ke an̄wautom, ima inyụn̄ ikpep nte ikemede ndikan mme ikọ utre nneme ye nte ikpanamde mme mfiakn̄ka. Ndondo oro n̄kọtọn̄ọde ndisịn ukeme ke an̄wautom, ama enem mi akan nte ekesidide.” ​—Nelisa.

“Eyenete an̄wan kiet an̄wam mi etieti! Enye ọsọn̄ọ mi ke isua itiokiet esinyụn̄ ada mi ọwọrọ an̄wautom; ndusụk ini enye esidep udia usenubọk ọnọ mi. Enye ama owụt mi ndinem itie N̄wed Abasi oro ẹken̄wamde mi nnen̄ede ekikere mi. Idahaemi, mmesinen̄ede nnyene udọn̄ ke idem mbon en̄wen ke ntak eti uwụtn̄kpọ esie. Esịt enem mi etieti ke emi enye akan̄wamde mi!”​—Shontay.

Se akpanamde. Edieke ete ye eka fo ẹnyịmede, yom owo ke esop mbufo emi ọsọn̄ọde fi ke emana, oro afo ekemede ndisan̄a kiet ke an̄wautom. (Utom 16:​1-3) Bible ọdọhọ ete: “Ukwak aban ukwak ọsọp. Ntre ke owo anam iso owo efen ayama.” (Mme N̄ke 27:17) Eyenen̄ede ọbọ ufọn edieke adiande idem ye ikpọ owo emi ẹnen̄erede ẹnyene mbufiọk. Alexis emi edide isua 19 ọdọhọ ete, “Esinem etieti ndidian idem ye ikpọ owo.”

Tọn̄ọ idahaemi! Ke idak emi, wet enyịn̄ owo ke esop mbufo, ke ẹsiode ete ye eka fo ẹfep, emi ekemede ndin̄wam fi ke an̄wautom.

․․․․․

ỌYỌHỌ MFỊNA ITA Ndisidụk Mbono Esop

Ntak emi mîdịghe mmemmem n̄kpọ. Ke ama eketie ke ufọkn̄wed tọn̄ọ ke usenubọk, ndika n̄ketie ke hour kiet m̀mê akande oro n̄kpan̄ utọn̄ nnọ mme utịn̄ikọ Bible ekeme nditie fi nte edidi ke nsinsi.

Ntak akpanamde emi. Bible eteme mme Christian ete: “Ẹyak nnyịn . . . ikere nte ikpedemerede kiet eken inọ ima ye nti utom, ikûsịn ndisop idem ọtọkiet, nte ido ndusụk  owo edide, edi isịn udọn̄ inọ kiet eken, ndien mbufo ẹdọdiọn̄ ẹnam ntem adan̄a nte ẹkụtde ẹte usen oro ke asan̄a ekpere.”​—Mme Hebrew 10:​24, 25.

Se mme uke fo ẹtịn̄de. “Ana owo esitịm idem ọnọ mme mbono esop. Ndusụk ini ana ededep ifet anam emi. Ama etịm idem, mbono esop eyenem fi koro afo ọyọfiọk se ẹdinemede, omonyụn̄ ekeme nditiene mbuana.”​—Elda.

“Nte ini akade, mma ntọn̄ọ ndikụt ke mbono esop esinen̄ede enem mi ke ini nnọde ibọrọ.”​—Jessica.

Se akpanamde. Da ini tịm idem, ndien edieke ekemede, nọ ibọrọ. Emi ayanam ọfiọk ke emetiene etịp n̄kpọ esịn ke se ẹnamde ke mbono esop.

 Ke uwụtn̄kpọ: Ewe esinem akan​—ndise mbre ke TV m̀mê nditiene mbre mbre oro ke an̄wambre? Anaedi akpama nditiene mbre mbre oro utu ke nditetie nse. Ntak mûnamke ntre ye mbono esop?

Tọn̄ọ idahaemi! Ke ufan̄ oro odude ke idak emi, wet ini emi afo ekemede ndibiat minit 30 kpọt kpukpru urua ntịm idem nnọ mbono esop.

․․․․․

Ediwak uyen ẹkụt nte se ẹwetde ke Psalm 34:8 edide akpanikọ. Itie oro ọdọhọ ete: “Ẹtabi ẹnyụn̄ ẹse nte Jehovah ọfọnde.” Ndi ekpenen̄ede enem fi edieke owo ọdọhọde ke udia oro anade fi ke iso enen̄ede enem edi iyakke atabi ese? Ndi ikpakam ifọnke ikan nditabi udia oro ke idemfo? Ukem oro ke edi ye edinam n̄kpọ Abasi. Tabi ke idemfo se nte enemde nditiene mbuana ke mme edinam eke spirit. Bible ọdọhọ ke owo emi mîdịghe andikokop kpọt, edi edide andinanam ‘edikop inemesịt ke ndinam emi.’​—James 1:​25.

KE IBUOTIKỌ ORO ETIENEDE

Kpep nte ekemede ndinịm mme utịtmbuba eke spirit nnyụn̄ nsịm mmọ.

[Ikọ idakisọn̄]

AKPAN ITIE N̄WED ABASI

“Ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.”​—Rome 12:2.

ITEM

Nyene ekpri n̄wed nyụn̄ tọn̄ọ ndisiwet mme akpan n̄kpọ oro ẹnemede ke mbono esop. Emi idiyakke etie ese ini, edi ayanam emem fi utom ndikpep n̄kpọ!

 NDI AMA ỌFIỌK . . . ?

Idiọkke ndidụn̄ọde se afo enịmde ke akpanikọ. Ke nditịm ntịn̄, ndibụp mme mbụme ndien ekem anam ndụn̄ọde edi eti usụn̄ ndifiọk m̀mê se afo enịmde aban̄a Abasi edi akpanikọ.​—Utom 17:11.

SE NDINAMDE

Nyosio minit ․․․․․ nsida n̄kot Bible kpukpru usen nnyụn̄ nda minit ․․․․․ kpukpru urua ntịm idem nnọ mbono esop.

Man nsinen̄ede n̄kpan̄ utọn̄ ke mbono esop, se ndinamde edi ․․․․․

Se ndibụpde ete ye eka mi mban̄a n̄kpọ emi edi ․․․․․

AFO EKERE DIDIE?

● Nso ikeme ndinam etie nte mme n̄kpọ eke spirit ẹfefek uyen?

● Ke otu n̄kpọ ita oro isinamde ke utuakibuot nnyịn, emi ẹnemede ke ibuotikọ emi, ewe ke akpama ndinam n̄kpọ mban̄a?

[Se ẹwetde ke ikpọ abisi ke page 278]

“Ido ukpono oro nsikade idịghe aba ido ukpono ete ye eka mi, edi edi ido ukpono mi. Jehovah edi Abasi mi, ndien nyomke ndinam n̄kpọ ndomokiet oro edibiatde itie ebuana mi ye enye.”​—Samantha

 [Ekebe/​Mme ndise ke page 280, 281]

Mmọ Ẹma Ẹnịm Mme Utịtmbuba

Bible ọdọhọ ete: “Mbufo [ifiọkke] se uwem mbufo edidide n̄kpọn̄.” (James 4:14) Ke ndusụk idaha, n̄kpa esidi ke ini owo mîdorike enyịn onyụn̄ ekeme ndidi ke ini owo edide uyen. Nte afo okotde mbụk Catrina ye eke Kyle, tịm fiọk nte mmọ ẹkenamde eti enyịn̄ ye Jehovah Abasi ke esisịt ini oro mmọ ẹkedude uwem ebe ke ndinịm nnyụn̄ nsịm mme utịtmbuba eke spirit.​—Ecclesiastes 7:1.

Catrina akakpa ke ini ekedide isua 18, edi ke ini enye ekedide isua 13, enye ama ewewet mme utịtmbuba oro enye okoyomde ndisịm ke uwem. Emi ama esịne ndidụk utom uyọhọ­ini, ndinam utom ke obio emi ẹyomde mme andikpep Bible, ndinyụn̄ nsan̄a ye ete esie nnam utom edibọp mme Ufọkmbono Obio Ubọn̄. Enye ekewet ete: “Mma nyak idemmi nnọ Jehovah Abasi!” Catrina okoyom “ndidu uwem ekekem ye mme idaha Jehovah, ke usụn̄ oro edinemde enye esịt.” Ke ini ẹkeyomde ndibụk Catrina, ẹkedọhọ ke enye ekedi “ediye eyenan̄wan emi okoyomde ndida ofụri uwem esie nnam n̄kpọ Jehovah.”

  Toto ke uyen, ẹma ẹkpep Kyle ndisinịm mme utịtmbuba. Ke enye ama akakpa ke mbabuat n̄kpọntịbe ubomisọn̄ ke ini ekedide isua 20, iman esie ẹma ẹkụt n̄wed oro eka esie akan̄wamde enye ewet mme utịtmbuba esie ke ini enye ekedide isua 4 kpọt. Utịtmbuba esie ama esịne edina baptism, ndisinọ utịn̄ikọ ke Ufọkmbono Obio Ubọn̄, ndinyụn̄ nnam utom ke ibuot itieutom Mme Ntiense Jehovah, kpa ebiet emi enye editienede anam utom man ẹsion̄o mme n̄wed oro ẹdin̄wamde mme owo ẹkpep n̄kpọ ẹban̄a Abasi. Ke eka esie ama okokot n̄wed oro ẹkewetde mme utịtmbuba Kyle ke ediwak isua emi ẹkebede, enye ama ọdọhọ ete, “Enye ama esịm kpukpru mme utịtmbuba emi.”

Mme utịtmbuba ewe ke afo enịm ọnọ idemfo? Afo ufiọkke nte uwem fo editiede n̄kpọn̄. Ntem, da usen kiet kiet nam ofụri se ekekeme. Ukem nte Catrina ye Kyle, da ini fo nam n̄kpọ ke mfọnn̄kan usụn̄ oro ekemede. Kpebe apostle Paul, emi eketịn̄de mme ikọ emi ke ekperede ini n̄kpa esie ete: “Mman̄wana eti en̄wan, mmefehe mbuba nsịm utịt, mmọsọn̄ọ mmụm mbuọtidem n̄kama.” (2 Timothy 4:7) Ibuotikọ oro etienede ayan̄wam fi anam oro!

[Ndise ke page 274, 275]

Edieke oyomde idem aka iso ọsọn̄ fi, oyom esisịn̄ede idem. Edieke oyomde ndika iso nsọn̄ idem ke n̄kan̄ eke spirit, oyom esikpep Ikọ Abasi