KAPITULO 38

Kasanok a Pagbalinen a Makaparagsak ti Panagdaydayawko iti Dios?

Ni Josh, nga agtawen iti 16, ket nakailad iti katrena. Napan ni nanangna iti kuartona sa sisiserioso a kinunana: “Joshua, bumangonkan! Ammom met a gimongtayo ita!” Saksi ni Jehova ti pamilia ni Josh, ket karaman iti eskediulda ti regular nga itatabuno kadagiti Nakristianuan a gimong. Ngem kasla masadut ni Josh a makigimong.

“Nanang, talaga kadi a masapul nga umayak?” inreklamona.

“Reklamoka la a reklamo, agsukatka ketdin. Diak kayat ti maladaw manen!” kinuna ni nanangna sa timmallikuden.

“Ngem Nanang,” kinuna ni Josh bayat a di pay nakaadayo ni nanangna, “saan a gapu ta relihionyo dayta ket masapul a relihionko metten.” Ammona a nangngeg dayta ni nanangna gapu ta nadlawna a nagsarimadeng sa pimmanawen a di nagun-uni.

Medio nakonsiensia ni Josh iti naibagana. Dina kayat a masaktan ni nanangna. Ngem dina met kayat ti agpadispensar. Awan ti maaramidanna no di ti agtulnog.

Nupay masuron, nagrubbuat lattan ni Josh. Kalpasanna, indayamudomna: “Uray ta dumtengto ti panawen a siakton ti agdesision para iti bagik. Saanak a kas iti dadduma idiay Kingdom Hall. Kasla diak pay ketdi kayat ti agbalin a Kristiano!”

 NARIKNAM met kadin ti kas iti narikna ni Josh? Pasaray mapilpilitanka kadi a makipaset kadagiti Nakristianuan nga aktibidad nupay pagaayat dayta dagiti dadduma? Kas pagarigan:

● Ibilbilangmo kadi ti panagadal iti Biblia a kas kanayonan a homework?

● Saanmo kadi a kayat ti mangasaba iti binalaybalay?

● Masansan kadi a maboringka kadagiti Nakristianuan a gimong?

No wen ti sungbatmo, dika maupay. Masursurom a tagiragsaken ti agserbi iti Dios. Kitaem no kasano.

KARIT 1 Panagadal iti Biblia

No apay a saan a nalaka. Nalabit saanka a managadal. Mabalin a nalakaka laeng a masingsinga ken marigatanka a mangipamaysa iti ad-adalem. Malaksid iti dayta, nabambannogkan a nagadal idiay eskuelaan!

No apay nga aramidem. Ti Biblia ket saan laeng nga impaltiing ti Dios no di ket “makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.” (2 Timoteo 3:16) No adalem ti Biblia ken utobem dagiti nabasam, umuneg ti pannakaawatmo kadagiti bambanag a saanmo a maawatan idi. Nasken a bigbigem a saanmo a magun-od ti maysa a napateg a banag no dimo pagreggetan a gun-oden. No kayatmo ti agbalin a nalaing iti maysa nga isport, masapul a sursuruem dagiti pagannurotan ken agensayoka. No kayatmo a nasalun-atka, masapul nga agehersisioka. Umasping iti dayta, no kayatmo a maammuan ti maipapan iti Namarsua, masapul nga adalem ti Sao ti Dios.

Ti makuna dagiti padam nga agtutubo. “Idi haiskulak, adda dagiti napateg a desision a masapul nga aramidek. Adu ti kalokuan dagiti padak nga estudiante, isu a kasapulan nga agdesisionak: ‘Kasta met kadi ti kayatko nga aramiden?’  Talaga kadi a kinapudno ti isursuro kaniak dagiti dadakkelko? Masapul a siak a mismo ti mangammo iti dayta.”​—Tshedza.

“Sigsigud a patiek a ti naadalko ket kinapudno, ngem masapul a paneknekak a mismo dayta. Masapul nga agdaydayawak iti Dios gapu ta dayta ti kayatko nga aramiden, saan ket a gapu ta dayta ti kayat dagiti dadakkelko.”​—Nelisa.

No ania ti mabalinmo nga aramiden. Mangaramidka iti bukodmo a plano iti panagadal depende kadagiti paginteresam ken kasapulam. Sika ti agpili iti topiko nga adalem. Ania ti umuna nga aramidem? Nasayaat no adalem a naimbag ti Bibliam ken usigem dagiti patpatiem, nalabit babaen ti panangusarmo iti libro a kas iti Ania a Talaga ti Isursuro ti Biblia? *

No kasanom nga aramiden. Markaam iti ✔ ti abay ti dua wenno tallo a topiko iti Biblia a kayatmo nga adalen​—wenno mangisuratka iti sabali, no kayatmo.

□ Adda kadi Dios?

□ Kasano a masiguradok a dagiti nangisurat iti Biblia ket pinaltiingan ti Dios?

□  Apay a rumbeng a patiek ti panamarsua imbes a ti ebolusion?

□ Ania ti Pagarian ti Dios, ken kasano a mapaneknekak ti kaaddana?

□ Kasano a mailawlawagko ti pammatik maipapan iti kasasaad dagiti natay?

□ Apay a rumbeng a kombinsidoak nga addanto panagungar?

□ Kasano a masiguradok no ania ti pudno a relihion?

․․․․․

KARIT 2 Pannakiraman iti Ministerio

No apay a saan a nalaka. Mabalin a makapanerbios ti makisarita kadagiti sabsabali maipapan iti Biblia wenno no kaeskuelaam ti maiparna a makasabaam.

No apay nga aramidem. Imbilin ni Jesus kadagiti pasurotna: “Mangaramidkayo iti ad-adalan . . . , nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) Ngem adda dadduma pay a rason a nasken nga aramidem dayta. Ipakita dagiti panagadal nga iti dadduma a lugar, kaaduan nga agtutubo ti mamati iti Dios ken iti Biblia. Ngem dagita nga agtutubo ket awanan iti napaypayso a namnama iti masanguanan. No adalem ti Biblia, maaddaanka iti pannakaammo a birbiroken ken kasapulan dagiti padam nga agtutubo! No iranudmo dagiti patpatiem, naragragsakka, ken napatpateg pay, maparagsakmo ti puso ni Jehova.​—Proverbio 27:11.

Ti makuna dagiti padam nga agtutubo. “Nangisaganakami nga aggayyem kadagiti epektibo nga introduksion ken nasursuromi no kasano a sungbatan dagiti sumupiat ken no kasano ti agsarungkar. Ad-adda  a natagiragsakko ti ministerio idi pinagreggetak ti makipaset iti dayta.”​—Nelisa.

“Dakkel ti naitulong kaniak ti maysa a Kristiano a kabsat a babai nga in-inauna ngem siak iti innem a tawen. Ikuykuyognak iti pangasabaan ken pasaray awisennak a mammigat iti ruar. Impabasana kaniak dagiti makaparegta a teksto a nakatulong tapno agbalbaliw ti panagpampanunotko. Gapu iti nagsayaat nga ulidanna, ad-adda itan nga interesadoak a tumulong kadagiti tattao. Diak masubadan ti kinaimbagna!”​—Shontay.

No ania ti mabalinmo nga aramiden. No ipalubos dagiti dadakkelmo, mangpilika iti maysa a kakongregasionmo a natataengan ngem sika a mabalin a pakikaduaam iti ministerio. (Aramid 16:1-3) Kuna ti Biblia: “Babaen iti landok, ti met laeng landok mapatadem. Gapuna ti maysa a tao patademenna ti rupa ti sabali.” (Proverbio 27:17) Adu ti pagimbagan ti pannakikadua kadagiti natataengan nga aduanen iti kapadasan. “Talaga a makapabileg ti pannakikadua kadagiti nataengan,” kuna ni Alexis nga agtawen iti 19.

No kasanom nga aramiden. Malaksid kadagiti dadakkelmo, mangisuratka iti nagan ti kakongregasionmo a makatulong kenka iti ministerio.

․․․․․

KARIT 3 Itatabuno Kadagiti Nakristianuan a Gimong

No apay a saan a nalaka. Kalpasan ti agmalmalem a panagtugawmo iti klasem idiay eskuelaan, kasla makatuok unayen ti panagimdeng kadagiti naibatay iti Biblia a palawag iti maysa nga oras wenno nasursurok pay.

No apay nga aramidem. Idagadag ti Biblia kadagiti Kristiano: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo, ket nangnangruna a kasta bayat a makitkitayo nga umas-asidegen ti aldaw.”​—Hebreo 10:24, 25.

 Ti makuna dagiti padam nga agtutubo. “Nasken ti panagsagana sakbay dagiti gimong. No dadduma, masapul laeng a pilitem ti bagim nga agadal. No nakasaganaka, matagiragsakmo dagiti gimong gapu ta ammom dagiti mapagsasaritaan, ken mabalinmo pay ketdi ti makipartisipar.”​—Elda.

“Nadlawko nga ad-adda a makapainteres dagiti gimong no nakapagkomentoak.”​—Jessica.

No ania ti mabalinmo nga aramiden. Iwayaam ti agsagana a nasaksakbay ken agkomentoka no kabaelam. Dayta ti tumulong kenka tapno ad-adda a mariknam a karamanka iti gimong.

Kas panangyilustrar: Ania ti naragragsak​—ti panagbuya iti ay-ayam iti TV wenno ti mismo a pannakiay-ayam? Siempre,  ad-adda a makaparagsak ti agay-ayam ngem ti agbuybuya laeng. Apay a dika makipaset kadagiti gimong imbes a tumabunoka laeng?

No kasanom nga aramiden. Isuratmo no kaano a mabalinmo ti agsagana iti uray 30 minuto laeng iti kada lawas para iti maysa a gimong ti kongregasion.

․․․․․

Napaneknekan ti adu nga agtutubo a pudno ti ibagbaga ti Salmo 34:8: “Nanamenyo ken kitaenyo a ni Jehova naimbag.” Saan kadi a makapatubbog iti ngiwat uray no mapagsasaritaan laeng ti maysa a naimas a putahe? Ngem saan kadi a nasaysayaat no maramanam a mismo dayta? Kasta met laeng no iti panagdaydayaw iti Dios. Nanamem ken kitaem a mismo no kasano a makagunggona ti pannakiraman kadagiti naespirituan nga aktibidad. Kuna ti Biblia a daydiay makiramraman iti trabaho, a saan a managdengngeg laeng, ket “naragsakto iti panangaramidna iti dayta.”​—Santiago 1:25.

ITI SUMAGANAD A KAPITULO

Ammuem no kasanoka a makaipasdek kadagiti kalat ken no kasanom a ragpaten dagita.

[Footnote]

NAPAPATEG A TEKSTO

“Agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.”​—Roma 12:2.

BALAKAD

Mangitugotka iti notebook a pangisuratam kadagiti kangrunaan a punto kadagiti Nakristianuan a gimong. Saanmonto a mapupuotan ti panaglabas ti oras ken nalaklakakanto a makasursuro!

AMMOM KADI . . . ?

Saan a dakes a sukimatem dagiti narelihiosuan a patpatiem. Kinapudnona, ti panagsaludsod ken panagsukimat ket nasayaat a pamay-an tapno maammuam no pudno met laeng dagiti patpatiem maipapan iti Dios.​—Aramid 17:11.

DAGITI ARAMIDEK!

Mangyeskediulak iti ․․․․․ minuto nga agbasa iti Biblia iti kada aldaw ken mangbusbosak iti ․․․․․ iti kada lawas nga agsagana kadagiti Nakristianuan a gimong.

Tapno makapagimdengak a naimbag kadagiti Nakristianuan a gimong, masapul nga ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Apay a mabalin a makaboring para iti maysa nga agtutubo dagiti naespirituan nga aktibidad?

● Ania kadagiti tallo nga aspeto ti panagdaydayaw a nailawlawag iti daytoy a kapitulo ti kayatmo nga iyaplikar?

[Blurb iti panid 278]

Ti relihion a nakaikamengak ket saan a relihion laeng dagiti dadakkelko no di ket relihionko metten. Ni Jehova ti Diosko, ket diak kayat ti mangaramid iti aniaman a mangdadael iti relasionko kenkuana.’’​—Samantha

 [Kahon/Dagiti Ladawan iti panid 280, 281]

Nangipasdekda Kadagiti Kalat

Kuna ti Biblia: “Saanyo nga ammo no anianto ti biagyo inton bigat.” (Santiago 4:14) Iti dadduma a kasasaad, bigla lattan a dumteng ni patay uray no ubing pay ti maysa a tao. Bayat a basaem dagiti kapadasan da Catrina ken Kyle, imutektekam no kasanoda a naaddaan iti nasayaat a nagan iti imatang ni Jehova a Dios bayat ti ababa a panagbiagda babaen ti panangipasdekda ken panangragpatda kadagiti naespirituan a kalat.​—Eclesiastes 7:1.

Natay ni Catrina idi agtawen iti 18, ngem idi 13 pay laeng ti tawenna ket nangisuraten kadagiti kalatna iti biag. Karaman iti dayta ti panagserbina iti amin a tiempo, panagserbi iti lugar nga agkasapulan kadagiti mannursuro iti Biblia, ken ti pannakipagtrabahona ken ni tatangna kadagiti proyekto a panagibangon iti Kingdom Hall. Insuratna: “Indedikarkon ti biagko ken Jehova a Dios!” Kayat ni Catrina ti “agbiag maitunos kadagiti pagalagadan ti Dios, iti wagas a makaparagsak Kenkuana.” Iti palawag ti pumpon ni Catrina, isu ket nadeskribir kas “napintas nga agtutubo, a ti biagna ket naisentro iti panagserbi ken Jehova.”

  Ubing pay ni Kyle idi nasursuruan a mangipasdek kadagiti kalat. Kalpasan ti nasaem a pannakaaksidentena iti lugan a nakaigapuan ti ipapatayna idi agtawen iti 20, nabirokan dagiti kakabagianna ti maysa a notebook a nakaisuratan dagiti kalatna nga inaramidda ken nanangna idi uppat pay laeng ti tawenna. Karaman kadagiti kalatna ti panagpabautisar, panagpalawag iti Kingdom Hall, ken panagserbi iti hedkuarter dagiti Saksi ni Jehova, a sadiay a tumulongto a mangpataud kadagiti literatura a mangipakaammo kadagiti tattao iti maipapan iti Dios. Kalpasan a nabasana dagiti kalat ni Kyle a naisurat adu a tawenen ti napalabas, kinuna ni nanangna: “Rinagpatna ti tunggal maysa kadagitoy a kalat.”

Ania dagiti kalat nga impasdekmo? Saanmo nga ammo no ania ti mapasamak inton bigat. Isu nga aramidem ti amin a kabaelam tunggal aldaw. Kas kada Catrina ken Kyle, usarem ti tiempom iti kasayaatan a pamay-an aginggat’ mabalin. Tuladem ni apostol Pablo, a nangibaga idi dandanin mauyos ti biagna: “Nakirupakak iti nasayaat a dangadang, tinarayko ti tarayen agingga iti pagpatinggaan, inalagadko ti pammati.” (2 Timoteo 4:7) Tulongannaka ti sumaganad a kapitulo a mangaramid iti dayta!

[Ladawan iti panid 274, 275]

No kayatmo a nasalun-atka, masapul nga agehersisioka. No kayatmo a nasalun-atka iti naespirituan, masapul nga adalem ti Sao ti Dios