Kif Nistaʼ Nilħaq il-Miri Tiegħi?
KAPITLU 39
Kif Nistaʼ Nilħaq il-Miri Tiegħi?
Liema minn dawn li ġejjin tixtieq li jkollok?
□ Iktar fiduċja fik innifsek
□ Iktar ħbieb
□ Iktar ferħ
IL-VERITÀ hi li jistaʼ jkollok it-tlieta li huma! Kif? Billi tagħmel miri u tilħaqhom. Ikkunsidra dan li ġej:
Iktar fiduċja fik innifsek. Meta tagħmel miri żgħar u tilħaqhom, se tħossok kunfidenti biex tagħmel miri akbar. Ukoll, se tħossok iktar kunfidenti meta tiffaċċja l-isfidi taʼ kuljum—bħal pereżempju li tirreżisti l-pressjoni minn dawk tamparek.
Iktar ħbieb. In-nies jieħdu pjaċir iqattgħu ħin maʼ wħud li jagħmlu miri raġunevoli għalihom infushom—uħud li jkunu jafu xi jridu u jkunu lesti li jaħdmu biex jilħqu l-miri.
Iktar ferħ. Ejja ngħiduha kif inhi: Huwa tedjanti li ma tagħmel xejn jew li tistenna li tiġri xi ħaġa f’ħajtek. Mill-banda l-oħra, meta tagħmel miri u tilħaqhom, tħoss li tkun qed twettaq xi ħaġa. Lest biex tibda? Il-paġni li ġejjin se jkunu t’għajnuna! *
✔ 1 IDENTIFIKA
1. Aħseb dwar liema miri tistaʼ tagħmel. Agħmel dan il-pass wieħed pjaċevoli. Toqgħodx taħseb iżżejjed; sempliċement aqbad u ikteb il-miri kollha li jiġuk f’moħħok. Ara jekk tistax taħseb f’minn tal-inqas 10 miri li tistaʼ tagħmel.
2. Ara x’inhuma l-miri tiegħek. Liema jidhru l-iktar eċċitanti? Liema huma l-iktar taʼ sfida? Dwar liema minnhom kieku tħossok tassew kburi li tkun ilħaqt? Tinsiex, l-aqwa miri huma dawk li jfissru l-iktar għalik.
3. Agħmel prijoritajiet. Innumera l-miri skont liema tixtieq tilħaq l-ewwel.
✔ 2 IPPJANA
Għal kull mira li għażilt, agħmel dan li ġej:
Ikteb il-mira tiegħek.
Nitgħallem lingwa barranija biex inkabbar il-ministeru
Agħżel data meta għandek tilħaq il-mira. Wara kollox, mira mingħajr data meta għandek tilħaqha tibqaʼ sempliċi ħolma!
L-1 taʼ Lulju
Ippjana l-passi involuti.
X’nistaʼ nagħmel?
1. Nibda nuża dizzjunarju.
2. Nitgħallem għaxar kelmiet ġodda kull ġimgħa.
3. Nismaʼ lil ħaddieħor jitkellem b’din il-lingwa.
4. Nitlob lil xi ħadd jiċċekkjali l-grammatika u jara jekk inkunx qed nippronunzja l-kliem sew.
Ipprova ara minn qabel x’jistgħu jkunu l-ostakli. Imbagħad, aħseb dwar kif tistaʼ tegħlibhom.
X’jistgħu jkunu l-ostakli?
Ma naf lil ħadd li jitkellem b’din il-lingwa.
Stinka bis-serjetà. Kun determinat li tagħmel l-almu tiegħek biex tilħaq din il-mira. Iffirma u ikteb id-data.
Kif nistaʼ negħlibhom?
Inniżżel rekordings bl-awdjo f’din il-lingwa mill-websajt www.pr418.com.
․․․․․ ․․․․․
Firma Data
✔ 3 AĠIXXI!
Aqbad u ibda. Staqsi lilek innifsek, ‘X’nistaʼ nagħmel illum biex nibda nirsisti ħalli nilħaq il-mira tiegħi?’ Veru, forsi għadek ma ħsibtx f’kull dettall, imma tħallix dan iżommok lura milli tibda. Bħalma tgħid il-Bibbja, “jekk tistenna sakemm ir-riħ u t-temp ikunu eżatt kif tridhom, qatt m’int se tiżraʼ jew taħsad x’ħaġa.” (Ekkleżjasti 11:4, Today’s English Version) Sib xi ħaġa li tistaʼ tagħmel illum—anki jekk tkun xi ħaġa żgħira—u aqbad u agħmilha.
Irrivedi l-miri tiegħek kuljum. Fakkar lilek innifsek għala kull mira hi importanti għalik. Ara xi progress tkun għamilt billi tagħmel ✔ ħdejn kull mira hekk kif tkun ilħaqtha (jew ikteb id-data taʼ meta tkun ilħaqtha).
Uża l-immaġinazzjoni tiegħek. Immaġina li lħaqt il-mira tiegħek. Ma tħossx sens taʼ sodisfazzjon? Issa żomm f’moħħok kull waħda mill-miri tiegħek u immaġinak twettaqhom. Ara kemm se tħossok ferħan! Mela stinka biex tilħaqhom!
[Nota ta’ taħt]
^ par. 10 Dawn is-suġġerimenti japplikaw l-iktar għal miri li tistaʼ tilħaq fi ftit ġimgħat jew xhur, imma l-prinċipji jistgħu japplikaw ukoll għal miri li jieħdu iktar żmien biex jintlaħqu.
SKRITTURA PRINĊIPALI
“Il-pjanijiet tal-ħabrieki żgur li jkunu taʼ vantaġġ għalih.”—Proverbji 21:5.
SUĠĠERIMENT
Toqgħodx tinkwieta jekk ma żżommx bl-eżatt mal-pjan. Kun flessibbli u agħmel aġġustamenti int u taħdem biex tilħaq il-mira tiegħek.
KONT TAF . . . ?
Iktar ma tkun kbira l-mira, iktar se jkun kbir is-sodisfazzjon li tħoss meta tilħaqha!
INT X’TAĦSEB?
● Huwa possibbli li jkollok ħafna miri f’daqqa?—Filippin 1:10.
● Il-fatt li tagħmel miri jfisser li tippjana kull minuta taʼ ħajtek?—Filippin 4:5.
[Kumment f’paġna 283]
“Huwa faċli li tibda tħossok skuraġġit jekk ma jkollokx xi ħaġa fuqiex tiffoka jew lejn xiex tħares ’il quddiem. Imma meta tagħmel miri u tilħaqhom, tħossok tajjeb dwarek innifsek.”—Reed.
[Kaxxa/Stampa f’paġna 283]
Eżempji taʼ Xi Miri
Il-Ħbiberija Nagħmel ħbieb maʼ xi ħadd li mhuwiex tampari. Nerġaʼ nsaħħaħ il-ħbiberija maʼ xi ħbieb antiki.
Is-Saħħa Nagħmel minn tal-inqas siegħa u nofs eżerċizzju kull ġimgħa. Norqod tmien sigħat kull lejl.
L-Iskola Intejjeb il-marki tiegħi fil-matematika. Nirreżisti l-pressjoni li jagħmluli studenti oħrajn biex nagħmel affarijiet ħżiena.
L-Ispiritwalità Nagħmel kwarta kuljum naqra l-Bibbja. Matul din il-ġimgħa se naqsam it-twemmin tiegħi maʼ xi ħadd minn sħabi tal-klassi.
[Stampa f’paġni 284, 285]
Il-miri huma bħal pjanti taʼ perit—jeħtieġ ix-xogħol biex isiru realtà!