KAPÍTULO 38

Ha ndaserviséiramo Jehovápe?

Josué orekóva 16 áño oñenohína hupápe. Upe javete oike isy ha heʼi chupe: “Neʼĩra piko repuʼã? Reikuaa porã ñanerreunionha kostedía”. Isy ningo testígo de Jehová, ha upévare michĩete guive Josué oho hendive rreunionhápe, péro koʼág̃a iñateʼỹma oho hag̃ua.

—“Ndaikatúi piko ndénte reho?”... ombohovái Josué isýpe.

—“Ejeprepara katu jaha. Ñag̃uahẽ jeýtama tárde hína!”... heʼi chupe isy osẽnguévo ikotýgui.

—“Oĩ porã ningo la nde ereko ne rrelihión, péro ndegusta haguére ndéve ndeʼiséi chéve chegustavaʼerãha avei”... heʼi Josué. Isy oñemondýi ha opytaite voi ohendúvo upéva, péro ndeʼivéintema mbaʼeve.

Añetehápe Josué ombyasy heʼi haguére upéva, haʼéngo ndoipotáikuri isy oñeñandu vai. Péro ndohoséi avei ojediskulpa. Ipahápe ojapómante isy heʼíva ha ojeprepara.

Tovapukúpe Josué oñepyrũ oñemonde ha heʼi: “Ndaikatuvéima aiko péicha, chete ningo adesidivaʼerã. Chéngo ndahaʼéi umi ótro mitãrusúicha ohóva Salónpe. Chéverõ g̃uarã che ndahaʼéi voi testigorã”.

 REPENSÁMAVA nde avei upéicha? Ikatu rehecha mbaʼéichapa ambue testígo ostudiase la Biblia ha ovyʼa predikasiónpe ha rreunionhápe, ndéve g̃uarã katu ndaigústoi formál ha rejapo nde tuvakuéra heʼíguinte ndéve. Eñeporandumína koʼã mbaʼe:

● Ipohyietereípa chéve astudia la Biblia, ku ajaporamoguáicha che taréa kolehiopegua?

● Chembohasýpa aikuaa haguénte voi asẽvaʼerãha apredika?

● Apensápa ikaiguetereiha umi rreunión?

Reñeñandúramo upéicha ani ere ndaikatumoʼãiha rekambia. Nde ikatu avei revyʼa reservívo Ñandejárape. Jahechami koʼã mbohapy mbaʼe ijetuʼúva jepi ha mbaʼépa rejapokuaa ndegusta hag̃ua umíva.

PETEĨHA Restudia la Biblia

Mbaʼérepa ijetuʼu. Oiméne pyaʼeterei nembyaju lívro umíva. Ha repensa la estúdio ndahaʼeieteha nderehegua. Ikatu ere: “Chakeko heta voi che taréa, ha astudia jey vaʼerã la Biblia piko?”.

Mbaʼérepa restudiavaʼerã la Biblia. Haʼe rupi Ñandejára Ñeʼẽ ha ikatúgui ñanepytyvõ “ñamboʼe ha ñañemoñeʼẽ hag̃ua ñande rapichápe, japorohekomboʼe ha ñaporomoarandu hag̃ua hekopete” (2 Timoteo 3:​16). Relee ha rejepyʼamongetárõ la Biblia heʼívare reaprendéta heta mbaʼe ndaijojaháiva, péro upearã reñehaʼãmante vaʼerã. Pór ehémplo, nde estádo porãséramo rejapovaʼerã ehersísio. Ha rehugakuaa hag̃ua partído, vólei térã ambue mbaʼe reikuaavaʼerã mbaʼéichapa ojehuga ha epraktika meme. Upéicha avei reikuaa porãsérõ Ñandejárape reñemotiempovaʼerã restudia hag̃ua la Biblia.

 Mitãrusukuéra heʼíva. “Arekópe 16 áño añepyrũ añeporandu heta mbaʼe che rrelihióngui. Ahecha che kompañerokuéra ojapóva ha apensa: ‘Mbaʼére piko che ndaikatúi avei ajapo upéicha? Oĩ porã jepe piko umi mbaʼe che tuvakuéra chemboʼevaʼekue?’. Péro koʼã mbaʼe chete añehaʼãvaʼerã kuri ahecha.” (Tshedza.)

“Chemichĩete guive che tuvakuéra chemboʼe heta mbaʼe Ñandejáragui. Péro che ajeroviase umívare ahecha rupi chejeheguiete oĩ porãha. Ndaikatúingo aservi Jehovápe haʼekuéra heʼíguinte chéve, síno che adesidi rupi.” (Nicolás.)

Mbaʼépa ikatu rejapo. Emoĩ peteĩ lístape umi mbaʼe reikuaaséva. Mbaʼe mbaʼépa rehesaʼỹijokuaa? Ikatu rehecha añetépa hína umi mbaʼe regueroviáva. Upearã nepytyvõkuaa lívro Mbaʼépa añetehápe omboʼe la Biblia?  a

Reñepyrũ hag̃ua. Ko lístape emarka (✔) mokõi térã  mbohapy téma reikuaasevéva. Ha rehaikuaa avei oimérõ oĩ ambue mbaʼe restudiaséva.

□ Añetehápepa oĩ Ñandejára?

□ Agueroviápa la Biblia ouha Ñandejáragui? Mbaʼérepa?

□ Mbaʼérepa amboyke pe evolusión ha ajerovia Ñandejára ojapo hague opa mbaʼe?

□ Mbaʼépa Ñandejára Rréino? Ahechaukakuaátapa oisãmbyhymaha?

□ Ikatúpa amyesakã mbaʼépa oiko ñandehegui ñamano rire?

□ Mbaʼérepa ajerovia umi omanóva oikove jeytaha?

□ Mavaitévapa pe rrelihión Ñandejára oguerohorýva?

․․․․․

MOKÕIHA Resẽ repredika

Mbaʼérepa ijetuʼu. Ikatu oime rekyhyje rejotopárõ g̃uarã peteĩ ne kompañérondi repredika aja. Térã ijetuʼu ndéve reñemongeta la Bíbliare peteĩ reikuaaʼỹva ndive.

Mbaʼérepa repredikavaʼerã. Jesús voi omandavaʼekue hemimboʼekuérape: ‘Peipytyvõ umi héntepe [...] oiko hag̃ua chuguikuéra che remimboʼe [...]. Ha pemboʼe chupekuéra ojapo hag̃ua opa mbaʼe haʼevaʼekue peẽme’ (Mateo 28:​19, 20, NM). Peteĩ investigasión ojejapóva heta tetãme ohechauka oĩha heta mitãrusu ojeroviáva Ñandejárare ha la Bíbliare. Péro heta mbaʼe oipyʼapy chupekuéra ha ndoikuaái mbaʼépa oikóta amo gotyove. Mbaʼépa nde rejapokuaa? Umi mbaʼe reaprendéva la Bíbliagui ikatu ideprovécho ndéve remyesakã hag̃ua chupekuéra umi mbaʼe oikuaaséva. Rejapóvo  upéva nde voi reñeñandu porãta, ha iñimportanteveha, rembovyʼáta Jehovápe (Proverbios 27:11).

Mitãrusukuéra heʼíva. “Peteĩ che amígondi rojeprepara rojapo hag̃ua rrevisíta, rohecha mbaʼe mbaʼe rehépa ikatu roñeʼẽ umi héntendi predikasiónpe ha mbaʼéichapa rombohováita umi porandu. Ajapo rupi upéicha koʼág̃a avyʼave apredika jave.” (Nicolás.)

“Oĩ peteĩ ermána ndahaʼéiva cheavegua ha hetáma chepytyvõva. Asẽ meme apredika hendive ha cheinvita jepi rorambosaʼimi hag̃ua upérupi. Ramoiténte chemokyreʼỹ la Biblia rupive ha ohechauka chéve mbaʼépepa tekotevẽ akambia. Upéicha rupi koʼág̃a amboʼe porãve ha ajepyʼapyve che rapichakuérare.” (Shontay.)

Mbaʼépa ikatu rejapo. Nde tuvakuéra nemopermísoramo ikatu resẽ repredika peteĩ ermáno térã peteĩ ermána ikatupyrývandi ha ijedavéva ndehegui (Hechos 16:​1-3). La Biblia heʼi voi: ‘Iérro ningo iérrope jey oñehaimbeʼe, yvypóra katu oñehekomboʼe oñemongetávo hapicha ndive’ (Proverbios 27:17). Rejeheʼáramo umi ermáno ikatupyrýva ha iñarandúvare reaprendéta heta mbaʼe ha tuicha reñakãrapuʼãta. Alexa, orekóva 19 áño heʼi voi: “Igustoiterei ningo japredika koʼãichagua ermánondi”.

Reñepyrũ hag̃ua. Oĩpa ne kongregasiónpe peteĩ ermáno térã ermána ikatúvandi resẽ repredika? Ehai héra.

․․․․․

MBOHAPYHA Reho rreunionhápe

Mbaʼérepa ijetuʼu. Reime rire un día pukukue koléhiope katuete nekaneʼõma reho hag̃ua rehendu jey hína diskúrso.

Mbaʼérepa rehovaʼerã. La Biblia ñanemokyreʼỹ: ‘Jaheka mbaʼéichapa ikatu ñañopytyvõ jajoayhuve ha jajapo  hag̃ua hetave mbaʼe porã. Ani jafalta ñande atyhápe, oĩháicha ojapóva, ñañomokyreʼỹ guei koʼág̃a koʼýte jahechávo hiʼag̃uimaha Ñandejára ára’ (Hebreos 10:​24, 25).

Mitãrusukuéra heʼíva. “Legálmente ikatu ijetuʼu, péro jajepreparavaʼerã jaha mboyve rreunionhápe. Péichango igustove, jaikuaa mbaʼéguipa oñeñeʼẽ ha ikatu ñakomenta.” (Elda.)

“Ymave ikaigueterei chéve umi rreunión. Péro upéi añepyrũ akomenta ha ahechakuaa upéicha igustoveha.” (Jessica.)

Mbaʼépa ikatu rejapo. Reho mboyve rreunionhápe restudiavaʼerã umi mbaʼe oñehesaʼỹijótava upe árape. Avei reñehaʼãvaʼerã rekomenta. Péicha ideprovechovéta ndéve umi rreunión ha nereñandumoʼãi ku reĩ reíva hína upépe.

 Epensami: mbaʼépa igustove, reguapy remaña peteĩ partído térã reikéramo rehuga? Katuete igustovéta nde voi rehugáramo, ajépa? Upeichaite avei umi rreunión, revyʼavéta rejeprepara ha rekomentáramo ha nderehóiramo reguapýnte upépe.

Reñepyrũ hag̃ua. Ikatúpa restudia rreunionrã média óra káda semana? Ehai mbaʼe diakuépa opyta porãve ndéve.

․․․․․

Heta mitãrusu ohechakuaáma añeteha la Biblia heʼíva: ‘Petantea ha pehecha Jehová imbaʼeporãha’ (Salmo 34:9 [34:8, NM]). Epensamína: oiméne nandegustapái oñeñeʼẽnteramo ndéve peteĩ tembiʼu hévare, katuete retanteaséta voi, ajépa? Upéicharõ, ani rejapura ere hag̃ua ndaigustoiha jaservi Jehovápe, ndete retanteavaʼerã ha upe rire rehecháta mbaʼeichaitépa revyʼa restudiávo Ñandejára Ñeʼẽ, repredikávo ha reho memévo rreunionhápe (Santiago 1:25).

PE KAPÍTULO OÚVAPE

Mbaʼépa rejapose nde rekovépe? Mbaʼéichapa ikatu rehupyty umíva?

[Nóta]

TÉYSTO OĨVA LA BÍBLIAPE

‘Pekambia pepensa lája pembopyahu hag̃ua pende rekove. Upéicha peikuaáta Ñandejára rembipota, iporãva, oĩva hekoitépe ha Haʼe oguerohorýva.’ (Romanos 12:2, NM)

PETEĨ KONSÉHO

Ikatu regueraha rreunionhápe peteĩ kuadérno reanota hag̃ua umi mbaʼe iñimportantevéva. Upéicha reaprendéta hetave mbaʼe, pyaʼeve ohasáta la óra ha ndereikomoʼãi ere: “Hiʼãche ko rreunión ndopamoʼãi voi”.

REIKUAÁPARAʼE?

Noĩvaíri rehecha añetépa umi mbaʼe oñemboʼevaʼekue ndéve Ñandejára Ñeʼẽgui (Hechos 17:11).

UMI MBAʼE AJAPÓTAVA!

Añehaʼãta alee la Biblia ․․․․․ minúto káda día ha astudiáta rreunionrã ․․․․․ óra káda semana.

Añatende porãve hag̃ua rreunionhápe ajapóta koʼã mbaʼe: ․․․․․

Mbaʼépa aporanduse che ru térã sýpe ko témare? ․․․․․

NDÉPA MBAʼE ERE?

● Mbaʼérepa heta mitãrusu ndostudiaséi la Biblia ha ndovyʼái predikasiónpe ni rreunionhápe?

● Mbaʼépepa ambaʼapovevaʼerã añakãrapuʼã hag̃ua Jehová servísiope?

[Komentário oĩva páhina 278-pe]

“Chéngo testígo de Jehová che adesidi rupi, ha ndahaʼéi che tuvakuéra heʼíguinte chéve. Ahayhu Jehovápe ha ndajaposéi mbaʼeve ndogustáiva chupe”. (Samantha)

 [Taʼanga ha rrekuádro oĩva páhina 280 ha 281-pe]

Haʼekuéra oikuaavaʼekue mbaʼépa ohupytyse

La Biblia heʼi: “Ndapeikuaái mbaʼépa ojehúta peẽme koʼẽrõ” (Santiago 4:14). Ikatu ojere vaípa ñandéve, oiko ñanderehe peteĩ mbaʼe ñahaʼarõʼỹva ha ñamano. Ñambyasýramo jepe, upéva oiko jepi avei umi imitãvare. Upéicha ojehuvaʼekue Catrina ha Káilpe. Péro haʼekuéra oikuaavaʼekue la ohupytyséva ha oñehaʼãmbaite oĩ porã Ñandejára renondépe (Eclesiastés 7:1).

Catrina orekovaʼekue 18 áñonte omanórõ guare. Orekópe 13 áño haʼe ojapómakuri peteĩ lísta ha ohai umi mbaʼe ohupytyséva hekovépe. Umíva apytépe omoĩ ojaposeha iprekursorádo, ohoseha ambue tetãme oñekotevẽhápe maranduhára ha ombaʼaposeha itúvandi omopuʼã hag̃ua Salón del Reino. Haʼe ohai: “Chéngo aservise Jehovápe ha ndahejamoʼãi mbaʼeve chejoko”. Catrina heʼivaʼekue avei: “Ajapose opa mbaʼe Jehová ojerureháicha. Che aipota haʼe ovyʼa chereheve”. Pe funerálpe ojeʼevaʼekue: “Catrina ningo haʼevaʼekue peteĩ mitãkuña porã, akóinte ojapóva Ñandejára oguerohorýva; chupe g̃uarã ndaiporivaʼekue mbaʼeve iñimportantevéva upévagui”.

  Upéicha avei Káil. Imitãʼi guive oikuaa porã vaʼekue mbaʼépa ohupytyse hekovépe. Péro orekópe 20 áño omano peteĩ aksidéntepe. Tiémpo rire ihentekuéra otopa peteĩ ikuadernokue, upépe haʼe ohaivaʼekue isy ndive umi mbaʼe ojaposéva Jehová servísiope. Hiʼarive upérõ 4 áñonte orekovaʼekue. Haʼe ohai ojevautisaseha, ojaposeha diskúrso rreunionhápe ha ombaʼaposeha Betélpe oipytyvõ hag̃ua ojejapohápe rrevísta ha lívro umíva. Oleepa rire upe kuadérno, isy heʼi: “Káil ohupytypaite umi mbaʼe ohaivaʼekue”.

Ha nde, reikuaámapa mbaʼépa rehupytyse? Nemanduʼákena avave ndajaikuaaiha mbaʼépa ikatu ojehu ñandéve amo gotyove. Upévare, ojapo haguéicha Catrina ha Káil, koʼág̃a ikatu reheve, reñehaʼãvaʼerã rejapo umi mbaʼe iñimportantevéva. Ehaʼangákena apóstol Páblope, omano mboyvemi haʼe heʼivaʼekue: “Hekoitépe niko añorairõ, ipahaite peve añani, ha ndajeíri che jeroviágui” (2 Timoteo 4:7). Mbaʼéichapa nde avei ikatu rehupyty heta mbaʼe porã nde rekovépe? Pe kapítulo oúva nepytyvõta upearã.

[Taʼanga oĩva páhina 274 ha 275-pe]

Nde estádo porã hag̃ua rejapovaʼerã ehersísio, ha reñemoag̃ui hag̃ua Jehováre restudiavaʼerã Iñeʼẽ