SURA YA 39

Ninaweza Kufikia Miradi Yangu Jinsi Gani?

Kati ya mambo yaliyoorodheshwa hapa chini ni mambo gani ambayo ungependa kutimiza?

□ Kujiamini zaidi

□ Kuwa na marafiki zaidi

□ Kuwa na furaha zaidi

KWA kweli, unaweza kuwa na yote matatu! Jinsi gani? Kwa kuweka na kufikia miradi. Fikiria yafuatayo:

Kujiamini zaidi. Unapojiwekea miradi midogo-midogo na kuifikia, utajiamini na kujiwekea miradi mingine mikubwa zaidi. Pia utajiamini zaidi unaposhughulika na magumu ya kila siku—kama vile kusimama imara unaposhinikizwa na vijana wenzako.

Kuwa na marafiki zaidi. Watu hufurahia kuwa pamoja na wale wanaojiwekea miradi inayofaa—wale wanaojua kile wanachotaka maishani na wako tayari kukitolea jasho.

Kuwa na furaha zaidi. Ukweli wa mambo ni: Kutokuwa na jambo la kufanya au kusubiri jambo fulani litendeke maishani hakumfanyi mtu awe na furaha. Kwa upande mwingine, unapojiwekea miradi na kuifikia, unahisi kuwa umetimiza jambo fulani. Basi sasa, uko tayari kuanza? Kurasa zinazofuata zitakusaidia! *

 ✔ 1 TAMBUA

1. Fikiria miradi unayoweza kujiwekea. Furahia hatua hii! Usichanganue, andika tu mambo mengi kadiri unavyoweza kuwazia. Ona ikiwa unaweza kuandika angalau mambo 10.

2. Changanua mambo uliyoandika. Ni mambo gani yanayokusisimua zaidi? Ni mambo gani yaliyo magumu kutimiza? Ni mambo gani utafurahia zaidi kutimiza? Kumbuka, miradi bora zaidi ni ile iliyo muhimu zaidi kwako.

3. Panga mambo ya kutanguliza. Andika nambari kando ya miradi yako kulingana na jinsi ungependa kuifikia.

 ✔ 2 MIKAKATI

Kwa kila mradi ambao umechagua, fanya mambo yafuatayo:

Andika mradi wako.

 Kujifunza Kihispania kwa ajili ya safari yangu ya kwenda Mexico

Weka wakati hususa wa kufikia mradi huo. Mradi pasipo wakati hususa wa kuufikia, ni ndoto tu!

Julai (Mwezi wa 7) 1

Panga hatua zinazohusika.

Hatua

1. Kununua kamusi.

2. Kujifunza maneno kumi mapya kila juma.

3. Kusikiliza watu wengine wanapozungumza Kihispania.

4. Kumwomba mtu mwingine ahakikishe ikiwa sarufi na matamshi yangu yako sawa.

Tazamia magumu. Fikiria jinsi utakavyoyakabili.

Magumu yanayotazamiwa

Hakuna mtu anayezungumza Kihispania karibu nami

Azimia. Azimia kufanya yote uwezayo ili kuufikia mradi huo. Sasa tia sahihi na uandike tarehe.

Jinsi ninavyoweza kuyakabili

Kupakua rekodi za Kihispania kwenye Tovuti ya www.pr418.com.

․․․․․ ․․․․․

Sahihi Tarehe

 ✔ 3 CHUKUA HATUA!

Anza mara moja. Jiulize, ‘Ninaweza kufanya nini leo ili niufikie mradi wangu?’ Huenda hujapanga kila hatua unayopaswa kuchukua, lakini usiruhusu hilo likuzuie kuanza. Kama vile Biblia inavyosema, ‘ukingoja upepo hutapanda mbegu, ukisubiri mawingu yatoweke, hutavuna kitu.’ (Mhubiri 11:4, Biblia Habari Njema) Tafuta jambo la kufanya leo, na ulifanye—hata kama ni jambo dogo.

Changanua miradi yako kila siku. Jikumbushe kwa nini kila mradi ni muhimu sana kwako. Changanua maendeleo ambayo umefanya kwa kuweka ✔ (au tarehe uliyotimiza) kando ya kila hatua baada ya kuitimiza.

Piga picha akilini. Wazia wakati ambapo utakuwa umeufikia mradi wako. Wazia utakavyoridhika. Kisha, wazia akilini hatua mbalimbali, moja baada ya nyingine, zinazohitajika ili kuufikia mradi wako. Halafu, jiwazie ukitimiza kila moja ya hatua hizo, na uwazie jinsi utakavyohisi baada ya kufikia mradi wako. Sasa anza kuufanyia kazi!

[Maelezo ya Chini]

ANDIKO MUHIMU

“Mipango ya mwenye bidii bila shaka huleta faida.”—Methali 21:5.

PENDEKEZO

Usishikilie mambo sana. Uwe tayari kubadilika, na ufanye marekebisho yanayohitajika ili kufikia mradi wako.

JE, WAJUA . . . ?

Kadiri mradi ulivyo mkubwa ndivyo utakavyopata uradhi zaidi unapoufikia!

UNA MAONI GANI?

● Inawezekana kuwa na miradi mingi kwa wakati mmoja?—Wafilipi 1:10.

● Je, kujiwekea miradi kunamaanisha kwamba unapangia kila dakika ya maisha yako?—Wafilipi 4:5.

[Blabu katika ukurasa wa 283]

“Ni rahisi kuvunjika moyo ikiwa huna jambo unalokazia fikira au unalotazamia. Lakini unapoweka na kufikia miradi, unahisi ukiwa na furaha.”—Reed

[Sanduku/​Picha katika ukurasa wa 283]

Mifano ya Miradi

Urafiki Kuanzisha urafiki na mtu ambaye si wa rika langu. Kufufua urafiki uliovunjika.

Afya Kufanya mazoezi kwa angalau dakika 90 kila juma. Kulala saa nane kila usiku.

Shule Kuwa na alama za juu zaidi katika somo la hesabu. Kusimama imara ninaposhinikizwa na wanafunzi wenzangu kufanya yaliyo mabaya.

Hali ya kiroho Kusoma Biblia kwa dakika 15 kila siku. Kumweleza mwanafunzi mwenzangu kuhusu imani yangu juma hili.

[Picha katika ukurasa wa 284, 285]

Miradi ni kama ramani ya ujenzi​—jitihada zinahitajika ili kukamilisha ujenzi wenyewe