Kapitulo 39

Unsaon Nako Pagkab-ot sa Akong mga Tumong?

Hain sa mosunod ang imong gusto?

□ Dugang kompiyansa sa kaugalingon

□ Mas daghag higala

□ Mas malipayong kinabuhi

ANG tinuod, mahimo nimong mabatonan kining tulo! Sa unsang paagi? Pinaagi sa pagtakda ug pagkab-ot ug mga tumong. Tagda ang mosunod:

Dugang kompiyansa sa kaugalingon. Kon magtakda kag gagmayng tumong ug makab-ot kana, makabaton kag kompiyansa sa pagtakda ug dagkong tumong. Dili ka mahadlok sa pag-atubang sa mga problema adlaw-adlaw—sama sa pagpit-os sa isigkabatan-on.

Mas daghag higala. Ganahan kang makig-uban sa mga tawong dunay mga tumong—kinsa nahibalo kon unsay ilang gusto ug naningkamot sa pagkab-ot niana.

Mas malipayong kinabuhi. Ang kinabuhi nga walay tumong makalaay. Apan kon may mga tumong ka ug imong makab-ot kana, malipay ka kay duna kay nahimo. Andam ka na ba sa paghimog tumong? Ang mosunod nga mga sugyot makatabang nimo! *

 ✔ 1 TINOA

1. Paghunahunag posibleng mga tumong. Isulat ang tanan nimong mahunahunaan. Sulayi kon makalista kag labing menos 10 ka tumong.

2. Timbang-timbanga kini. Hain niini ang labing makapainteres o ang kinalisoran? Hain niini ang gusto nimong unahon? Hinumdomi, ang labing importante para nimo mao ang kinamaayohang tumong.

3. Unaha ang importante. Numerohi ang imong mga tumong sumala sa gusto nimong unahon pagkab-ot.

 ✔ 2 PLANOHA

Sa matag tumong nga imong gipili, buhata kini:

Isulat ang imong tumong.

 Magtuon ug sign language para makasangyaw sa mga amang

Pagtakda ug deadline. Kon dili ka magtakda ug deadline, ang imong tumong walay kapuslanan!

Hulyo 1

Pagplano kon unsay himoon.

Kon unsay himoon

1. Mopalit ug diksiyonaryo.

2. Magtuon ug napulo ka pulong matag semana.

3. Maniid kon giunsa pag-sign sa mga amang.

4. Mangutana kon husto ba ang akong pag-sign.

Pagdahom nga dunay mga babag. Dayon paghunahuna kon unsaon kini pagbuntog.

Posibleng mga babag

Walay makamaog sign language sa among lugar

Panaad. Saari ang imong kaugalingon nga maningkamot gyod ka sa pagkab-ot niini nga tumong. Dayon pirmahi kini ug butangig petsa.

Kon unsay akong himoon

Mag-download ug sign language nga mga video sa www.pr418.com.

․․․․․ ․․․․․

Pirma Petsa

 ✔ 3 LIHOK!

Sugod dayon. Pangutan-a ang imong kaugalingon, ‘Unsay akong pwedeng himoon karon aron ako nang masugdan ang akong tumong?’ Bisan pag dili pa kaayo detalyado ang imong plano, mahimo na nimo kining sugdan. Ang Bibliya nag-ingon: “Kon maghulat ka nga momaayo ang panahon, dili ka gayod makapugas ug wala kay maani.” (Ecclesiastes 11:4, Today’s English Version) Paghunahuna ug tumong nga imong mahimo karon—bisag gamay lang—ug buhata kana.

Susiha ang imong mga tumong matag adlaw. Hinumdomi kon nganong importante ang matag tumong para nimo. Susiha ang imong pag-uswag pinaagi sa pagbutang ug ✔ (o petsa) sa matag tikang nga imo nang nahimo.

Handurawa kana. Handurawa nga nakab-ot na nimo ang imong tumong ug batia ang kalipay nga may nalampos ka. Sunod, hunahunaa pag-usab ang matag tikang. Dayon handurawa nga imong gihimo ang matag tikang hangtod nga imong nakab-ot ang imong tumong. Di ba nakapalipay na nimo? Sige, pagsugod na!

[Footnote]

TEKSTO

“Ang mga plano sa kugihan mosangpot gayod sa kaayohan.”—Proverbio 21:5.

SUGYOT

Ayaw sobra ka estrikto sa pagsunod sa plano. Pailin-ilin lang samtang naningkamot ka sa pagkab-ot sa imong tumong.

NAHIBALO KA BA . . . ?

Kon mas dako ang imong tumong, mas magmalipayon ka dihang imong makab-ot kini!

UNSAY IMONG HUNAHUNA?

● Maayo bang dunganon pagkab-ot ang daghan kaayong tumong?—Filipos 1:10.

● Sa pagtakdag mga tumong, kinahanglan ba nimong planohon ang matag gutlo sa imong kinabuhi?—Filipos 4:5.

[Blurb sa panid 283]

“Laay kaayo ang kinabuhi kon walay tumong. Pero kon duna kay tumong ug imo kining makab-ot, malipay gyod ka.”—Reed

[Kahon/Hulagway sa panid 283]

Sampol nga mga Tumong

Panaghigalaay Makighigala sa dili nako kaedad. Makigsuod pag-usab sa daang mga higala.

Panglawas Mag-ehersisyog mga 90 ka minutos kada semana. Matulog ug walo ka oras kada gabii.

Eskuylahan Patas-on ang akong grado sa math. Dili magpaimpluwensiya sa ubang estudyante sa paghimog daotan.

Espirituwalidad Magbasag Bibliya 15 minutos kada adlaw. Sangyawan ang akong klasmet niining semanaha.

[Hulagway sa panid 284, 285]

Ang mga tumong samag plano sa usa ka bilding—kon dili ka molihok, wala kay malampos