KAPITULO 39

Kasanok a Maragpat Dagiti Kalatko?

Ania kadagiti sumaganad ti kayatmo a maadda kenka?

□ Dakdakkel a kompiansa

□ Ad-adu a gagayyem

□ Agbalin a naragragsak

KINAPUDNONA, mabalin a maadda kenka dagita a tallo! Kasano? Babaen ti panangipasdekmo kadagiti kalat ken panangragpatmo kadagita. Usigem dagiti sumaganad:

Dakdakkel a kompiansa. No mangipasdekka kadagiti babassit a kalat ken ragpatem dagita, dakdakkelto ti kompiansam a mangipasdek kadagiti daddadakkel a kalat. Naturturedkanto pay a mangsango kadagiti karit iti inaldaw​—kas iti panangsaranget iti impluensia dagiti kapatadam.

Ad-adu a gagayyem. Magustuan dagiti tattao ti makikadua kadagidiay addaan iti kalat​—dagidiay ammoda ti kayatda ken sisasaganada a mangragpat kadagita.

Agbalin a naragragsak. Aklonentayo: Saanka unay a naragsak no awan ti ar-aramidem wenno no ur-urayem lattan nga adda mapasamak iti biagmo. Ngem no adda kalatmo ket ragragpatem dayta, naragragsakka gapu ta mariknam nga adda magapgapuanam. Nakasaganaka kadin? Makatulong kenka dagiti sumaganad a panid! *

 ✔ 1 AMMUEM

1. Mangpanunotka kadagiti kalat a ragpatem. Makaparagsak nga aramiden daytoy! Basta isuratmo laeng ti amin a mapanunotmo, uray saanmo pay laeng a panunoten a naimbag. Kitaem no makailistaka iti di kumurang a 10.

2. Tingitingem dagiti insuratmo. Ania kadagita ti magustuam unay? Ania ti karirigatan? Ania kadagita ti maipagpannakkelmo unay a ragpaten? Laglagipem a dagiti kasayaatan a kalat ket masansan a dagidiay kapatgan kenka.

3. Ikeddengmo no ania ti ipangpangrunam. Numeruam no ania dagiti kalat a kayatmo nga umun-una a ragpaten.

 ✔ 2 AGPLANO

Iti tunggal kalat a napilim, aramidem dagiti sumaganad:

Isuratmo dagiti kalatmo.

 Agsursuroak iti sign language tapno makasabaak dagiti umel ken tuleng

Ikeddengmo no kaano ti rumbeng a pannakaragpatna. Ti ngamin kalat nga awan ti tiempo a pannakaragpatna ket arapaap laeng!

Hulio 1

Planuem dagiti aramidem.

Dagiti aramidek

1. Gumatangak iti diksionario.

2. Linawas nga agsursuroak iti 10 a baro a senias.

3. Paliiwek no kasano nga agkokomunikar dagiti umel ken tuleng.

4. Agsaludsodak no husto met laeng ti panagseniasko.

Ammuem dagiti posible a lapped. Kalpasanna, panunotem no kasanom a mapagballigian dagita.

Posible a lapped

Awan ti kalugarak a makaammo iti sign language

Pabilgem ti determinasionmo. Ikarim iti bagim nga aramidem ti amin a kabaelam tapno maragpatmo ti kalatmo. Pirmaam ken petsaam.

Ti mabalinko nga aramiden

I-download-ko dagiti video iti sign language manipud iti www.pr418.com.

․․․․․ ․․․․․

Pirma Petsa

 3 AGTIGNAY!

Rugiam a dagus. Isaludsodmo iti bagim, ‘Ania ti mabalinko nga aramiden ita tapno marugiakon a ragpaten ti kalatko?’ Nupay saanmo a maiplano ti tunggal detalye ti aramidem, saan a dayta ti makalapped kenka. Kas kuna ti Biblia, “no ur-urayem a sumayaat ti angin ken panawen, awan a pulos ti maimulam ket awanto met ti apitem.” (Eclesiastes 11:4, Ti Baro a Naimbag a Damag Biblia) Mangpanunotka iti aramidem ita​—uray no bassit laeng​—ket itungpalmo dayta.

Inaldaw a kitaem no adda naaramidam. Laglagipem no apay a napateg kenka ti tunggal maysa kadagiti kalatmo. Tapno makitam ti maar-aramidam, ikkam iti ✔ (wenno isuratmo ti petsa ti pannakalpasmo) iti abay ti tunggal inlistam nga aramiden apaman a maibanagmon dagita.

Usarem ti imahinasionmo. Ipapanmo a naragpatmon ti kalatmo. Saan kadi a naragsakka ta adda naaramidam? Sumaganad, sublianam ti napalabas ket iladawam iti panunotmo ti tunggal maysa kadagiti aramidem. Kamaudiananna, ipapanmon a mairingringpasmon ti tunggal maysa kadagita, ken panunotem no kasano ti karagsakmo no naragpatmon ti kalatmo. Agtignayka ngaruden!

[Footnote]

NAPAPATEG A TEKSTO

“Dagiti gakat daydiay nasaet sigurado a mangipaay iti pagsayaatan.”​—Proverbio 21:5.

BALAKAD

Dimo panunoten a saanmo a mabalin a baliwan ti planom. Mabalinmo a baliwan dagita bayat a ragragpatem dagiti kalatmo.

AMMOM KADI . . . ?

No dakdakkel ti kalatmo, dakdakkel met ti pannakapnek a mariknam apaman a maragpatmo dayta!

ANIA TI MAKUNAM?

● Mabalinmo kadi a paggigiddanen ti adu unay a kalat?​—Filipos 1:10.

● Ti kadi panangaramid kadagiti kalat kaipapananna a planuem ti tunggal minuto ti biagmo?​—Filipos 4:5.

[Blurb iti panid 283]

Nalakaka a maupay no awan ti namnamaem wenno nakaipamaysaan ti panunotmo. Ngem no mangaramidka kadagiti kalat ken ragpatem dagita, naragragsakkanto.’’​—Reed

[Kahon/Ladawan iti panid 283]

Dagiti Pagarigan a Kalat

Pannakigayyem Makigayyemak iti saanko a kaedad. Makisinningedak manen iti nabayagen a gayyem.

Salun-at Agehersisioak iti di kumurang a 90 minuto iti kada lawas. Rinabii a maturogak iti walo nga oras.

Eskuelaan Ngumato ti gradok iti Math. Agtalinaedak a natibker no adda mangsulisog kaniak.

Espiritualidad Agbasaak iti Biblia iti 15 minuto kada aldaw. Iranudko dagiti patpatiek iti maysa a kaklasek ita a lawas.

[Ladawan iti panid 284, 285]

Dagiti kalat ket mayarig iti plano​—nasken nga aramidem tapno pumaysoda